Cyelempyiibilʼà sà Yesu fanŋke niŋgage ta
20
Cibilaage canɲcyiigea ɲyɛ̀sɔɔge na,
ɲyɛge mpyi na sàha jà a cwó mɛ,
Magidala Mariyama à kàre fanŋke na mà sà li ta kafaage pi mpyi a tɛ̀gʼa ku ɲwɔ tò ke,
kurʼà lwɔ́ wani.
2 Ɲyɛ ka u u fê a kàre Simɔ Pyɛri ná cyelempyaŋi kyaa li mpyi a táan Yesu á sèlʼe ke,
pire yyére,
maa pi pyi:
«Pi à Kafooŋi buwuŋi lwɔ́ a yige fanŋke e,
wuu sí ɲyɛ a u tayahaga cè mɛ.»
3 Ka Pyɛri ná uru cyelempyaŋi si fworo na ŋkɛ̀ɛge fanŋke na.
4 Pi mú shuunni mpyi na fî,
ŋka cyelempyaŋʼà Pyɛri caanra fanŋke na.
5 U à lyêele ke,
maa lempe ɲya ɲìŋke na,
ŋka u ɲyɛ a jyè mɛ.
6 Li ɲyɛ a mɔ mɛ,
ka Simɔ Pyɛri si nɔ wani,
maa ntílʼa jyè fanŋke e,
maa lempe wíi.
7 Vàanɲyi yi mpyi a tɛ̀gʼa Yesu ɲùŋke tò ke,
yire na mpyi a kúrulʼa yaha yi mɛgɛ cyage e,
yi ná lempe ɲyɛ a mpyi tanuge e fanŋke e mɛ.
8 Ɲyɛ cyelempyaŋi u mpyi a fyânha a nɔ ke,
ka uru mú si jyè maa ɲya,
maa dá.
9 Fo mà sà nɔ lire tèni na,
cyelempyiibii ɲyɛ a mpyi a yi yyaha cè na Kile Jwumpe Semɛŋi à jwo na Yesu mpyi na sí n‑sìi ɲɛ̀ n‑fworo kwùŋi i mɛ.
10 Puru ɲwɔhɔ na,
cyelempyiibii mú shuunnʼà núrʼa kàre pyɛngɛ.
Yesu à uye cyêe Magidala Mariyama na
11 Ɲyɛ ka Mariyama si mpa yyére fanŋke ɲwɔge na,
maa mɛɛ le na súu.
Ka u mɛɛsuwuŋi si ŋkwɔ̀ a lyêelʼa wíi fanŋke e,
12 mà Kile mɛ̀lɛkɛɛbii pìi shuunni ɲya ná vàanvyinɲyi i,
pi à tɛ̀ɛn Yesu buwuŋi tasinnage e.
Pi wà à tɛ̀ɛn Yesu ɲùŋke tayahage e,
ka u sanŋi si ntɛ̀ɛn Yesu tooyi woge e.
13 Ka pi i u yíbe:
«Ceewe,
ɲaha na mu na mɛɛ súu yɛ?»
Ka u u pi pyi:
«Pi à mii Kafooŋi buwuŋi lwɔ́ a yige,
mii sí ɲyɛ a u tayahaga cè mɛ.»
14 U à ta u puru jwo a kwɔ̀ ke,
maa yyaha kɛ̂ɛnŋʼa wíi mà Yesu ɲya u à yyére,
ŋka u ɲyɛ a mpyi a cè na uru wi mɛ.
15 Ka Yesu si jwo:
«Ceewe,
ɲaha na mu na mɛɛ súu yɛ?
Jofoo mu na ɲcaa yɛ?»
Ka u u wá na sɔ̂nŋi na cikɔɔge faafooŋi wi,
ka u u u pyi:
«Lʼaha nta mu u à Yesu lwɔ́,
u saha cyêe na na si sà u lwɔ́.»
16 Ka Yesu si jwo:
«Mariyama!»
Ka u u yyaha kɛ̂ɛnŋɛ Yesu yyére maa jwo Eburubii shɛɛnre e:
«Araboni!»
