2
1 Lena Mawu ɖo jiŋukunsin kpodo nyixɔ, kpodo onu zɛtɛye xeni le ye mɛ ye ɖo mɛ. 2 Xena Mawu o wa odan zɛtɛye vɔ, e ɖo odanwiwa te le onyihinhɔn acowegɔ la gbe. 3 Mawu do na onyihinhɔn acowegɔ la, bo ɖe-e ɖo ovo, ɖo, azan mɛ la gbe Mawu ɖo odan zɛtɛye wiwa te.Ɛgbɛtɔ le Edɛnu we ɛjikpa mɛ
4 Mɔsinha wɛ Mawu ɖo jiŋukunsin kpo nyixɔ kpo ɖo mɛ.
Hwexenu na Mawu ɖo jiŋukunsin kpodo nyixɔ, 5 otin hɔntuntɔn ti ɔn le nyixɔ la ji, ogbe ti ko wu le hwemɛ la nu, ɖo, Xwetɔ Mawu la ɔn na na oju ja do nyixɔ la ji, ɛgbɛtɔ ti can ko le nyixɔ la ji a do lɛ ogle; 6 vɔ, ɛsin bo nɔ tɔn sɔn nyixɔ gɔ a bo fa nyixɔ la ji seŋu.
7 Xwetɔ Mawu sɔ okɔ bo do wasi ɛgbɛtɔ; E bo fun gbigbɔ xeni nɔ na ɛgbɛ do ŋɔtinye mɛ ni-i, mi wɛ ɛgbɛtɔ trɔ zun ɛmɛ le ɛgbɛ.
8 E mɛ godo, Xwetɔ Mawu wasi ɛjikpa ɖokpo do Edɛnu, le hwezɛdo we akpaji, e bo sɔ ɛgbɛtɔ xena e wasi la, sɔ do e mɛ. 9 Xwetɔ Mawu na na otin hamɛ-hamɛ xeye ni nyɔ kpinkpɔn ye, wu do ɛjikpa la mɛ; sinsyɛn yetɔnye bo nyɔ na ɖuɖu. Otin xena sinsyɛn etɔn nɔ na ɛgbɛ, kpodo otin xena sinsyɛn etɔn nɔ na na ye nɔ kpɔn onu jɛ onunywɛ kpodo onu nyanyla wu, bo le dodomɛ na ɛjikpa la.
10 Otɔsisa ɖe nɔ tɔn sɔn Edɛnu la, a bo hu ɛsin na ɛjikpa la. Bɛ sɔn ɛjikpa la mɛ, otɔsisa la ɖo zɛklan ɛnɛ. 11 Tantyantɔn nɔ nyi Picɔn. Zɛklan mɛ la wɛ lɛdo Avila we oto la seŋu, oto mɛ la mɛ wɛ ye nɔ kpɔn sika le, 12 Sika la bo nyi adodwe taŋu. Otin we ɛsin xeni nɔ hwɛn nywɛ taŋu xena ye nɔ yɔ tun budɛlyɔmu kpodo ɛkpɛn nywɛ-nywɛ xena ye nɔ yɔ tun onisi, bo le oto mɛ la can mɛ. 13 Zɛklan owegɔ bo nɔ nyi Gihɔnu; e mɛ la wɛ lɛdo Kucu we oto la seŋu. 14 Zɛklan atɔngɔ la nɔ nyi Tigli; e mɛ la wɛ nɔ sa gbɔn hwezɛdo na Asu we oto. Zɛklan ɛnɛgɔ la bo nɔ nyi Eflati.
15 Xwetɔ Mawu bo sɔ ɛgbɛtɔ sɔ do ɛjikpa Edɛnutɔn la mɛ, e ba nɔ do lɛ-ɛ a bo mɔ nɔ kpe ŋukunsin do e wu. 16 Xwetɔ Mawu bo na ogbeɖiɖe xe na ɛgbɛtɔ: «Otin zɛtɛye xeni le ɛjikpa la mɛ, o hɛn, o na ɖu sinsyɛn yetɔnye; 17 vɔ, sinsyɛn xeni nɔ na na ye nɔ kpɔn onu jɛ onunywɛ kpodo onu nyanyla wu la, o ɔn ɖu-i nɔ o, ɖo, gbegbe xena o na ɖu-i, o na ku.»
18 Xwetɔ Mawu bo lɔ tun mɔ: «E ɔn nyɔ tun ŋusunglo a nɔ emyɔ ɖokpo gee; ko na wasi alɔgɔtɔ ɖe ni-i, e ba sɔgbe kpo-e.» 19 Xwetɔ Mawu sɔ okɔ bo do wasi kanlin hɔntuntɔn zɛtɛye seŋu kpodo oxɛ zɛtɛye seŋu. E bo kplɔ ye do va ɛgbɛtɔ kɔn, a do kpɔn nyikɔ xena e na ɖo na ye. E mɛ, onu le ɛgbɛ ɖekpekpe ba nyi nyikɔ xena ɛgbɛtɔ na ɖo ni-i. 20 Ɛgbɛtɔ ɖo nyikɔ na kanlin xwegbetɔn zɛtɛye, oxɛye kpodo kanlin hɔntuntɔn zɛtɛye. Vɔ, e ɔn kpɔn alɔgɔtɔ ɖe xeni sɔgbe kpodo emyɔ ŋutɔ. 21 Mi wɛ Xwetɔ Mawu na na awlɔn ɖaxo ɖe sɔ ŋusunglo la, e bo ɖyɛ awlɔn mɛ. Mawu bo ɖe dajaxu ɖokpo na ŋusunglo la, bo tu agbaza la do tɛnxo etɔn.
22 Xwetɔ Mawu sɔ dajaxu la do wasi nyɔnusi ɖokpo, e bo kplɔ-ɛ va ŋusunglo la kɔn. 23 Xena ŋusunglo la kpɔn-ɛ, e do axwa, bo lɔ tun mɔ:
«Ɛɛn hɛɛn! Fifi, oxu tɛyee we oxu xɛn,
Gbaza tɛye we agbaza xɛn.
Ɛmɛ xe, ye na nɔ yɔ-ɛ tun nyɔnusi,
Ɖo ŋusunglo wu wɛ ye ɖe-e tɔn-ɛ le.»
24 Mi wɛ dɔn, ŋusunglo na lɛ le otɔ kpodo onɔ kpo kɔn, a bo va yi tɛ do osyɛ wu, ye ba trɔ zun onu ɖokpo gee.
25 Ŋusunglo la kpodo nyɔnusi la kpo bo le ɛsɛgbeji, ŋunya ko nɔ wa ɛmɛ ɖe do ɛmɛ ɖe wu o.