19
Kyoat Pilatus a itun a yor iry Yahudi desikre maktei bonyo, yaso suldatare ma ral oboban a raala toha healare iblutare ne, ma ral ma roban de rtaba Yesuske.† 2 Ode suldat desikre ranak a karkyary mahaw ne, ode ral ti Yesuske usuke khatuke ma kyeluk a snyamur, maktei o ral rabit narnarw a kmata molmol ebuske ma ral ma rhonak a I. 3 Maktei o iry desikre rba ti ramdiry a Yesuske wasi lulw ne, ode rala rhury ma rbitil anike ma rbohe, “Tleru O! Kali Oi ne Yahudi-nare wait Raja O!” Maktei o rkohw raseluk Yesuske matake kralake.
Ral oboban maoly ne ma ral ma roban de rtaba Yesuske (19:3)
4 Lemade Pilatus byetik ei mloskye huruk ma tyanuk ti iry Yahudi desikre ma byohe, “Myatos! Kala ma kaso ma ror I ei mloskye ti e mane, ma mhye ohe lema kutot salke it dakun toha iry ne elik.”
5 Dendye ror Yesuske ei mloskye bonyo, hyonak rabit narnarw a kmata molmol ebus desy, ode snyamur mahaw desy kimin ti usuke khatuke a nggora. Lemade Pilatus tyanuk ti iry desikre ma byohe, “Myatos iry desy!”
6 Kyoat a usu khatu mabaa klen ti irkye yor Hulasokwe, ror a suldat majak ti Hulasokwe Seike, raatos Yesuske bonyo rboran ma rbohe, “Rbakw a I ti tul masanwalw ike! Rbakw a I ti tul masanwalw ike!”
Lemade Pilatus tyanuk ti sir ma byohe, “Mmyesan a myal I ma ti mbyakw a I ti tul masanwalw ike bo! Kali lema kutot iry neke salake it elik ma ksyusu o sal a I.”
7 Keskye iry desikre rhalas Pilatus ma rbohe, “Ktyoha ara wasimy a tnyetak kubkubakke mo, I neke musti mo rtunik a tnyetak matmyatkye ti I, kali byohe Hulasokwe Anan a I.”*
8 Kyoat Pilatus itomolu ma iry desikre ratanuk koldyesy bonyo, imtaut a ksyalik. 9 Lemade Pilatus yor Yesuske ei wasi sekye kralake huruk, ode yena I de byohe, “Kali mosy a nus ka?”
Keskyede Yesuske lema tyanuk namit-namit. 10 Dendye Pilatus tyanuk ti Yesuske ma byohe, “Kyanmwane kuena o mo lema muhalas yaw ne de? De lema mhwe ohe yaw neke wasikw haretke ma bisa ma ktwunik O toha sey metmetke e? Ode wasikw haretke dakun ma kaso ma rbakw a O ti tul masanwalw ike e?”
11 Lemadendye Yesuske hyalas Pilatus ma byohe, “Kolnye Hulasokwe lema yal haretke ti o, desikemo lema bisa ma mhwareta mal tenakkwe elik. Keskye iry a manor Yaw ti o nekre wait lim o sal ne lan ma kbyilak wasimw lim o sal.”
12 Kyoat Pilatus itomolu Yesuske ma itanuk koldyesy bonyo, yalkyaw i ma yobak a ksala ma tyunik a Yesuske toha sey metmetke, keskyede iry a Yahudi desikre rboran ma rbohe, “Kolnye mbwuma mtwunik iry ne toha sey metmetke, desikemo oi neke lema muka liamu mor Kaisarke.† Kali kolnye esei desike byohe raja i, desikemo i desike syorw a Kaisarke ma desy.”
13 Kyoat Pilatus itomolu iry a Yahudi-nare ma ratanuk koldyesy bonyo, byu ti suldatare ma ror Yesuske bai mloskye ti iry Yahudi desikre huruk. Desikeo Pilatus tyaklulw ti kader a kyalamo itaklulw ti ma itunik a tnyetakke ti irire ne, neke wen a kader desike kimin ti ne kani a Flur Hatkwe.† Ma ti tel Ibranike o kani Gabata. 14 Ode kyoat itaklulw ti kader desy, desikeo sekwe dyutw de, ti sew a iry Yahudi-nare rasosan sir ma rakita sew lan Paskahke ne. Desikeo Pilatus tyanuk ti iry Yahudi desikre ma byohe, “I neke wasimy a Raja I!”
