Yesu gɔ adɔn na dahwe kplibɔnɔ ɖe
(Mat 9:1-8; Lwk 5:17-26)
2
1 Azan ovii ɖe godo, Yesu gbɔn va Kapɛnawumu, ɛmɛye bo se tun e bo le oxwegbe. 2 Mi wɛ, ɛmɛ susu gbagbagba va kpli gbɔɔn tɛnxo ti ɔn mɔ le ofi ti gbɔɔn do le oxwe la we agbo mɔnu can, e bo lo lɔ Mawu we oxo na ye nɔ. 3 Ye hɛn kplibɔnɔ ɖe do gbɔn nɔ e kɔn nɔ, ɛmɛ ɛnɛ bo kɔ-ɛ. 4 Xena ye ɔn kpewu na sɔ-ɛ sɔ va ŋukɔn ni-i do lena ɛmɛye su ɖo wu, ye ɖe omɔ do sanŋutakpwe xe mɛ na Yesu le la we otaa, bo sɔ adɔnnɔ la jɛ ote gbɔn omɔ la nu, e bo le onyi hinhlɔn le okpɔn etɔn mɛ. 5 Xena Yesu kpɔn xɔse yetɔn, e lɔ na kplibɔnɔ la tun mɔ: «Ovi tɛye, o kpɔn sisɔkɛ na onu nyanyla tɔweye.» 6 Osɛnkplan-ɛmɛtɔ ɖeye le onyi xinxlɔn le ofi la, bo lo lɔ le ayixa yetɔn mɛ nɔ tun mɔ: 7 «Ɛlɛ jɔ na dahwe xe do lɔ oxo ɖo mɔsinha nɔ? E zun Mawu nɔ. Onu lɛ na kpewu sɔ onu nyanyla sɔ kɛ ɛmɛ? Mawu ɖokpo gee jan wɛ na kpewu wasi-i.» 8 Yesu kpɔn onu jɛ susu yetɔnye wu zɔnɖokpo le ayixa etɔn mɛ, e bo lɔ na ye tun mɔ: «Ɛlɛ jɔ mi do ɖo susu mɛ haye? 9 Na ye lɔ na kplibɔnɔ xe la tun mɔ: “O kpɔn sisɔkɛ na onu nyanyla tɔweye” alo “Site, sɔ okpɔn tɔwe a bo zɔn zɔnlin” ŋukɔ lɛ fa hugan ɖe? 10 E nyɔ! Ko jlo na mi a nyɔ-ɛ tun, Ɛgbɛtɔ we Ovi la bo ɖo ɛcɛ a do sɔ onu nyanylaye sɔ kɛ ɛmɛ le nyixɔ la ji.» Mi wɛ e lɔ na kplibɔnɔ la tun mɔ: 11 «Ko ɖe ogbe na we nɔ, site, sɔ okpɔn tɔwe a bo sɔn yi oxwe tɔwe gbe.» 12 Le e tɛnxo zɔnɖokpo, e site, bo sɔ okpɔn etɔn, bo tɔn le ŋumɛ na ɛmɛ zɛtɛye. E kpaca do ye ɛmɛ zɛtɛye taŋu, ye bo kanfu Mawu nɔ, bo lɔ nɔ tun mɔ: «Mí ɔn kpɔn onu mɔsinha tɔn kpɔn gbeɖe.»Yesu yɔ Lewi
(Mat 9:9-13; Lwk 5:27-32)
13 Yesu mɔ tɔn yi Galile we otɔ to ke, otogun la zɛtɛye bo va e kɔn nɔ, e bo nɔ kplan onu ye nɔ. 14 Hwexenu na e va yi nɔ, e kpɔn Lewi, Alufe vyɛ, e bo xlɔn onyi le takwɛjɔtɔye we odanwaxwe. E bo lɔ ni-i tun mɔ: «Kplɔ-ɔ do.» Lewi site, bo kplɔ-ɛ do. 15 Xena Yesu va yi tɛnxo le Lewi we oxwegbe a do ɖu onu, takwɛjɔtɔ susu kpodo onu nyanylawatɔ buye can yi tɛnxo le aha na emyɔ kpodo onukplanvi etɔnye, ɖo, ye ɛmɛ susu wɛ kplɔ-ɛ do. 16 Mi wɛ, xena osɛnkplan-ɛmɛtɔ Falizitɔye kpɔn tun e bo ɖu onu nɔ kpodo takwɛjɔtɔye kpodo onu nyanylawatɔye, ye lɔ na onukplanvi etɔnye tun mɔ: «Ɛlɛ jɔ e do ɖu onu kpodo takwɛjɔtɔye kpodo onu nyanylawatɔye nɔ?» 17 Yesu se oxo yetɔn, bo lɔ na ye tun mɔ: «Ɛmɛ xeye ni le ozan ye, ɔn hyan doto, adɔnnɔye wɛ ɖo ohyan etɔn. Ko ɔn va na do yɔ ɛmɛ xeye ni nɔ yɔ yeɖe tun ɛmɛ jijwɛye o, vɔ, onu nyanylawatɔye wɛ ko va na.»
