Yesu dɔn odan onukplanvi weve laye
9
1 Yesu yɔ onukplanvi weve laye, bo na ye hɔnhlɔn kpo ɛcɛ kpikpa kpo, na ye a do nya gbigbɔ nylakan zɛtɛye, a bo gɔ adɔn na ɛmɛye. 2 E mɛ godo, e bo dɔn ye ɖodan tun ye boo jla Mawu we Xɔluɖuɖu la, a bo gɔ adɔn na adɔnnɔye. 3 E bo lɔ na ye tun mɔ: «Na mi lo sɔn nɔ, mi ká sɔ onu ti. Okpo hɛn asi wɛ, oglo wɛ, kpɔnnɔ wɛ, oho wɛ, mi ká hɛn onu ti. Ɖokpo-ɖokpo miatɔn ni ká hɛn awu ti. 4 Na ye yi mi le oxwe ɖe gbe, mi nɔ blɛ la gbɔɔn do yi hwexenu na mi na va sɔn le toxo la mɛ. 5 Na ɛmɛye ɔn yi mi le ofi ɖe, mi tɔn le toxo la mɛ, a bo hunhun ofinzɔ xeni le afɔ miatɔnye, a bo do ɖe xlɛ ye tun onu nyanyla bɛ ye bo wasi.» 6 Onukplanvi laye bo sɔn, ye bo gbɔn otaye mɛ nɔ, bo do jla Ɛwɛn Nywɛ la nɔ. Ye bo gɔ adɔn na adɔnnɔye gbɔn ofi zɛtɛye nɔ.Xɔlu Elodu kan odo se na Yesu
7 Xɔlu Elodu, xeni ɖu oga le Galile we kansinmɛ, se onu zɛtɛye xeni jɔ nɔ laye. E ko nyɔ susu xena e na bu do ye wu. Ɖo ɛmɛ ɖeye lo lɔ nɔ tun mɔ: «Jan xeni nɔ lɛ Mawu we ɛsin na ɛmɛ, wɛ fɔn sɔn oku.» 8 Ɛmɛ buye bo lɔ nɔ tun mɔ: «Eli wɛ trɔ va.» Ɛmɛ ɖeye can bo lɔ nɔ tun mɔ: «Oxolɔɖonyitɔ saatɔn ɖe wɛ fɔn sɔn oku.» 9 Vɔ Elodu bo tun mɔ: «Mɔ ŋutɔ, ko na ogbe, ye bo gbo ota na Jan, onu lɛ mɔ nyi ɛmɛ xe la, xena ko se oxo ɖoɖooɖo mɛ ye do e wu nɔ la?» E bo kan nɔ na kpɔn ŋumɛ na Yesu.
Yesu na onuɖuɖu ɛmɛ akpo atun
10 Xena ɛmɛ dindɔn laye trɔ gbɔn vɔ, ye lɔ onu zɛtɛye xena ye wasi, na Yesu. E bo kplɔ ye ɖoɖyo, ye bo sɔn yi toxo xena ye nɔ yɔ tun Bɛtisayida we akpaji. 11 Vɔ, xena ɛmɛye kpɔn ɖo mɔsinha, ye kplɔ Yesu do. E bo yi ye, bo lɔ oxo na ye nɔ do Mawu we Xɔluɖuɖu wu, e bo mɔ gɔ adɔn nɔ na ɛmɛ xeye ni le adɔngigɔ we ohyan mɛ ye. 12 Xena ozin lo cɔn nɔ, onukplanvi weve laye bo tɛkpɔ Yesu, bo lɔ ni-i tun mɔ: «Ɖe ogbe na ɛmɛ laye na ye a sɔn yi ototaye mɛ kpodo oxwe xeye ni tɛkpɔ bwɛ ye mɛ. Ye ba do kpɔn ofi xena ye na nɔ kpodo onu xena ye na ɖu, ɖo zogbeji wɛ mí le.» 13 Yesu bo ɖo e wu na ye tun mɔ: «Miye ŋutɔ, mi na ye onuɖuɖu.» Vɔ ye bo ɖo e wu ni-i tun mɔ: «Kpɔnnɔ atun kpodo ohwe owe jan wɛ mí ɖo. Alo, mí a va yi xɔ onuɖuɖu na ɛmɛ ɖoɖooɖo mɛ laye wɛɛ?» 14 Vɔ, ŋusunglo mɛhyɔn akpo atun ha wɛ le ofi la. Yesu bo lɔ na onukplanvi etɔn laye tun mɔ: «Mi ma ye do kanɖewo-kanɖewo ha, ye ba xlɔn onyi.» 15 Onukplanvi laye bo wasi ɖo mɔsinha. Ye bo na na ɛmɛ zɛtɛye xlɔn onyi seŋu. 16 Yesu bo sɔ kpɔnnɔ atun laye kpodo ohwe owe laye, bo ɖe okɔ kpɔn jiŋukunsin, bo do ɛkpɛ na Mawu. E bo wɛn ye, bo sɔ na onukplanvi etɔnye tun ye ni boo ma na ɛmɛyea. 17 Ɛmɛ zɛtɛye bo ɖu onu, gomi bo gɔ ye. Ye bo bɛ gbokpwe xeye na ye ɔn ɖu ye do jaxwi mɛ gbɔɔn jaxwi weve bo gɔ.
