Yesu à uye cyêe u cyelempyiibii pìi baashuunni na
21
Ɲyɛ cyire karigii kàntugo,
Yesu à uye cyêe u cyelempyiibii na sahaŋki Tibɛriyadi baŋi ɲwɔge na.
Amɛ u à uye cyêe pi na:
2 kuru cyage e,
Yesu cyelempyiibii pìi baashuunni na mpyi wani,
pire e Simɔ Pyɛri,
ná Tomasi pi maha mpyi:
«Ŋaŋi» ke,
ná Natanayɛli u à yîri Galile kùluni i Kana kànhe e ke,
ná Zebede jyaabii mú shuunni.
3 Ka Simɔ Pyɛri si pi pyi:
«Mii na ŋkɛ̀ɛge fyaa tacuŋi i.»
Ka cyelempyiibii sanmpii si jwo:
«Wuu mú na ŋkɛ̀ɛge ná mu i.»
Ka pi i fworo lire e,
mà sà jyè bakwɔɔge e na cwòobii wàa lwɔhe e,
ŋka kuru canŋke numpilage e,
pi ɲyɛ a fya niŋkin ta mɛ.
4 Ɲyɛ̀gʼà pa múgo ke,
ka pi i Yesu niɲjyereŋi ɲya baŋi ɲwɔge na,
ŋka pi ɲyɛ a núrʼa u cè mɛ.
5 Ka Yesu si pi pyi:
«Na pyìi,
yii à fyaabii pìi ta la?»
Ka pi i u pyi:
«Wuu ɲyɛ a yaaga ta mɛ.»
6 Ka Yesu si pi pyi:
«Yii cwòŋi wà bakwɔɔge kàniŋke na,
yii sí pìi ta.»
Pi à cwòŋi wà ke,
fyaabii ɲyahaŋi cye e pi ɲyɛ a jà a cwòŋi dìrʼa yige lwɔhe e mɛ.
7 Cyelempyaŋi kyaa li mpyi a táan Yesu á ke,
ka uru si jwo Pyɛri á:
«Kafooŋi wi!»
Simɔ Pyɛri u mpyi a u vàanɲyi wwû marii fyaabii caa ke,
tèni i u à lógo:
«Kafooŋi wi!»
ke,
ka u u láha a yi le maa jyè lwɔhe e.
8 Ka cyelempyiibii sanmpii si wá na ŋkɛ̀ɛge bakwɔɔge e kùmpoge yyére,
cwòŋi mpyi a ɲî fyaabii na,
ka pi i wá na u dìrili.
Pi ná lwɔhe ɲwɔge laage mpyi a tɔɔn mɛ,
ku mpyi a kuye wwû mɛtirii ŋkulʼe (100) mɛ.
9 Pi à nɔ kùmpoge na maa ntîge ke,
ka pi i naŋkyanhii ɲya,
fyaa sí ɲyɛ cyi ɲuŋʼi,
bwúuru mú na mpyi wani.
10 Ka Yesu si pi pyi:
«Yii a ma ná yii fyaabii niɲcumpii pìlʼe.»
11 Ka Simɔ Pyɛri si dùgo kùmpoge na,
maa cwòŋi dìrʼa yige ná fyabwoyi i.
Pi puni na mpyi ŋkuu ná beeshuunni ná kɛ ná taanre (153) ŋka fyaabii na pi ɲyahaŋi mú i,
cwòŋi ɲyɛ a cwɔn mɛ.
12 Ka Yesu si pi pyi:
«Yii a ma,
yii pa lyî.»
Cyelempyaŋi wà ɲyɛ a ɲɛnʼa u yíbe na:
«Jo u ɲyɛ mu yɛ?»
mɛ,
ɲaha na yɛ pi mpyi a cè na Kafooŋi wi.
13 Ka Yesu si file,
maa bwúuruŋi lwɔ́,
maa u táa pi na,
maa fyaabii mú kan pi á.
14 Kuru kʼà pyi Yesu tontanrawoge mà uye cyêe u cyelempyiibii na,
mà lwɔ́ u à ɲɛ̀ a fworo kwùŋi i ke.
Yesu à Pyɛri yíbe
15 Pi à lyî a kwɔ̀ ke,
ka Yesu si jwo Simɔ Pyɛri á:
«Yuhana jyaŋi Simɔ,
tàange ku ɲyɛ mu i mà yyaha tíi ná mii i ke,
tá kurʼà pêe mà tòro ŋke ku ɲyɛ pi sanmpilʼe mà yyaha tíi ná mii i bɛ?»
