Yesu kplan onu sɔn ɛɖɛ xixo wu
11
1 Gbeɖokpo, Yesu le ofi ɖe, bo lo xo ɛɖɛ nɔ. Xena e xo ɛɖɛ vɔ, onukplanvi etɔn ɖokpo lɔ ni-i tun mɔ: «Xwetɔ, kplan ɛɖɛxixo mí, ɖi lena Jan xeni nɔ lɛ Mawu we ɛsin na ɛmɛ, kplan onukplanvi etɔnye ɖo ha.» 2 Yesu ɖo e wu na ye tun mɔ: «Na mi xo ɛɖɛ nɔ, mi lɔ tun mɔ:Míatɔ,
Na na ɛgbɛtɔye a nyɔ-ɛ tun nyikɔ tɔwe bo nyi kinkwɛn,
Xɔluɖuɖu tɔwe ni va,
3 Na mí egbe, onuɖuɖu xena o nɔ na mí onyihinhɔngbe-onyihinhɔngbe,
4 Sɔ onu nyanyla míatɔnye sɔ kɛ mí, ɖo míye can nɔ sɔ kɛ ɛmɛ xeye ni jɛ agɔ do mí ye.
Ká lɔn na mí a jɛ tintɛnkpɔn mɛ o.»
Ye na na onu ɛmɛ xeni byɔ
5 Yesu bo mɔ lɔ na ye ke tun mɔ: «E nyi tun ɛmɛ ɖe le mia mɛ, e bo ɖo hadwe ɖe, mi wɛ le ozan mima mɛ, e bo va yi fɔn-ɛ, bo lɔ ni-i tun mɔ: “Hadwe tɛye, wyan kpɔnnɔ atɔn na-a, 6 ɖo hadwe tɛye ɖe gbɔn sɔn omɔ ji fifi bo va zɛ kɔn ye, ko ko ɖo onu ɖe bo na ni-i.” 7 Ɛmɛ ɖee la bo nɔ xɔmɛ daan, bo ɖo e wu ni-i tun mɔ: “Ká mɔ do hannu na-a, ohɔn tɛye o le tutu, vikpɛ tɛyee kpo mɔ kpo bo o hlɔn onyi, ko ɔn kpewu na site a bo do na we kpɔnnɔ.” 8 Ko lo lɔ na mi nɔ tun mɔ, na e ɔn mɔ site do hadwe xena e nyi ni-i wu can, e na site do hannu xena e do ni-i nɔ wu ŋuklɛn-ŋuklɛn, a bo sɔ onu xena e kan nɔ zɛtɛye a sɔ ni-i. 9 Mi wɛ dɔn, mɔ ko lo lɔ na mi nɔ tun mɔ: mi byɔ, ye na na mi; mi kan, mi na kpɔn; mi xuxu, ye na hun na mi. 10 Ɖo, ɛmɛ ɖekpekpe xeni byɔ, e nɔ yi; ɛmɛ xeni kan, e nɔ kpɔn; ye bo nɔ hun na ɛmɛ xeni xuxu. 11 Ovitɔ ŋukɔ lɛ le mia mɛ, na ovyɛ byɔ-ɛ ohwea, e ba sɔ odan sɔ ni-i? 12 Alo na e byɔ-ɛ azin, e ba sɔ kekle sɔ ni-i? 13 Na e nyi tun mɔ, mi ɛmɛ nyanylaye, mi nyɔ onu nywɛ nina vikpɛ miatɔnye, naɖe lɛ Mawu Otɔ xeni le jiŋukunsin, ɔn na na Gbigbɔ Kinkwɛn ɛmɛ xeye ni lo byɔ-ɛ nɔ ye ɖo?»