Piyɛ lɔ tun Yesu bɛ bo nyi Klisu Mawutɔn la
18 Gbeɖokpo, Yesu le azɔga bo lo xo ɛɖɛ nɔ, onukplanvi etɔnye bo le e kɔn. Yesu bo kan ye se tun mɔ: «Onu lɛ ɛmɛye nɔ lɔ tun ko bo nyi?» 19 Onukplanvi laye bo ɖo e wu ni-i tun mɔ: «Ɛmɛ ɖeye nɔ lɔ tun myɔ bo nyi Jan xeni nɔ lɛ Mawu we ɛsin na ɛmɛ, ɛmɛ ɖeye bo nɔ lɔ tun myɔ bɛ bo nyi Eli. Ɛmɛ buye bo nɔ lɔ tun oxolɔɖonyitɔ saatɔnye we ɖokpo xeni fɔn sɔn oku bɛ myɔ bo nyi.» 20 Yesu bo kan ye se tun mɔ: «Miye ɖe, onu lɛ mi nɔ lɔ tun mɔ bo nyi?» Piyɛ bo ɖo e wu tun mɔ: «Myɔ wɛ nyi Klisu Mawutɔn la.»
Yesu lɔ oxo sɔn oku etɔn wu
21 Yesu bo gbɛ na ye titeŋugbetɔn tun ye boo ká mɔ lɔ oxo mɛ la na ɛmɛ ɖe. 22 E bo mɔ lɔ tun mɔ: «Ɛgbɛtɔ we Ovi la ɖo na ɖu aya susu. Otomɛhyɔnye, Mawu we ovɔsantɔ ɖaxoye kpodo osɛnkplan-ɛmɛtɔye bo na gbɛ-ɛ. Ɛmɛye na hu-i vɔ onyihinhɔn atɔngɔ gbe etɔn, e bo na fɔn sɔn oku.»
Lena ye na kplɔ Yesu do ɖo
23 Yesu bo lɔ na ɛmɛ zɛtɛye tun mɔ: «Na ɛmɛ ɖe na kplɔ-ɔ do, e ɖo na gbɛ onu le eɖe wu, a bo kɔ otinsoga etɔn onyihinhɔngbe-onyihinhɔngbe, a bo kplɔ-ɔ do. 24 Ɖo, ɛmɛ ɖekpekpe xeni jlo na hwlɛn ɛgbɛ etɔn gan, na bu-i. Vɔ ɛmɛ ɖekpekpe xeni na bu ɛgbɛ etɔn do mɔ wu ye, na hwlɛn-ɛ gan. 25 Na ɛmɛ ɖe ɖo ɛgbɛ mɛ bwɛ we dɔkunnuye seŋu, vɔ e bo bu ɛgbɛ etɔn, alo e bo crɔn, ale ŋukɔ lɛ e nyi ni-i? 26 Na ŋunya wa ɛmɛ ɖe do mɔ kpodo oxo tɛyee wu, ŋunya na va wa Ɛgbɛtɔ we Ovi la can do emyɔ la wu, le hwexenu na Ɛgbɛtɔ we Ovi la na va le gigo etɔn mɛ, kpodo Mawu Otɔ la kpo Mawu we ɛwɛndotɔ kinkwɛnye we gigo mɛ. 27 Ko lo lɔ na mi nɔ le oxojɔxo mɛ tun, le ɛmɛ xeye ni le bwɛ ye mɛ, ɛmɛ ɖeye ɔn ku nɔ gbɔxwe ye na do kpɔn Mawu we Xɔluɖuɖu la.»
