Yesu dɔn onukplanvi kanɖegban ŋukun owe ɖodan, na ye a do yi jla Mawu we oxo
10
1 E mɛ godo, Xwetɔ la can onukplanvi kanɖegban ŋukun owea buye, bo ɖo ye ɖodan owe-owe, na ye a jɛ ŋukɔn ni-i a do yi toxoye kpodo ofi xeye na emyɔ ŋutɔ ɖo na yi ye. 2 E bo lɔ na ye tun mɔ: «Ɛjinukun susu wɛ le ye bo na ɖe, vɔ odanwantɔye ɔn su. Mi ɖe kuku na Xwetɔ xetɔn ni nyi ɛjinukun la, tun ni boo mɔ ɖo odanwatɔye ɖodan, na ye a do yi ɖe ɛjinukun laye. 3 Mi kpɔn! Ko ɖo mi ɖodan nɔ, le ɖi lɛngbɔviye ha le ohlaye mɛ. 4 Mi ká hɛn oho, mi ká hɛn oglo, mi ká hɛn afɔkpa, mi ká nɔ ote le omɔ ji a do do ogbe na ɛmɛ ɖe. 5 Oxwe ɖekpekpe gbe na mi na ɖyɛ, mi ba lɔ gbɔxwe tun mɔ: “Fifa ni nɔ oxwe xe gbe.” 6 Na fifa we ɛmɛ ɖe le blɛ, fifa miatɔn na nɔ kpo-e. Na e ɔn nyi mɔsinha, fifa miatɔn na mɔ trɔ va na mi. 7 Mi nɔ oxwe xe gbe na fifa we ɛmɛye le la, mi ɖu, a bo nu onu xena ye na na mi le blɛ ye, ɖo odanwatɔ ɖo na yi odan xena e wa we axɔtu. Mi ká gbɔn oxwegbe-oxwegbe nɔ. 8 Na mi ɖyɛ toxo ɖe mɛ, ye bo yi mi, mi ɖu onu xena ye na xwle mi. 9 Mi gɔ adɔn na adɔnnɔ xeye ni le blɛ, a bo lɔ na otovi laye tun mɔ: “ Mawu we Xɔluɖuɖu la o tɛkpɔ mi.” 10 Vɔ, na mi va ɖyɛ toxo ɖe mɛ, ye ko yi mi, be mi tɔn jɛ dogbaji, a bo lɔ na ɛmɛ zɛtɛye tun mɔ: 11 Toxo miatɔn we ofinzɔ, xeye ni le afɔ na mí, mí xuxub ye kpan ŋukɔn mi. Vɔ, mi na nyɔ-ɛ tun mɔ: “ Mawu we Xɔluɖuɖu la o tɛkpɔ mi.”» 12 Yesu mɔ yi e ji, bo lɔ na ye nɔ tun mɔ: «Le ɛhwɛɖɔzangbe, oto dindɔn toxo mɛ la tɔn, na hugan Sodomu we toxo we oto dindɔn.»Ye na dɔn oto na ɛmɛ xeye ni ɔn kan do Yesu we oxo ji ye
13 «Babaa na mi Kolazɛntɔye! Babaa na mi Bɛtisayidatɔye! Ɖo, e do nyi tun ŋudandonu xeye ni jɔ le mia de, do jɔ le Tilu kpo Sidɔn we otoye mɛ wɛ, be sɔn xoxo gbɔɔn wɛ otovi mɛ ye, o na trɔ ji mɛ, a bo sɔ dɔkpoyec sɔ do, a bo lɛ ofin. 14 Mi wɛ dɔn, le ɛhwɛɖɔzan la gbe oto dindɔn miatɔn na hugan Tilutɔye kpo Sidɔntɔye tɔn. 15 Miye Kapɛnawumutɔye, mi bu-i tun Mawu na kɔ toxo miatɔn do yi kaka jiŋukunsin wɛɛ? Gbeɖekpɔn, kaka kutomɛ wɛ Mawu na ɖiɖi-i jɛ ote do.»
16 Yesu mɔ lɔ na ye tun mɔ: «Ɛmɛ xeni ɖo oto mi, mɔ wɛ e ɖo oto, ɛmɛ xeni gbɛ mi, mɔ wɛ e gbɛ. Vɔ ɛmɛ xeni gbɛ mɔ, e gbɛ ɛmɛ xeni ɖo-o ɖodan.»