Yesu lɔ oxo sɔn ɛhwɛ xena ye do ni-i wu
14 Gbeɖokpo, Yesu lo nya gbigbɔ nylakan xeni nɔ hu ɛɖɛkan, le dahwe ɖe mɛ nɔ, xena gbigbɔ nylakan la tɔn, dahwe la jɛ oxo lilɔ ji, e bo kpaca do otogun xeye ni le ofi la. 15 Ganke, ɛmɛ ɖeye bo lɔ tun mɔ: «Bɛlizebulu, xeni nyi gbigbɔ nylakanye we oga, wɛ nɔ ni-i ɛcɛ, e bo nɔ do nya gbigbɔ nylakanye.» 16 Ɛmɛ bu ɖeye jlo na ɖo omɔ ni-i, mi wɛ ye lɔ ni-i tun ni boo ɖe josi ɖe xlɛ gbɔn ŋudandonu wiwasi mɛ, na heye a bo do nyɔ-ɛ tun Mawu bɛ bo ɖo-e ɖodan. 17 Vɔ, Yesu nyɔ susu xeni le ota mɛ na ye, mi wɛ e lɔ na ye tun mɔ: «Na xɔluɖuto ɖe le, otovi laye bo tɔn ahwan yenɔniɔye, oto mɛ la nɔ gba, oxɔ xeye ni le oto mɛ la mɛ ye bo nɔ hɔ, ɖe do ɖe ji. 18 Na Satana va wa ahwan nɔ kpodo emyɔ ŋutɔ ɖe, naɖe lɛ xɔluɖuto etɔn na nɔ ote ɖo? Ɖo mi lɔ nɔ tun Bɛlizebulu bɛ bo na mɔ ɛcɛ na ko bo do nya gbigbɔ nylakanye nɔ. 19 E nyi tun Bɛlizebulu wɛ na mɔ ɛcɛ na ko do nya gbigbɔ nylakanye nɔ, onu lɛ na ɛcɛ ɛmɛ miatɔnye, na yee do nya gbigbɔ nylakanye nɔ? Ɛmɛ miatɔn laye ŋutɔ, wɛ na ɖe xlɛ mi tun ɛhwɛ miatɔn bo gú. 20 Vɔ, e nyi Mawu we ɛcɛ wɛ ko do nya gbigbɔ nylakanye nɔ, be e bo ɖe xlɛ tun Mawu we Xɔluɖuɖu la, bo o va mia kɔn.
21 Na ŋusunglo kanlinsu ɖe sɔ ahwan wanu ganji, bo cɔ oxwe etɔn nɔ, onu xeye na e ɖo ye, nɔ nɔ alɔ ji ni-i pɛpɛpɛ. 22 Vɔ na ɛmɛ bu, xeni ɖo hɔnhlɔn hu-i, va kpe kpo-e, bo ɖu le e ji, e na yi ahwan wanu xeye ji na e kan do nɔ ye le e si, a bo ma onu etɔnye na ɛmɛye.
23 Na ɛmɛ ɖe ɔn le ahwan tɛye mɛ, be e bo site do wu ye. Na ɛmɛ ɖe ɔn kple ɛmɛye kpo-o nɔ, be e bo nya ye do ogbe nɔ.»
Yesu lɔ oxo sɔn lena gbigbɔ nylakan nɔ lɛkɔ va ɛmɛ mɛ ɖo wu
24 «Na gbigbɔ nylakan tɔn le ɛmɛ ɖe mɛ, e nɔ va yi dan gbɔn zogbeye ji nɔ, a do kan ofi xena e na kpɔn gbɔjwɛ le. Na e ɔn kpɔn ofi ɖe, e nɔ lɔ tun mɔ: “Ko na trɔ yi oxwe tɛye gbe, ofi xena ko lɛ le.” 25 Na e trɔ va, e nɔ kpɔn tun ye bo za oxwe la gbe, onu zɛtɛye bo le tito nu le ofi la. 26 Na e kpɔn-ɛ ɖo mɔsinha, e nɔ va yi kplɔ gbigbɔ nylakan acowe, xeye ni nyla hugan-ɛ ye, do va oxwe la gbe, ye ba jɛ agban do blɛ. Vivɔnu etɔn, ɛmɛ mɛ la we ninɔmɛ mɔ nɔ va nyla hugan saatɔn.»
