Luka 24

Yesu à ɲɛ̀ a fworo kwùŋi i

(Macwo 28.1-10; Marika 16.1-8; Yuhana 20.1-10)

Cibilaage canɲcyiige ɲyɛ̀kwɔnge na, sìnmpe nùguntanga wumpe ná wusunaŋi pire cyeebii mpyi a yalʼa yaha ke, ka pi i yire lwɔ́ na ŋkɛ̀ɛge fanŋke na. 2 Kafaage ku mpyi a tɛ̀gʼa fanŋke ɲwɔ tò ke, pi à sà nɔ wani ke, ka pi i sà kuru ta kʼà kùuŋkulʼa láha fanŋke ɲwɔge na. 3 Ka pi i jyè fanŋke e maa wíi, ŋka pi ɲyɛ a Kafooŋi Yesu buwuŋi ɲya mɛ. 4 Ka li i pi bilibili. Mà pi yaha purʼe, ka pi i mpâlʼa nàmii shuunni ɲya pi à vàanvyinweeweere le mà yyére.

5 Ka pire cyeebii fyagara wuubii si niŋkure sín maa yyahayi cyígile ɲìŋke na. Ka pire nàmpii shuunniŋi si jwo pi á: «Ɲaha na yii ɲyɛ na ɲyii shinŋi caa kwùubii shwɔhɔlʼe yɛ? 6 U ɲyɛ naha mɛ. U à ɲɛ̀ a fworo kwùŋi i. Jwumpe u mpyi a jwo yii á mà u yaha ná yii e Galile kùluni i ke, yii funŋɔ cwo puru na. 7 U mpyi a jwo na “Fànha ki, u le kapimpyiibii cye e, pi i u kwòro cige na. U kwùŋi canmpyitanrewuuni, u sí ɲɛ̀ n‑fworo kwùŋi i.”»

8 Pi à puru jwo a kwɔ̀ ke, ka cyeebii funɲyi si ɲcwo Yesu jwumpe niɲjwumpe na. 9 Ka pi i yîri fanŋke na maa ŋkàrʼa sà yi puni yyaha jwo kɛ ná niŋkinŋi ná pi shɛ̀rɛfeebii sanmpii punʼá. 10 Cyeebii pi mpyi a kàre fanŋke na ke, pire pi mpyi: Mariyama u mpyi na yîri Magidala kànhe e ke, uru ná Zhanɛ ná Yakuba nuŋi Mariyama mà bâra cyeebii piibɛrii na. Pire cyeebii punʼà yîri fanŋke na, maa mpa jwumpe ninumpe jwo Yesu tùnntunmpilʼá. 11 Ŋka pi mpyi na sɔ̂nŋi na ɲùŋɔ baa jwumɔ cyeebilʼà jwo. Pi ɲyɛ a dá pu na mɛ. 12 Lire ná li wuuni mú i, ka Pyɛri si yîri maa fê a kàre fanŋke na, maa sà jâara a wíi ku funŋke e. Lempe kanni baare e, u ɲyɛ a yafyin ɲya mɛ. Ka li i u bilibili, ka u u núrʼa kàre pyɛngɛ.

Yesu à uye cyêe u fyèɲwɔhɔshiinbii pìi shuunni na, pi i ŋkɛ̀ɛge Emayusi kànhe e

(Marika 16.12-13)

13 Kuru canŋke ninuge e, Yesu fyèɲwɔhɔshiinbii pìi shuunni mpyi na ŋkɛ̀ɛge kànhe kà na, kuru kànhe mɛge na mpyi Emayusi. Ku ná Zheruzalɛmu kànhe laage mpyi a tòro culumɛtirii kɛ ná shuunni na mɛ. 14 Karigii cyi mpyi a pyi lire tèni i ke, pi mpyi na cyire puni yu piyʼá, na ŋkɛ̀ɛge. 15 Mà pi yaha jwumpe na piye shwɔhɔlʼe, ka Yesu yabiliŋi si file pi na, maa kuni bínni ná pi e. 16 Pi mpyi na Yesu ɲaa, ŋka lʼà pyi mu à jwo yaage kà kʼà para pi yyaha na, mà pi pyi pi ɲyɛ a jà a u cè mɛ.