Lire ɲwɔhe ku ɲyɛ:
«Cyelentuŋi!»
17 Ka Yesu si u pyi:
«Ma hà na cû n‑yaha mɛ,
mii sàha ŋkwɔ̀ a dùgo Tufooŋi yyére mɛ,
ŋka sà yi jwo mii cìnmpyiibilʼá na mii naha na dùru na Tuŋi yyére,
uru mú sí u ɲyɛ yii Tuŋi,
na mii naha na dùru na Kileŋi yyére,
uru mú sí u ɲyɛ yii Kileŋi.»
18 Ka Mariyama si ŋkàrʼa sà a yi yu cyelempyiibilʼá:
«Mii à Kafooŋi ɲya!»
Ɲje Yesu à jwo u á ke,
maa wá na yire yu.
Yesu à uye cyêe u cyelempyiibii na
19 Kuru cannuge,
cibilaage canɲcyiige yàkoŋke,
Yesu cyelempyiibii mpyi a bínni bagʼe,
maa ku shwɔ̂hɔ piye na Yahutuubii ɲùŋufeebii yyaha fyagare na.
Ka Yesu si mpa yyére pi shwɔhɔlʼe maa pi pyi:
«Kile u yyeɲiŋke kan yii á.»
20 Mà u yaha puru na,
u à u kantahigii ná u kàmpanŋke cyêe pi na.
Cyelempyiibilʼà Kafooŋi ɲya ke,
ka pi funŋke si ntáan sèlʼe.
21 Ka Yesu si núrʼa pi pyi:
«Kile u yyeɲiŋke kan yii á!
Bà Tufooŋi à mii tun mɛ,
amuni mii à yii tun.»
22 Yesu à puru jwo a kwɔ̀ ke,
maa ɲwɔge kafɛɛge fwɔ pi na,
maa pi pyi:
«Yii Kile Munaani ta.»
23 Yii aha mpiimu kapegigii yàfa pi na ke,
pire wogigii sí n‑yàfa pi na,
yii aha ɲcyé mpiimu wogigii na ke,
pire wogigii sí n‑kwôro pi na.
Yesu à uye cyêe Tomasi na
24 Yesu à uye cyêe u cyelempyiibii kɛ ná shuunniŋi na canŋke ŋkemu i ke,
ŋge mɛge ku ɲyɛ pi e Tomasi ná pi maha u pyi:
«Ŋaŋi» ke,
uru ɲyɛ a mpyi ná pi e mɛ.
25 Ka cyelempyiibii sanmpii si u pyi:
«Wuu à Kafooŋi ɲya!»
Ka u u pi pyi:
«Mii aha mpyi mii ɲyɛ a sìkanŋkii fyèŋi ɲya u cyeyi i mɛ,
mii sí ɲyɛ a na kampeeni tɛ̀gɛ fyèŋi na,
maa bwɔ̀n u ŋkèni tafuruge nɔɔpiige na mɛ,
mii sì n‑dá mɛ.»
26 Cibilaaga niŋkin à tòro ke,
ka cyelempyiibii si núrʼa piye bínni bage e,
maa ku shwɔ̂hɔ piye na,
Tomasi na mpyi ná pi e lire tèni i,
ka Yesu sí mpa yyére pi shwɔhɔlʼe,
maa jwo:
«Kile u yyeɲiŋke kan yii á.»
27 Maa Tomasi yyere na u file uru na,
maa jwo:
«Kampeeni taha naha,
na cyeyi wíi,
ma cyɛge file,
maa ku le na ŋkèni tafuruge e.
Fworo dánabaare e,
ma a dá.»
28 Ka Tomasi si u pyi:
«Mii Kafooŋi ná mii Kileŋi!»
29 Ka Yesu si u pyi:
«Mu à mii ɲya ke,
lire e mu à dá,
mpii pi à dá mii na,
mà li ta pi ɲyɛ a mii ɲya mɛ,
pire wuunʼà ɲwɔ.»
Yuhana sémɛŋi kasemɛni