Pi à sà Yesu cû
18
Ɲyɛ Yesu à puru jwumpe jwo ke,
ka u ná u cyelempyiibii si fworʼa kàre Sedɔrɔn dùge kàntugo.
Cikɔɔgɔ na mpyi kuru cyage e,
ka pi i jyè kuru funŋke e.
2 Yesu mpyi a têe na sì ná u cyelempyiibilʼe kuru cyage e.
Ɲyɛ Zhudasi u mpyi na sí Yesu le cye e ke,
uru mpyi a kuru cyage saha cè.
3 Mà Yesu ná u cyelempyiibii sanmpii yaha kuru cyage e,
ka Zhudasi si nɔ wani.
Sòrolashikuruŋɔ ná Kileɲaarebage saɲcwɔnsigibii pìi na mpyi ná Zhudasi i.
Kile sáragawwuubii ɲùŋufeebii ná Farizhɛɛnbii pi mpyi a pire tun ná Zhudasi i.
Fùkinahii ná bɛ̀ɛnmɛ yaayi yabɛrɛ ná kàshikwɔnyaaya na mpyi pi cye e.
4 Karigii cyi mpyi na sí Yesu ta ke,
u mpyi a cyire cè a kwɔ̀.
Ka u u file pi na,
maa pi yíbe:
«Jofoo yii na ɲcaa yɛ?»
5 Ka pi i u pyi:
«Nazarɛti kànhe shinŋi Yesu.»
Ka Yesu si pi pyi:
«Mii u ŋge!»
Lirʼà ta Zhudasi u mpyi na sí Yesu le cye e ke,
uru mpyi pi shwɔhɔlʼe.
6 Tèni i Yesu à jwo:
«Mii u ŋge!»
ke,
ka pi i wá na núruli kàntugo fo mà sà ɲcwo ɲìŋke na.
7 Ka u u núrʼa pi yíbe:
«Jofoo yii na ɲcaa yɛ?»
Ka pi i jwo:
«Nazarɛti kànhe shinŋi Yesu.»
8 Ka u u núrʼa pi pyi:
«Mii ɲyɛ a jwo yii á mà kwɔ̀ na mii u ŋge mà?
Kampyi mii yii saha na ɲcaa,
yii na fyèɲwɔhɔshiinbii yaha pi a sì.»
9 Lirʼà pyi ke,
jwumpe Yesu à jwo na:
«Mii Tuŋi,
shin maha shin mu à kan mii á ke,
u wà ɲyɛ a pînni mɛa» ka puru si fûnŋɔ.
10 Lirʼà Simɔ Pyɛri ta ná kàshikwɔnŋwɔɔgʼe,
ka u u ku dìrʼa wwû mà tɛ̀gʼa Kile sáragawwuubii ɲùŋufembwɔhe báarapyiŋi kàniŋɛ niŋgeŋke kwɔ̀n a cyán.
Uru báarapyiŋi mɛge na mpyi Malikusi.
11 Ka Yesu si Pyɛri pyi:
«Ŋwɔɔni le li fwuuni i.
Lire sanni i ke,
kyaage lwɔhe mii Tuŋi à yaha mii mɛɛ na ke,
mu la ɲyɛ mii u ku bya mà?»
12 Ɲyɛ Yesu à puru jwo ke,
ka sòrolashiibii ná pi ɲùŋufooŋi ná Kileɲaarebage saɲcwɔnsigibii si u cû maa u cyeyi pwɔ.
13 Maa fyânha a kàre ná u e Anab yyére,
Kayifu nafenaŋi u ɲyɛ ure.
Kayifu u mpyi sáragawwuubii ɲùŋufembwɔhe lire yyeeni.
14 Uru u mpyi a Yahutuubii ɲùŋufeebii yɛrɛ na:
«Lʼà pwɔ́rɔ shin niŋkin kanna u kwû sùpyire puni cyaga.»
