Ithaarimo nyuma ya gûcookera Mwathani
30
1 Musa aathi na mbere kwîra aana ba Isiraeri, “Nwa wîgue rîra mantû mama monthe makaabûûyîîra, ithaarimo na irumi bira mbandîkîîte, na bûgeeciiria îgûrû rîamo bûrî mîgongooni îra Mwathani akaabûnyagaarîria, 2 wegua îgiita rîru bûgaacookeera Mwathani Ngai wenu, biû na aana beenu na bwanjîîrie kwathîkîra maathana mara nkûbûnenkera îmunthî na nkoro cienu cionthe, 3 rîru Mwathani akabûcookeria mabua meenu kaîrî. Akabwîgîîrua kîao na abwîthîranie kaîrî kuuma mîgongooni îra akeegua abûnyagaarîîtie. 4 Wana wegua bûrî mîthiani ya nthîgûrû, Mwathani Ngai wenu akaathi, akabûceria abwîthîranie na abûcookie. 5 Akabûcookia nthîgûrû îra yarî ya biûyûûyû bienu na îgaatuîka yenu kaîrî. Agaatûma mabua meenu maingîa na bûthagaya nkûrûki ya biûyûûyû bienu.6 “Mwathani akaatheria nkoro cienu na nkoro cia nciarwa cienu, bûra bûkaamwenda na nkoro cienu cionthe na mîoyo yenu yonthe, kaingo bûtûûra mwoyo. 7 Mwathani Ngai wenu akaira irumi bibi bionthe kîrî anthû beenu bara babûmeneete na babûnyamaaragia. 8 Rîru bûkaathîkîra Mwathani kaîrî na bûthiingate maathana mara nkûbûnenkera îmunthî. 9 Mwathani Ngai wenu agaatûma bûûmbana mûno mantûûni monthe mara bûkaarûtha. Akabûnenkera aana baingî na nyamû cia ndîîthia inyiingî na mînda yenu îgaaciara maketha maingî n'ûntû Mwathani agaakeneera kûbûrûthîra mantû meega wa ta bûra akeenagîîra biûyûûyû bienu. 10 Mwathani Ngai wenu akabûkeneera wegua bûkaathîkîra mûgambo wake na bûthiingate maathana na mawatho mara maandîkîîtwe îbukuuni rîrî rîa Watho, na wegua bûkaagarûkîra Mwathani Ngai wenu na nkoro na mîoyo yenu yonthe.
Mwoyo kana gîkuû
11 “Yathana rîra nkûbûnenkera îmunthî ti rîûmo gûciûkîrwa kana kûrîkinyîra. 12 Rîtirî îgûrû matuuni, kûûraaya mûno, bûra bûûmba kûûria, ‘N'ûû akaathi îgûrû atûtûûgûrûkîrie rîo kaingo tûrîîgua na tûrîathîkîra?’ 13 Na rîtirî rûgongo rwa îria, kûûraaya mûno, bûra bûûmba kûûria, ‘N'ûû akaariinga îria atûreetere rîo kaingo tûrîîgua na tûrîathîkîra?’ 14 Kiugo kîrî aakubî naabi; kîrî kanyuani gaaku na nkorooni yaku, kaingo ûkîathîkîra.
15 “Tathikîîriani. Îmunthî inkûbûnenkera mwanya wa kûthuura, wegua i mwoyo na wega, kana i gîkuû na kînyamaara. 16 Îmunthî ndabwatha bwende Mwathani Ngai wenu, bûthi na njîra ciake na bûthiingate maathana, mawatho na ûrutani bwake. Bwarûtha ûgu, bûgaatûûra mwoyo na bûgaatuîka mûgongo ûmûnene, na Mwathani Ngai wenu akabûthaarima bûrî nthîgûrû îra bûthiîte kûthûngîra bûtûûra. 17 Îndî wona bwarega kûthikîîria maathana mama, bwarega kwathîka, bwakuuyua bwatûmîkîra na bwagonga ngai ciingî, 18 ga nkûbwîra îmunthî na mma atî bûkaathirua. Bûtiîgua bûrî na ûtûûro bwega na bûûraaya nthîgûrû îra bûthiîte kûringa Njorondani bûthûûngîra na bwîgwatîra yoo.
19 “Îmunthî nkûbûnenkera mwanya wa kûthuura gatîgatî ka mwoyo na gîkuû, gatîgatî ka ithaarimo na irumi. I ngwîta îgûrû na nthî bituîka akûûyî ba îtua rîra bûgaatua. Thuuraani mwoyo kaingo biû na nciarwa cienu bûtûûra mwoyo! 20 Îthuuraani kwenda Mwathani Ngai wenu na kûmwathîkîra na kwîneenkanîra kîrî we, n'ûntû n'we ûtûûro bwenu. Bwarûtha ûgu bûkeegua bûrî na îgiita rîîraaya rîa gûtûûra nthîgûrû îra ndaathiîtiirie kûnenkera biûyûûyû bienu, Îburaîmu, Isaka na Njakubu.”