Yesu gɔ gigɔdɔn na dahwe ɖe le gbɔjwɛzangbe
14
1 Le Jwifuye we gbɔjwɛzan ɖe gbe, Yesu ɖyɛ Falizitɔye we oga ɖe we oxwegbe, a do ɖu onu. Ɛmɛ xeye ni le oxwe la gbe ye, bo lo xyɔ kpɔn-ɛ nɔ. 2 Mi wɛ, dahwe ɖe, xena gigɔdɔn le e wu, bo le ŋukɔn ni-i. 3 Yesu yi oxo bo lɔ na osɛnkplan-ɛmɛtɔye kpodo Falizitɔye tun mɔ: «Osɛn míatɔn na ogbe tun ye boo gɔ adɔn na ɛmɛ le gbɔjwɛzangbe, alo e gbɛ?» 4 Ye bo bɔ onu xwii. Mi wɛ, Yesu ɖo alɔ adɔnnɔ la wu, bo gɔ adɔn ni-i, bo lɔ ni-i tun ni boo va sɔn. 5 E mɛ godo, Yesu bo lɔ na ye tun mɔ: «Onu lɛ le mia mɛ, na ovyɛ alo nyibu etɔn jɛ dotwɛ mɛ le gbɔjwɛzangbe, e ko na ɖe tɔn-ɛ zɔnɖokpo?» 6 Ye ɔn kpewu ɖo oxo ɖe oxo mɛ la wu.Yesu lɔ oxo sɔn ɛmɛ ɖe sɔ hwe wu
7 Xena Yesu kpɔn lena ɛmɛ xeye na ye yɔ ye, xlɔn onyi le okpo tantyantɔnye ji ɖo nɔ, e do olo xe na ye: 8 «Na ɛmɛ ɖe yɔ we, na do va yi ɖu onu le alɔwletyɔn, ká mɔ va yi xlɔn onyi le okpo tantyantɔn ji. Ɖo, na e nyi tun, e yɔ ɛmɛjɔmɛ ɖe xeni hugan we, 9 ɛmɛ xeni yɔ mi ɛmɛ owe laye, na va lɔ na we tun mɔ: “Jo tɛnxo tɔwe do ni-i.” Ŋunya wɛ e na nyi na we na o na do va yi xlɔn onyi le okpo kpotwi la ji. 10 Vɔ, na ye yɔ we, va yi xlɔn onyi le okpo kpotwi la ji. Hwexenu na ɛmɛ xeni yɔ we la na va, e na lɔ na we tun mɔ: “Hadwe tɛye, va xlɔn onyi le tɛnxo adodwe mɛ le ŋukɔn.” Hwemɛnu, e na nyi owi biba na we le ŋumɛ na ɛmɛ xeye kpo myɔ kpo ni yi tɛnxo a do ɖu onu ye. 11 Ɖo, ɛmɛ ɖekpekpe xeni na kɔ eɖe, ye na zin-i do odo, ɛmɛ xeni na hwe eɖe, ye na kɔ-ɛ do yi oji.»
Lena ye na yi axɔtu sɔn Mawu kɔn ɖo
12 Le e mɛ godo, Yesu lɔ na ɛmɛ xeni yɔ-ɛ la tun mɔ: «Na o ka na lindɔn mɛ alo hwesa we onuɖuɖu ɛmɛye nɔ, ká mɔ nɔ yɔ hadwe tɔweye, alo nɔvweye, alo ɛmɛ tɔweye alo hawetɔ dɔkunnɔye. Ɖo, tanyɔ yee can na mɔ va yɔ we, e bo na nyi axɔtu na onu xena o na ye. 13 Vɔ, na o ɖo agɔɖuɖu ɖaxo ɖe, yɔ ayanɔye, afɔgbonɔye, tɛkunɔye kpodo ŋuvanɔye. 14 Do e mɛ wu, o na nyi nyɔnanɔ, ɖo, yee ɔn kpewu tu axɔ etɔn na we nɔ. Mawu bo na tu axɔ mɛ la na we le hwexenu na e na fɔn ɛmɛ jijwɛye sɔn oku.»
