Musa aakua
34
1 Rîru Musa aathi mwanka kîrîmaani kîa Nebo aumîîte mwaranthî wa Moabu. Aatwa kathûmbîri kara geetagwa Pisiga kara karaitheene na Njeriko. Mwathani amwonia nthîgûrû yonthe kuuma Ngiriandi kûthi Ndani. 2 Amwonia nthîgûrû yonthe ya Nabutarî, ya Eburaimu na ya Manase, na nthîgûrû yonthe ya Njunda, îra îthiîte mwanka îria rîa Menditarîniani. 3 Amwonia Negebu; nthîgûrû îmbaranîru kîbondeeni kîa Njorondani kûthi bwa Njeriko, ntûûra ya mîkîndû, na kûthi mwanka Soari. 4 Rîru Mwathani eera Musa, “Îno n'yo nthîgûrû îra ndaathiîtiirie ndeera Îburaîmu, Isaka na Njakubu nkamînenkanîra kîrî nciarwa ciao. Ngûgwîtîgîîria ûmiona na meetho maaku, îndî ntigwîtîgîîria ûthûûngîra ku.”5 Kwoogu Musa, mûruti ngûgî wa Mwathani akuîra naagu nthîgûrû ya Moabu wa ta bûra Mwathani augîîte. 6 Mwathani amûthika kîbondeeni kîa Moabu akubî na Bethi-Peori. Îndî mwanka îmunthî gûtirî we wiyî ara oongwa nthiko ya Musa îrî. 7 Musa aarî na ûkûrû bwa mîanka îgana rîa mîrongo îîrî agîkua. Îndî wana agîkua mwîrî wake warî na inya na meetho maake mataarî thîîna. 8 Antû ba Isiraeri baarîrîra Musa nthîgûrû îmbaranîru ya Moabu ntugû mîrongo îthatû, rîru ntugû cia kûrîrîra Musa ciathira.
9 Njosua mwana wa Nuni naûyûrirwe i ûûgî n'ûntû Musa n'arî akûmwaigîîra njara na amûthuura arî muntû ûra akaathana nyuma yake. Antû ba Isiraeri i baathîkîîre Njosua na baarûtha mantû monthe mara Mwathani aathîîte Musa.
10 Gûtaaro kûgîa na kîroria kîngî Isiraeri ta Musa ûra baiyeene na Mwathani ûthiû kwa ûthiû. 11 Mwathani n'we aatûmîîte Musa ariinga biama na arûtha magegania nthîgûrû ya Miisiri kîrî Faraû na aruti ngûgî baake na kîrî nthîgûrû yonthe. 12 Mwathani aarûthire mantû mamu manene na ma kûmakania mbere ya antû ba Isiraeri, gûkûrûkîîra Musa.