Yesu gɔ adɔn na dahwe ɖe le gbɔjwɛzan gbe
(Mat 12:9-14; Lwk 6:6-11)
3
1 Yesu mɔ trɔ ɖyɛ Jwifuye we okplityɔn la ke. Dahwe ɖe xena alɔ ku na, bo le blɛ la. 2 Falizitɔye bo xyɔ kpɔn Yesu nɔ, a do kpɔn tun e kɛ na gɔ adɔn na dahwe la le gbɔjwɛzan la gbe ma, ye ba do do ɛhwɛ ni-i. 3 Yesu lɔ na dahwe xena alɔ ku na la tun mɔ: «Site, a bo va dodomɛ.» 4 E bo lɔ na ye tun mɔ: «Dogbɔn Osɛn míatɔn mɛ ɖe, onu nywɛ wɛ ye na wasi loo alo onu nyanyla wɛ ye na wasi, le gbɔjwɛzan gbe? Ye na hwlɛn ɛmɛ gan wɛ loo alo ye na hu ɛmɛ?» Vɔ, ye bɔ onu. 5 Yesu lɛ ŋukunsin gbɔn ye ji kpodo aɖi kpo, e bo nyi onulilo ni-i taŋu do oji sinsyɛnxu yetɔn wu, mi wɛ e lɔ na dahwe la tun mɔ: «Drɛn alɔ tɔwe.» E bo drɛn alɔ etɔn, adɔn la bo gɔ ni-i, alɔ la bo mɔ fɔn. 6 Zɔnɖokpo, xena Falizitɔye tɔn le okplityɔn la, ye wasi okpli kpodo ɛmɛ xeye ni le xɔlu Elodu we ogbɛ mɛ ye, ye ba do sɔ ogbeta do lena ye na wa a do hu Yesu wu.Ɛmɛ susu gbagbagba va Yesu kɔn
7 Yesu kpodo onukplanvi etɔnye sɔn yi Galile we otɔ to. Ɛmɛ susu gbagbagba bo kplɔ-ɛ do. Ye sɔn Galile we kansinmɛ, Yude we oto mɛ, 8 Jeluzalɛmu, Idumɛ we kansinmɛ, kpodo Judɛn we otɔsisa la godo, kpodo Tilu kpo Sidɔn we otoye mɛ. Ye va e kɔn, ɖo ye se onu xeye na e wasi nɔ ye. 9 E bo lɔ na onukplanvi etɔnye tun ye boo jla otɔjihun ɖe ɖo onyi na he, ɛmɛ laye ko mɔ do tintin-i nɔ. 10 Ɖo, e nɔ gɔ adɔn na ɛmɛ susu taŋu, do e mɛ la wu, ɛmɛ zɛtɛye xe wu na adɔn le ye, hunxa-ɛ nɔ, a do ɖo alɔ e wu. 11 Na ɛmɛ xeye mɛ na gbigbɔ nylakanye le ye kpɔn-ɛ, ye nɔ jɛ klita le akɔn mɛ ni-i, kpo axwa kpo, ye nɔ lɔ tun mɔ: «Myɔ wɛ nyi Mawuvyɛ la.» 12 E bo nɔ gbɛ na ye titeŋugbetɔn tun ye boo ká mɔ na na ɛmɛye a nyɔ-ɛ o.
Yesu sɔ ɛmɛ dindɔn weve laye sɔ ɖo onyi
(Mat 10:1-4; Lwk 6:12-16)
13 E mɛ godo Yesu xɛ okpó ɖe ji, bo yɔ ɛmɛ xeye na e jlo ye, ye bo va e kɔn. 14 E bo ɖo ɛmɛ weve onyi [bo na nyikɔ ye tun ɛmɛ dindɔnye] na ye a do le kpo-e, e ba nɔ do dɔn ye ɖodan Mawu we oxo jijla gbe, 15 kpodo ɛcɛ xena ye na do nya gbigbɔ nylakanye. 16 [Ɛmɛ weve xeye na e ɖo onyi laye xɛn]: Simɔ xena Yesu ɖo nyikɔ na tun Piyɛ, 17 Jaki kpodo nɔvyɛ Jan, ye ɛmɛ owe laye bo nyi Zebede vikpɛye, Yesu bo ɖo nyikɔ na ye tun Bowanɛlugɛsi, e gɔnmɛ wɛ nyi ɛmɛ xeye ni nɔ ɖe ogbe ɖi oju ha, 18 bɔ do ye wu, Andre, Filipu, Batelemi, Matye, Tɔma, Jaki xeni nyi Alufe vyɛ, Tade, Simɔ ɛhwɛyina-ototɔa, 19 kpodo Yuda Isikalyɔtu xeni va sa Yesu.