15 Keskyede iry desikre rboran ma rbohe, “Mtwabahunw a I, mtwabahunw a I, mbwakw a I ti tul masanwalw ike!”
Lemade Pilatus yena sir ma byohe, “Wah! Myaso yaw ma kbwakw a wasimy Rajake ti tul masanwalw ike e?”
Keskyede Yahudi-nare wait iry a mabaa klen ti irkye yor Hulasokwe wait usu khatu desikre rhalas Pilatus ma rbohe, “Lema ara mika ara wasimy Raja salik, de aramy miheke cuma mo Kaisarke i ne ika Raja ma aramy bo.”
16a Lemadendye Pilatus yal Yesuske ti iry desikre, ma ti rbakw a I ti tul masanwalw ike.
Yesuske rbakw a I ti tul masanwalw ike
16b Dendye iry desikre ral Yesuske ma ror I ba. 17 Kyoat rbetik toha Yerusalem, desikeo Yesuske myesan a hyar wasi tul masanwalw ike, ma byai wenke it ma kani a Wen Uskwe Keburake kimin tike.† Ma ti tel Ibranike o kani Golgota. 18 Ode ti desike Yesuske rbakw a I ti tul masanwalw ike, ma yor irkye enaru ma rbakw a sir dakun ti tul masanwalw iare, ma it a imin ti Yesuske kseri wisalke, ode it a imin ti Yesuske kseri wanke ma rareak a Yesuske. 19 Ode Pilatus yaso wasi suldatare ma ral mbanke it ma rkesy tunke khatuke it ti, maktei o rbakw a mban a rakesy tunke khatu desike ti tul masanwalw a rabakw a Yesuske ti desike wasi sra ne, ma kduduke kolnye: “Yesuske yosy a Nazaret, ma I neke iry a Yahudi-nare wait Raja I.” 20 Ode iry a Yahudi-nare ribun sir a rbaca tun suldatare rakesy desy, kali wen a rabakw Yesuske ti tul masanwalw i desike lema soso toha nus lan desy. Ode ti mban desike tunke khatu desike rkesi kla-telw. Neke ral tel Ibranike ma rkesy, ode ral tel Latinke ma rkesy, ode ral tel a Yunanike ma rkesy dakun.
21 Keskyede Yahudi-nare wait iry mabaa klen ti irkye yor Hulasokwe, neke wait usu khatu desikre rtanuk ti Pilatus de rbohe, “Kete mkwesy o ‘I neke iry Yahudi-nare wait Raja I.’ De musti mo mkwesy ohe, ‘Iry ne tyanuk ma byohe, I neke Yahudi-nare wait Rajake.’ ”
22 Keskyede Pilatus hyalas sir de byohe, “Sai kkwesy koldyesy de, desikeo desy de. Kete irkye it a byuma yeluk elik.”
23 Kyoat suldat desikre irkye enaat a rbakw a Yesuske ti tul masanwalw ike maktei bonyo, ral wasi rabitare ode rahe ti enaat, ma it o it ne rosy a ratsam-ratsam ma kyakar a sir. Maktei o ral wasi rabit narnarw a bokbokke dakun, keskye rabit narnarw bokbok desike lema rsor o nam, de ratenw kyosy a srake ma ti kyait hahke. 24 Lemadendye suldat desikre it de tyanuk ti it ma rbohe, “Kete tahy a rabit narnarw ne ma tahe, de mmya ma thuty aluri ti ma ksyusu ohe, ana ese wasi.”
Ktela desike kdi ti ma kola ne rakesy ti Kitab Lanke, ma kibohe:
“Iry desikre rahe wasikw a rabitare,
ode rhuty aluri ti wasikw rabit narnarw bokbokke.”*
Dendye suldat desikre rala koldyesy bo.
25 Kyoat desike Yesuske ena, ode ena-na wai, ode Maria idake, neke Kleopas sawa, ode Maria Magdalena dakun, neke raktemtem ramdiry ti desy, ma rney a tul masanwalw a rabakw a Yesuske ti desy. 26 Ode kyoat Yesuske yatos ohe wasi matoha I a ilobak desike† malmata imdiry yor Yesuske ena ti wen desy bonyo, Yesuske tyanuk ti ena ma byohe, “Eno, anamkwe i desy!”
27 Maktei o Yesuske tyanuk ti wasi matoha I a ilobak desike ma byohe, “Wai, enamw i desy!” Dendye kyala kyosy desike Yesuske wasi matoha I a ilobak desike, yal Yesuske ena ma ena i.
