Yesu do olo do onuxwatɔ wu
(Mat 13:1-9; Lwk 8:4-8)
4
1 Yesu mɔ jɛ onukpinkplan ji ke le otɔ to. Ɛmɛ susu gbagbagba bo lɛdo-e, e bo gbɔjwɛ ɖyɛ otɔjihun ɖe mɛ le otɔ la ji, bo xlɔn onyi. Ɛmɛ laye bo le otɔ la to. 2 E kplan onu susuye nɔ dogbɔn olo dido mɛ, bo lɔ na ye nɔ le onukpinkplan etɔn mɛ tun mɔ: 3 «Mi ɖo oto: onuxwatɔ ɖe tɔn a do va yi xwaa onu. 4 Mi wɛ hwexenu na e xwa onu la nɔ, onukun ɖeye jɛ omɔ to, oxɛye bo va, bo can ye ɖu nywɛɖe. 5 Onukun laye we akpa ɖe bo jɛ ɛkpɛn mɛ, okɔ ko su le ofi la. Onukun laye bo yawu wu, ɖo, nyixɔ la ɔn tito. 6 Xena ohwe hun, ye fyɔ, bo xu, ɖo, ye ɔn ɖi okyɔn nywɛɖe. 7 Onukun laye we akpa bu jɛ ɛŋujaye mɛ. Ɛŋuja laye vun, bo tu gbigbɔ do oxo na ye, e ko syɛn okun ti. 8 Vɔ, onukun laye we akpa ɖe jɛ nyixɔ nywɛ ji, ye wu, bo hwɛn nɔ. Onukun ɖe syɛn okun ogban, ɖe bo syɛn kanɖeko, bu bo syɛn kanweko.» 9 E mɛ godo, e lɔ na ye tun mɔ: «Ɛmɛ xeni ɖo oto bo na do se onu, ni se onu.»Yesu lɔ onu xeni dɔn na e nɔ do do olo
(Mat 13:10-17; Lwk 8:9-10)
10 Xena Yesu va yi jɛ ovo, ɛmɛ xeye ni lɛdo-e ye kpodo onukplanvi weve laye jɛ oxo kinkan-ɛ se ji do olo dido laye wu. 11 E bo lɔ na ye tun mɔ: «Miye wɛ ye sɔ Mawu we Xɔluɖuɖu we onumakpɔndona sɔ na, vɔ ɛmɛ gbokpweye, olo didoye mɛ jan wɛ ye na nɔ se le. 12 E mɛ,
Ŋukunsin na le ote na ye, ganke ye ko kpɔn onu ti nɔ,
Ye na ɖo oto nɔ ganke ye ko se onu ti gɔnmɛ nɔ,
Ye na gba va trɔ jimɛ, Mawu ba va sɔ onu nyanyla yetɔnye sɔ kɛ ye.»
Yesu ɖe onuxwatɔ we olo dido la gɔnmɛ
(Mat 13:18-23; Lwk 8:11-15)
13 Mi wɛ Yesu lɔ na ye tun mɔ: «Mi ɔn se olo dido mɛ la gɔnmɛ wɛɛ? Naɖe mi na wa a do se olo dido gbokpweye gɔnmɛ? 14 Onu xena onuxwatɔ la lo xwa nɔ, Mawu we oxo wɛ. 15 Ɛmɛ ɖeye le ɖi omɔ to ha, xena ye se oxo la, Satana nɔ va zɔnɖokpo, a bo ɖe oxo xena ye xwa do ye mɛ la tɛ. 16 Mɔsinha ke, ɛmɛ ɖeye nɔ yi oxo la do ɛkpɛn mɛ, ye wɛ nyi, ɛmɛ xeye ni nɔ se oxo la, a bo yi-i kpodo jijwɛ kpo zɔnɖokpo. 17 Vɔ, oxo la ɔn nɔ li okyɔn do ayixa yetɔn mɛ o, oganxixo ovii ɖe jan wɛ ye nɔ tɛ do e wu na, na vivɛsise alo ofun ɖiɖe na ɛmɛ va va do oxo la wu, bleŋu wɛ ye nɔ jɛ onyi. 18 Ɛmɛ ɖeye nɔ yi oxo la do ɛŋujaye mɛ, ye wɛ nyi ɛmɛ xeye ni nɔ se oxo la, 19 vɔ, ɛgbɛ mɛ we onuliloye, dɔkun we ɛmɛblɛɖuye kpodo ojlo gbokpweye nɔ ɖyɛ ye mɛ, a bo tu gbigbɔ do xo na oxo la, e ko nɔ syɛn okun ti. 20 Ɛmɛ ɖeye nɔ yi oxo la do nyixɔ nywɛ ji, ye wɛ nyi ɛmɛ xeye ni nɔ se oxo la, bo nɔ yi-i, bo nɔ syɛn okun, onukun ɖe nɔ syɛn ogban, ɖe ba syɛn kanɖeko, onukun bu ba syɛn kanweko.»
