Yesu yɔ onukplanvi etɔn tantyantɔnye
5
1 Gbeɖokpo, Yesu le Jenɛzalɛtia we otɔ to, ɛmɛ susu bo hunxa-ɛ, bo lo tintin-i nɔ, bo na do se Mawu we oxo. 2 E kpɔn otɔjihun owe le otɔ la to, oɖɔdatɔye bo tɔn le ye mɛ bo lo klɔ oɖɔ yetɔnye nɔ. 3 Tɔjihun ɖokpo bo nyi Simɔtɔn, Yesu bo ɖyɛ otɔjihun mɛ la mɛ, bo lɔ na Simɔ tun mɔ: «Simɔ, e jlo-o tun na kun otɔjihun la do yi otɔ la ji viɖe.» Yesu bo xlɔn onyi le otɔjihun la mɛ, bo jɛ onukpinkplan otogun la ji.4 Xena e kplan onu ye vɔ, e lɔ na Simɔ tun mɔ: «Kun otɔjihun la do yi ŋukɔn le ofi xena otɔ la tito le. Myɔ kpodo hawetɔ oɖɔdatɔ laye kpo, mi da oɖɔ na mi a wle ohwe.» 5 Simɔ lɔ ni-i tun mɔ: «Xwetɔ, mí nɔ zanŋute, bo da oɖɔ gbɔɔn ganke, mí ɔn kpewu wle ohwe ti kanŋukonu. Vɔ xeni nyi myɔ wɛ lɔ mɔsinha, ko na da oɖɔ la.» 6 Ye da oɖɔ la, bo wle ohwe susu gbagbagba gbɔɔn oɖɔ yetɔnye bo jɛ vunvun ji. 7 Ye wasi alɔ na ye hatɔ xeye ni le otɔjihun owegɔ la mɛ, tun ye boo va kpedo heye wu. Xena ye va, ye ɛmɛ zɛtɛye bo nɔ okpɔ bo bɛ ohwe laye do otɔjihun owe laye mɛ. Agban va hugan otɔjihun laye gbɔɔn ye bo ka syɔ nɔ. 8 Xena Simɔ Piyɛ kpɔn ɖo mɔsinha, e jɛ klita le akɔn mɛ na Yesu bo tun mɔ: «Xwetɔ, dun yi le wu ye, ɖo onu nyanylawatɔ wɛ ko nyi.» 9 Lesinha na ohwe laye su ɖo, e kpaca do Simɔ kpodo ɛmɛ xeye ni bɔ do e wu zɛtɛye. 10 Mɔsinha ke wɛ e kpaca do hatɔ oɖɔdatɔ xeye we nyikɔ ni nyi Jaki kpo Jan xeye ni nyi Zebede we ovikpɛye. Yesu lɔ na Simɔ tun mɔ: «Ká mɔ vɔ, ɖo bɛ sɔn egbe ji, ɛgbɛtɔye wɛ o na nɔ kplɔ va na-a ɖi lena o nɔ wle ohwe ɖo ha.» 11 E mɛ godo, ye kun otɔjihun yetɔnye va ago, bo jo onu zɛtɛye do, bo kplɔ Yesu do.
