Ɛgbɛ la we
Titɔ e ji
Oxotaɖiɖe
Wema xe wɛ lɔ lena ɛgbɛ la tɔ e ji ɖo, e bo mɔ nyi wema tantyan le Mawu we oxo mɛ. Mɔyizi bɛ wlan wema xe la. Wema la lɔ oxo sɔn lena Mawu ɖo ɛgbɛ la kpodo onu zɛtɛye xeni le e mɛ ɖo, bo lɔ lena Mawu ɖo ŋusunglo tantyantɔn kpodo nyɔnusi tantyantɔn ɖo, kpodo lena Mawu we otogun va nɔ onyi ɖo.
Wema la ma ɖo lesinha:
1-11. Mɔyizi lɔ lena Mawu ɖo ɛgbɛ la kpodo onu zɛtɛye xeni le e mɛ ye, e bo jla ɛjikpa ɖo bo sɔ ɛgbɛtɔ sɔ do e mɛ, Mawu bo kpɔn tun onu zɛtɛye bo nyɔhwyan. Do yi nɔ Satana va blɛ ɛgbɛtɔ ɖu, e ko se tonu na Mawu, mɔsinha wɛ onu nyanyla ɖyɛ ɛgbɛ la mɛ ɖo gbɔɔn do yi hwexenu na Mawu va crɔn ɛgbɛ la kpodo ɛsin le Nɔwe we hwenu. Mawu bo hwlɛn Nɔwe kpodo xwedo gan ɖo emyɔ ɖokpo wɛ nyi ɛmɛ jijwɛ le hwemɛ la nu. E mɛ godo, Mawu bo va wasi okancica kpo Nɔwe. Ɛmɛye mɔ va ji do e ji le nyixɔ la ji, vɔ, ye ko sɛn Mawu nɔ ɖi lena e jɛ ɖo ha.
12-25. E lɔ lena Mawu yɔ Ablamu ɖo, ni a do tɔn sɔn otɔ we xwedo mɛ a bo do va yi sɛn emyɔ Mawu la ɖokpo. Mawu bo xo ogbe ni-i tun he bo na ni-i jijimɛviye taŋu. Mawu wasi okancica kpo-e bo do sɔ adagbigbo sɔ ɖo onyi, e bo xo ogbe ni-i tun he bo na do ni-i, a bo mɔ do na jijimɛvi xeye ni va jɔ kplɔ-ɛ do ye, a bo mɔ do na ɛmɛ zɛtɛye xeni na kan do emyɔ Mawu la ji ɖi Ablamu ha. Ablamu ɖo kpodo osyɛ Salayi bo o ku nyɔxo ganke, Mawu bo va do na ye bo na ye ovi ŋusunglo ɖokpo, ye bo ɖo nyikɔ ni-i tun Izaki.
26-36. E lɔ oxo do Esawi kpo Jakɔbu xeye na Izaki la va ji ye wu, bo mɔ lɔ ɛgbɛ xena Jakɔbu zan gbɔɔn na Mawu do va ɖɔli nyikɔ ni-i, e bo do trɔ zun Izrayɛli.
37-50. E lɔ ɛgbɛ xena Jakɔbu vikpɛye zan gbɔɔn do va jɛ lena Jozɛfu va yi ɖu oga ɖaxo le Ejiputi ɖo, otɔ kpodo nɔvyɛ zɛtɛye seŋu bo do va ci Ejiputi la, ɖo, le hwemɛ la nu, xovɛ sinsyɛnxu ɖe va tɔn le ɛgbɛ la mɛ seŋu. Akpa xe la wɛ lɔ lena Jakɔbu kpodo Jozɛfu la va ku ɖo ɖe kplɔ ɖe do. Vɔ, gbɔxwe na Jozɛfu la na ku, e lɔ na nɔvyɛye tun Mawu bo va gɔ alɔ na ye, a bo do ɖe ye tɔn-ɛ le Ejiputi, a bo kplɔ ye do sɔn yi Kana xeni nyi oto xe we ogbe na Mawu xo na Ablamu, Izaki kpodo Jakɔbu.
Wema xe la wɛ ɖe Mawu we owan yiyi, ogbe ji ninɔ, hɔnhlɔn kpodo onu ma kpɔn gbeɖe xeye na e wasi we ɖeye sɔ xlɛ ɛgbɛtɔ zɛtɛye seŋu. E bo mɔ ɖe hwlɛngan we tito Mawutɔn sɔ xlɛ ɛgbɛtɔ.