Yesu à ɲɛ̀ a fworo kwùŋi i
28
Ɲyɛ canŋɔŋkʼà tòro ke,
cibilaage canɲcyiigea ɲyɛ̀sɔɔge na,
Magidala Mariyama ná Mariyamaŋi sanŋʼà pa mpa fanŋke wíi.
2 Ka ɲìŋke si mpâlʼa cyɛ̂ɛnnɛ sèe sèlʼe.
Kafooŋi Kile mɛ̀lɛkɛŋi wà mpyi a yîri nìɲyiŋi na,
maa ntîgʼa pa kafaabwɔhe kùuŋkulʼa láha a yaha ŋkere na,
maa ntɛ̀ɛn ku na.
3 U mpyi na ɲî kileɲini bɛ̀ɛnmpe fiige,
u vàanɲyi mú sʼà fíniŋɛ weewee.
4 Ka saɲcwɔnsigibii si fyá na ɲcyɛ̂ɛnni,
fo mà sà ɲcírige.
5 Ka mɛ̀lɛkɛŋi si jwo cyeebilʼá:
«Yii àha raa fyáge mɛ.
Yesu pi à kwòro cige na ke,
mii à li cè na uru yii na ɲcaa.
6 U ɲyɛ naha mɛ,
u à ɲɛ̀ bà u mpyi a yi jwo mɛ!
Yii u buwuŋi tasinnage wíi!
7 Numɛ,
yii a sì fwɔfwɔ,
yii i sà yi jwo u cyelempyiibilʼá na “U à ɲɛ̀ a fworo kwùŋi i.
U à kàrʼa sà yii sige Galile kùluni i.
Yii sí sà u ɲya wani.”
Yire yi mpyi mii á,
mii u jwo yii á.»
8 Ka pi fyagara wuubii ná funntanga wuubii si fê a yîri fanŋke na,
na fî na ŋkɛ̀ɛge fwɔfwɔ si sà yi jwo Yesu cyelempyiibilʼá.
9 Ka Yesu si mpâlʼa pi ɲùŋɔ bɛ̂ mà pi yaha kuni na,
maa pi shɛ́ɛre.
Ka pi i file u na,
maa niŋkure sín,
maa u cû tooyi na,
maa u pêe.
10 Ka Yesu si jwo:
«Yii àha raa fyáge mɛ.
Yii a sì,
yii sà mii cìnmpyiibii pyi na pi a sì Galile kùluni i.
Wani pi sí sà mii ɲya.»
Sòrolashiibii ná sáragawwuubii kafinare kani
11 Mà cyeebii yaha kuni na,
sòrolashiibii pi mpyi na fanŋke kàanmucaa ke,
ka pire pìi si jyè kànhe e,
mà sà yi puni yyaha jwo Kile sáragawwuubii ɲùŋufeebilʼá.
12 Ka sáragawwuubii ɲùŋufeebii si wwɔ̀ ná Yahutuubii kacwɔnribilʼe,
maa jwo a bɛ̂ li na,
maa wyɛ́rɛɲyahaga kan sòrolashiibilʼá,
13 maa jwo:
«Yii a yi yu yii a ntùuli na u cyelempyiibilʼà pa numpilage e,
mà pa u buwuŋi yû,
mà yii yaha ŋɔɔmpe na.
14 Fànhafooŋi ká yire lógo,
wuu sí n‑jà yi cwɔɔnrɔ ná u e,
bà yii si mpyi si shwɔ kyaage na mɛ.»
15 Ka pi i wyɛ́rɛŋi lwɔ́,
maa li pyi bà pi à yi jwo pi á mɛ.
Ka puru jwumpe si ɲcaala Yahutuubii shwɔhɔlʼe fo mà pa nɔ niɲjaa na.
Yii sà supyishiŋi puni pyi mii cyelempyii
16 Ka cyelempyiibii kɛ ná niŋkinŋi si ŋkàre Galile kùluni i.
Yesu mpyi a ɲàŋke ŋkemu kyaa jwo pi á ke,
ka pi i sà dùgo kuru na,
mà u ta wani.
17 Pi à sà u ɲya ke,
maa u pêe,
ŋka pi pìi funyɔ mpyi na pi kyáali.
18 Ka Yesu si file pi na,
maa pi pyi:
«Nìɲyiŋi ná ɲìŋke síŋi punʼà kan mii á.
19 Lire e yii a sì yii sà supyishiŋi puni pyi mii cyelempyii,
yii sʼa pi batizeli Tufooŋi ná Jyafooŋi ná Kile Munaani mɛge na,
20 yii raa pi taanni karigii puni mii à jwo a waha yii á ke,
cyire na.
Mii na ɲyɛ ná yii e canŋa maha canŋa fo si sà nɔ diɲyɛŋi tèekwooni na.»