Ɛwɛn Nywɛ Yesutɔn xena
Maki
Wlan
Jan jla Mawu we oxo le zogbeji
(Mat 3:1-12; Lwk 3:1-18; Jan 1:19-28)
1
1 Lesinha wɛ Yesu Klisu Mawuvyɛ la we Ɛwɛn Nywɛ la we titɔ e ji, bɛ ɖo. 2 Ye wlan le oxolɔɖonyitɔ Ezayi we wema mɛ tun mɔ:«Kpɔn, mɔ Mawu, na sɔ ɛwɛndotɔ tɛye sɔ ɖodan, e ba jɛ ŋukɔn na we
A do jla omɔ ji ɖo na we,
3 Ogbe ɛmɛ la tɔn mɛ lo ɖi le zogbeji nɔ, bo lɔ nɔ tun mɔ:
“Mi jla Xwetɔ la we omɔ ɖo,
Afɔmɔ etɔnye ni jɔ nywɛɖe.”»
4 Mɔsinha wɛ Jan, Mawu we ɛsin lɛ na ɛmɛtɔ, va zogbeji, bo jla Mawu we oxo nɔ tun mɔ: «Mi ɖɔli jijɔ, a bo na na ye a lɛ Mawu we ɛsin na mi, Mawu ba sɔ onu nyanyla miatɔnye sɔ kɛ mi.» 5 Mi wɛ Yude we otomɛtɔ zɛtɛye kpodo Jeluzalɛmu we toxomɛtɔ zɛtɛye nɔ yi e kɔn nɔ, bo nɔ lɔ onu nyanyla yetɔnye le agbaŋugba, Jan bo nɔ lɛ Mawu we ɛsin na ye le Judɛn we otɔsisa mɛ.
6 Jan nɔ do awugaga xena ye sɔ osɔkpotɔnɔ we ofun do wasi, a bo bla alin ji kpo akpakan xena ye sɔ olangbaza do wasi, e nɔ ɖu bɔsukle, a bo nu owinsin hɔntuntɔn. 7 E bo jla Mawu we oxo la nɔ, bo lɔ nɔ tun mɔ: «Ɛmɛ ɖe le godo na-a, bo gbɔn nɔ, e ɖo hɔnhlɔn hugan mɔ, ko ko jɛ na xwi, a bo do tun afɔkpakan etɔnye can. 8 Mɔ, Mawu we ɛsin jan wɛ ko lɛ na mi, vɔ emyɔ, e na lɛ Gbigbɔ Kinkwɛn na mi.»
Jan lɛ Mawu we ɛsin na Yesu
(Mat 3:13-17; Lwk 3:21-23)
9 Mi wɛ le hwemɛ la nu, Yesu sɔn Nazalɛti, le Galile we kansinmɛ bo va, Jan bo lɛ Mawu we ɛsin ni-i le Judɛn we otɔsisa la mɛ. 10 Trololo na Yesu do tɔn le ɛsin la mɛ, e kpɔn jiŋukunsin hun, Gbigbɔ Kinkwɛn bo jɛ ote do e ji, bo ɖo hɔnnɛ we ninɔmɛ ha. 11 Ogbe ɖe bo ɖi sɔn jiŋukunsin bo lɔ tun mɔ: «Myɔ wɛ nyi ovi tɛye xena ko yi owan na, myɔ wɛ nɔ do jijwɛ na-a.»
Satana va tɛn Yesu kpɔn
(Mat 4:1-11; Lwk 4:1-13)
12 E mɛ godo zɔnɖokpo, Mawu we Gbigbɔ bo kplɔ Yesu do yi zogbeji. 13 Le azan kanɖe gblamɛ, le zogbe la ji, Satana tɛn-ɛ kpɔn. Emyɔ kpodo olan hɔntuntɔnye wɛ le blɛ la, ɛwɛndotɔ Mawutɔnye bo nɔ va wle obyo ni-i nɔ.