Piyɛ, Jan kpodo Jaki, kpɔn Yesu le Mawu we gigo mɛ
28 Xena Yesu lɔ oxo mɛ laye vɔ, onyihinhɔn atrotɔn ha va yi, e bo kplɔ Piyɛ, Jan kpodo Jaki kpo, bo xɛ okpó ɖe ji, a do va yi xo ɛɖɛ. 29 Hwexenu na e lo xo ɛɖɛ nɔ, ŋumɛ etɔn bo ɖɔli, awu etɔn bo trɔ zun owe pepepe bo da ozo nɔ. 30 Zɔnɖokpo, dahwe owe ɖeye bo va jɛ jɛtun kpo-e nɔ. Mɔyizi kpodo Eli wɛ nyi ɛmɛ owe laye. 31 Ye bo ze le Mawu we gigo mɛ. Yesu kpo ye kpo bo lɔ oxo nɔ sɔn lena e na va vɔ odan etɔn ɖo, a bo do ku le Jeluzalɛmu. 32 Piyɛ kpodo ɛmɛ xeye kpo mi kpo ni le okpɔ ye, bo o dɔ awlɔn tototo. Xena ye fɔn, ye kpɔn Yesu we gigo kpodo ɛmɛ owe xeye ni le kpo-e ye. 33 Hwexenu na Mɔyizi kpodo Eli, lo lɛ le Yesu kɔn nɔ, Piyɛ lɔ tun mɔ: «Xwetɔ, bwɛ xena mí le, e nyɔ; mí a wasi zava atɔn, ɖokpo na nyi tɔwe, ɖokpo na nyi Mɔyizitɔn, ɖokpo ba nyi Elitɔn.» Vɔ, Piyɛ ɔn nyɔ oxo xena e lo lɔ nɔ. 34 Hwexenu na e mɔ gbɛ lɔ oxo nɔ, sunwɔ ɖe va cɔn ye ji. Onukplanvi laye bo vɔ le hwexenu na sunwɔ la lo cɔn ye ji nɔ. 35 Ogbe ɖe bo ɖi le sunwɔ la mɛ, bo lɔ tun mɔ: «Ɛmɛ xe la wɛ nyi ovi tɛye xena ko can, mi ɖo oto-e.» 36 Xena ogbe la ɖi vɔ, e bo va drɔn Yesu ɖokpo gee. Onukplanvi laye bo bɔ onu do onu xena ye kpɔn laye ji, ye ko lɔ oxo ɖe na ɛmɛ ɖe le azan mɛ laye mɛ.
Yesu nya gbigbɔ nylakan le ovi ɖe mɛ
37 Le onyihinhɔngbe etɔn, xena ye jɛ ote le okpó la ji, ɛmɛ susu gbagbagba ɖeye va kpe Yesu. 38 Le ɛmɛ laye mɛ, dahwe ɖe do axwa bo tun mɔ: «Onukplan-ɛmɛtɔ, ko ɖe kuku na we, ɖe okɔ kpɔn ovi tɛye, ɖo ovi ɖokpo gee xena ko ɖo la mɛ. 39 Hwe ɖeye nu, gbigbɔ ɖe nɔ va jɛ e ji, e ba do axwa nɔ, a bo hunhun nɔ tititi, ɛdyɔ ba gbɔn onu ni-i nɔ. Gbigbɔ la nɔ do vivɛsise ni-i taŋu, e bo nɔ syɛnxu taŋu gbɔxwe gbigbɔ la nɔ do va jo-e do. 40 Ko bo ɖe kuku na onukplanvi tɔweye tun ye boo nya gbigbɔ la le e mɛ, vɔ ye ɔn kpewu.» 41 Yesu bo yi oxo, bo lɔ tun mɔ: «Miye, ɛmɛ nyanylaye kpodo ɛmɛ xeye ni ɔn kan do Mawu ji ye wɛ mi nyi. Gbɔɔn do jɛ ogan ŋukɔ mɛ lɛ ko na nɔ mia kɔn na, a bo do do agbɔxo nɔ?» E mɛ godo, Yesu bo lɔ na ovitɔ la tun mɔ: «Kplɔ ovi tɔwe la va bwɛ!» 42 Hwexenu na ovi la gbɔn nɔ Yesu de nɔ, gbigbɔ nylakan la bo kɔ-ɛ sɔ xu onyi, bo hunhun-i kpodo hɔnhlɔn kpo. Vɔ, Yesu bo ɖe ogbe do gbigbɔ nylakan la, bo tun okan na ovi la. E bo sɔ-ɛ sɔ na otɔ. 43 Lena Mawu we hɔnhlɔn glo ɖo, e kpaca do ye taŋu.
