Rkumak Yesuske
18
Ode kyoat Yesuske syambayan ma tyanuk nam ribun desy maktei bonyo, yor wasi matoha Iare rbetik toha nus Yerusalemke ma rbai sah Kidronke seridake.† Ti sahke serida desike boke it, ma kbyenw ti aw a zaitunke. Dendye Yesuske yor wasi matoha Iare rsukar ei bo desike kralake. 2 Keskyede Yudas a ana maketa Yesuske ne hye wen desy, kali kyaki-kyaki neke Yesuske yor wasi matoha Iare rawahuk sir ti wen desy. 3 Dendye Yudas yor suldat a Roma-nare, rtabal a iry majaga Hulasokwe Seike rbai wen desy dakun. Iry desikre ror Yudas de rba, kali iry mabaa klen ti irkye yor Hulasokwe wait usu khatunare, ror iry manosy lui Farisi-nare, neke raso sir ma rba. Ode kyoat iry desikre rba, desikeo rety a damarare, oborare, ode mnas o mtubal dakun.4 Keskye Yesuske hye nam ana madi mumu ti tenanke ne, lemade lyakut ei lulkwe ode yena iry desikre ma byohe, “Esei ne miobak a I ne de?”
5 Kyoat Yesuske iena iry desikre, desikeo Yudas a maketa Yesuske ne, malmata imdiry yor sir ti desy dakun. Lemade iry desikre rhalas Yesuske ma rbohe, “Yesus iry Nazaretke.”
Dendye Yesuske tyanuk ti sir ma byohe, “Yau ne.”†
6 Kyoat Yesuske tyanuk ma byohe, “Yau ne,” desikeo iry desikre rsuka sir ei lyakwe, desyo kele rtunik sir ei lasmyerke. 7 Lemade Yesuske yena sir huruk ma byohe, “Myobak esei de?”
Dendye rhalas Yesuske ma rbohe, “Yesus iry Nazaretke.”
8 Lemadendye Yesuske tyanuk ti sir ma byohe, “Dai ktwanuk ti e de, ma kbwohe, ‘Yau ne.’ Ode kolnye mlay bain ma miobak Yaw, desikemo mlyura wasikw iry nekre ma rba.” 9 Yesuske tyanuk koldyesy, ma ktyoha nam kola itanuk a kmunake ohe, “Amo, iry munal sir ma Yaw nekre, ana lema irkye it a itayar dakun.”†
10 Lemade Simon Petrus nyaik a wasi krakye, ode syoby ohut a Malkhus tlia wanke ma kdyohut. Malkhus neke ika at ti uskwe khatu lan lahuk ti iry mabaa klen ti irkye yor Hulasokwe. 11 *Dendye Yesuske tyanuk ti Petrus ma byohe, “Petrus o, mswihik wasimw kray desy ei kasulnanke huruk! De lema mhwe ohe, kala ma khwar a masunw lan a Amaku ihatetak ma Yaw ne e?”†
Ror Yesuske ba ti Hanas iry mabaa klen lan lahukke
12 Kyoat Yesuske itanuk koldyesy maktei bonyo, suldat Romawi-nare ror wait uskwe khatuke, ode iry majaga Hulasokwe Seike neke rkumak Yesuske ode rsik ranteke ti I. 13 Maktei o ror Yesuske ba ti Hanas,† neke Kayafas a ryana. Ode ti ain desike Kayafas neke ika iry mabaa klen lan lahuk ti irkye yor Hulasokwe. 14 *Kayafas neke kyalake syurat iry Yahudi-nare wait usu khatunare ma byohe, “Lemamo iry sasam neke myaty ma yeluk iry ribunke ma kete rmaty.”
Petrus ibu a ituli Yesuske
15 Kyoat desike Yesuske wasi matoha Ike enaru, neke Simon Petrus yor irkye it dakun, ma deruke rlakut rosy lyakwe ma rtoha Yesuske. Ode Yesuske wasi matoha I a ida desike hye iry mabaa klen lan lahukke, dendye syukar ma tyoha Yesuske ei kintal iry mabaa klen lan lahukke wasi sey lan imin tike, 16 klala Petrus imdiry ti mloskye ma nyey a holholat lorkye. Dendye Yesuske wasi matoha mahe iry mabaa klen lan lahuk neke, byetik huruk ma itun a yor wamfwet majaga ti holholat lory desy, ma iten ma yor Petrus de rsukar ei kintalke kralake. 17 Lemade wamfwet majaga ti holholat lory desike tyanuk ti Petrus ma byohe, “Hei! De lema oi neke iry a rakumak desy wasi matoha Ike it ne o, o de?”
Keskye Petrus hyalas wamfwet desy ma byohe, “Lema yaw.”
18 Kyoat desike mrin a ksyalik, dendye iry mabaa klen lan lahuk ti irkye yor Hulasokwe ne wait makaryaare ror suldat majaga Hulasokwe Seike ne dum, neke rorif akye ma rmamuk ti desy. Desikeo Petrus imdiry yor sir ma myamuk akye ti desy dakun.
