Yesu lɔ na ɛmɛye tun ye boo ɖɔli jijɔ
13
1 Le hwemɛ la nu, ɛmɛ ɖeye va lɔ oxo na Yesu do lena Pilati ɖe ogbe ye bo hu Galile we oto mɛ tɔ ɖeye, le hwexenu na ye lo san ovɔ na Mawu nɔ. 2 Yesu bo ɖo e wu na ye tun mɔ: «Mi bu-i tun oku xena ye ku ɖo mɔsinha, ɖe xlɛ tun ye bo nyi onu nyanylawatɔye hugan Galiletɔ gbokpweye wɛɛ? 3 O o! Ko lo lɔ na mi nɔ tun mɔ, ye ɔn hu ɛhwɛ hugan yee o. Vɔ, na mi ɔn ɖɔli jijɔ, mi na crɔn seŋu ɖi yee ha. 4 Mi bu-i tun ɛmɛ fɔtɔn ŋukun atɔn xeye ji na oxɔ kikɔ xeni le Silowe we otota mɛ, mu jɛ, ye bo ku ye, onu nyanylawatɔye wɛ ye nyi hugan Jeluzalɛmutɔ gbokpweye wɛɛ? 5 O o! Ko lo lɔ na mi nɔ tun mɔ, ye ɔn hu ɛhwɛ hugan yee o. Vɔ, na mi ɔn ɖɔli jijɔ, mi na crɔn seŋu ɖi yee ha.»Yesu do olo do figitin wu
6 E mɛ godo, Yesu mɔ do olo xe na ye: «Dahwe ɖe ɖo figitin le vɛngle etɔn mɛ. E va otinkunsinsyɛn gbɛn gbe le e ji, vɔ e ko kpɔn ti. 7 Mi wɛ e lɔ na vɛnglejikpɔntɔ la tun mɔ: “Kpɔn, sɔn oxwe atɔn xɛn wɛ ko nɔ va, a do kan otinkunsinsyɛn le figitin xe ji, ko ko nɔ kpɔn. Gbo-e! Ɖo e yi tɛnxo le ogle la ji nɔ vɔvɔ.” 8 Vɔ, vɛnglejikpɔntɔ la, bo lɔ ni-i tun mɔ: “Xwetɔ, jo-e do le oxwe xe mɛ kpɔn. Ko na kun ogun lɛ do-e, a bo bɛ odun do e mɛ. 9 Tanyɔ, e na va syɛn okun, na e ɔn syɛn, o ba gbo-e.”»
Yesu gɔ adɔn na nyɔnu ɖe le Jwifuye we gbɔjwɛzangbe
10 Gbeɖokpo, Yesu kplan onu ɛmɛye nɔ le Jwifuye we okplityɔn ɖe le gbɔjwɛzan yetɔn gbe. 11 Nyɔnu adɔnnɔ ɖe bo le ofi la. Sɔn oxwe fɔtɔn ŋukun atɔn gbɔɔn wɛ gbigbɔ nylakan ɖe, do adɔn-ɛ, e bo ci tɔtɔ, e ko mɔ kpewu nɔ jlɔ can. 12 Xena Yesu kpɔn nyɔnu la, e yɔ-ɛ, bo lɔ ni-i tun mɔ: «Nyɔnu, adɔn tɔwe gɔ.» 13 Yesu ɖo alɔ e ji, zɔnɖokpo, e bo jrɔ, bo jɛ Mawu kinkanfu ji. 14 Vɔ, e bo vɛ le okplityɔn la we oga wu, ɖo, Yesu gɔ adɔn na ɛmɛ le gbɔjwɛzangbe. Mi wɛ e lɔ na ɛmɛ zɛtɛye tun mɔ: «Onyihinhɔn ɛdɛn wɛ ye na do wa odan. Azan mɛ laye ji wɛ mi na nɔ va le, ye ba gɔ adɔn na mi, e ko mɔ nyi gbɔjwɛzangbe nɔ.» 15 Xwetɔ la bo ɖo e wu ni-i tun mɔ: «Ɛyɛmɛnuwatɔye wɛ mi nyi! Le gbɔjwɛzangbe ɖe, ɖokpo-ɖokpo miatɔn ɔn nɔ tun okan na nyibu etɔn, alo osɔkɛtɛ etɔn le okpwe mɛ, a bo kplɔ-ɛ yi ɛsin nu gbe wɛɛ? 16 Nyɔnu xe, xeni nyi Ablaxamu we jijimɛ vi, xena Satana bla sɔn oxwe fɔtɔn ŋukɔn atɔn xɛn, be e ɔn jɛ na ye na tun okan ni-i le gbɔjwɛzangbe wɛɛ?» 17 Xena Yesu ɖo e wu na kɛntɔ etɔnye ɖo mɔsinha, ŋunya wa ye seŋu. Otogun la zɛtɛye bo lo kpɔn jijwɛ nɔ do ŋudandonu xeye na e wasi nɔ ye wu.
Yesu sɔ onu sɔ jlɛ do Mawu we Xɔluɖuɖu wu
18 Yesu lɔ tun mɔ: «Ɛlɛ Mawu we Xɔluɖuɖu la ɖi? Ɛlɛ wu lɛ ko na kpewu jlɛ-ɛ do? 19 Mawu we Xɔluɖuɖu la, e le ɖi otinkunvi ketekete ɖe, xena dahwe ɖe sɔ, bo va yi xwa-ɛ do ɛjikpa etɔn mɛ. Otinkun la bo wu, bo trɔ zun otin, oxɛye bo nɔ va yi ɖo adɔ yetɔnye do aba etɔnye mɛ.»