Yesu we ɛmɛye ka va dɔn-ɛ do sɔn nɔ
(Mat 12:24-32; Lwk 11:15-23; Lwk 12:10)
20 Yesu trɔ gbɔn va oxwegbe. Ɛmɛ susu gbagbagba bo kpli gbɔɔn Yesu kpodo onukplanvi etɔnye ɔn kpewu na ɖu onu can. 21 Xena xwedo etɔn we ɛmɛye se mɔsinha, ye jɛ omɔ a do va dɔn-ɛ do sɔn, ɖo ye lo lɔ nɔ tun e bo ɔn mɔ le eɖe mɛ o.
Ye lɔ tun gbigbɔ nylakan bo le Yesu mɛ
(Mat 12:22-32; Lwk 11:14-23; 12:10)
22 Osɛnkplan-ɛmɛtɔ xeye ni sɔn Jeluzalɛmu ye, lɔ nɔ tun mɔ: «Bɛlizebulu wɛ le e mɛ» ye bo mɔ lɔ tun mɔ: «Gbigbɔ nylakanye we oga mɛ la wɛ ni-i ɛcɛ, e bo nɔ do nya gbigbɔ nylakanye nɔ.» 23 E bo yɔ ye do va, bo do olo na ye tun mɔ: «Naɖe lɛ Satana na nya Satana ɖo? 24 Na xɔluɖuto ɖe le, otovi laye bo tɔn ahwan yenɔniɔye, xɔluɖuto mɛ ɔn kpewu na nɔ ote o. 25 Na xwedo ɖe we ɛmɛye tɔn ahwan yenɔniɔye, xwedo mɛ ɔn kpewu na nɔ ote. 26 Na Satana tɔn ahwan eɖe, bo ma, e ɔn kpewu na nɔ ote, etɔn vɔ do blɛ.
27 Vɔ, ɛmɛ ti ɔn kpewu na ɖyɛ ŋusunglo kanlinsu ɖe we oxwegbe, a bo bɛ onu etɔnye, na e ɔn bla kanlinsu la ɖo onyi gbɔxwe. Na e bla-ɛ vɔ, e na bɛ onu xeye ni le oxwe etɔn gbe ye. 28 Le oxojɔxo mɛ, ko lo lɔ na mi nɔ, ye na sɔ onu nyanyla zɛtɛye kpodo ozun xeye na ye zun na Mawu can, a sɔ kɛ ɛgbɛtɔ vikpɛye, 29 vɔ na ɛmɛ ɖe zun Gbigbɔ Kinkwɛn, e ɔn yi sisɔkɛ nɔ kpɔn gbeɖe. E hu ɛhwɛ mavɔmavɔ.»
30 Yesu lɔ mɔsinha na ye, ɖo ye lɔ tun mɔ: «Gbigbɔ nylakan bo le e mɛ.»
Yesu lɔ ɛmɛ xeni nyi nɔvyɛ kpodo onɔ
(Mat 12:46-50; Lwk 8:19-21)
31 Yesu we onɔ kpodo nɔvyɛye va, bo le gaji, bo dɔn ɛmɛ ɖodan na ye a do yɔ-ɛ va. 32 Ɛmɛ susu bo xlɔn onyi lɛdo-e, ye bo lɔ ni-i tun mɔ: «Kpɔn, nawe, nɔvwe ŋusunglo kpodo nyɔnusiye le gaji bo lo kan we nɔ.» 33 E bo ɖo e wu na ye tun mɔ: «Onu lɛ nyi naye? Onu lɛ nyi nɔvyee?» 34 Mi wɛ, e sa ŋukunsin gbɔn ɛmɛ xeye ni xlɔn onyi lɛdo-e ye ji, bo lɔ tun mɔ: «Naye kpodo nɔvyee xɛn. 35 Ɛmɛ ɖekpekpe xeni wasi Mawu we ojlo, ɛmɛ mɛ la wɛ nyi nɔvye ŋusunglo, nɔvye nyɔnusi kpodo naye.»