Pi à kàre ná Yesu i fànhafooŋi Pilati yyére
27
Ɲyɛ̀sɔɔge na,
Kile sáragawwuubii ɲùŋufeebii puni ná Yahutuubii kacwɔnribilʼà sà piye ɲya,
maa jwo a bɛ̂ Yesu mbòŋi na,
2 maa u pwɔ maa ŋkàre ná u e fànhafooŋi Pilati yyérea.
Zhudasi kwùŋi kani
3 Zhudasi u ɲyɛ Yesu lefooŋi pi cye e ke,
u à pa li ɲya na pi à jwo na pi sí Yesu bò ke,
ka li i mpɛn u e,
ka u u wyɛ́rɛfyinŋi beɲjaaga ná kɛŋi núruŋɔ Kile sáragawwuubii ɲùŋufeebii ná Yahutuubii kacwɔnribii na,
4 maa jwo:
«Mii à kapii pyi,
mii à sùpya kan kwùŋʼá,
ŋgemu u ɲyɛ u ɲyɛ a kapii pyi mɛ.»
Ka pi i u ɲwɔ shwɔ:
«Wuu ɲaha ɲyɛ purʼe mɛ,
mu wuyo yi ɲyɛ yire.»
5 Ka Zhudasi si wyɛ́rɛfyinŋi wà Kileɲaarebage e,
maa yîri pi taan mà sà uye pwɔ a bò.
6 Ka Kile sáragawwuubii ɲùŋufeebii si uru wyɛ́rɛfyinŋi kuu maa jwo:
«Mà tàanna ná wuu Saliyaŋi i,
wuu ɲyɛ a yaa wuu u le Kileɲaarebage wyɛ́rɛŋi yaleŋke e mɛ,
ɲaha na yɛ supyibowyɛrɛ wi.»
7 Ka pi i jwo a bɛ̂ li na si sà coge faanrafooŋi wà kɛrɛge shwɔ ná uru wyɛ́rɛŋi i,
si mpyi nàmpwuunbii fanɲya.
8 Lire na,
pi à kuru kɛrɛge mɛge le:
«Sishange Kɛrɛge» mà pa nɔ ná niɲjalʼe.
9 Lire pyiŋkanni na,
jwumpe Kile tùnntunŋi Zheremi mpyi a jwo ke,
purʼà fûnŋɔ.
U mpyi a jwo:
«Pi à wyɛ́rɛfyinŋi tɔnmpyara beɲjaaga ná kɛ lwɔ́.
Izirayɛli shiinbilʼà uru tɔ̀rɔ mà yaha supyibowyɛrɛ,
10 maa sà coge faanrafooŋi kɛrɛge shwɔ ná urʼe,
bà Kafooŋi Kile à yi jwo mii á mɛb.»
Pilati à Yesu yíbe
11 Ka pi i Yesu yyéeŋɛ fànhafooŋi Pilati yyaha na,
ka u u u yíbe na:
«Yahutuubii saanŋi u ɲyɛ mu la?»
Ka Yesu si jwo:
«Mu aha jwo amuni yo.»
12 Ka Kile sáragawwuubii ɲùŋufeebii ná Yahutuubii kacwɔnribii si ntîge Yesu na karii niɲyahagilʼe,
ŋka u ɲyɛ a yafyin jwo mɛ.
13 Ka Pilati si jwo:
«Ɲcyii karigii pi na yu na ntare mu na ke,
mu ɲyɛ na cyi núru mà?»
14 Yesu ɲyɛ a sàa yafyin jwo u á mɛ,
ka lire si fànhafooŋi kakyanhala sèlʼe.
Yesu kataanmpʼà cwɔɔnrʼa yaha u mbòŋi na
15 Ɲyɛ li mpyi kalyee fànhafooŋʼá,
bilereŋkwoŋi kataanni nʼa mpyi a nɔ,
sùpyire ká kàsujyiŋi ŋgemu ɲáare u á ke,
u maha uru yaha u à fworo.