Yesu yɔ oɖɔdatɔ ɛnɛ
(Mat 4:12-22; Lwk 4:14-15; 5:1-11)
14 Xena ye wle Jan sɔ do ogankpamɛ vɔ, Yesu va Galile we kansinmɛ, bo lo jla Mawu we Ɛwɛn Nywɛ la nɔ, 15 bo lɔ nɔ tun mɔ: «Ogan la xo, Mawu we Xɔluɖuɖu la bo o tɛkpɔ. Mi ɖɔli jijɔ, a bo kan do Ɛwɛn Nywɛ la ji.»
16 Yesu lo zɔn zɔnlin nɔ gbɔn Galile we otɔ la to, bo kpɔn Simɔ kpodo nɔvyɛ Andre, ye bo lo da oɖɔ do otɔ la mɛ nɔ, ɖo, oɖɔdatɔye wɛ ye nyi. 17 Yesu bo lɔ na ye tun mɔ: «Mi kplɔ-ɔ do na ma na na mi a nɔ kplɔ ɛgbɛtɔye va na-a, ɖi lena mi nɔ wle ohwe ɖo ha.» 18 Le e tɛnxo zɔnɖokpo, ye jo oɖɔ yetɔnye do, bo kplɔ-ɛ do. 19 Xena e zɔn yi ŋukɔn viɖe, e kpɔn Jaki kpodo nɔvyɛ Jan, xeye ni nyi Zebede vikpɛye, ye bo le otɔjihun yetɔn mɛ, bo lo jla oɖɔ yetɔn ɖo nɔ. 20 Zɔnɖokpo, Yesu yɔ ye, ye bo jo yetɔ Zebede kpodo odanwatɔ etɔnye do otɔjihun la mɛ, bo kplɔ-ɛ do.
Yesu ɖe ɛcɛ kpikpa etɔn sɔ xlɛ
21 Yesu kpodo onukplanvi etɔnye ɖyɛ Kapɛnawumu we toxo mɛ. Mi wɛ, le Jwifuye we gbɔjwɛzan gbe, Yesu ɖyɛ okplityɔn yetɔn bo jɛ onu kpinkplan ɛmɛye ji. 22 Onukpinkplan etɔn bo hu onu do ye, ɖo, e kplan onu nɔ kpodo ɛcɛ kpikpa, e ko le ɖi osɛnkplan-ɛmɛtɔye tɔn ha o. 23 Le oganxixo mɛ la mɛ, dahwe ɖe le okplityɔn yetɔn la, gbigbɔ nylakan bo le e mɛ, e bo ca criɖiɖi 24 bo lɔ tun mɔ: «Ɛlɛ o jlo na mía, Yesu Nazalɛtitɔn? O va bo na do gu okun na mí wɛɛ? Ko nyɔ ɛmɛ xena o nyi, myɔ wɛ nyi Ɛmɛ Kinkwɛn xena Mawu sɔ ɖodan.» 25 Yesu bo ɖe ogbe tɔ-ɛ vivɛɖe, bo lɔ tun mɔ: «Bɔ onu, a bo tɔn le dahwe xe mɛ!» 26 Gbigbɔ nylakan la bo hunhun dahwe la kpodo hɔnhlɔn kpo taŋu, bo tɔn le e mɛ kpodo axwa lelele. 27 E kpaca do ye ɛmɛ zɛtɛye seŋu, mi wɛ ye kan yenɔniɔye se tun mɔ: «Ɛlɛ nyi xe la? Onukplan-ɛmɛ yɔyɔ kpodo ɛcɛ kpikpa kpo xɛn mɔ! E nɔ ɖe ogbe do gbigbɔ nylakanye can, ye ba se otonu ni-i.» 28 Mi wɛ nyikɔ etɔn gbakpe trololo gbɔn Galile we kansin la zɛtɛye mɛ seŋu.
Yesu gɔ adɔn na adɔnnɔ susu
(Mat 8:14-15; Lwk 4:38-39)
29 Xena Yesu lɛ le okplityɔn la, zɔnɖokpo, emyɔ kpodo Jaki kpodo Jan, yi Simɔ kpodo Andre we oxwegbe. 30 Simɔ sinɔ bo le onyi hinhlɔn, e bo ɖo zozo; zɔnɖokpo ye lɔ oxo etɔn na Yesu. 31 E bo tɛkpɔ-ɛ, bo hɛn alɔ ni-i, bo fɔn-ɛ site, zozo la bo ɖote, e bo jɛ jonɔ yiyi na ye ji.
