Musa athaarima antû ba Isiraeri
33
1 Gîkî i kîo kîthaarimo kîra Musa mûruti ngûgî wa Ngai athaarimire antû ba Isiraeri mbere akua. Auga:2 “Mwathani aagûrûkire kuuma kîrîmaani gîa Sinai
auma ta bûra riûa riumaga Seiri,
aayica arî kîrîmaani gîa Parani
aaya na magiri ma araîka
na rûmonjo rwa mwanki njara ya ûrîo.a
3 Na mma Mwathani n'wendeete antû baaku,
atheru baaku bonthe barî njaraani ciaku.
Bathiingataga makinya maaku
na bakathiingata mataaro maaku.
4 Musa n'atûneenkeere watho,
na i ru rûgai rwa mwingî wa Njakubu,
5 Mwathani n'atuîkire mûnene wa antû ba Isiraeri
rîra atongoria ba antû baakomanire
amwe na mîîrîga ya Isiraeri.”
6 Musa auga ûûgû îgûrû rîa mwîrîga wa Rubeni;
“Mwîrîga wa Rubeni ûrootûûra ûtakûthira,
wana wegua antû baau bakeegua barî baakai.”
7 Musa auga ûûgû îgûrû rîa mwîrîga wa Njunda;
“Itû Mwathani îgua kîrîro kîa Njunda
ûbacookie kîrî antû baao kaîrî.
Baneenkere inya na ûbarwîrîîre
bateethie kuumania na anthû baao!”
8 Musa auga ûûgû îgûrû rîa mwîrîga wa Rawi;
“Mwathani nûnenkanîrîîte Urimu na Thumimu kîrî mwîtîgua gwaku,
Nwabagereerie Masa
na wabathimîra Meriba.
9 Arawi i baathîkîîre kiugo gîaku
na baarûûngamîîra kîrîîkanîro gîaku.
Ibaanenkanîîre kaanya ka mbere kîrî woû
nkûrûki ya bûra baarî kîrî aciari, ndûgû ciao kana aana baao.
10 Îîndî tiga barutane Njakubu watho bwaku,
Baneenkere antû ba Isiraeri mataaro maaku.
Bagakûbîîthîria macoco
na barute kîgongwana kîra kîbîîthagua kîthînjîrooni.
11 Thaarima Arawi, itû Mwathani,
na wîtîgîîrie ngûgî cionthe cia njara ciao.
Una tuuna twa anthû baao,
ûbathirie bûra batakîûmba gûûkîîra kaîrî.”
12 Musa auga ûûgû îgûrû rîa mwîrîga wa Benjameni,
“Antû ba Benjameni i beendeetwe i Mwathani,
na batûûraga na ûkiri.
Akaraga abathiûrûkîrîîte rîonthe
na akabarigîîria kuumania na moothûûku monthe.”
13 Musa auga ûûgû îgûrû rîa mwîrîga wa Njosebu:
“Nthîgûrû yao îroothaarimwa i Mwathani
na kîewa kîa mbura kuuma îgûrû
na rûûyî kuuma ruungu rwa nthîgûrû.
14 Abathaarime na bira biega biiyaga kagiita ka riûa,
na bira bithongi kuumania na mweri.
15 Irîma biao bia tene biûyûre imera biithongi
na tûrîma twao twa ntwîre tûthiîkwe i maketha.
16 Nthîgûrû yao îroûyûra into bira biega bionthe,
na kîao kîa Mwathani ûra aarî gakandooni kara kaabîîyaga.
Ithaarimo bibi birootûûra kîrî Njosebu,
we ûra aarî mûtongoria gatîgatî ka aruagina.
17 Njosebu arî na inya ta ncamba îra icierwe îrî ya mbere,
inya yake i ta ya ngoci cia mbogo.
I cio agaatûûnga nacio mîgongo ya kûûraaya,
amîtiindîke mwanka mîthia ya nthîgûrû.
Gîkî i kîo kîthaarimo gîakwa kîrî mwingî wa Eburaimu,
na kinya kîrî magiri ma antû ba Manase.”
18 Musa auga ûûgû îgûrû rîa mîîrîga ya Seburuni na Isakaari,
“Antû ba Seburuni baroona baita biacaaraani ciao cia rûgongo rwa îria.
Ûtonga bwa Isakaari bûroingîa mîciî yao.
19 Bageetaga mîgongo kîrîmaani kîao
kûrutîra igongwana bia wagîru noogo.
Bagateethekaga n'ûtonga bwa îria
na ûtonga bûra bwithîîtwe mûthangaani.”
20 Musa auga ûûgû îgûrû rîa mwîrîga wa Ngandi,
“Ngai ûra athagayagia Ngandi arookumua!
Ngandi eethuuranîrîîte ta cimba
agiita njara kana kîongo.
21 Antû ba Ngandi i beegwatîîre nthîgûrû îra nthoongi,
baanenkerwa îgai rîa mûtongoria.
Rîra atongoria ba antû ba Isiraeri baûnganîîte,
i baathîkîîre mawatho ma Mwathani kîrî bo
na baathiingata mawatho ma Mwathani bûra kûbatîîrue kûringana na kwenda gwake.”
22 Musa auga ûûgû îgûrû rîa Mwîrîga wa Ndani,
“Ndani i kaunga ga cimba,
kathûngûthîîte kuuma Mbasani.”
23 Musa auga ûûgû îgûrû rîa Mwîrîga wa Nabutarî,
“Mwathani nabwîgîîtue kîao mûno
abûnenkera ithaarimo biingî mûno.
Ûroîgwatîra kuuma mbarî ya iti mwanka îriani rîa Gariiri.”b
24 Musa auga ûûgû îgûrû rîa mwîrîga wa Aseri,
“Aseri aroothaarimwa nkûrûki ya aana bara bangî bonthe,
aroonenkerwa gîtîîyo n'aruagina,
na akathaambaga mbayo na maguta ma mîceituuni.
25 Taûni ciake iroingagwa na mîrîîgo ya cuuma.
Agatûûraga Rîonthe maayîîga.”
26 “Gûtirî ngai ûngî ta Ngai wa Isiraeri.
Atûmagîra matu ta nkaarî cia mbaraathi kûûya gûgûteethia,
akagiitania îgûrû amatwete aaya kûbûteethia.
27 Mwathani ûra atûûraga tene na tene n'we wîbitho bwenu,
na njara ciake n'itûgwatîîrîte.
Atugutagia anthû bara barî mbere yaku
na n'we augagîîria, ‘Bathirie.’
28 Kwoogu Isiraeri bagaatûûra maayîîga,
nciarwa cia Njakubu bagaatûûra barî bonka,
nthîgûrû yûûyûri irio na ndibei
îgûrû narîo rîgeetûûraga maame.
29 Ka bûthaarimîîtwe na inya ata Isiraeri!
N'ûû ûngî akari ta biû,
biû antû boonokeetue i Mwathani?
Nwe rong'o yenu ya kûbûrigîîria
na rûûyiû rwenu rwa kûûmbana.
Anthû beenu bakeegwîthia nthî bakîbûkayîra bûbeegîîrua kîao,
naabi bûkaaranga mîgongo yao.”