16 Lire tèni i,
wà mpyi kàsuŋi i,
sùpyire puni mpyi a u cè.
U mɛge mpyi Barabasi.
17-18 Pilati mpyi a cè na yiɲcyɛge kurugo,
Kile sáragawwuubii ɲùŋufeebilʼà Yesu Kirisita le uru cye e.
Lire e sùpyirʼà bínni ke,
ka Pilati si pi pyi:
«Jofoo yii la ɲyɛ mii i yige yɛ?
Barabasi laa,
Yesu pi maha mpyi Kirisita ke?»
19 Ɲyɛ mà Pilati yaha yukyaalabage e,
ka u cwoŋi si tùnnturo yaha a shà u á,
na ŋge nàŋi u ɲyɛ ɲcɛ̀ɛgɛ cyaga baa ke,
na u àha ŋkwɔ̀ u ɲwɔge le u kyalʼe mɛ,
ɲaha na yɛ karii niɲyahagilʼà uru kànha ŋɔɔge e pìlaga u kyaa na.
20 Ɲyɛ ka Kile sáragawwuubii ɲùŋufeebii ná Yahutuubii kacwɔnribii si sùpyire fɔ̀ɔnŋʼa ta na ti Barabasi ɲáare,
ti i Yesu yaha pi bò.
21 Ka fànhafooŋi si núrʼa pi yíbe:
«Mpii shiinbii shuunniŋi i,
jofoo yii la ɲyɛ mii i yige yɛ?»
Ka pi i jwo:
«Barabasi!»
22 Ka Pilati si pi yíbe:
«Yesu pi maha mpyi Kirisita ke,
ɲaha mii sí n‑pyi uru na yɛ?»
Ka pi puni si jwo:
«U kwòro cige na!»
23 Ka Pilati si núrʼa pi yíbe:
«Kapiini ndire u à pyi mà sà nɔ u bò yɛ?»
Ka pi i wá na ŋkwúuli fànha na:
«U kwòro kworokworocige na!»
24 Pilati à li ɲya na uru jwumpe fànhʼà cyɛ́rɛ,
tùnmpe sí i ɲyahage na ma ke,
ka u u lwɔhɔ lwɔ́ a u cyeyi jyé sùpyire ɲyii na,
maa jwo:
«Mii à na cyeyi jyé a yige ŋge nàŋi kani i.
Yii á li ɲyɛ numɛ.»
25 Ka sùpyire puni si u ɲwɔ shwɔ:
«U kwùŋi nùmpanŋke tugure ti pyi wuu ná wuu pyìibii woro.»
26 Lire tèni i ka Pilati si Barabasi yige mà tàanna ná sùpyire ɲyii wuuni i,
maa pi pyi pi à Yesu bwɔ̀n ná kàsɔrigilʼe,
maa u kan pi sà ŋkwòro kworokworocige na.
Sòrolashiibilʼà cyàha Yesu na
27 Ɲyɛ ka Pilati sòrolashiibii pìi si ŋkàre ná Yesu i pi tatɛɛnge e,
maa sòrolashiibii piibɛrii yyérʼa pa u kwûulo,
28 maa u vàanɲyi wwû u na,
maa vàanntinmbwɔhɔ niɲyɛga le u na,
29 maa ŋguro cîn mà pyi saanra ɲùntoŋɔ mà tò u na,
maa kàbii le u kàniŋɛ cyɛge e,
marii niŋkure sínni u taan,
marii u fwɔ́hɔre marii ŋko:
«Yahutuubii Saanŋi,
wuu à mu shɛ́ɛre!»
30 Marii ntilwɔhe wàa u na,
maa kàbiini shwɔ u na mà taha na u bwùun ɲùŋke e.
31 Pi à u fwɔ́hɔrʼa kwɔ̀ ke,
maa vàanntinmbwɔhe niɲyɛge wwû u na,
maa u yabiliŋi vàanɲyi le u na,
maa ŋkàre ná u e si sà ŋkwòro kworokworocige na.