Pyɛri à jwo na uru ɲyɛ a Yesu cè mɛ
(Macwo 26.69-70; Marika 14 14.66-68; Luka 22.55-57)
15 Pi niŋkaribii ná Yesu i,
Simɔ Pyɛri ná cyelempyaŋi wabɛrʼà taha pi fye e,
màceŋɛ na mpyi uru cyelempyaŋi ná sáragawwuubii ɲùŋufembwɔhe shwɔhɔlʼe.
Lire kurugo u mú à jyè ná pi e Kile sáragawwuubii ɲùŋufembwɔhe pyɛnge e.
16 Pyɛri mpyi a kwôro pyɛnge ɲwɔge na,
cyíinŋi na.
Ŋge cyelempyaŋi u mpyi sáragawwuubii ɲùŋufembwɔhe shinceŋi ke,
ka uru si fworo cyíinŋi na,
bilicwoŋi u mpyi na pyɛnge ɲwɔge kàanmucaa ke,
maa jwo ná urʼe,
maa Pyɛri lèŋɛ pyɛnge funŋke e.
17 Ɲyɛ Pyɛri niɲjyiŋi,
ka uru bilicwoŋi si jwo u á:
«Tá mu mú ɲyɛ ŋge nàŋi cyelempyaŋi wà mɛ?»
Ka Pyɛri si jwo:
«Ɔnhɔ,
mii ɲyɛ u wà mɛ!»
18 Lʼà pyi wyeere tèni i,
báarapyiibii ná Kileɲaarebage saɲcwɔnsigibii mpyi a yyére na kyànhigii nage ware,
Pyɛri mú mpyi a yyére na ku ware ná pi e.
Kile sáragawwuubii ɲùŋufembwɔhʼà Yesu yíbe
19 Ɲyɛ Kile sáragawwuubii ɲùŋufembwɔhʼà Yesu yíbe u cyelempyiibii ná u kàlaŋi kyaa na.
20 Ka Yesu si u pyi:
«Mii ɲyɛ a kyaa jwo ŋwɔhɔre e mɛ.
Tère maha tère mii mpyi maha sùpyire kâlali Kile Jwumpe kàlambayi ná Kileɲaarebage e,
cyeyi i Yahutuubii maha piye bínnini ke.
Mii ɲyɛ a yafyin jwo ŋwɔhɔre e mɛ.
21 Ɲaha kurugo mu saha na mii yíbili yɛ?
Mpii pi à ɲɛnʼa mii jwumpe lógo ke,
sà pire yíbe ɲje mii à jwo pi á ke,
pirʼà yi lógo fo mà ɲwɔ.»
22 Yesu à puru jwo ke,
Kileɲaarebage kàanmucyafooŋi u mpyi a yyére u taan ke,
ka uru si kantawaa bwɔ̀n u e,
maa u pyi:
«Sáragawwuubii ɲùŋufembwɔhe ɲwɔ mu à shwɔ amɛ la?»
23 Ka Yesu si nàŋi pyi:
«Kampyi jwumpimɛ mii à jwo,
cyage kʼà pu pi ke,
kuru jwo na á.
Kampyi jwumpimɛ bà mɛ,
ɲaha na mu à mii bwɔ̀n yɛ?»
24 Ɲyɛ ka Anac si u cyempwɔ wuŋi tùugo sáragawwuubii ɲùŋufembwɔhe Kayifu yyére.
Pyɛri saha à jwo na uru ɲyɛ Yesu cyelempya mɛ
25 Mà Simɔ Pyɛri yaha u u nage ware,
wà à u pyi:
«Tá mu mú ɲyɛ ŋge nàŋi cyelempyaŋi wà mɛ?»
U ɲyɛ a tɛ̀ɛn li taan mɛ,
maa jwo:
«Ɔnhɔ,
mii ɲyɛ u wà mà dɛ!»
26 Ɲyɛ nàŋi niŋgeŋke Pyɛri a kwɔ̀n ke,
Kile sáragawwuubii ɲùŋufembwɔhe báarapyiŋi wà na mpyi uru cìnmpworo.
Ka uru báarapyiŋi si Pyɛri pyi:
«Lire sanni i ke,
mii yabiliŋi ɲyiigii ɲyɛ a kànha a mu ná uru ɲya cikɔɔge e mà?»
