Kanyɛ hu Abɛli
4
1 Aɖamu nɔ kpodo osyɛ Ɛvu, e bo yi gomi, bo ji Kanyɛ, bo lɔ tun mɔ: «Xwetɔ Mawu kpedo wu ye, ko bo ji ŋusuglovi ɖokpo.» 2 E bo mɔ ji nɔvyɛ Abɛli. Abɛli bo nyi kanlinwintɔ, Kanyɛ bo nyi oglelɛtɔ. 3 Azan ɖeye va yi, mi wɛ gbeɖokpo, Kanyɛ hɛn ɛjinukunye bo do va na onu Xwetɔ Mawu. 4 Abɛli, can bo hɛn kanlin etɔnye we ovi tantyan xeni do oju ye do va. Xwetɔ Mawu yi Abɛli kpodo onunina etɔn, 5 vɔ, e ɔn yi Kanyɛ kpodo onunina etɔn. E vɛ le Kanyɛ wu taŋu, e bo ɖɔŋu. 6 Xwetɔ Mawu bo lɔ na Kanyɛ tun mɔ: «Ɛlɛ jɔ na aɖi do wle we, o bo ɖɔŋu? 7 Na o wa onu nywɛ, o na kɔ ota do yi oji, na e ɔn nyi mɔsinha, onu nyanyla le oxɔmɔnu na we bo jlo na ɖu le ji we, vɔ, myɔ ɖu le e ji.» 8 Ganke, Kanyɛ lɔ oxoa na nɔvyɛ Abɛli, mi wɛ hwexenu na ye le nugyo, e zɔn jɛ nɔvyɛ ji, bo hu-i.9 Xwetɔ Mawu lɔ na Kanyɛ tun mɔ: «Bɔ lɛ nɔvwe Abɛli le?» E bo ɖo e wu tun mɔ: «Ko ɔn nyɔ; mɔ wɛ nyi nɔvye la cɔtɔ?» 10 Mi wɛ Mawu lɔ tun mɔ: «Ɛlɛ nyi e mɛ na o do te? Nɔvwe we ɛhun we ogbe lo ɖi nɔ sɔn nyixɔ ji gbɔɔn bo va kɔn ye, bo lo byɔ ohlɔn nɔ. 11 Fifi nudo na jɛ ji we, o bo na le dindyɔnu le nyixɔ xeni kɛ onu bo nu nɔvwe we ɛhun le alɔ mɛ na we la ji. 12 Na o lɛ ogle, nyixɔ ɔn mɔ na we dɔkun etɔnye nɔ o. O ɔn li odo le ofi ɖe nɔ, o na nɔ flu nɔ le nyixɔ la ji.»
13 Mi wɛ Kanyɛ lɔ na Xwetɔ Mawu tun mɔ: «Ɛhwɛ xena ko hu we oto dindɔn hugan hinhɛn na-a. 14 Egbe fifi, o nya-a nɔ le nyixɔ xe la ji, ko na hwla ɖiye do we, ko ɔn li odo do ofi ɖe nɔ, a bo flu nɔ, na ɛmɛ ɖe va kpɔn-ɔ, e na hu-u.» 15 Mi wɛ Xwetɔ Mawu lɔ ni-i tun mɔ: «Na ɛmɛ ɖe hu we, zɔn acowe wɛ ko na ɖe ohlɔn tɔwe.» Mi wɛ Xwetɔ Mawu ɖo josi Kanyɛ wu, e mɛ, na ɛmɛ ɖe kpɔn-ɛ, e ko mɔ hu-i nɔ o. 16 E mɛ godo, Kanyɛ dun yi le Xwetɔ Mawu we ŋukɔn, bo va yi ci Nɔdu we oto mɛ le hwezɛdo na Edɛnu.
Kanyɛ we jijimɛviye
17 Kanyɛ nɔ kpodo osyɛ, e bo yi gomi, bo ji ŋusunglovi ɖokpo xena e ɖo nyikɔ na tun Enɔku. Kanyɛ bo ɖo toxo ɖokpo, bo ɖo ovyɛ we nyikɔ Enɔku la na toxo la. 18 Enɔku ji Iladi, Iladi bo ji Mɛhuyayɛli, Mɛhuyayɛli bo ji Mɛtucayɛli, Mɛtucayɛli bo ji Lemɛki. 19 Lemɛki bo ɖe nyɔnu owe, ɖokpo nɔ nyi Ada, owegɔ la bo nɔ nyi Sila. 20 Ada la ji Yabali, Yabali la wɛ nyi kanliwintɔ xeye ni nɔ ɖi asa a bo do sɔn nɔ ye we dagbo. 21 Ye bo yɔ nɔvyɛ tun Yubali. Emyɔ wɛ nyi dagbo na ɛmɛ xeye ni nɔ xo onuxonu okannɔ kpodo ɛmɛ xeye ni nɔ kun kpete ye. 22 Sila emyɔ bo ji Tubali-Kanyɛ xeni nɔ sɔ oganmu alo ogan a do tun odanwanu xeni ɖa. Tubali-Kanyɛ la we nɔvyɛ nyɔnusi nɔ nyi Naama.
23 Lemɛki bo lɔ na osyɛye tun mɔ:
«Ada kpodo Sila, mi ɖo oto ogbe tɛye!
Syee mi, mi tɛ oto do oxo tɛye wu!
Na ye xo-o, ko na hu ŋusunglo ɖokpo,
Na ye do abi wu ye, ko na hu vikpɛvi ɖokpo.
24 Na ye ɖe ohlɔn na Kanyɛ zɔn acowe, ye na ɖe ohlɔn na mɔ Lemɛki donu kanɖegban atun ŋukun owe.»
25 Aɖamu mɔ nɔ kpodo osyɛ. E bo ji ovi ŋusunglo ɖokpo bo ɖo nyikɔ ni-i tun Sɛti, ɖo, e lɔ tun Mawu bo na he jijimɛvi ɖokpo do Abɛli xena Kanyɛ hu la, we domɛ.
26 Sɛti va ji ovi ŋusunglo ɖokpo bo ɖo nyikɔ ni-i tun Enɔsu. Hwemɛnu wɛ ye jɛ ɛɖɛxixo na Mawu ji bo nɔ do yɔ-ɛ tun Xwetɔ Mawu.