Yesu à ɲɛ̀ a fworo kwùŋi i
16
Ɲyɛ canŋɔŋkʼà tòro ke,
Magidala Mariyama ná Yakuba nuŋi Mariyama ná Salomɛ,
ka pire mú taanre si ŋkàrʼa sà sìnmɛ nùguntanga wumɔ shwɔ si ntɛ̀gɛ Yesu buwuŋi tìri.
2 Lʼà pyi cibilaage canɲcyiigea ɲyɛ̀sɔɔge na.
Tèni i pi à nɔ kafaage fanŋke na ke,
canŋa ɲyiini mpyi na fwore.
3 Pi niŋkaribii mpyi na ŋko piyʼá:
«Jofoo u sí n‑pa kafaabwɔhe kùuŋkuu n‑láha wuu á fanŋke ɲwɔge na yɛ?»
4 Pi à ta naha pi ɲyiigii yîrige ke,
ka pi i kafaabwɔhe ta kʼà kùuŋkulʼa lwɔ́ fanŋke ɲwɔge na.
5 Pi à nɔ wani ke,
maa jyè fanŋke e,
mà nàɲjiiwe ɲya u à vàanvyinge le,
mà tɛ̀ɛn kàniŋke na,
ka cyeebii si fyá sèlʼe.
6 Ka nàɲjiiŋi si pi pyi:
«Yii àha vyá mɛ.
Nazarɛti Yesu pi à kwòro cige na ke,
uru yii na ɲcaa la?
U à ɲɛ̀ a fworo kwùŋi i,
u ɲyɛ naha mɛ.
Yii u buwuŋi tasinnage wíi.
7 Yii sà yi jwo Pyɛri ná cyelempyiibii sanmpilʼá “U à kàrʼa sà yii sige Galile kùluni i.
Yii sí sà u ɲya wani,
bà u à fyânha a yi jwo a yaha mɛ.”»
8 Ɲyɛ ka cyeebii si fê a fworo fanŋke e.
Pi puni mpyi a fyá fo na ɲcyɛ̂ɛnni.
Li funmpɛɛnrʼà pi pyi pi ɲyɛ a ɲɛnʼa yaaga jwo sùpya á mɛ.
Mpiimu na Yesu à uye cyêe ke
[
9 Yesu à ɲɛ̀ a fworo kwùŋi i cibilaage canɲcyiige ɲyɛ̀sɔɔge na ke,
Magidala Mariyama na u à fyânha a uye cyêe,
ŋge e Yesu à jínabii baashuunniŋi kɔ̀rʼa yige ke.
10 Ka uru ceeŋi si ŋkàrʼa sà yi jwo Yesu fyèɲwɔhɔshiinbilʼá.
Pi mpyi a tɛ̀ɛn yyetanhare e,
marii myahigii súu.
11 Ŋka tèni i pi a lógo na Yesu à ɲɛ̀ a fworo kwùŋi i,
na u wá ɲyii na,
na Mariyama à u ɲya ke,
pi ɲyɛ a sàa dá mɛ.
12 Lire kàntugo Yesu à uye kɛ̂ɛnŋʼa cyêe u fyèɲwɔhɔshiinbii pìi shuunni na mà pi yaha pi i ŋkɛ̀ɛge sige e.
13 Ka pire si núrʼa pa yi jwo pi sanmpilʼá,
ŋka pire mú saha ɲyɛ a dá mɛ.
14 Kàsanrage na,
Yesu à uye cyêe u cyelempyiibii kɛ ná niŋkinŋi na mà pi yaha pi i lyî.
U à pi faha pi dánabaare na,
ɲaha na yɛ mpii pi à u ɲya u à ɲɛ̀ a fworo kwùŋi i,
maa mpyi ɲyii na ke,
u cyelempyiibii ɲyɛ a ɲɛnʼa dá pire jwumpe na mɛ.
15 Puru ɲwɔhɔ na,
ka Yesu si pi pyi:
«Yii a sì diɲyɛŋi ɲùɲyi puni na,
yii sʼa Jwumpe Nintanmpe yu sùpyire punʼá.
16 Ŋgemu ká dá pu na,
maa batize ke,
urufoo sí nùmpanŋa ta,
ŋka shin maha shin u à pu lógo,
maa mpyi u ɲyɛ a dá pu na mɛ,
Kile sí urufoo tùn.
17 Mpii pi à dá mii na ke,
pire sí raa kakyanhala karigii ɲcyiimu pyi ke,
cyire cyi ɲyɛ:
pi sí raa jínabii kɔ̀re,
pi sí raa yu shɛɛnre tabɛrʼe,
18 pi sí raa wwòobii cwôre,
ŋka pi sì raa yaage pyi pi na mɛ.
Pi mɛ́ɛ ká bàha bya,
ku sì n‑jà kapii pyi pi na mɛ.
Pi sí raa cyeyi tare yampii na,
sʼa Kile ɲáare pi na pi raa ɲcùuŋi.»
Yesu à kò a dùgo nìɲyiŋi na
19 Kafooŋi Yesu à puru jwumpe puni jwo a kwɔ̀ ke,
ka Kile si u kò a dùrugo nìɲyiŋi na,
ka u u sà ntɛ̀ɛn Kile kàniŋɛ cyɛge na.
20 Ɲyɛ ka u cyelempyiibii si ŋkàrʼa sà a Jwumpe Nintanmpe yu cyeyi puni i.
Kafooŋi mpyi maha pi tɛ̀re báaraŋi puni i,
kakyanhala karigii pi mpyi maha mpyi Yesu mɛge na ke,
cyire mpyi maha fànha kaan pi jwumpʼá,
mà li cyêe na sèe wi.]