27 Ka Pyɛri si núrʼa yi kyáala.
Ka ŋkùpooŋi si ntílʼa mɛɛ sú.
Pilati à Yesu yíbe
28 Lire kàntugo pi à yîri ná Yesu i Kayifu yyére maa ŋkàre fànhafooŋi pyɛngɛd.
Lʼà pyi ɲyɛ̀sɔɔge na.
Ŋka Yahutuubii ɲyɛ a ɲɛnʼa jyè fànhafooŋi pyɛnge e mɛ.
Lirʼà pyi bà pi fwɔnrɔ baa wuubii si mpyi si bilereŋkwoŋi kataanni ɲjyìŋi lyî Kile yyahe taan mɛe.
29 Lire kurugo fànhafooŋi Pilati à fworo pi fye e cyíinŋi na,
maa pi yíbe:
«Ŋge nàŋi làwwuge ɲùŋke ku ɲyɛ ŋkire yii á yɛ?»
30 Ka pi i u pyi:
«Ŋge nàŋi nʼa mpyi u ɲyɛ a kapii pyi mɛ,
wuu mpyi na sí u le mu cye e mɛ.»
31 Ka Pilati si pi pyi:
«Yii yabilimpii pi u cû yii i u kataanmpe cwɔɔnrɔ yii tàanna ná yii Saliyaŋi i.»
Ka Yahutuubii ɲùŋufeebii si u pyi:
«Kuni ɲyɛ a kan wuu á,
wuu sùpya bò mɛ.»
32 Lirʼà pyi ke,
jwumpe Yesu mpyi a jwo u mbòŋi kyaa na ke,
ka puru si fûnŋɔ.
33 Lire tèni i,
ka Pilati si núrʼa jyè u bage e,
maa Yesu yyere,
maa u yíbe:
«Yahutuubii Saanŋi u ɲyɛ mu la?»
34 Ka Yesu si u pyi:
«Mu à yi jwo maye e laa,
pìi pi à yi jwo mu á mii kyaa na?»
35 Ka Pilati si u pyi:
«Mu à mii ɲya Yahutu la?
Mu kìni shiinbii ná Kile sáragawwuubii ɲùŋufeebii pi à mu le mii cye e.
Ɲaha mu à pyi yɛ?»
36 Ka Yesu si u pyi:
«Mii Saanre ɲyɛ naha diɲyɛŋi woro mɛ.
Kàmpyi ti mpyi naha woro,
mii fyèɲwɔhɔshiinbii mpyi na sí kàshige kwɔ̀n,
bà Yahutuubii ɲùŋufeebii si mpyi pi àha ɲjà mii cû mɛ,
ŋka sèeŋi na,
mii Saanre ɲyɛ naha woro mɛ.»
37 Ka Pilati si u pyi:
«Lire e ke saanwa u ɲyɛ mu la?»
Ka Yesu si u pyi:
«Mu yabiliŋi u à jwo na mii ɲyɛ saanwa!
Mii à pa si diɲyɛŋi i,
si sèeŋi cyêe sùpyire na.
Shin maha shin la ku ɲyɛ sʼa ɲaare sèeŋi fye e ke,
urufoo sí ɲɛɛ raa mii jwumpe núru.»
38 Ka Pilati si jwo:
«Ɲaha kʼà sìi sèeŋi yɛ?»
U à puru jwo ke,
maa fworʼa kàre Yahutuubii yyére sahaŋki,
maa sà yyére pi yyaha na,
maa pi pyi:
«Mii nàha sàa tìgire cyage ta ŋge nàŋi na mɛ!
39 Ɲyɛ ná lire na ɲyɛ kalyee,
yyee maha yyee bilereŋkwoŋi kataanni ká nɔ,
mii maha yii sùpya yige kàsuŋi i,
li sí n‑bɛ̂ yii á mii u Yahutuubii Saanŋi yige la?»
40 Ka Yahutuubii si jwo fànha na:
«Ɔnhɔ,
uru yaha wani!
Barabasi yige!»
Mà li ta uru ŋge na mpyi kapimpyi.