Pi à Yesu kwòro cige na
32 Ɲyɛ mà sòrolashiibii yaha pi i ŋkɛ̀ɛge ná Yesu i taboŋke e,
pi à círi ná Sirɛni kànhe shinŋi wʼe,
u mɛge mpyi Simɔ.
Ɲyɛ ka pi i u kárama u à Yesu kworokworocige tugo.
33 Ɲyɛ pi à sà nɔ cyage kʼe,
pi maha kuru cyage mɛge pyi:
«Ɲuŋkwɔɔge Cyage»
34 maa yasorogo le sinmʼe mà kan Yesu á,
u bya bà u sɛɛge si mpyi si ɲíŋɛ mɛ.
U à ku nɛ́ɛnʼa wíi ke,
u ɲyɛ a ɲɛnʼa ku bya mɛ.
35 Sòrolashiibilʼà u kwòrʼa kwɔ̀ ke,
maa ŋkyaanlwooni tɛ̀gʼa u vàanɲyi táa piye na,
bà pi puni si mpyi si pi nàzhanŋi cè mɛ.
36 Lire kàntugo maa ntɛ̀ɛn wani na u kàanmucaa.
37 Ɲyɛ ka wà si u mbòŋi ɲùŋke sémʼa taha kworokworocige na u ɲùŋke nìɲyiŋi na.
Yʼà sémɛ:
«ŊGE U ƝYƐ YESU,
YAHUTUUBII SAANŊI.»
38 Ɲyɛ pi mpyi a nàŋkaalii shuunni kwòro kworokworociye na Yesu taan.
Wà mpyi u kàniŋke na,
u sanŋi sí ɲyɛ u kàmɛni na.
39 Sùpyire nintorore mpyi maha u fwɔ́hɔre,
marii ɲùɲyi kwòre,
40 marii ŋko:
«Mu u mpyi maha jwo na mu sí Kileɲaarebage cyán si ku faanre canmpyaa taanre e ke,
mu u ɲyɛ amɛ la?
Mu yabiliŋi u maye shwɔ.
Kampyi Kile Jyaŋi u ɲyɛ mu,
tîge kworokworocige na mayʼá!»
41 Ɲyɛ ka Kile sáragawwuubii ɲùŋufeebii ná Kile Saliyaŋi cyelentiibii ná Yahutuubii kacwɔnribii mú si wá na u fare marii ŋko:
42 «U à pìi shwɔ,
maa mpyi u ɲyɛ a jà a uye shwɔ mɛ.
Kampyi uru u ɲyɛ Izirayɛli saanŋi,
u tîge cige na numɛ,
lire ká mpyi,
wuu sí n‑dá u na.
43 U à u cyɛge taha Kile na,
maa jwo na uru ɲyɛ Kile Jyaŋi.
Kampyi u kyalʼà táan Kile á,
Kile à yaa u u shwɔ numɛ.»
44 Nàŋkaabii pi mpyi a kwòro u taan ke,
ka pire mú si wá na u fare amuni.
Yesu kwùŋi
45 Ɲyɛ canŋke mpyi a nɔ ɲùŋɔ niŋi i,
ka numpini si mpâlʼa jyè kìni cyeyi puni i,
mà tère pyi fo mà sà byanhara yàkoŋke na.
46 Lire tèni i,
ka Yesu si jwo fànha na:
«Eli,
Eli,
lama sabakatanic?»
Lire ɲwɔhe ku ɲyɛ:
«Mii Kileŋi,
mii Kileŋi,
ɲaha na mu à kàntugo wà mii á yɛd?»
47 Mpii pi mpyi wani ke,
ka pire pìi si yire lógo,
maa jwo:
«Yii lógo!
U naha na Kile tùnntunŋi Eli yiri,
na u pa uru tɛ̀gɛ.»
48 Lire tèenuuni i,
ka pi wà si fê a sà sìcogo fyinmɛ lùtanhage kʼe,
maa ku nɔ́rɔ kàbii na,
mà yaha Yesu ɲwɔge taan,
u u ku ta a shwɔɔnrɔ.