Nyɔna adodwe la
27 Oxo mɛ la wɛ Yesu lo lɔ nɔ kpoŋu, mi wɛ nyɔnu ɖe kɔ ogbe yi oji bo lɔ ni-i tun mɔ: «Nyɔnanɔ wɛ nyi nyɔnu xeni hɛn gomigban tɔwe, nyɔnanɔ wɛ nyi nyɔnu xeni na we anɔ.» 28 Vɔ, Yesu bo ɖo e wu ni-i tun mɔ: «O o! Ɛmɛ xeye ni nɔ se Mawu we oxo, bo nɔ wasi do e ji ye, wɛ nyi nyɔnanɔ.»
Yesu gbɛ josi wiwasi
29 Xena ɛmɛ susu gbagbagba ɖeye va trɔ do Yesu nɔ, e jɛ lilɔ ji na ye tun mɔ: «Jijimɛvi egbetɔn xeye, ɛmɛ nyanylaye wɛ ye nyi. Ye lo kan josi xeni na ɖe xlɛ ye tun Mawu bɛ bo wa odan nɔ, vɔ, oxolɔɖonyitɔ Jonasi we josi kɛɖɛ jan wɛ ye na kpɔn. 30 Ɖo, lena Jonasi nyi josi na Ninivu we oto mɛtɔye ɖo, mɔsinha ke wɛ Ɛgbɛtɔ we Ovi la na nyi josi na jijimɛvi xeye ɖo. 31 Le ɛhwɛɖɔzangbe, xɔlu nyɔnusi xeni kpa ɛcɛ saa le Saba we kansinmɛ, na site kpan ŋukɔn jijimɛvi xeye, a bo do ɛhwɛ na ye, ɖo, kansinmɛ dindyɔnye wɛ e sɔn bo do va se onunyinywɛ we oxo Salomɔtɔn. Vɔ, ɛmɛ xeni le bwɛ, bo hugan Salomɔ. 32 Le ɛhwɛɖɔzangbe, Ninivutɔye na site kpan ŋukɔn jijimɛvi xeye, a bo do ɛhwɛ na ye, ɖo, xena ye se Mawu we oxo xena Jonasi lɔ, ye ɖɔli jijɔ. Vɔ, ɛmɛ xeni le bwɛ, hugan Jonasi.»
Ŋukunsin wɛ nyi zogyan na agbaza
33 Yesu mɔ yi e ji, bo lɔ tun mɔ: «Ɛmɛ ti ɔn nɔ tɛ zogyan a bo sɔ hwla alo a bo sɔ tɔka sɔ cɔn-ɛ. Vɔ ye nɔ sɔ-ɛ sɔ ɖo onu ji na ɛmɛ xeye ni ɖyɛ ofi la nɔ ye, a do kpɔn kinklɛn etɔn. 34 Ŋukunsin wɛ nyi zogyan na agbaza tɔwe. Na ŋukunsin tɔwe le nywɛɖe, be agbaza tɔwe la seŋu bo le kinklɛn mɛ. Vɔ na ŋukunsin tɔwe ɔn le nywɛɖe, be agbaza tɔwe can le vuvlu mɛ. 35 Mi wɛ dɔn, cɔ ɖiwe na kinklɛn xeni le myɔ mɛ ko mɔ nyi vuvlu nɔ. 36 Na e nyi tun agbaza tɔwe la seŋu le kinklɛn mɛ, ofi ti ko le vuvlu mɛ, be agbaza tɔwe la seŋu, le kinklɛn mɛ ɖi lena zogyan nɔ tɛ do ji we kpo kinklɛn etɔn ɖo ha.»
