Ɛgbɛ la we
Titɔ e ji
Mawu ɖo ɛgbɛ la kpodo ɛgbɛtɔ
1
1 Le titɔ e ji, Mawu ɖo jiŋukunsin kpodo nyixɔ.2 Nyixɔ la ɔn ɖo ninɔmɛ ti o, e bo le toto. Vuvlu bo cɔn ogun ɖaxo xeni tito taŋu la nu, vɔ, Mawu we Gbigbɔa bo lo ɖi asa gbɔn ɛsin xeni le ogun ɖaxo la mɛ ji nɔ. 3 Mawu bo lɔ tun mɔ: «Kinklɛn ni va!» Kinklɛn bo va. 4 Mawu bo kpɔn tun kinklɛn la bo nyi onu nywɛ. Mi wɛ Mawu ɖe kinklɛn la ɖo ovo na vuvlu. 5 Mawu bo yɔ kinklɛn la tun «Oklo,» bo yɔ vuvlu la tun «Ozan.» Ozan bo do, onyi bo hɔn: mi wɛ nyi onyihinhɔn tantyan.
6 Mawu bo lɔ tun mɔ: «Onu sinsyɛnxu ɖe ni va ɛsinye mɛ a do ma ɛsin xeye ni le jigbeye do ovo na ɛsin xeye ni le odo ye.» 7 Mawu bo wasi onu sinsyɛnxu mɛ la, e bo ma ɛsin xeye ni le jigbeye ɖo ovo na ɛsin xeye ni le odoye. E bo nyi ɖo mɔsinha. 8 Mawu bo yɔ onu mɛ la tun «Jiŋukunsin». Ozan bo do, onyi bo hɔn: mi wɛ nyi onyihinhɔn owegɔ.
9 Mawu lɔ tun mɔ: «Ɛsin xeye ni le jiŋukunsin we agɔ ye, ni kpli do ofi ɖokpo, na ofi xuxu, a ze.» E bo nyi ɖo mɔsinha. 10 Mawu bo yɔ ofi xuxu la tun nyixɔ bo yɔ ɛsin xeni kpli la tun ɛxu. Mawu bo kpɔn tun e bo nyi onu nywɛ. 11 Mi wɛ, Mawu mɔ lɔ tun mɔ: «Le nyixɔ la ji, onu ɖekpekpe xeni nɔ gbɛ wu, ni wu, ogbe xeye ni nɔ syɛn okunye ni wu, otin hamɛ-hamɛ xeye ni nɔ syɛn okunye ni wu, otinkunsinsyɛn laye ba ɖo okun do dɔmɛ.» E bo nyi ɖo mɔsinha. 12 Onu ɖekpekpe xeni nɔ wu laye bo wu, ogbe hamɛ-hamɛ xeye ni nɔ syɛn okunye, otin hamɛ-hamɛ xeye ni nɔ syɛn okunye, otinkunsinsyɛn laye bo ɖo okun le dɔmɛ. Mawu bo kpɔn tun e bo nyi onu nywɛ. 13 Ozan bo do, onyi bo hɔn. Mi wɛ nyi onyihinhɔn atɔngɔ.
14 Mawu bo lɔ tun mɔ: «Onu xeye ni nɔ tɛ ozo ye ni tɔn do jiŋukunsin mɛ, a do ɖe oklo ɖo ovo na ozan, ye ba nyi josi xeye na ye na nɔ do nyɔ hwenuye, azanye kpodo oxweye. 15 Ye ni nyi onu xeye ni nɔ tɛ ozo ye le jiŋukunsin mɛ a bo do klɛn do nyixɔ ji.» E bo nyi ɖo mɔsinha. 16 Mawu bo wasi onu ɖaxo owe, xeye ni nɔ tɛ ozo laye, ɖaxo taŋu la na nɔ klɛn ŋutɔ le oklo, ovii la ba nɔ klɛn le ozan mɛ. E bo wasi sunhweviye can. 17 Mawu bo ɖo ye do jiŋukunsin mɛ, na ye a nɔ do klɛn do nyixɔ ji, 18 a bo do klɛn le oklo kpodo ozan, a bo do ɖe kinklɛn ɖo ovo na vuvlu. Mawu bo kpɔn tun e bo nyi onu nywɛ. 19 Ozan bo do, onyi bo hɔn: mi wɛ nyi onyihinhɔn ɛnɛgɔ.