49 Ka pi sanmpii si jwo:
«Wuu a u wíi kampyi Eli sí n‑pa u shwɔ.»
50 Ka Yesu si núrʼa jwo fànha na,
maa u múnaani kan Kile á.
51 Lire tèni i,
ka Kileɲaarebage táataa vàanŋke si ntílʼa cwɔn niŋke e,
mà lwɔ́ nìɲyiŋi na fo ɲwɔhʼi.
Ka ɲìŋke si ɲcyɛ̂ɛnnɛ,
ka kafaabwoyi si jya.
52 Ka fanɲyi si múgo.
Kile wuubii pi mpyi a kwû ke,
ka pire pìi niɲyahara si ɲɛ̀,
53 maa fworo fanɲyi i.
(Ɲyɛ Yesu à pa ɲɛ̀ ke,
ka pi i jyè Zheruzalɛmu kànhe e mà piye cyêe shinɲyahara na.)
54 Ɲyɛ Ɔrɔmu sòrolashiibii yyaha yyére shinŋi ná mpii pi mpyi na Yesu kàanmucaa ná u e ke,
tèni i pirʼà ɲìŋke ɲya kʼà cyɛ̂ɛnnɛ,
karigii cyi à pyi ke,
maa cyire ɲya ke,
ka pi i fyá sèe sèlʼe,
maa jwo:
«Nàkaana baa,
ŋge nàŋi mpyi Kile Jyaŋi.»
55 Cyee niɲyahamii mpyi a yyére tatɔɔnge e marii wíi.
Pire cyeebii mpyi a taha Yesu fye e mà yîri Galile kùluni i,
marii u tɛ̀re.
56 Mariyama u mpyi na yîri Magidala kànhe e ke,
ná Mariyama u ɲyɛ Yakuba ná Yusufu nuŋi ke,
ná Zebede jyaabii nuŋi mpyi pi e.
Yesu ntòŋi kani
57 Yàkoŋkʼà nɔ ke,
ka nàfuufooŋi wà si mpa,
u mɛge mpyi Yusufu,
Arimati kànhe shin u mpyi u wi.
U mú na mpyi Yesu cyelempya.
58 Ka u u nɔ Pilati na,
maa sà Yesu buwuŋi ɲáare u á.
Ka Pilati si pi pyi pi u kan u á.
59 Ka Yusufu si Yesu buwuŋi lwɔ́ a sà mpwɔ vàanntofɔnŋi wʼe,
60 maa u le fanŋke e,
kuru mpyi a tùgo kafaaga ɲuŋʼi,
u mpyi a ku kwɔ̀n a yaha uye mɛɛ na,
bu mpyi na sàha ŋkwɔ̀ a tò kʼe mà ɲya mɛ.
Ka u u kafaabwɔhɔ kùuŋkulʼa pa ntò fanŋke ɲwɔge na,
maa ŋkàre.
61 Ɲyɛ Magidala Mariyama ná Mariyamaŋi sanŋi mpyi a tɛ̀nnʼa yyaha kan fanŋkʼá.
Fanŋke kàanmuɲcyaŋi
62 Kuru canŋa nùmpanŋa mpyi canŋɔŋke,
ka Kile sáragawwuubii ɲùŋufeebii ná Farizhɛɛnbii si ŋkàre siɲcyan Pilati yyére
63 maa jwo:
«Ɲùŋufooŋi,
lʼà tîge wuu funŋʼi na ŋge kafiniviniŋi,
mà u yaha ɲyii na,
u mpyi maha jwo uru ká ŋkwû,
canmpyaa taanre uru sí ɲɛ̀.
64 Kuru cyage e,
mu à yaa mu u pìi yaha pi a fanŋke kàanmucaa fo canɲyi taanreŋi ká mpa fûnŋɔ.
Lire ká mpyi li ɲyɛ a pyi mɛ,
u cyelempyiibii sí n‑jà n‑pa u buŋi yû,
si jwo na u à ɲɛ̀ a fworo kwùŋi i.
Tire kafinare kàntuge sí n‑waha si ntòro niɲcyiire na.»