Yesu mɔ lɔ oxo sɔn oku etɔn wu
Onu xeye na Yesu lo wasi nɔ ye bo jɛŋu na ɖokpo-ɖokpo yetɔn nɔ, Yesu bo lɔ na onukplanvi etɔnye tun mɔ: 44 «Miye, mi ɖo oto ganji a bo se oxo xena ko lɔ na mi nɔ le fifi. Ye na sɔ Ɛgbɛtɔ we Ovi la sɔ jo na ɛmɛye.» 45 Vɔ, onukplanvi laye ɔn se oxo mɛ la we gɔnmɛ. Mawu sɔ oxo la we gɔnmɛsise sɔ hwla do ye, na ye ko mɔ do se e gɔnmɛ nɔ. Onukplanvi laye bo vɔ oxo la kinkan Yesu se nɔ.
Ɛmɛ xeni nyi ɛmɛ ɖaxo
46 Onukplanvi laye bo jɛ onu dindɔn ji le yeɖe mɛ, a do nyɔ ɛmɛ xeni nyi ɛmɛ ɖaxo le ye mɛ. 47 Xena Yesu nyɔ susu xeni le oji yetɔn mɛ, e kplɔ vikpɛvi ɖe bo sɔ ɖo aha, 48 e bo lɔ na ye tun mɔ: «Ɛmɛ ɖekpekpe xeni na yi vikpɛvi xe le nyikɔ tɛye mɛ, mɔ ŋutɔ wɛ e yi. Ɛmɛ xeni yi-u, e yi ɛmɛ xeni dɔn-ɔ ɖodan. Ɖo, ɛmɛ xeni nyi vikpɛvi le mi ɛmɛ zɛtɛye mɛ, mi wɛ nyi ɛmɛ ɖaxo.»
Ɛmɛ xeni nyi ɛmɛ miatɔn
49 Jan bo yi oxo bo lɔ tun mɔ: «Xwetɔ, mí kpɔn dahwe ɖe, e bo nya gbigbɔ nylakanye le nyikɔ tɔwe mɛ nɔ, mí bo jlo na gbɛ ni-i, ɖo e ɔn nyi onukplanvi tɔwe ɖi míye ha.» 50 Vɔ, Yesu bo lɔ na ye tun mɔ: «Mi ká gbɛ ni-i o, ɖo ɛmɛ xeni ɔn site do mia wu, ɛmɛ miatɔn wɛ e nyi.»
Yesu sɔ omɔ na do yi Jeluzalɛmu
51 Vɔ, hwexenu na Mawu na kɔ Yesu tɛ le ɛgbɛ la mɛ lo tɛkpɔ nɔ, Yesu bo sɔ ogbeta taŋu, a do yi Jeluzalɛmu we toxo mɛ. 52 E bo sɔ ɛwɛndotɔye ɖodan, na ye a jɛ ŋukɔn ni-i. Ɛwɛndotɔ laye bo jɛ omɔ, ye bo ɖyɛ Samalitɔye we otota ɖe mɛ, a do wasi jijlaɖoye ɖo onyi ni-i. 53 Vɔ, otota la mɛ tɔye ɔn yi-i, ɖo e lo sɔn yi Jeluzalɛmu we toxo mɛ nɔ. 54 Xena onukplanvi etɔnye, Jan kpo Jaki kpo, kpɔn ɖo mɔsinha, ye lɔ tun mɔ: «Xwetɔ, o jlo tun mí a ɖe ogbe na ozo a jɛ ote sɔn jiŋukunsin a bo fyɔ ye wɛɛ?»
Yesu lɔ oxo sɔn lena ye na kplɔ-ɛ do ɖo wu
57 Hwexenu na ye le omɔ ji bo lo sɔn nɔ, ɛmɛ ɖe lɔ na Yesu tun mɔ: «Ofi ɖekpekpe xena o na yi, ko na xo do we.» 58 Yesu bo ɖo e wu ni-i tun mɔ: «Owɔye ɖo ogun xe mɛ na ye nɔ nɔ, oxɛye bo ɖo adɔ, vɔ, Ɛgbɛtɔ we Ovi la, e ɔn ɖo ofi xena e na sɔ ota sɔ ɖo.»
59 Yesu bo lɔ na ɛmɛ ɖe tun mɔ: «Kplɔ-ɔ do.» Vɔ, ɛmɛ la bo lɔ ni-i tun mɔ: «Ɖe omɔ na-a, na ma va yi ɖi didaye gbɔxwe.» 60 Mi wɛ Yesu bo ɖo e wu ni-i tun mɔ: «Jo ɛmɛ kukuye do na ye a ɖi ɛmɛ kuku yetɔnye; myɔ, va yi jla Mawu we Xɔluɖuɖu la.»