17 Ka Yesu si pi yíbe: «Ɲaha shi yii na yu, na ŋkɛ̀ɛge amɛ yɛ?» Ka pi yyetanha wuubii si yyére. 18 Ŋge mɛge ku mpyi pi e Kilopasi ke, ka uru si jwo: «Karigii cyi à pyi numɛ Zheruzalɛmu i ke, mu kanni baare e, sùpya ɲyɛ a sìi Zheruzalɛmu i cyi cèmbaa mɛ.»

19 Ka Yesu si pi yíbe: «Ɲaha shi kʼà pyi yɛ?» Ka pi i u pyi: «Kile tùnntunŋi Yesu u mpyi a yîri Nazarɛti kànhe e, ná Kile mpyi a fànha le u jwumpe ná u kapyiiŋkilʼe sùpyire ɲyii na ke, nde lʼà u ta ke, lire kɛ! 20 Wuu Kile sáragawwuubii ɲùŋufeebii ná wuu yyaha yyére shiinbilʼà u le cye e, pi à u kwòro cige na a bò. 21 Wuu mpyi na sɔ̂nŋi na uru u sí n‑pa shiinbii ɲùŋɔ wwû bilere e. Ŋka u à kwû ke, cyi canmpyaa taanre u ɲyɛ ŋge. 22 Wuu kuruŋke e, cyeebii pìlʼà pa jwumpe pà jwo wuu á, mpemu pʼà sàa wuu bilibili sèe sèlʼe ke. Ɲyɛ̀ge na, pi à sôlʼa kàre u fanŋke na, 23 maa mpa wuu pyi na pire ɲyɛ a sà u buwuŋi ta wani mɛ, na pirʼà Kile mɛ̀lɛkɛɛbii pìi ɲya, ka pire mɛ̀lɛkɛɛbii si yi jwo pirʼá na Yesu à ɲɛ̀ a fworo kwùŋi i. 24 Bà cyeebilʼà yi jwo wuu á mɛ, wuu shɛ̀rɛfeebii pìi mú à shà fanŋke na, mà sà yi ta amuni, ŋka pire mú ɲyɛ a u ɲya mɛ.»

25 Ka Yesu si pi pyi: «Yii yákili baafeebii, yii dama ɲyɛ a táan jwumpe na mà dɛ! 26 Lire kyaalaŋkanni na, bà Kile Niɲcwɔnrɔŋi mpyi a yaa u kyaala u u nta a jyè Kile sìnampe e mà?»

27 Lire kàntugo mà lwɔ́ Kile tùnntunŋi sémɛbii na, mà sà nɔ fo sanmpii puni sémɛbii na, jwumpe pʼà sémɛ u kyaa na pire sémɛbilʼe ke, ka u u puru yyaha jwo pi á.

28 Kànhe na pi mpyi na ŋkɛ̀ɛge ke, pi à sà nɔ kuru na ke, ka Yesu si uye pyi mu à jwo u ko raa ntùuli sʼa ŋkɛ̀ɛge yyaha yyére. 29 Ka pi i u ɲáare na u àha ŋkàre mɛ, na numpilage na ŋko raa wwùu. Ka u u jyè pyɛnge e maa ntɛ̀ɛn wani ná pi e. 30 Tèni i pi à pa ŋkwûulo sʼa lyî ke, ka u u bwúuruŋi lwɔ́, maa fwù kan Kile á, maa u kwɔ̀n kwɔ̀n a kan pi á. 31 Lirʼà pyi ke, ka pi yákilibii si múgo, ka pi i ɲcè na Yesu wi. Lire kàntugo ka u u mpâlʼa pînni pi na.

32 Ka pi i wá na yi yu piyʼá na: «Tèni i u mpyi na Kile Jwumpe Semɛŋi yyaha yu wuu á kuni na ke, wuu funɲyi mpyi a táan sèe sèlʼe dɛ!» 33 Ka pi i ntílʼa yîri, maa núrʼa kàre Zheruzalɛmu kànhe e, mà sà sanmpii kɛ ná niŋkinŋi ná pi shɛ̀rɛfeebii ta pi à bínni. 34 Ka pire cyelempyiibii si jwo pi á na Kafooŋi Yesu à ɲɛ̀ nàkaana baa, na Simɔ yabiliŋʼà u ɲya!