Yesu gɔ adɔn na okpodɔnnɔ ɖe
12 Gbeɖokpo, Yesu le toxo ɖe mɛ, mi wɛ dahwe ɖe le ofi la, okpodɔn ɖoɖyo bo gɔ goto ni-i. Xena e kpɔn Yesu, e do onu odo, bo ɖe kuku na Yesu tun mɔ: «Xwetɔ, na o jlo, o kpewu na na na ma trɔ zun ɛmɛ mimɛb». 13 Yesu drɛn alɔ bo ɖo alɔ e wu, bo lɔ ni-i tun mɔ: «Ko jlo, trɔ zun ɛmɛ mimɛ.» Zɔnɖokpo, okpodɔn la bo bu le goto ni-i. 14 Yesu bo do osɛn ni-i tun mɔ: «Ká lɔ na ɛmɛ ti, vɔ va yi sɔ ɖiwe sɔ xlɛ ovɔsantɔ Mawutɔn, o ba do wasi ovɔsinsan xena Mɔyizi we Osɛn byɔ. E mɛ la wɛ na ɖe xlɛ ye tun adɔn tɔwe bo gɔ.» 15 Ganke, Yesu we nyikɔ bo gbakpe gbɔn ofi zɛtɛye nɔ, ɛgbɛtɔ susu gbagbagba nɔ va kple a do se onukpinkplan etɔn, a bo mɔ do kpɔn adɔngigɔ sɔn e de. 16 Vɔ, Yesu nɔ tɔn le ye mɛ a do va yi xo ɛɖɛ le ofi xena ɛmɛ ti ɔn le.
Yesu gɔ adɔn na dahwe kplibɔnɔ ɖe
17 Gbeɖokpo, Yesu lo kplan onu ɛmɛye nɔ. Falizitɔye kpo osɛnkplan-ɛmɛtɔye bo xlɔn onyi le aha ni-i. Ye bo sɔn Jeluzalɛmu we toxo mɛ kpodo otota zɛtɛye xeni le Galile kpo Yude we otoye mɛ. Mawu we hɔnhlɔn bo le kpo-e, e bo gɔ adɔn na adɔnnɔye nɔ. 18 Ɛmɛ ɖeye kɔ dahwe kplibɔnɔ ɖe do okpɔn adɔnnɔyetɔn mɛ bo na do va Yesu kɔn. Ye bo jlo na hɛn adɔnnɔ la ɖyɛ oxwe xe gbe na Yesu le, a bo do sɔ adɔnnɔ la sɔ ɖo ŋukɔn ni-i. 19 Vɔ ye ɔn kpewu bo wasi mɔsinha, ɖo ɛmɛ susu wɛ gɔ oxwe la gbe. Ye gbɔjwɛ xɛ oxɔ la ta, bo ɖe omɔ ɖe, bo sɔ adɔnnɔ la jɛ ote le agun mɛ do ŋukɔn na Yesu. Adɔnnɔ la bo le onyi hinhlɔn le okpɔn etɔn la mɛ. 20 Xena Yesu kpɔn xɔse yetɔn, e lɔ na adɔnnɔ la tun mɔ: «O kpɔn sisɔkɛ na onu nyanyla tɔweye.» 21 Osɛnkplan-ɛmɛtɔye kpodo Falizitɔye xeye ni le ofi la, bo lo bu susu nɔ tun mɔ: «Dahwe ŋukɔ lɛ nyi xe? E lo zun Mawu nɔ. Ɛmɛ ti ɔn le bo na sɔ onu nyanyla sɔ kɛ ɛmɛ. Mawu ɖokpo gee jan wɛ na kpewu wasi-i!» 22 Yesu kpɔn onu jɛ susu yetɔnye wu, e bo lɔ na ye tun mɔ: «Ɛlɛ jɔ mi do ɖo susu mɛ haye? 23 Na ye lɔ tun mɔ: “O kpɔn sisɔkɛ na onu nyanyla tɔweye” alo “Site a bo zɔn zɔnlin,” ŋukɔ lɛ fa hugan ɖe? 24 Vɔ, ko jlo na mi a nyɔ-ɛ tun mɔ, Ɛgbɛtɔ we Ovi la, ko ɖo ɛcɛ le nyixɔ ji na do sɔ onu nyanylaye sɔ kɛ ɛmɛ.» E mɛ godo, Yesu lɔ na kplibɔnɔ la tun mɔ: «Site a bo sɔ okpɔn tɔwe na sɔn yi oxwe tɔwe gbe.» 25 Haŋu zɔnɖokpo, dahwe kplibɔnɔ la site le ɛmɛ zɛtɛye we ŋumɛ, e bo sɔ okpɔn etɔn, bo sɔn yi oxwe etɔn gbe, bo kanfu Mawu nɔ. 26 E kpaca do ɛmɛ zɛtɛye taŋu le ofi la, ye bo kanfu Mawu nɔ, kpodo vivɔ kpo. Ye bo lɔ tun mɔ: «Onu makpɔn gbeɖe wɛ mí kpɔn le egbe!»