Yesuske myaty
28 Maktei o Yesuske hye deny ohe karya ribun lan a musti mo iala nekre, neke kdi ti mumu de. Dendye Yesuske tyanuk ma byohe, “Kbwatu!” Ode nam itanuk desike ktyoha nam a heitlulswo rakesy ti Kitab Lanke ma ana kidi ti ne.*
29 Ode ti desike tasy maiskye kwen makitkye kimin ti takwe, lemadendye suldatke it a ila bya ti yal temarke ode yutuk ti aurke khunake, maktei o hyuhuk aurke khuna desy ti tasy maiskye kwen makity desy, ode yal ti Yesuske nunuke. 30 Dendye kyoat Yesuske ibusak tasy maiskye kwen makity desy tebikan bonyo, tyanuk ma byohe, “Nam nekre mumu ne ktei de.” Ode itanuk koldyesy ma ktei bonyo ibalik matake ma myaty elik.
Rsimban a Yesuske serike
31 Sew a Yesuske imaty desike sew a iry Yahudi-nare rasosan sir ma rakita sew Inamreske. Ode iry Yahudi-nare ralan sew Inamres ana mama desike ma kbyilak sew Inamres ida nekre, kali sew Inamres ne kdi ti sew lan Paskahke ti minggu desy dakun. Ode iry manety lulw ti Yahudi-nare lema rdakin ti kolnye iry a rabakw sir ti tul masanwalw iare ne, ratol ti tul desikre nini sew Inamreske kdi ti. Dendye iry manety lulw ti Yahudi desikre rba ti raten toha Pilatus, ma yaso wasi suldatare ma ti rkawel iry a ratola sir ti tul masanwalw i nekre lwautare ma samlurw o rmaty, maktei o rnauk sir toha tul masanwalw i desikre ti lenla sew Inamreske kidi ti ne. 32 Lemade Pilatus wasi suldatare rba ti rkawel iry deru mahatw a rabakw a sir ti tul masanwalw iare, ma rareak a Yesuske ne, neke lwautare a kmuna. 33 Ode kyoat ranait Yesuske bonyo ratos o Yesuske myaty de, dendye lema rkawel lwaunare. 34 Klala suldatke it a yal demurke, ma yal ma syimban a Yesuske serike, ode isimban bonyo larke kyor werke knyaha.
35 Nam kuabrita nekre kyosy iry a maatos manenen ktela madi ti nekre mumu ne. Ode nam ribun iatos o itanuk nekre mumu ne mlay, dendye kabrita nam a iatos nekre ti e ma mtyohak dakun.†
36 Ode ktela nekre kdi ti mumu, ma ktyoha nam rakesy ti Kitab Lanke ti kibohe, “I neke ana lema rkawel lurike it dakun.”* 37 Ode ayatke it a ktyanuk huruk ma kbyohe, “Irire ana ratos elik ohe, iry ne I ne rasimban a I ne.”*
Yesuske ramlin a I
38 Maktei bonyo, irkye it ma ani Yusuf, ma yosy a nus Arimateake, neke bya ti iten toha Pilatus, ma bisa ma nyauk Yesuske tbunanke toha tul masanwalw ike. Yusuf neke Yesuske wasi matoha Ike it ne dakun. Keskyede ihunik ohe, i neke tyohak ti Yesuske, kali imtaut iry a Yahudi-nare wait usu khatunare. Lemade Pilatus you Yusuf nam itenke, dendye Yusuf a bya ti nyauk a Yesuske tbunanke toha tul masanwalw ike. 39 *Ode Nikodemus mya dakun ei wen desy. Nikodemus neke ain maba sokre i ne ima ma iseak a Yesuske ti sewahke ne. Ode Nikodemus neke myai wen Yesuske ratabahunw a I tike, ode yety a nul mahon a mtelas nekre, neke nul a murke ma rahora ktyabal a nul gaharuke, ma wasi mdedanke anakyai tatyailke hean-telw. 40 Lemadendye deruke ral Yesuske tbunanke, ma ral kain lenan malilikwe ma rhul eta Yesuske tbunan desy, ode raturu nul desikre ti Yesuske tbunan desy, ma ktyoha ktela Yahudike ti kolnye rala ma ramlin mamatire ne. 41 Ode ti wen Yesuske rbakw a I ti tul masanwalw ike ne, neke knyey a boke it, ma bo desike bobke kuranke it ma kimin ti, ma lenla ramlin mamatkye it ti elik. 42 Kyoat desike Yahudi-nare wait sew a Inamreske kyarasy de, ode bobke kuran desike knyey a wen desy, dendye ramlin Yesuske tbunanke ti desy.