Yesu ɖu le lɛgba we tintɛnkpɔnye ji
4
1 Hwexenu na Yesu lɛ le Judɛn we otɔ to nɔ, e o gɔ kpo Gbigbɔ Kinkwɛn, Gbigbɔ la bo kplɔ-ɛ do yi zogbeji. 2 Lɛgba va tɛn-ɛ kpɔn le blɛ na onyihinhɔn kanɖe. Yesu ɔn ɖu onu ti gbɔɔn onyihinhɔn kanɖe la do vɔ, xena azan mɛ laye va yi vɔ, xovɛ va ci-i. 3 Mi wɛ lɛgba lɔ ni-i tun mɔ: «E nyi na o nyi Mawu we ovi, be bo ɖe ogbe na ɛkpɛn mɛ ye, na ye a trɔ zun kpɔnnɔ.» 4 Yesu ɖo e wu ni-i tun mɔ: «Mawu we oxo lɔ tun: “Onuɖuɖu ɖoɖyo jan hɛn ɛgbɛtɔ na ɖu a do nɔ ɛgbɛ.”»5 Lɛgba mɔ kplɔ Yesu yi jigbe, bo xlɛ-ɛ ogaɖuxwe zɛtɛye xeni le nyixɔ ji le cɛju viɖe kleŋu mɛ. 6 E bo lɔ na Yesu tun mɔ: «Ko na sɔ ɛcɛ kpikpa kpo dɔkunnu xeni gbɔn nyixɔ ji xena o kpɔn nɔ mɛ zɛtɛye sɔ na we; ɖo, mɔ wɛ ye sɔ onu mɛ zɛtɛye sɔ do alɔ mɛ na, ko hɛn ko na sɔ na ɛmɛ xeni jlo-o. 7 Myɔ, e nyi tun o do onu odo na-a, be onu laye seŋu na nyi tɔwe.» 8 Yesu bo ɖo e wu ni-i tun mɔ: «Mawu we oxo la lɔ tun mɔ: “Xwetɔ Mawu tɔwe wɛ o na do onu odo na, emyɔ ɖokpo gee wɛ o na sɛn.”»
9 E mɛ godo, lɛgba la mɔ va kplɔ-ɛ do yi ota na Mawu we oxwe xeni le Jeluzalɛmu, bo lɔ ni-i tun mɔ: «E nyi na o nyi Mawu we ovi dododo, zɔn sɔn bwɛ, a bo jɛ nyixɔ mɛ; 10 ɖo Mawu we oxo la lɔ tun mɔ: “Mawu na ɖe ogbe na ɛwɛndotɔ etɔnye, ye bo na va kpe ŋukunsin do wu we.” 11 Mɔsinha ke: “ Ɛwɛndotɔ Mawutɔn laye na hɛn we do alɔ yetɔnye mɛ, e mɛ, afɔ tɔwe ɔn klɛn ɛkpɛn ɖe nɔ.”» 12 Yesu ɖo e wu ni-i tun mɔ: «Mawu we oxo lɔ tun mɔ: O ɔn ɖo na tɛn Xwetɔ Mawu tɔwe kpɔn.» 13 Xena lɛgba zan walɔ mɛ zɛtɛye bo do tɛn Yesu kpɔn vɔ, e dun yi le Yesu wu gbɔɔn do yi hweɖenu.
Yesu bɛ odan etɔn le Galile we kansinmɛ
14 Yesu gbɔn va Galile, kpo Gbigbɔ Kinkwɛn we hɔnhlɔn kpo. Ɛmɛye bo lo ɖe kunnu ni-i nɔ gbɔn Galile we kansinmɛ seŋu. 15 E nɔ kplan onu gbɔn Jwifuye we okplityɔnye, ɛmɛ zɛtɛye bo kanfu nyikɔ etɔn nɔ.