20 Yesu mɔ lɔ na ye tun mɔ: «Ɛlɛ wu lɛ ko na kpewu jlɛ Xɔluɖuɖu Mawutɔn do? 21 E le ɖi kpɔnnɔ tinkɛn xena nyɔnu ɖe kɔn do yovowɔ nyinya susu mɛ, owɔ nyinya la zɛtɛye bo va fɔn jekee.»
Mi gbɔn agbo ovi la nu
22 Yesu sɔn yi Jeluzalɛmu we toxo mɛ nɔ. Hwexenu na e lo sɔn nɔ, e gbɔn ototaye kpodo toxoye mɛ nɔ bo do kplan onu ɛmɛye nɔ. 23 Ɛmɛ ɖe bo kan-ɛ se tun mɔ: «Ɛmɛ ɖaxo, ɛmɛ viɖe jan wɛ Mawu na hwlɛngan?» Yesu bo ɖo e wu na ye tun mɔ: 24 «Mi jɛ gbagba a bo gbɔn agbo ovii la nu, a do ɖyɛ Xɔluɖuɖu Mawutɔn la mɛ, ɖo, ko lɔ na mi nɔ tun mɔ, susu wɛ nyi ɛmɛ xeye ni na tɛnkpɔn na do ɖyɛ e mɛ, vɔ, ye ko kpewu nɔ.
25 Hwexenu na xwetɔ la na site, a bo tu agbo la kpodo cavi kpo, mi na va le gaji, a bo xuxu-i nɔ, a bo lɔ nɔ tun mɔ: “Xwetɔ, hun agbo na mí.” Xwetɔ la ba va ɖo e wu na mi tun mɔ: “Ko ɔn nyɔ ofi xena mi sɔn o.” 26 E mɛ, mi na va jɛ lilɔ ji tun mɔ: “Mí ɖu, bo nu kpo we, o bo kplan onu ɛmɛye gbɔn omɔye ji le toxo míatɔnye mɛ.” 27 E bo na va ɖo e wu na mi tun mɔ: “Ko ɔn nyɔ ofi xena mi sɔn, mi dɔn miaɖe tɛ le ŋumɛ na-a, mi onu nyanylawatɔye.” 28 Blɛ mɛ wɛ mi na fan avin le, a bo ɖu aɖukun le hwexenu na mi na kpɔn Ablaxamu, Izaki, Jakɔbu, kpodo oxolɔɖonyitɔ zɛtɛye le Xɔluɖuɖu Mawutɔn mɛ, vɔ, miye, ye na nya mi do agbo godo. 29 Ɛmɛye na sɔn hwezɛdo, hweyixɔ, otagbe kpo afɔgbe, a bo yi tɛnxo na agɔɖuɖu le Xɔluɖuɖu Mawutɔn la mɛ. 30 Hwemɛnu, le ɛmɛ xeye ni nyi kpotwi ye mɛ, ɖeye na va nyi tantyan, mɔsinha ke, le ɛmɛ xeye ni nyi tantyan ye mɛ, ɖeye na va nyi kpotwi.»
Yesu yi owan na Jeluzalɛmu we toxo
31 Hwexenu na Yesu lɔ oxo mɛ laye nɔ, Falizitɔ ɖeye tɛkpɔ-ɛ bo lɔ ni-i tun mɔ: «Lɛ le bwɛ, a bo sɔn yi ofi bu, ɖo, xɔlu Elodu ka hu we nɔ.» 32 Yesu bo ɖo e wu na ye tun mɔ: «Mi va yi lɔ na dahwe mɛ, ɛmɛblɛɖutɔ ɖi owɔ ha, tun mɔ: “Ko nya gbigbɔ nylakanye nɔ, bo gɔ adɔn na ɛmɛye nɔ le egbe kpodo swɛ kpo, sɔmɔ ko na wa odan tɛye vɔ.” 33 Vɔ, egbe, swɛ, kpodo sɔmɔ, ko ɖo na zɔn omɔ tɛye, ɖo, e ɔn jɛ tun ye a hu oxolɔɖonyitɔ Mawutɔn le ofi bu ti zɛgbɔn Jeluzalɛmu wu.
34 Jeluzalɛmutɔye! Jeluzalɛmutɔye! Mi nɔ hu oxolɔɖonyitɔye, a bo tɔ ohwan ɛmɛ xeye na Mawu ɖo ɖodan miye gbɔɔn ye ba ku! Zɔn nɛmu ɖe wɛ ko jlo na kple mi do kɔn ye, ɖi lena goklonɔ nɔ kple vikpɛ etɔnye do axwe etɔnye gɔ ɖo ha, vɔ, mi ko jlo. 35 Xena e nyi tun mɔsinha wɛ, Mawu na jo oxwe miatɔn do na mi. Ma lɔ na mi tun mɔ, mi ɔn mɔ kpɔn-ɔ nɔ, gbɔɔn do jɛ hwexenu na mi na va lɔ tun donanɔ bɛ bo nyi ɛmɛ xeni gbɔn nɔ le Xwetɔ la we nyikɔ mɛ.»