Yesu do olo do lɛngbɔ xeni bu na ye va kpɔn-ɛ wu
15
1 Takwɛjwɛtɔ susu kpodo onu nyanylawatɔ susu buye, tɛkpɔ Yesu bo na do ɖo oto-e. 2 Falizitɔye kpodo osɛnkplan-ɛmɛtɔye kpo bo lo lɔ oxo do e wu nɔ, bo tun mɔ: «Dahwe xe, e nɔ yi onu nyanylawatɔye nywɛɖe, a bo ɖu onu kpo ye.» 3 Mi wɛ Yesu do olo xe na ye tun mɔ: 4 «Na ɛmɛ ɖe le mia mɛ, bo ɖo lɛngbɔ kanweko, ɖokpo gee bo va bu le ye mɛ ɖe, be e ɔn nɔ jo lɛngbɔ kanwe fɔtɔn ŋukun ɛnɛ gbokpwe laye do amakanmɛ, a bo va yi kan ɖokpo mɛ la gbɔɔn a bo kpɔn-ɛ wɛɛ? 5 Na e va kpɔn-ɛ ɖe, oji nɔ jɔ-ɛ, e bo nɔ kɔ-ɛ do okɔgbe, 6 a do gbɔn va oxwegbe, a bo yɔ hadwe etɔnye kpodo ɛmɛ xeye ni le oxwe ha ni ye, a bo lɔ na ye tun mɔ: “Mi kpɔn jijwɛ kpo-o, ɖo, ko kpɔn lɛngbɔ tɛye xeni bu saa la.” 7 Ko lɔ na mi nɔ tun mɔsinha ke wɛ, jijwɛ xeni na nɔ onyi le jiŋukunsin le hwexenu na onu nyanylawatɔ ɖokpo gee na ɖɔli jijɔ etɔn, e na hugan jijwɛ xeni na nɔ onyi le blɛ do ota na ɛmɛ jijwɛ kanwe fɔtɔn ŋukun ɛnɛ xeye ni ɔn hyan jijɔ ɖiɖɔli ye.»Yesu do olo do oho xeni bu na ye va kpɔn-ɛ wu
8 Yesu mɔ yi e ji bo lɔ na ye tun mɔ: «Alo nyɔnusi ŋukɔ lɛ le, na e ɖo oho owo, ɖokpo bo va bu le e wu ni-i, e ko na va yi tɛ zogyan, a bo za oxwe la gbe, a bo kan-ɛ nywɛɖe, gbɔɔn a bo kpɔn-ɛ? 9 Na e kpɔn-ɛ vɔ, e ba yɔ hadwe etɔnye kpodo ɛmɛ xeye ni le oxwe ha ni ye, a bo lɔ na ye tun mɔ: “Mi kpɔn jijwɛ kpo-o, ɖo ko kpɔn oho xeni bu do-o saa la!” 10 Ko lɔ na mi nɔ tun mɔ: mɔsinha ke wɛ ɛwɛndotɔ Mawutɔnye nɔ kpɔn jijwɛ ɖo, do onu nyanylawatɔ ɖokpo gee xeni ɖɔli jijɔ wu.»
Yesu do olo do hwanjavi xeni jɛ ogbe bo va gbɔn wu
11 Yesu mɔ lɔ na ye tun mɔ: «Dahwe ɖe ɖo ovi ŋusunglo owe. 12 Vikpɛvi la bo lɔ na otɔ tun mɔ: “Didaye, sɔ cinɔ xeni ɖo na nyi tɛye sɔ na-a.” Mi wɛ otɔ ma cinɔ etɔnye na ye ɛmɛ owe laye. 13 Azan ɖe ma jɛ, vikpɛvi la sa cinɔ etɔn laye seŋu, bo sɔn yi oto dindyɔn ɖe mɛ. E bo va yi zan ɛgbɛ ɖejan-ɖejan, oho etɔn bo vɔ seŋu. 14 Xena e zan oho la zɛtɛye vɔ hɛn, xovɛ ɖaxo ɖe va tɔn le oto la mɛ. E bo va jɛ aya ɖuɖu ji. 15 E gbɔjwɛ va yi jɛ odanwiwa ji na dahwe ɖe le oto la mɛ. E nɔ va yi kpɔn ohaye ji na dahwe la le nugyo. 16 Xovɛ nɔ ci-i gbɔɔn oha laye we onuɖuɖu bo nɔ jlo-e, vɔ, ɛmɛ ti ko nɔ ni-i. 17 E va jɛ ota mɛ bubu ji, bo lɔ tun mɔ: “Odanwatɔ xeye ni le didaye kɔn ye, zɛtɛye wɛ nɔ kpɔn onuɖuɖu, a bo ɖu gbɔɔn e ba drɔn, vɔ xovɛ bo ka va hu mɔ le bwɛ nɔ.” 18 Ko na trɔ sɔn yi didaye kɔn, a bo lɔ ni-i tun mɔ: “Didaye, ko jɛ agɔ do Mawu, bo jɛ agɔ do we. 19 Ko ɔn mɔ jɛ na o na yɔ-ɔ tun ovi tɔwe o. Yi-u ɖi ɛmɛ ɖokpo ha le odansɔvi tɔweye mɛ.” 20 Mi wɛ, e jɛ omɔ, bo bɛ otɔ la de nu.