Ka Pyɛri si u pyi:
«Ɔɔn,
Kafooŋi!
Mu yabiliŋi ɲyɛ a cè na mu kyalʼà táan mii á mà?»
Ka Yesu si jwo u á na u a uru mpàpyiyi ɲwɔ caa.
16 Maa núrʼa jwo tozhɔnwogo:
«Yuhana jyaŋi Simɔ,
mii kyalʼà táan mu á la?»
Ka u u jwo:
«Ɔɔn,
Kafooŋi!
mu à cè na mu kyalʼà táan mii á.»
Ka Yesu si yi jwo u á na u a uru mpàabii kàanmucaa.
17 Ka Yesu si núrʼa jwo tontanrewogo:
«Yuhana jyaŋi Simɔ,
mii kyalʼà táan mu á la?»
Ka Pyɛri si yyaha tanha na Yesu à uru yíbe a ta taanre na u kyalʼà táan urʼá la,
maa Yesu pyi:
«Kafooŋi,
mu à karigii puni cè,
mu à cè na mu kyalʼà táan mii á.»
Ka Yesu si yi jwo u á na u a uru mpàabii ɲwɔ caa.
18 Maa núrʼa u pyi:
«Sèeŋi na mii sí n‑sìi yi jwo mu á,
mu nàɲjiiwe wuŋi mpyi maha vàanntinŋke le,
maa maye pwɔ,
cyage kʼà táan mu á ke,
maa ŋkàre wani.
Ŋka mu aha mpa lyɛ,
mu sí cyeyi yîrigea,
wabɛrɛ sí mu vàanntinŋke le mu na,
si mu pwɔ si ŋkàre ná mu i cyage ku ɲyɛ ku ɲyɛ a táan mu á mɛ.»
19 Kwùŋkanni na Pyɛri mpyi na sí n‑kwû si pèenɛ taha Kile na ke,
lire Yesu mpyi na yu ná mpe jwumpe e.
Puru ɲwɔhɔ na,
ka Yesu si Pyɛri pyi:
«Taha na fye e.»
Cyelempyaŋi kyaa lʼà táan Yesu á ke
20 Cyelempyaŋi kyaa li mpyi a táan Yesu á ke,
Pyɛri à yyaha kɛ̂ɛnŋʼa wíi mà uru ɲya u u ma pi kàntugo.
Canŋka mà pi yaha pi i numpilaga lyìge lyî,
uru cyelempyaŋi u ná mpyi a tɛ̀ɛn maa fɛ̂ɛn Yesu kàmpanŋke na,
maa u yíbe:
«Kafooŋi,
jofoo u sí mu le cye e yɛ?»
21 Ɲyɛ Pyɛri à uru cyelempyaŋi ɲya ke,
maa jwo Yesu á:
«Kafooŋi,
ŋge de,
ɲaha ku sí uru ta yɛ?»
22 Ka Yesu si u pyi:
«Mii la ká mpyi uru u kwôro kwùmbaa fo mii cannuruge,
mu ɲaha ku ɲyɛ lire e yɛ?
Mu wi ke,
taha mii fye e kanna.»
23 Puru jwumpe cye kurugo,
dánafeebilʼà jwo cyeyi puni i na uru ŋge cyelempyaŋi sì n‑kwû mɛ.
Mà li ta Yesu ɲyɛ a jwo Pyɛri á na u sì n‑kwû mɛ.
Mpe Yesu à jwo ke,
puru pʼà pyi:
«Mii la ká mpyi u kwôro kwùmbaa fo zà nɔ mii cannuruge na,
mu ɲaha ku ɲyɛ lire e yɛ?»
24 Uru cyelempyaŋi ninuŋi u à ɲcyii karigii puni jwo,
uru mú sí u à cyi sémɛ.
Wuu mú sʼà cè na cyi na ɲyɛ sèe.
25 Ɲyɛ Yesu à karigii cyiibɛrii niɲyahagii pyi.
Li nʼa mpyi a yaha na cyire karigii cyi le cyi mɛgɛ sémii niŋkin niŋkin i,
mii na sɔ̂nŋi pire sémɛbii tayahaga mpyi na sì n‑ta diɲyɛŋi i mɛ.