Ye gbɛ Yesu le Nazalɛti we otota mɛ
16 Yesu va Nazalɛti, otota xe mɛ na e hwɛn le. Le Jwifuye we gbɔjwɛzan gbe, e ɖyɛ Jwifuye we okplityɔn ɖi lena e o nɔ wasi ɖo saa ha, e bo site bo na do xlɛ Mawu we oxo. 17 Ye sɔ oxolɔɖonyitɔ Ezayi we wema sɔ ni-i tun ni boo xlɛ-ɛ na heye, xena e hun-i, e bo xlɛ ofi xena ye wlan do tun mɔ:
18 Mawu we Gbigbɔ le ji ye
Ɖo e can-a
Na ko na do va yi do Ɛwɛn Nywɛ na ɛmɛ xeye ni ɖu aya nɔ ye,
E ɖo-o ɖodan, na ma va yi lɔ na ogantɔye tun ye bo na ɖe ogan na ye,
A bo mɔ lɔ na ŋuvanɔye tun ye bo na kpɔn onu,
A bo ɖe ogbe na ɛmɛ xeye na ye do aya na nɔ ye tun ye boo jɛ yeɖe si,
19 A bo do va lɔ oxo sɔn oxwe ɖe wu, oxwe xe mɛ na Mawu ɖe dɔmɛnywɛ etɔn sɔ xlɛ.
20 E mɛ godo, e tu wema la. E bo sɔ-ɛ sɔ na odansɔvi la, bo xlɔn onyi. Ye ɛmɛ zɛtɛye xeni le okplityɔn la, bo kpɔn-ɛ nɔ trululu. 21 E bo lɔ na ye nɔ tun mɔ: «Le egbe, Mawu we oxo xena mi se nɔ xe la, e cɛ.» 22 Ye ɛmɛ zɛtɛye bo ɖe kunnu nywɛ do Yesu wu nɔ. Oxo vivi xeye ni tɔn le onu mɛ ni-i nɔ ye, nɔ kpaca do ye nɔ. Ye bo lɔ nɔ tun mɔ: «Jozɛfu vyɛ la hɛn nyi e mɛ wɛɛ?» 23 Yesu lɔ na ye tun mɔ: «Ko kan do e ji tun mi na va do olo xe na-a: “Doto, gɔ adɔn na ɖiwe.” Mi bo na mɔ va lɔ na-a tun mɔ: “Onu xeye na o wasi le Kapɛnawumu we toxo mɛ mí bo se ye, mɔ wasi ye can le bwɛ, le otota tɔwe mɛ.”» 24 E bo mɔ lɔ na ye tun mɔ: «Le oxojɔxo mɛ, ko lo lɔ na mi nɔ: Oxolɔɖonyitɔ ti ɔn le, na ye nɔ yi-i nywɛɖe le oto etɔn mɛ. 25 Le oxojɔxo mɛ, ko lo lɔ na mi nɔ tun mɔ, okposi susu wɛ le Izrayɛli we oto mɛ le Eli we hwenu. Le hwemɛnu, oju ɔn ja na oxwe atɔn kpo sunzan ɛdɛn, xovɛ ɖaxo ɖe bo tɔn le oto la mɛ. 26 Ganke, Mawu ɔn sɔ Eli ɖodan ye ɛmɛ ti kɔn. Vɔ, e ɖo-e ɖodan okposi ɖokpo kɔn, le Salɛputa we toxo mɛ xeni le Sidɔn we kansinmɛ. 27 Mɔsinha ke, okpodɔnnɔ susu wɛ le Izrayɛli we oto mɛ, le oxolɔɖonyitɔ Elize we hwenu, ganke ye ɛmɛ ti ɔn kpɔn adɔngigɔ, vɔ, Naama xeni nyi Sili we oto mɛ tɔ, e ko nyi Jwifu, wɛ e gɔ adɔn na.»
28 Xena ye se mɔsinha, aɖi wle ye ɛmɛ zɛtɛye le okplityɔn la. 29 Ye site, bo ɖe Yesu tɔn le otota la mɛ. Ye bo dɔn-ɛ yi ota mɛ na okpó xe ji na Nazalɛti la we otota le, a do tintin-i do nyixɔmɛ. 30 Vɔ Yesu gbɔn agblamɛ na ye bo sɔn.