Hwexenu na e le dindyɔn nu bo lo gbɔn nɔ, otɔ la kpɔn-ɛ ɖodan, onu etɔn bo ɖu adɔnu ni-i, e bo do odun, bo va yi wle-e do akɔn nu, bo kpla asi okɔ ni-i. 21 Ovi la bo lɔ ni-i tun mɔ: “Didaye, ko jɛ agɔ do Mawu, bo jɛ agɔ do we. Ko ɔn mɔ jɛ na o na yɔ-ɔ tun ovi tɔwe.” 22 Vɔ, otɔ la, bo lɔ na odansɔvi etɔnye tun mɔ: “Mi yawu, a va yi sɔ awu gaga xeni nyɔhwyan hugan zɛtɛye va, na mi a do ni-i, mi ba sɔ alɔganvi a bo do ni-i, a bo do afɔkpa ni-i. 23 Mi va yi sɔ nyibu xeni do olan ganji la, a bo hu-i, na mí a ɖu-i, a bo kpɔn jijwɛ. 24 Ɖo ovi tɛye xe, e lena ɖi tun e o ku saa ha, e bo va trɔ va ɛgbɛ; e bu saa, fifi ko bo va kpɔn-ɛ.” Ye bo jɛ agɔɖuɖu ji.
25 Vɔ, ovi tantyan etɔn la bo le nugyo le hwemɛ la nu, xena e lɛkɔ bo tɛkpɔ oxwe la gbe, e se onu xixo kpodo owe ɖuɖu nɔ. 26 Mi wɛ e yɔ odansɔvi ɖe bo kan-ɛ se tun ɛlɛ jɔ nɔ jaa. 27 Odansɔvi la bo ɖo e wu ni-i tun mɔ: “Nɔvwe wɛ gbɔn, mi wɛ didawe hu nyibu xeni do olan la, ɖo, e kpɔn tun e bo le nywɛɖe do gbɔn.” 28 Xena e se oxo mɛ la, aɖi wle-e, e ko jlo na ɖyɛ oxwe la gbe. Otɔ la bo tɔn, a do fa oji mɛ ni-i, ni a do ɖyɛ oxwe la gbe. 29 Mi wɛ, e lɔ na otɔ la tun mɔ: “Sɔn oxwe nɛmu ɖe xɛn ko lo wa odan na we nɔ, ko ko gbɛ tonu sise na we kpɔn. Vɔ, o ɔn na-a ogbɔvi ɖokpo tete na ma do ɖu agɔ kpodo hadwe tɛyee kpɔn can. 30 Vɔ, xena ovi tɔwe la gbɔn fifi, emyɔ xeni zan dɔkun tɔwe kpodo agalɛtɔye kpo, o va yi hu nyibu xeni do olan la ni-i!” 31 Mi wɛ otɔ lɔ ni-i tun mɔ: “Ovi tɛye, myɔ, o le kɔn ye tɛgbɛ, onu tɛye zɛtɛye wɛ nyi tɔwe. 32 Vɔ, mí ɖo na ɖu agɔ, a bo kpɔn jijwɛ, ɖo nɔvwe xe, e lena ɖi tun e o ku saa ha, bo va trɔ va ɛgbɛ; e bu saa, fifi ko bo va kpɔn-ɛ.”»