Ye kan oxo Yesu se do onu bibla wu
(Mat 9:14-17; Lwk 5:33-39)
18 Gbeɖokpo, Jan we onukplanviye kpodo Falizitɔye lo bla onu nɔ. Ye bo va lɔ na Yesu tun mɔ: «Ɛlɛ jɔ na Jan we onukplanviye kpodo Falizitɔye we onukplanviye lo bla onu nɔ, vɔ, onukplanvi tɔweye ko bla onu nɔ?» 19 Mi wɛ Yesu ɖo e wu na ye tun mɔ: «Ɛmɛ xeye na ye yɔ na alɔwiwle ye, na kpewu bla onu le hwexenu na nyɔnusu la le blɛ? Xena nyɔnusu la gbɛ le ye kɔn, ye ɔn kpewu na bla onu o. 20 Vɔ, azanye gbɔn nɔ, ye bo na kplɔ nyɔnusu la le ye kɔn, mi wɛ ye na bla onu le azan mɛ la ji.
21 Ɛmɛ ti ɔn nɔ kan le avɔ yɔyɔ wu a do va yi ta awu xixo. E nyi ye wasi mɔsinha, avɔvi yɔyɔ la na myɔ a bo dɔn awu xixo la vun, vunvun la bo na mɔ nyla diin. 22 Ɛmɛ ti ɔn nɔ kɔn vɛn yɔyɔ do olan agbaza we oglo xixoye mɛ, e ma dɛn, vɛn la na wo oglo laye, vɛn la kpodo oglo laye bo na la do okpɔ. Vɔ, olangbaza we oglo yɔyɔye mɛ wɛ ye nɔ kɔn vɛn yɔyɔ do.»
Yesu lɔ oxo do Jwifuye we gbɔjwɛzan wu
(Mat 12:1-8; Lwk 6:1-5)
23 Le Jwifuye we gbɔjwɛzan ɖe gbe, Yesu gbɔn ɛjinukun we ogle ɖe mɛ va yi nɔ, onukplanvi etɔnye bo jɛ ɛjinukunye kinkan ji, le omɔ la ji bo do sɔn nɔ. 24 Falizitɔye bo lɔ ni-i tun mɔ: «Kpɔn, ɛlɛ jɔ na ye do wasi onu xena Osɛn gbɛ tun ye boo ká wasi le gbɔjwɛzan gbe nɔ?» 25 Yesu bo ɖo e wu na ye tun mɔ: «Be, onu xena Davidi wasi le hwexenu na xovɛ ci emyɔ kpodo ɛmɛ xeye ni kplɔ-ɛ do ye, ye ko kpɔn onu ɖe bo na ɖu, mi ɔn xlɛ kpɔn gbeɖe wɛɛ? 26 Le ovɔsantɔ ɖaxo Abyata we hwenu, Davidi ɖyɛ ofi xena ye nɔ sɛn Mawu le, bo ɖu kpɔnnɔ xena ye do san ovɔ na Mawu, bo na ɛmɛ xeye ni kplɔ-ɛ do ye, yee can ye bo ɖu. Vɔ, kpɔnnɔ mɛ la, ɛmɛ ti ɔn ɖo ɛcɛ bo na do ɖu, zɛgbɔn ovɔsantɔ Mawutɔnye wu.» 27 Yesu mɔ lɔ na ye tun mɔ: «Gbɔjwɛzan la le na ɛgbɛtɔ, e ɔn nyi ɛgbɛtɔ hɛn le na gbɔjwɛzan la. 28 Mi wɛ dɔn, Ɛgbɛtɔ we Ovi la, ɖo ɛcɛ do gbɔjwɛzan la can ji.»