35 Ɲyɛ nde lʼà mpii shiin shuunniŋi ta mà pi niŋkaribii yaha ke, ná pyiŋkanni na pi à Yesu cè, tèni i u à bwúuruŋi kwɔ̀n kwɔ̀n mà kan pi á ke, ka pi i yire puni yyaha jwo.

Yesu à uye cyêe u cyelempyiibii na

(Macwo 28.16-20; Marika 16.14-18; Yuhana 20.19-23; Kapyiiŋkii 1.6-8)

36 Mà yaha puru jwumpe na, ka pi i mpâlʼa Yesu niɲjyereŋi ɲya piye shwɔhɔlʼe. Ka u u jwo: «Kile u yyeɲiŋke kan yii á.» 37 Ka pi i fyá fo mà tatɛɛngɛ fô piye na, ɲaha na yɛ pi mpyi na sɔ̂nŋi na buŋi wà fwɔ̀ɔngɔ pirʼà ɲya. 38 Ka Yesu si pi pyi: «Ɲaha na yii ɲyɛ na fyáge bɛ? Ɲaha kʼà nte sɔ̀nŋɔre shiŋi tîrige yii funŋʼi yɛ? 39 Yii na kantahigii ná na tooyi wíi, yii i ɲcè na mii wi. Yii bwɔ̀n na na a wíi, bufwɔɔngɔ ɲyɛ na mpyi ná cyere ná kaciiyʼi mii fiige mɛ.» 40 Mà u yaha puru jwumpe na, u à u kantahigii ná u tooyi cyêe pi na.

41 Pi mpyi a dá Yesu ɲɛ̀ŋi na mɛ, ɲaha na yɛ u ɲɛ̀ŋi mpyi a pi funɲyi táan fo mà pi bilibili. Ka Yesu si pi yíbe: «Yalyige na wá naha yii á la?» 42 Ka pi i fyafwɔgɔ kan u á. 43 Ka u u ku shwɔ a kyà pi ɲyii na. 44 Maa jwo: «Tèni i mii mpyi ná yii e ke, mii à yi jwo yii á na yaaga maha yaaga kʼà sémɛ mii kyaa na ná sanmpii sémɛbii ná Zaburu sémɛŋi i ke, cyire punʼà yaa cyi tòro cyi jwuŋkanni na.»

45 Ɲyɛ u à yire jwo ke, maa pi yákilibii múgo, bà pi si mpyi si Kile Jwumpe Semɛŋi ɲwɔhe cè mɛ. 46 Maa núrʼà jwo pi á: «Lʼà sémɛ amuni na sí n‑kyérege n‑bò, ŋka u kwùŋi canntanrawoge u sí ɲɛ̀. 47 Na mà lwɔ́ Zheruzalɛmu kànhe na, Jwumpe Nintanmpe sí n‑jwo u mɛge na supyishiŋi punʼá, na pi pi toroŋkanni kɛ̂ɛnŋɛ pi i láha kapegigii na, bà Kile si mpyi si cyi yàfa pi na mɛ. 48 Ɲyɛ kyaa maha kyaa mii à pyi ke, yii à cyire puni ɲya tapyige e, yii a cyi yu yii a mâre. 49 Yii tɛ̀ɛn Zheruzalɛmu i, mii Tuŋi Kile à sífente ntemu ɲwɔmɛɛ lwɔ́ ke, fo mii aha tire tîrige yii ɲuŋʼi tèni ndemu i ke.»

Yesu à kò a dùgo nìɲyiŋi na

(Marika 16.19-20; Kapyiiŋkii 1.9-11)

50 Lire kàntugo ka Yesu si ŋkàre ná u cyelempyiibilʼe Bɛtani kànhe taan. Pi à sà nɔ wani ke, ka u u u cyeyi yîrige, maa jwó le pi á. 51 Mà u yaha u u dùbabii leni pi á, u à kò a yîri pi shwɔhɔlʼe mà kàre nìɲyiŋi na. 52 Ka cyelempyiibii si wá na u kêre. Pi à kwɔ̀ ke, ka pi funntanga wuubii si núrʼa kàre Zheruzalɛmu kànhe e.

53 Canŋa maha canŋa pi mpyi maha piye bínnini Kileɲaarebage e, marii Kile kêre.