Yesu lɔ oxo sɔn ɛmɛ xeye na ye yɔ na onuɖuɖu wu
15 Xena ye se oxo mɛ laye vɔ, ɛmɛ xeye ni yi tɛnxo bo do ɖu onu nɔ ye we ɖokpo lɔ na Yesu tun mɔ: «Nyɔnanɔ wɛ nyi ɛmɛ xeni na ɖu onu le Mawu we Xɔluɖuɖu mɛ!» 16 Mi wɛ Yesu ɖo e wu ni-i tun mɔ: «Dahwe ɖe, ɖo agɔɖuɖu ɖaxo ɖe, bo yɔ ɛmɛ susu. 17 Xena onuɖuɖu la we ganmɛ su, e dɔn odansɔvi etɔn ɖodan tun ni boo va yi lɔ na ɛmɛ xeye na he bo yɔ laye tun ye boo va, ɖo onu zɛtɛye bo o sɔgbe. 18 Vɔ, ye ɛmɛ zɛtɛye bo jɛ ogbe bibyɔ ji, ɖe kplɔ ɖe do. Ɛmɛ tantyantɔn bo lɔ na odansɔvi la tun mɔ: “ Ko xɔ ogle ɖe, ko bo ɖo na va yi kpɔn ogle la, ko ɖe kuku na we, sɔ kɛ-ɔ.” 19 Ɛmɛ bu bo lɔ tun mɔ: “Ko xɔ nyibu xena ye nɔ do lɛ ogle, owe-owe donu atun, ko bo lo sɔn nɔ a do va yi do ye kpɔn, ko ɖe kuku na we, sɔ kɛ-ɔ.” 20 Ɛmɛ bu ke bo mɔ lɔ tun mɔ: “Fifi wɛ ko wle alɔ, mi wɛ dɔn ko ɔn kpewu na va.” 21 Xena odansɔvi la trɔ gbɔn, e lɔ oxo mɛ laye na xwetɔ etɔn xeni kpa ɛcɛ na oxwe la. Mi wɛ, aɖi wle xwetɔ la, e bo lɔ na odansɔvi la tun mɔ: “Yawu, a bo yi dogbajiye kpodo toxo la we omɔye ji, a bo kplɔ ayanɔye, afɔgbonɔye, ŋuvanɔye kpodo tɛkunɔye do va.” 22 Xena odansɔvi la, yi bo trɔ va, e va lɔ na xwetɔ etɔn tun mɔ: “Xwetɔ, odan xena o dɔn la, e o nyi wiwasi, vɔ, tɛnxo bo mɔ le.” 23 Xwetɔ la bo lɔ na odansɔvi la tun mɔ: “Yi oglemɔye ji kpodo ɛjikpaye we aha, o ba zin ɛmɛye ji na ye a ɖyɛ oxwe tɛye gbe, ni a gɔ tanŋu-tanŋu. 24 Ɖo ko lo lɔ na mi nɔ tun mɔ, ɛmɛ xeye na ko o yɔ saa ye, we ti ɔn tɔ onu onuɖuɖu tɛye nɔ.”»
Lena ye na wa a do nyi Yesu we onukplanvi
25 Ɛmɛ susu gbagbagbaye bo lo zɔn omɔ kpodo Yesu nɔ. E bo trɔ okɔ, bo lɔ na ye tun mɔ: 26 «Na ɛmɛ ɖe va kɔn ye, e ko yi owan na-a hugan otɔ, onɔ, osyɛ, vikpɛ etɔnye, nɔvyɛye kpodo ɛgbɛ etɔn can, e ɔn kpewu na nyi onukplanvi tɛye. 27 Na ɛmɛ ɖe ɔn kɔ otinsoga we agban etɔn bo kplɔ-ɔ do, e ɔn kpewu na nyi onukplanvi tɛye. 28 Ɖo, onu lɛ le mia mɛ, na e ka gbá sanŋu ɖe nɔ, e ko na xlɔn onyi, a bo wa kɔnŋuta do oho xena e na zan wu, a do kpɔn tun he na kpewu na hu e nu jaa? 29 Na e ɔn nyi mɔsinha, e bo ɖo dodwe, vɔ, e ko va hu sanŋu la nu, ɛmɛ xeye ni na kpɔn ɖo mɔsinha ye, na jɛ kiko-e ji, 30 a bo lɔ tun mɔ: “Dawhe mɛ jɛ sanŋu gbigba ji, e ko kpewu hu e nu.” 31 Alo xɔlu ŋukɔ lɛ le, na e ka tɔn ahwan xɔlu bu nɔ, e ko na xlɔn onyi, a bo gbeje kpɔn tun mɔ: “Ahwan xena kɛntɔ tɛye ka va wa nɔ kpodo sɔja akpo oko ɖe, ko na kpewu wa ahwan la kpodo sɔja akpo owo?” 32 Na e ɔn kpewu, hwexenu na ɛmɛ ɖee la mɔ gbɛ le dindyɔnnu, e na dɔn afɔsɔɖotetɔ etɔn ɖodan-ɛ, a bo byɔ tun heye a bo wasi fifa. 33 Mɔsinha ke wɛ, na ɛmɛ ɖe le mia mɛ, e ko ɖe okɔ le onu zɛtɛye xena e ɖo ye wu, e ɔn kpewu na nyi onukplanvi tɛye.»
Yesu do olo do ojɛ wu