Yesu ɖe ogbe do gbigbɔ nylakan ɖe le Kapɛnawumu
31 Yesu va toxo Kapɛnawumutɔn mɛ le Galile we kansinmɛ. E bo kplan onu ɛmɛye nɔ, le Jwifuye we gbɔjwɛzan gbe. 32 Lena e lo kplan onu ɖo nɔ, e hu onu do ɛmɛye taŋu, ɖo e lɔ oxo nɔ kpodo ɛcɛ kpikpa kpo. 33 Le okplityɔn la, dahwe ɖe le, gbigbɔ nylakan bo le e mɛ, e bo ca criɖiɖi kpodo axwa lelele tun mɔ: 34 «Awo! Yesu Nazalɛtitɔn, ɛlɛ o jlo na mía? O va bo na do gu okun na mí wɛɛ? Ko nyɔ ɛmɛ xena o nyi: Myɔ wɛ nyi ɛmɛ kinkwɛn xena Mawu sɔ ɖodan.» 35 Yesu bo ɖe ogbe tɔ-ɛ vivɛɖe tun mɔ: «Bɔ onu a bo tɔn le dahwe xe mɛ.» Gbigbɔ nylakan la ze dahwe la sɔ xu onyi le ɛmɛ zɛtɛye we ŋumɛ, bo tɔn le e mɛ, e ko wa onu vivɛ ti kpodo dahwe la. 36 Onu xeni jɔ la, e kpaca do ɛmɛ zɛtɛye, ye bo kan yenɔniɔye se nɔ tun mɔ: «Oxo ŋukɔ lɛ nyi xe? Dahwe xe nɔ ɖe ogbe do gbigbɔ nylakanye kpo ɛcɛ kpikpa kpodo hɔnhlɔn, ye bo nɔ tɔn le ɛmɛye mɛ.» 37 E mɛ la godo, Yesu we nyikɔ bo gbakpe gbɔn ofi zɛtɛye le kansin la mɛ.
Yesu gɔ adɔn na adɔnnɔ susu
38 Xena Yesu lɛ le Jwifuye we okplityɔn la vɔ, e yi Simɔ we oxwegbe. Simɔ we sinɔ bo ɖo zozo ɖaxo ɖe. Ye bo va ɖe kuku na Yesu tun ni boo va gɔ adɔn ni-i. 39 Yesu tɛkpɔ adɔnnɔ la, bo ɖe ogbe do adɔn la, zozo la bo gɔ ni-i. Zɔnɖokpo, nahwe la site, bo jɛ jonɔ yiyi na ye ji.
40 Xena ohwe yi oxɔ, ɛmɛye kplɔ ɛmɛ yetɔnye, xeye ni jɛ adɔn hamɛ-hamɛye va Yesu kɔn. Yesu nɔ ɖo alɔ ota na ye ɖokpo-ɖokpo, a bo gɔ adɔn na ye. 41 Gbigbɔ nylakanye can tɔn le ɛmɛ susu mɛ bo nɔ do axwa tun mɔ: «Mawu we ovi wɛ o nyi!» Vɔ Yesu nɔ ɖe ogbe tɔ ye tun ye boo bɔ onu, ɖo, gbigbɔ nylakan laye nyɔ-ɛ tun emyɔ bɛ bo nyi Klisu la.
Yesu lɔ Mawu we oxo gbɔn Jwifuye we okplityɔnye
42 Xena onyi hɔn, Yesu tɔn le toxo la mɛ, bo sɔn yi ofi xena ɛmɛ ti ɔn le. Ɛmɛ susu bo lo kan-ɛ nɔ, xena ye va yi kpɔn-ɛ, ye jlo na hɛn e wu na e ko do sɔn le ye kɔn nɔ. 43 Vɔ Yesu bo lɔ na ye tun mɔ: «E le vivɛɖe tun ko na jla Mawu we Xɔluɖuɖu we Ɛwɛn Nywɛ la na toxo gbokpweye can, e mɛ la wɛ dɔn na Mawu do dɔn-ɔ ɖodan.» 44 Yesu bo lɔ Mawu we oxo gbɔn okplityɔn xeye ni le Jwifuyeb we oto mɛ ye.