Yesu do ɛhwɛ na Falizitɔye kpodo osɛnkplan-ɛmɛtɔye
37 Hwexenu na Yesu lɔ oxo nɔ, Falizitɔ ɖe va yɔ-ɛ tun ni boo va ɖu onu le he kɔn ye. Yesu ɖyɛ oxwe la gbe bo yi tɛnxo a do ɖu onu. 38 Xena Falizitɔ la kpɔn tun Yesu bo ɔn klɔ alɔ ɖi lena walɔ yetɔn byɔ ɖo ha gbɔxwe jɛ onu la ɖuɖu ji, e kpaca-ɛ. 39 Mi wɛ Xwetɔ la lɔ ni-i tun mɔ: «Miye Falizitɔye mi nɔ klɔ goto na kɔkpo kpodo agban kpo na ye a do mɛ, vɔ oji miatɔnye bo gɔ kpo ɛfin kpodo danu wiwa. 40 Yɛyinɔye wɛ mi nyi. Ɛmɛ xeni wasi godo la ke hɛn wasi dɔmɛ la can wɛɛ? 41 Mi sɔ onu xeni le kɔkpo la kpodo agban la mɛ, sɔ na ayanɔye, hwemɛnu, onu zɛtɛye bo na nyi onu mimɛ na mi.
42 Babaa na mi, Falizitɔye, ɖo, mi nɔ na maɖowo amahwɛnnywɛ mati kpodo hlu kpo tɔn, mi bo mɔ nɔ na maɖowo omaye tɔn, vɔ mi bo nɔ ɖe okɔ le onu jijwɛ wiwasi kpodo owan yiyi na Mawu wu. Xena mi ɖo na wasi laye bɛ mɛ, e ko nyi tun mi na jo gbokpweye can do hɛn.
43 Babaa na mi, Falizitɔye, ɖo mi nɔ yi owan na okpo tantyantɔnye ji ninɔ le okplityɔn míatɔnye, mi bo mɔ nɔ yi owan na ogbe dido kpodo sisi kpo le dogbaye ji. 44 Babaa na mi ɖo mi le ɖi yɔgun xeye na ye ɔn do josi ye ha, ɛmɛye bo nɔ gbɔn ye ji nɔ le ma nyɔ-ɛ mɛ.»
45 Osɛnkplan-ɛmɛtɔ ɖe lɔ ni-i tun mɔ: «Onukplan-ɛmɛtɔ, na o lɔ oxo ɖo mɔsinha nɔ, be o lo zun míye can nɔ.» 46 Yesu ɖo e wu ni-i tun mɔ: «Babaa na mi, osɛnkplan-ɛmɛtɔye can, mi nɔ do agban kpinkpɛnye xeni nɔ vɛ hinhɛn na ɛmɛye, vɔ miye ŋutɔ ko nɔ wa onu ti kanŋukonu a do hɛn ye kpo ye. 47 Babaa na mi, ɖo oxolɔɖonyitɔ xeye na mia dagbwaye hu ye, mi nɔ ɖo acɔ na yɔgun yetɔnye, 48 e mɛ la bo ɖe xlɛ tun miye bo yi ogbe na onu xena ye bo wasi ye, ɖo, yee hu oxolɔɖonyitɔ laye, miye bo nɔ ɖo acɔ na yɔgun yetɔnye nɔ! 49 Mi wɛ dɔn, Mawu do lɔ oxo dogbɔn onunyinywɛ etɔn mɛ tun mɔ: “Ko na ɖo oxolɔɖonyitɔye kpodo ɛmɛ dindɔnye ɖodan ye, ye na hu ɛmɛ ɖeye le ye mɛ, a bo do aya na ɛmɛ ɖeye.” 50 Do e mɛ la wu, Mawu na byɔ oxolɔɖonyitɔ xeye na ye hu sɔn ɛgbɛ la we gɔnmɛ jijɛ gbɔɔn ye, we ohlɔn do jijimɛvi egbetɔnye si, 51 sɔn Abɛli ji gbɔɔn do va yi jɛ Zakali xena ye hu le Mawu we oxwegbe le ovɔsinsan we agba la kpodo tɛnxo kinkwɛn la gblamɛ, ji. Ɛɛn! Ko lo lɔ na mi nɔ, jijimɛvi egbetɔnye si wɛ ye na byɔ ohlɔn do.
52 Babaa na mi osɛnkplan-ɛmɛtɔye, ɖo mi sɔ cavi xeni nɔ hun onunyinywɛ we ohɔn la. Miye ŋutɔ ɔn ɖyɛ e mɛ nɔ, mi bo mɔ gbo omɔ na ɛmɛ xeye ni jlo na ɖyɛ e mɛ nɔ ye.»