Onukplanvi kanɖegban ŋukun owe laye va ɖo ogbe na Yesu
17 Onukplanvi kanɖegban ŋukun owe laye, trɔ gbɔn va kpo jijwɛ kpo, bɔ lɔ nɔ tun mɔ: «Xwetɔ, gbɔɔn do jɛ gbigbɔ nylakanye ji, na mi ɖe ogbe do ye le nyikɔ tɔwe mɛ, ye nɔ ɖo oto mí!» 18 Yesu ɖo e wu na ye tun mɔ: «Ko o kpɔn lɛgba nɔ, e bo flɛ nɔ sɔn jiŋukunsin ɖi kinklɛn ha. 19 Mi ɖo oto: ko na mi ɛcɛ, na mi a do zɔn zɔnlin gbɔn odanye kpodo kekleye ji, a bo do ɖu le kɛntɔ la we hɔnhlɔn zɛtɛye ji, onu ti ɔn kpewu wa onu nyanyla ɖe kpo mi nɔ. 20 Mi ká kpɔn jijwɛ tun gbigbɔ nylakanye ɖo oto mi, vɔ, mi kpɔn jijwɛ ɖo Mawu wlan nyikɔ miatɔnye le jiŋukunsin.»
Yesu kpɔn jijwɛ do Otɔ la wu
21 Zɔnɖokpo kpoŋu, Gbigbɔ Kinkwɛn do jijwɛ ɖaxo ɖe na Yesu, e bo kɔ ogbe yi oji bo lɔ tun mɔ: «Otɔ, xeni kpa ɛcɛ na jiŋukunsin kpodo nyixɔ kpo, ko do ɛkpɛ na we, ɖo onu xeye na o sɔ hwla do zinzinnɔye kpo onunywɛtɔye, wɛ o ɖe xlɛ vikpɛviye. Ɛɛn Otɔ, o jlo tun ni boo nyi ɖo mɔsinha.
22 Didaye sɔ onu zɛtɛye sɔ na-a. Ɛmɛ ti ɔn nyɔ Ovi la, zɛgbɔn Otɔ la wu. Ɛmɛ ti ko mɔ nyɔ Otɔ la, zɛgbɔn Ovi la wu kpodo ɛmɛ xeye na Ovi la jlo na ɖe-e sɔ xlɛ ye.»
23 E mɛ godo, Yesu trɔ kpan ŋukɔn onukplanvi etɔn laye, bo lɔ na ye ɖoɖyo tun mɔ: «Nyɔnanɔ wɛ nyi, ɛmɛ xeye ni lo kpɔn onu xena mi kpɔn nɔ fifi ye. 24 Ɖo, ko lo lɔ na mi nɔ tun, saa we oxolɔɖonyitɔ susu kpodo xɔluye, jlo na kpɔn onu xeye na mi lo kpɔn nɔ xeye, vɔ, ye ko kpewu kpɔn ye. Ye jlo na se oxo xe na mi lo se nɔ, vɔ ye ko kpewu se-e.»
Yi owan na Mawu tɔwe kpodo hawetɔ ɛgbɛtɔ
25 Osɛnkplan-ɛmɛtɔ ɖe, yi oxo a do do Yesu kpɔn. Mi wɛ e kan-ɛ se tun mɔ: «Onukplan-ɛmɛtɔ, ɛlɛ ko na wa a do kpɔn Ɛgbɛ Mavɔmavɔ?» 26 Yesu bo ɖo e wu ni-i tun mɔ: «Naɖe lɛ Mawu we Osɛn la lɔ do oxo mɛ la wu? Naɖe o se e gɔnmɛ ɖo?» 27 Osɛnkplan-ɛmɛtɔ la bo ɖo e wu ni-i tun mɔ: «O na yi owan na Xwetɔ Mawu tɔwe kpo oji tɔwe blebu, okla tɔwe blebu, ayixa tɔwe kpodo hɔnhlɔn tɔwe zɛtɛye seŋu. O ba mɔ yi owan na hawetɔ ɖi myɔ ŋutɔ ha.» 28 Yesu bo mɔ lɔ ni-i tun mɔ: «O lɔ-ɛ nywɛɖe, nɔ wasi ɖo mɔsinha, o ba nɔ ɛgbɛ.»