Yesu can Lewi
27 E mɛ godo, Yesu lɛ le blɛ, bo va yi kpɔn takwɛjɔtɔ ɖe xeni xlɔn onyi le odanwaxwe etɔn, ye bo nɔ yɔ-ɛ tun Lewic. Yesu bo lɔ ni-i tun mɔ: «Kplɔ-ɔ do.» 28 Lewi site, bo jo onu zɛtɛye do, bo kplɔ Yesu do.
29 E mɛ godo, Lewi ɖu agɔ ɖaxo ɖe le oxwe etɔn gbe, a bo do do bubu Yesu wu. Takwɛjwɛtɔ susu kpodo ɛmɛ buye bo lo ɖu onu kpodo ye nɔ. 30 Falizitɔye kpo osɛnkplan-ɛmɛtɔ yetɔnye, bo lo lɔ oxo do onu mɛ la wu nɔ, ye bo kan onukplanvi Yesutɔnye se tun mɔ: «Ɛlɛ jɔ na mi nɔ do ɖu, a bo nu kpo takwɛjɔtɔye kpo onu nyanylawatɔye kpo?» 31 Yesu ɖo e wu na ye tun mɔ: «Adɔnnɔye wɛ hyan doto, ɛmɛ xeye ni le ozan ye, ɔn ɖo ohyan etɔn. 32 Ko ɔn va na do yɔ ɛmɛ xeye ni nyi ɛmɛ jijwɛye, vɔ, onu nyanylawatɔye wɛ ko va na, ye ba do ɖɔli jijɔ yetɔnye.»
Yesu lɔ oxo do onu bibla wu
33 Falizitɔye lɔ na Yesu tun mɔ: «Jan we onukplanviye kpo onukplanvi míatɔnye, ye nɔ bla onu ganmɛ-ganmɛ, a bo xo ɛɖɛ nɔ, vɔ onukplanvi tɔweye, ye nɔ ɖu a bo nu.» 34 Yesu ɖo e wu na ye tun mɔ: «Le alɔwiwle zan gbe, mi na kpewu na lɔ na ɛmɛ xeye na ye yɔ ye tun ye boo bla onu hwexenu na nyɔnusu la mɔ gbɛ le ye kɔn wɛɛ? 35 Vɔ, azan ɖe lo gbɔn nɔ, na ye na va kplɔ nyɔnusu la le ye kɔn, hwemɛnu wɛ ye na bla onu.»
36 Yesu mɔ do olo na ye, bo tun mɔ: «Ɛmɛ ti ɔn nɔ kan le awu yɔyɔ wu a do va yi ta awu xixo. E nyi ye wa mɔsinha, be awu yɔyɔ la bo vun, mɔsinha ke avɔvi yɔyɔ na ye va yi tɔ do awu xixo la ji, e ɔn sɔgbe kpo-e nɔ. 37 Ɛmɛ ti ɔn nɔ kɔn vɛn yɔyɔ do olan agbaza we oglod xixo mɛ, e ma dɛn, oglo xixo mɛ la na wo, vɛn yɔyɔ la bo na kun hun, oglo laye can bo na la. 38 Vɔ, olan agbaza we oglo yɔyɔ mɛ wɛ ye nɔ kɔn vɛn yɔyɔ do! 39 Ɛmɛ ti ko nɔ kan na nu vɛn yɔyɔ le hwexenu na e o nu xixo la vɔ. Ɖo, ye nɔ lɔ tun mɔ: “Xixo la bo nyɔhwyan hugan.”»