20 Mawu bo lɔ tun mɔ: «Onu le ɛgbɛye ni gɔ ɛsinye mɛ a bo hwan nɔ, oxɛye can ba zɔn gbɔn jigbe nɔ.» E bo nyi ɖo mɔsinha. 21 Mawu ɖo tɔmɛlan ɖaxo-ɖaxoye kpodo onu le ɛgbɛ hamɛ-hamɛ xeye ni nɔ lin otɔ ye, bo nɔ hwan le otɔ mɛ nɔ ye, e bo mɔ ɖo oxɛ hamɛ-hamɛ ɖekpekpe xeye ni ɖo axwe ye. Mawu bo kpɔn tun e bo nyi onu nywɛ. 22 Mawu bo do na ye, bo lɔ tun mɔ: «Mi ji, a bo gba okun a bo gɔ ɛxuye mɛ, oxɛye can ni gba okun le nyixɔ la ji.» 23 Ozan bo do, onyi bo hɔn: mi wɛ nyi onyihinhɔn atungɔ.
24 Mawu bo lɔ tun mɔ: «Nyixɔ ni na onu le ɛgbɛ hamɛ-hamɛye: oxwegbe we kanlinye, kanlin xeye ni nɔ dɔn adɔ gbɔn nyixɔ mɛ ye, onu le ɛgbɛ viviye kpodo kanlin hɔntuntɔnye.» E bo nyi wiwasi. 25 Mawu wasi hɔntun we kanlin hamɛ-hamɛye, oxwegbe we kanlin hamɛ-hamɛye, kpodo kanlin xeye ni nɔ dɔn adɔ gbɔn nyixɔ mɛ hamɛ-hamɛ zɛtɛye seŋu kpodo onu le ɛgbɛ viviye ji. Mawu bo kpɔn tun e bo nyi onu nywɛ. 26 Mawu bo lɔ tun mɔ: «Mí a wasi ɛgbɛtɔb do ninɔmɛ míatɔn ji, e ba le ɖi míye ha. Ye ni kpa ɛcɛ do ɛxu mɛ we ohweye, jiŋukunsin we oxɛye kpodo kanlinye ji, ye ba mɔ kpa ɛcɛ do nyixɔ la ji seŋu kpodo kanlin xeye ni nɔ dɔn adɔ gbɔn nyixɔ mɛ nɔ ye kpodo onu le ɛgbɛ viviye ji.»
27 Mawu bo ɖo ɛgbɛtɔ do ninɔmɛ etɔn ji,
E ɖo ɛgbɛtɔ do Mawu we ninɔmɛ ji,
E bo ɖo ŋusunglo kpodo nyɔnusi kpo.
28 Mawu bo do na ye, bo lɔ na ye tun mɔ: «Mi ji, a bo gba okun, mi gɔ nyixɔ la ji, a bo kpa ɛcɛ ni-i. Mi kpa ɛcɛ na ɛxu mɛ we ohweye, a bo kpa ɛcɛ na jiŋukunsin mɛ we oxɛye kpodo kanlin ɖekpekpe xeni nɔ dɔn adɔ gbɔn nyixɔ la ji nɔ.» 29 Mawu bo lɔ tun mɔ: «Mi kpɔn, ko sɔ oma ɖekpekpe xeni le nyixɔ la ji seŋu bo ɖo okun, sɔ na mi, bo sɔ otin ɖekpekpe xeni nɔ syɛn okun sɔ na mi. Ye na nyi onuɖuɖu na mi. 30 Ko sɔ ama ɖekpekpe sɔ na kanlin ɖekpekpe xeni le nyixɔ la ji, kpodo oxɛ ɖekpekpe xeni le jiŋukunsin mɛ, kpodo kanlin ɖekpekpe xeni nɔ dɔn adɔ gbɔn nyixɔ la ji. Ama mɛ laye na nyi onuɖuɖu na onu le ɛgbɛ ɖekpekpe.» E bo nyi mɔsinha. 31 Mi wɛ, Mawu kpɔn onu xena e wasi zɛtɛye seŋu. E bo nyi onu nywɛ ganji. Ozan bo do, onyi bo hɔn: mi wɛ nyi onyihinhɔn ɛdɛngɔ.