Yesu do olo do dahwe Samalitɔ ɖe wu
29 Vɔ, na do ɖe xlɛ tun ɛhwɛ hetɛye bo jɔ, osɛnkplan-ɛmɛtɔ la bo kan Yesu se tun mɔ: «Onu lɛ ko na yɔ tun hayetɔ ɛgbɛtɔ?» 30 Yesu bo ɖo e wu ni-i tun mɔ: «Dahwe ɖokpo sɔn Jeluzalɛmu we toxo mɛ bo do va yi Jeliko we toxo mɛ nɔ. Hwexenu na e sɔn nɔ, e bo va yi jɛ jagudaye we alɔ mɛ le omɔ la ji, ye bo xo-e gbɔɔn bo jo-e do beɖe-beɖe. E mɛ godo, ye bɛ onu etɔn zɛtɛye seŋu, bo sɔ sɔn, bo jo-e do omɔ la ji. 31 Le vlavo mɛ, ovɔsantɔ Mawutɔn ɖokpo bo gbɔn omɔ la ji bo do va yi nɔ. Xena e kpɔn ɛmɛ xena jagudaye xo la, e gbɔn azɔga bo sɔn. 32 Mɔsinha ke wɛ, dahwe ɖokpo xeni tɔn sɔn Lewi we akɔta mɛ, gbɔn omɔ ɖokpo la ji bo do va yi nɔ. Xena emyɔ can kpɔn ɛmɛ xena jagudaye xo la, e gbɔn azɔga bo sɔn. 33 Vɔ, dahwe Samalitɔ ɖokpo xeni lo yi omɔ ji nɔ, bo gbɔn omɔ mɛ la ɖokpo bo do va sɔn nɔ. Xena e kpɔn ɛmɛ xena jagudaye xo la, e ɖu adɔnu ni-i, e bo tre le e kɔn. 34 Dahwe Samalitɔ la bo gogo-e ganji, bo klɔ abi etɔnye kpodo vɛnd kpodo amie, e bo vun avɔ ɖe bo do bla abi laye ni-i. E mɛ godo, e bo kɔ-ɛ do osɔ kɛtɛ etɔn ji, bo kplɔ-ɛ do yi omɔjiyitɔye we oxwe ɖokpo gbe, a bo mɔ do wle obyo ni-i ganji. 35 Onyihinhɔngbe etɔn, dahwe Samalitɔ la bo sɔ ohoganf sɔ na oxwejikpɔntɔ la, bo lɔ ni-i tun mɔ: “Wle obyo ni-i, na e mɔ do hyan oho ɖekpekpe can, zan do e wu, hwexenu na ko na trɔ va sɔn nɔ, ko bo na tu oho gbokpwe la na we.”» 36 Xena Yesu lɔ mɔsinha vɔ, e kan osɛnkplan-ɛmɛtɔ la se tun mɔ: «Le ɛmɛ atɔn mɛ laye mɛ, onu lɛ ɖe xlɛ tun he bo nyi ɛmɛ xena ye xo la we hatɔ dogbɔn onukpinkpɔn tɔwe mɛ?» 37 Osɛnkplan-ɛmɛtɔ la bo ɖo e wu tun mɔ: «Ɛmɛ xeni kpɔn dɔŋuɖunu na dahwe la wɛ.» Mi wɛ Yesu lɔ ni-i tun mɔ: «Va sɔn, myɔ can o ba nɔ va yi wasi ɖo mɔsinha.»
Mata yi Yesu do oxwe etɔn gbe
38 Xena Yesu kpodo onukplanvi etɔnye kpo le omɔ ji bo lo sɔn nɔ, e va yi ɖyɛ otota ɖe mɛ, nyɔnu ɖe, xe we nyikɔ ni nɔ nyi Mata, bo yi-i do oxwe etɔn gbe. 39 Mata bo ɖo nɔvi nyɔnusi ɖe xeni nɔ nyi Malya. Malya la bo va xlɔn onyi le aha na Yesu, bo lo ɖo oto oxo xena e lo lɔ nɔ. 40 Mata bo jɛ tagba susu nɔ, a do kpewu yi jonɔ na ye. E bo va Yesu de, bo lɔ ni-i tun mɔ: «Xwetɔ, lena nɔvye jo odan la zɛtɛye do okɔ na mɔ ɖokpo gee ɖo, e ɔn ɖi onu ti na we wɛɛ? Be bo lɔ ni-i tun ni boo kpedo wu ye.» 41 Xwetɔ la ɖo e wu ni-i tun mɔ: «Mata, Mata, o lo so jikan nɔ, bo jɛ tagba nɔ na onu susu, 42 vɔ, onu ɖokpo gee wɛ le vivɛɖe. Malya bo sɔ adodwe la, ɛmɛ ɖe ko va yi-i le e si nɔ.»