Yesu do olo do zogyan wu
21 Mi wɛ e lɔ na ye tun mɔ: «Na ɛmɛ ɖe hɛn zogyan va ɖe, e nɔ sɔ tɔka sɔ cɔn-ɛ wɛɛ, alo e nɔ sɔ ɖo batin gɔ wɛɛ? Onu ji hɛn e nɔ sɔ ɖo wɛɛ? 22 Onu ɖekpekpe xeni le hwihwlatyɔn na jɛ agbaŋugba. Onu ɖekpekpe xena ye cɔn onu do, na jɛ kinklɛn nu. 23 Na ɛmɛ ɖe ɖo oto bo na do se onu, ni se onu.» 24 Yesu mɔ lɔ na ye ke tun mɔ: «Mi tɛ oto nywɛɖe do onu xena mi se nɔ wu. Onujlɛnu xena mi do jlɛ onu nɔ, wɛ ye na zan a do jlɛ na miye can, a bo na mi do e ji. 25 Ɖo, ɛmɛ xeni ɖo, ye na mɔ ni-i do e ji, vɔ ɛmɛ xeni ɔn ɖo ɖe, ye na mɔ yi ovii xena e ɖo la, le e si.»
Yesu lɔ oxo sɔn onukun wu
26 Yesu mɔ lɔ tun mɔ: «Mawu we Xɔluɖuɖu la le ɖi dahwe ɖe xeni flɛn onukun do nyixɔ ji ha, 27 e dɔ awlɔn le ozan mɛ o, e nɔ ŋuzɔn le oklo o, onukun la na wu a bo hwɛn, emyɔ ko nyɔ lena e nyi ɖo nɔ. 28 Nyixɔ ŋutɔ wɛ nɔ na ɛjinukun la, tantyantɔn, ɛjinukun we otin la nɔ wu, a bo do ovi abɔ mɛ, ovi la ba va ɖo okun ganji. 29 Na e va bya, ye nɔ sɔ ɛjinukungbonu do ye wu, ɖo onukun ɖiɖe we ogan xo.»
Yesu jlɛ Mawu we Xɔluɖuɖu la do otinkun wu
(Mat 13:31-32; Lwk 13:18-19)
30 Yesu mɔ lɔ ke tun mɔ: «Ani ha wu lɛ mí na jlɛ Mawu we Xɔluɖuɖu la do, alo, olo ŋukɔ lɛ mí na do a do lɔ oxo do e wu? 31 E le ɖi otinkunvi ɖe ha, na ye xwa-ɛ do nyixɔ gɔ, e nɔ nyi otinkunvi ketekete xeni hwe hugan onukun zɛtɛye seŋu xeni gbɛ le ɛgbɛ la mɛ. 32 Vɔ, na ye xwa-ɛ, e nɔ wu, a bo va trɔ zun otin ɖaxo xeni hugan otin zɛtɛye le ɛjikpa la mɛ. E nɔ wasi aba ɖaxo-ɖaxoye gbɔɔn na oxɛye hɛn, ye na ɖo adɔ yetɔnye do aba etɔnye mɛ, ama etɔnye ba cɔn ye ji.»
33 Dogbɔn olo dido mɔsinhatɔn susu mɛ, Yesu nɔ kplan Mawu we oxo la ɛmɛye nɔ, ɖi lena ye na kpewu se ɖo ha. 34 E ɔn nɔ dokpo olo ma do na ye, vɔ, na emyɔ kpodo onukplanvi etɔnye va le ovo, e nɔ ɖe onu zɛtɛye gɔnmɛ na ye.
Yesu ɖe ogbe do jɛhɔn, e bo ɖo oto-e
(Mat 8:23-27; Lwk 8:22-25)
35 Gbegbe mɛ la we hwedo, Yesu lɔ na onukplanvi etɔnye tun mɔ: «Mí a jɛ otɔ la godo.» 36 Ye lɛ le ɛmɛ susu laye kɔn, onukplanvi laye bo kun Yesu kpodo otɔjihun xe mɛ na e o le saa la do sɔn, otɔjihun buye can bo le aha ni-i. 37 Jɛhɔn sinsyɛnxu ɖe bo site, ɛsin bo ɖyɛ otɔjihun la mɛ nɔ, gbɔɔn otɔjihun la bo jɛ gigɔ ji. 38 Yesu bo le godo, bo sɔ okɔ ɖo onu ji, bo lo dɔ awlɔn nɔ. Ye fɔn-ɛ, bo lɔ ni-i tun mɔ: «Onukplan-ɛmɛtɔ, oku na mí ka ku nɔ, ɔn ɖi onu ti doŋu na we wɛɛ?» 39 Yesu fɔn, bo ɖe ogbe do jɛhɔn la, bo lɔ na otɔ la tun mɔ: «Ma se onu! Bɔ onu!» Jɛhɔn la ɖote, awin bo zin cɛncɛncɛn. 40 Yesu bo lɔ na ye tun mɔ: «Ɛlɛ jɔ mi do vɔ ɖoɖooɖo mɔsinha? Mi ɔn ɖo xɔse hɔnɖyo wɛɛ?» 41 Vivɔ ɖaxo ɖe jɛ ye ji, ye bo lɔ na yenɔniɔye nɔ tun mɔ: «Dahwe ŋukɔ lɛ gbɛ nyi xe, na jɛhɔn kpodo otɔ can nɔ do se otonu ni-i nɔ?»