32 Le hwedo, xena ohwe yi oxɔ vɔ, ye kplɔ adɔnnɔ zɛtɛye kpodo ɛmɛ xeye mɛ na gbigbɔ nylakanye le, do va ni-i. 33 Oto la mɛtɔ zɛtɛye seŋu bo va kpli le oxwe la we agbo mɔnu. 34 E bo gɔ adɔn na adɔnnɔ susu xeye ni jɛ adɔn hamɛ-hamɛye, bo nya gbigbɔ nylakan susuye can, vɔ, e ɔn ɖe omɔ na gbigbɔ nylakan laye tun ye boo lɔ oxo o, ɖo, ye o nyɔ ɛmɛ xena e nyi.
Yesu jla Mawu we oxo le Galile
35 Le kɛklɛnu dɛɛn, hwexenu na vuvlu mɔ gbɛ le ote, Yesu fɔn, bo tɔn le oxwe la gbe, bo sɔn yi ofi xena ɛmɛ ti ɔn le, bo jɛ ɛɖɛxixo ji le blɛ la. 36 Simɔ kpodo ɛmɛ xeye ni kplɔ-ɛ do ye, bo jɛ kinkan-ɛ ji, 37 xena ye va yi kpɔn-ɛ, ye lɔ ni-i tun mɔ: «Ɛmɛ zɛtɛye wɛ kan we nɔ.» 38 E bo lɔ na ye tun mɔ: «Mí a lɛ le bwɛ, a bo yi otota xeye ni tɛkpɔ bwɛ ye mɛ, na ma do jla Mawu we oxo la can, ɖo, e mɛ la wɛ dɔn na ko do tɔn.» 39 E gbɔn Galile we kansin la zɛtɛye mɛ, bo lɔ Mawu we oxo le okplityɔn yetɔnye nɔ, bo nya gbigbɔ nylakanye nɔ.
Yesu gɔ adɔn na okpodɔnnɔ ɖe
(Mat 8:2-4; Lwk 5:12-16)
40 Okpodɔnnɔ ɖe tɛkpɔ Yesu, bo jɛ klita le akɔn mɛ ni-i, bo ɖe kuku ni-i, bo lɔ tun mɔ: «Na o jlo, o kpewu na na na ma trɔ zun ɛmɛ mimɛ.» 41 Ɛgbɛ etɔn ɖu adɔnu na Yesu, e bo drɛn alɔ etɔn, bo ɖo alɔ e wu, bo lɔ ni-i tun mɔ: «Ko jlo, trɔ zun ɛmɛ mimɛ.» 42 Le e tɛnxo zɔnɖokpo, okpodɔn la bo bu le goto ni-i, e bo trɔ zun ɛmɛ mimɛ. 43-44 Zɔnɖokpo, Yesu tɔ-ɛ ogbe vivɛɖe tun mɔ: «Kpɔn ɖiwe ji, ká lɔ oxo ɖe na ɛmɛ ɖe o, vɔ, va yi ɖe ɖiwe sɔ xlɛ ovɔsantɔ Mawutɔn, o ba do wasi ovɔsinsan xena Mɔyizi wlan, e mɛ la wɛ na ɖe xlɛ ye tun adɔn tɔwe bo gɔ.» E mɛ godo, e bo nya-ɛ. 45 Vɔ, xena dahwe la sɔn, e jɛ oxo la jijla ji kpodo axwa kpo, bo na na e gbakpe gbɔn ofi ɖekpekpe. Do e mɛ wu, Yesu ɔn mɔ nɔ kpewu ɖyɛ toxo ɖe mɛ le ŋumɛ na ɛmɛye. E nɔ ci toxo godo le zogbeji, ɛmɛye bo nɔ sɔn ofi ɖekpekpe, a bo va e kɔn.