Kîrîîkanîro kîa Mwathani na antû ba Isiraeri barî nthîgûrû ya Moabu
29
1 Bibi i biugo bia kîrîîkanîro kîra Mwathani eerire Musa arûthe na antû ba Isiraeri barî nthîgûrû ya Moabu amwe na kîrîîkanîro kîra aarûthire nabo barî kîrîmaani kîa Orebu.a2 Musa eethîrania antû ba Isiraeri abeera,
“I bweboneere na meetho meenu mantû monthe mara Mwathani aarûthire Miisiri kîrî Faraû, aruti ngûgî baake na nthîgûrû yake yonthe. 3 I bwonire na meetho meenu magerio maanene, biama bia inya na magegania. 4 Îndî amwe na ûgu, wana îmunthî tûrî Mwathani atibûneenkereete mathûgaania ma gûciûkîrwa, meetho makwona kana matû ma kwîgua. 5 Îgiita rîra rîonthe rîa mîanka mîrongo îna îra mbûtongoreetie rwanda, nguo cienu itaateembûkaanga kana iraatû bienu bithira. 6 Bûtoona mîgaate, ndibei kana biakûnyua biirûru, îndî Mwathani we n'abûneenkeere irio kaingo bûmenya we i Mwathani Ngai wenu. 7 Tûgûkinya aaga, mûnene Sioni wa Esiboni na Ogu wa Mbasani i baumîîre barûa naati, îndî twabacinda. 8 Twathûkia nthîgûrû yao twagaîra mîîrîga ya Rubeni na Ngandi na nucu ya mwîrîga wa Manase, îrî rûgai rwao.
9 “Kwoogu athîkîraani biugo bia kîrîîkanîro gîkî kaingo mantû meenu monthe mara bûkûrûtha makaathi bwega. 10 Biû îmunthî bûrûûngi mbere ya Mwathani Ngai wenu bwinthe; atongoria ba mîîrîga yenu, akûrû ba Isiraeri, arûngamîîri beenu na antû arûme bonthe ba Isiraeri, 11 amwe na aana beenu na aka beenu, na ageni bara batwîre gatîgatîîni keenu, kuuma kîrî bara babuunagîra nkû mwanka bara babûtaagîra rûûyî. 12 Bûrûûngamîîte aaga kaingo bûrûtha kîrîîkanîro na Mwathani Ngai wenu, bwathiîtia kwathîkîra kîrîîkanîro kîra Ngai akûrûtha naabi îmunthî. 13 Arîenda abûtuîkithia antû baake n'we atuîka Ngai wenu, wa ta bûra aabwîrire na athiîtîria biûyûûyû bienu, Îburaîmu, Isaka na Njakubu. 14 Ntikûrûtha kîrîîkanîro gîkî na biû bwinka, 15 biû bûrûûngi aaga naati îmunthi mbere ya Mwathani Ngai wetû îndî i kinya na nciarwa ira ikaaya cia Isiraeri.
16 “Biû bwingwa i bûkûmenya bûra twatûûraga Miisiri na bûra twabuuraangagîîra nthîgûrû cia mîgongo îra îîngî tûrî ûthû n'yo. 17 I bwonire mantû maao ma rûko, ngai ciao cia ûrongo cia mîtî, na cia maiga, na cia fetha na cia thaabu. 18 Mwathani aarûthire kîrîîkanîro gîkî naabi kaingo gûtikaagîte muntû mûrûme, kana mûka, kana mûciî, kana mwîrîga ûkaumauma kîrî Mwathani Ngai wenu ûthi kûgonga ngai inu cia mîgongo îîngî. Bûmenyeere gûtikeegue kûrî na mûri ûkuuma maciaro marî na gana na cûmû. 19 Gûtikaagîte muntû nwa ûmwe nyuma ya kwîgua biugo bia mawatho ma kîrîîkanîro akeebîîra, ‘Gûtirî bu ngaakara naawe wana ndaarûtha bûra nkwenda.’ Gûgakarîka ûgu nkabûthiria bwinthe bara beega na bara bathûûku. 20 Mwathani atiikirîra antû ba mûthemba ta ûyu. Mûthûûro na rûriitho rwake rûkababîîthia ta mwanki. Bakaagwatwa ni irumi bionthe bira biandîkîîtwe îbukuuni rîrî na Mwathani akaabuuta mariîtwa maao bariganîrie cwe. 21 Mwathani akabaathûrana na antû ba mîîrîga ya Isiraeri barî ngerekano, abareteere inyamaara kûringana na irumi bira birî kîrîîkanîrooni kîra kîandîkîîtwe îbukuuni rîrî rîa watho.
22 “Rîru aana beenu ba nthuke ira ikaaya na ageni ba kuuma nthîgûrû cia kûûraaya, bakoona inyamaara bira birî nthîgûrû na mîrimo îra Mwathani akûreeta ku. 23 Bakoona mûthetu wa nthîgûrû ûtuîkîîte ûbiriti na mwonyo, na nthîgûrû yûûmagarîîte ta îng'aaria gûtarî kîo kîandwa gîkûra ku, gûtarî nwa kabua ka nyaki. Gûkeegua gûkari ta Sondomu na Ngomoora, Andima na Seboiimu, ira Mwathani aathiriirie na mûthûûro wake. 24 Mîgongo îra îbûthiûrûkîrîîte îkaûragia, ‘I mbi yatûma Mwathani arûtha nthîgûrû îno ûûgû? Na i mbi îtûmîîte athûûra na inya ûgu?’
25 “N'yo îgaacookagîrua îkeerwa, ‘Ûntû bûbû bûkarîkîîte n'ûntû antû ba nthîgûrû îno i baaregire kûthingata kîrîîkanîro kîra baarûthire na Mwathani, Ngai wa biûyûûyû biao, rîra aabarutaga Miisiri. 26 I baagarûkire baanjîîria gûtûmîkîra na kûgonga ngai cingî ira ciarî i ngeni kîrî bo, ira Mwathani ataabanenkera. 27 Na i kîo gîtûmi Mwathani athûûrîrîîte antû baake na aareeta irumi bionthe bira biandîkîîtwe îbukuuni rîrî nthîgûrû yao 28 Mwathani n'athûûrire mûno i bo. Na n'ûntû bwa mûthûûro ûyu wake mûnene, Mwathani n'abatiibûrire kuuma nthîgûrû abayugayugîria nthîgûrû îîngî, wa bûra gûkari kinya îmunthî.’
29 “Mantû mara maithe i ma Mwathani Ngai wetû; îndî mantû mara maumbûrîîtwe i meetû na nciarwa cietû tene na tene, kaingo tûûmba kwathîkîra biugo bibi bia watho.”