Ɛgbɛtɔ jɛ tintɛnkpɔn mɛ
3
1 Le kanlin xeye ni le hɔntun xena Xwetɔ Mawu ɖo ye mɛ, odan wɛ jɔ ɛyɛ hugan gbokpweye seŋu. Odan la bo lɔ na nyɔnu la tun mɔ: «Mawu lɔ tun miye boo ká ɖu otin zɛtɛye xeni le ɛjikpa la mɛ we sinsyɛnye oxojɔxo?» 2 Nyɔnu la bo ɖo e wu tun mɔ: «Mí nɔ ɖu otin xeye ni le ɛjikpa la mɛ we sinsyɛnye. 3 Vɔ, Mawu lɔ do otin xeni le ɛjikpa la we dodomɛ we sinsyɛn wu tun mɔ: mi ká ɖu o, mi bo ká ɖo alɔ e wu o, e ma dɛn, mi na ku.» 4 Mi wɛ odan la lɔ na nyɔnu la tun mɔ: «Gbeɖe kpɔn! Mi ɔn ku nɔ o! 5 Vɔ, Mawu nyɔ-ɛ tun mɔ, gbe xe gbe na mi na ɖu-i, ŋukunsin miatɔnye na hun, mi bo na le ɖi emyɔ ŋutɔ ha, a bo nyɔ onunywɛ kpodo onu nyanyla.»6 Nyɔnu la bo kpɔn tun sinsyɛn otin la tɔnye bo na nyɔ na ɖuɖu, bo nyɔ kpinkpɔn, e bo mɔ kpɔn tun e bo jɛ na hun tagbɔ na ɛmɛ. E bo gbɛn sinsyɛn etɔn bo ɖu; e bo na oswa xeni le aha ni-i can, e bo ɖu. 7 Ye ɛmɛ owe laye we ŋukunsinye bo hun; ye bo nyɔ-ɛ tun ye bo le ɛsɛgbeji. Ye bo sɔ figimaye ɖo okpɔ, bo ca ɖe do ɖe wu, bo do wasi ɖi avɔye ha.
Mawu nya ɛgbɛtɔ tɔn-ɛ le ɛjikpa etɔn mɛ
8 Mi wɛ, hwexenu na hwedo we jɛhɔn lo xo nɔ, Xwetɔ Mawu ɖi asa gbɔn ɛjikpa la mɛ nɔ, ye bo se onuwiwa etɔn. Ŋusunglo la kpodo osyɛ bo va yi bɛ do Xwetɔ Mawu le ɛjikpa la we otinye mɛ. 9 Xwetɔ Mawu yɔ ŋusunglo la, bo kan-ɛ se tun mɔ: «Bɔ lɛ o le?» 10 E bo ɖo e wu tun mɔ: «Ko se onuwiwa tɔwe le ɛjikpa la mɛ, bo vɔ, ɖo, ko le ɛsɛgbeji, ko bo va yi bɛ.» 11 Xwetɔ Mawu bo lɔ tun mɔ: «Onu lɛ lɔ na we tun myɔ bo le ɛsɛgbeji? Otin xe we sinsyɛn na ko tun myɔ boo ká ɖu la, o ɖu-i wɛɛ?» 12 Ŋusunglo la bo ɖo e wu tun mɔ: «Nyɔnu xena o sɔ ɖo aha na-a la, wɛ na-a sinsyɛn otin la tɔn, ko bo ɖu.»
13 Mi wɛ Xwetɔ Mawu kan nyɔnu la se tun mɔ: «Ɛlɛ jɔ o do wasi mɔsinha?» Nyɔnu la bo ɖo e wu tun mɔ: «Odan la wɛ blɛ-ɔ ɖu, ko bo ɖu.»
14 Xwetɔ Mawu bo lɔ na odan la tun mɔ:
«Xena e nyi tun o wasi mɔsinha,
Nudo na jɛ jiwe le oxwegbe we kanlinye kpodo hɔntun we kanlinye mɛ,
O na nɔ dɔn adɔ tɔwe gbɔn nyixɔ ji,
O bo na nɔ ɖu ofinzɔ
Le ɛgbɛ tɔwe we azan zɛtɛye gbe.
15 Ko na hɛn okɛn va myɔ kpodo nyɔnu la kpo mɛ,
Okɛn ba mɔ nɔ jijimɛvi tɔwe kpodo jijimɛvi etɔn mɛ:
Jijimɛvi nyɔnu la tɔn, na gba ota na we,
Myɔ, o bo na xu aɖu afɔdrinu ni-i.»
16 E bo lɔ na nyɔnu la tun mɔ:
«Ko na na na gomi tɔweye na nyi vivɛsise taŋu na we.
O na nɔ se vivɛ taŋu gbɔxwe a ji ovi,
Ojlo tɔweye na nɔ le suwe ji,
Vɔ, emyɔ ba nɔ kpa ɛcɛ na we.»
17 E lɔ na ŋusunglo la tun mɔ: «Xena e nyi tun o se siwe we ogbe, bo ɖu otin xe we sinsyɛn na ko gbɛ na we tun myɔ boo ká ɖu la,
Do myɔ wu we,
Nudo na jɛ nyixɔ la ji,
Le ɛgbɛ tɔwe we azan zɛtɛye gbe,
E na nɔ syɛnxu na we taŋu
Gbɔxwe nyixɔ na nɔ na we onuɖuɖu,
18 E na nɔ dɔn ɛŋu kpodo ogbeye na we,
O bo na nɔ ɖu oma hɔntuntɔnye.
19 Ɛdɛn na nɔ tɔ we ŋutɔ gbɔxwe,
O na nɔ kpɔn onu a bo ɖu,
Gbɔɔn do yi hwexenu na o na trɔ sɔn yi nyixɔ
Xe mɛ na ye ɖe we tɔn-ɛ le;
Ɖo, okɔ wɛ onyi,
O bo na mɔ trɔ sɔn yi okɔ gɔ.»
20 Aɖamua bo ɖo nyikɔ na osyɛ tun «Ɛvub» ɖo, emyɔ wɛ nyi onɔ na ɛgbɛtɔ zɛtɛye seŋu. 21 Xwetɔ Mawu bo wasi olangbaza we awu na Aɖamu kpodo osyɛ, e bo sɔ do na ye. 22 Xwetɔ Mawu bo lɔ tun mɔ: «Fifi, xena ɛgbɛtɔ va le ɖi ɛmɛ ɖokpo le mía mɛ ha, bo nyɔ onunywɛ kpodo onu nyanyla, mí a tu omɔ do-e, na e ko mɔ do drɛn alɔ nɔ, a bo do sɔ ɛgbɛ we otin la we sinsyɛn, a bo ɖu, a bo do nɔ ɛgbɛ gbɔɔn do yi mavɔmavɔ mɛ nɔ o.» 23 Mi wɛ Xwetɔ Mawu nya-ɛ le Edɛnu we ɛjikpa la mɛ, ni a do va yi lɛ ogle le nyixɔ xe mɛ na ye ɖe-e tɔn-ɛ le la ji. 24 Xena e nya ɛgbɛtɔ tɔn-ɛ, e sɔ Celubɛnye sɔ ɖo ɛjikpa la we omɔnu le hwezɛdo we akpaji, na ye a do cɔ omɔ xeni yi ɛgbɛ we otin la kɔn. Dɛnkpwe bo le ye si, ye bo mimi-i nɔ, dɛnkpwe laye bo da ozo nɔ mla-mla-mla.