19 Kyoat desike iry mabaa klen lan lahukke nenmo yena Yesuske ti wasi matoha Iare, ode yena I ti nam iajarare dakun. 20 Lemadendye Yesuske hyalas mabaa klen desy ma byohe, “Irire ribun a rhe nam kuajarare, kali kyalamo kajar ti sey rasambayan tiare, ode ti kintal Hulasokwe Seike, ode ti wen a iry Yahudi-nare rawahuk sir tike, de lema kajar ti wen mahunik iare. 21 Ode kyanmwane muena Yaw kolnye ne de? Lemamo mena iry a kyalamo matomolu nam kuajarare. Iry desikre rhe elik nam kutanukare.”
22 Kyoat Yesuske itanuk koldyesy maktei bonyo, majagake it a kyohw a Yesuske matake, ode tyanuk ti I ma byohe, “Hei! Lema eras ti muhalas iry mabaa klen lan lahuk desy ma mutanuk ti i koldyesy ne!”
23 Lemade Yesuske tyanuk ti iry desy ma byohe, “Kolnye tun kutanuk desike sal, desikemo mlwosu de mbwohe nam mutanukke sal. Keskyede nam kutanuk desike mlay, ode kyanmwane mukohw a matakkwe ne de?”
24 Lemade Hanas yaso ma ror Yesuske ti Kayafas, kali Kayafas nenmo ika iry mabaa klen lan lahukke ma yeluk Hanas. Ode kyoat ror Yesuske ba, desikeo rante rasik ti Yesuske simake ne kimin ti simake a nggora.
Petrus ibu a ituli Yesuske huruk
25 Kyoat desike Simon Petrus imdiry ma mamwaw i ti desy. Lemade iry mamin desikre rtanuk ti i ma rbohe, “Oi neke Yesuske wasi matoha Ike it ne o o de?”
Keskye Petrus hyalas sir ma byohe, “Lema! Lema yaw!”
26 Lemade iry mabaa klen lan lahukke wasi atke it, neke wai-na i ne Petrus isoby ohut a tliake ne,* neke tyanuk ti Petrus ma byohe, “De lema oi ne kuatos o ma munor Yesuske ti bo zaitunke krala desy e?”
27 Keskyede Petrus ibu a ituli huruk ma byohe, “Lema yaw.”
Kyoat desike dakun o sihkye kyokoak.
Ror Yesuske ba ti gubernur Pilatus
28 Bolbolbol ne a nggora bonyo, usu khatu Yahudi-nare ral Yesuske toha Kayafas wait sekye, ode ror I bai gubernurke wasi sekye. Keskye iry Yahudi-nare lema bisa ma rsukar ei gubernurke wasi sekye, kali ana khyury ma raray,† ma ana lema bisa ma rtoha ma ra kotw a Paskahke. 29 Lemadendye gubernur Pilatus byetik ma yait iry desikre, ode tyanuk ti sir ma byohe, “Mmyanadu iry neke kali sala sai de?”
30 Lemade iry desikre rhalas Pilatus ma rbohe, “Amo gubernur o, kolnye iry ne lema ika sala, desikemo lema aramy myor I mai ne.”
31 Lemade Pilatus tyanuk ti iry desikre ma byohe, “Myal iry ne, ode kyosy a e ma myesan a myukun I bo, ma ktyoha wasimy a tnyetak kubkubakke.”
Keskye iry Yahudi desikre rhalas Pilatus ma rbohe, “Ktyoha ara wasimy a ktela kubkubakke mo, iry maoly ne musti mo aramy mtyunik tnyetak matmyatkye ti I. Keskye haret Romawike kbyu eta ma lema bisa ma aramy mtyunik tnyetak matmyatkye ti irkye it elik. De rmesan a bisa ma rala koldyesy bo.”*
32 *Kyoat a iry desikre ratanuk koldyesy bonyo, nam desikre kdi ti ma ktyoha nam Yesuske itanuk ti ktela ana imaty ne.
33 Lemadendye Pilatus yulak i ei wasi sekye kralake, ode yaso irire ma ral Yesuske ma ror I ba ti yait i, ma yena I de byohe, “Oi neke Yahudi-nare wait Raja O e?”
34 Lemade Yesuske yulak I ma yena Pilatus ma byohe, “Kyosy a ralamkwe kmyesan ma mena Yaw, ta kete iry dum a rlosu Yaw ti o de?”
35 Dendye Pilatus hyalas Yesuske ma byohe, “Mrwekan mo yaw neke iry a Yahudi yaw e? De lema wasimw bangsake sir ne ranor O ma yaw ne e? Ode lema wasimy iry mabaa klen ti irkye yor Hulasokwe ne wait usu khatu sir e? De mala sal sai mane ranor O mai ne, ne de?”
36 Lemade Yesuske hyalas Pilatus ma byohe, “Kuma ma kuhareta kola rajake ne, neke lema kyosy a nuske ktem ne. Kali kolnye wen kuhareta kola rajake tike kyosy a nuske ktem ne, desikemo wasikw irire ana rma ma rsorw a irire de, ma kete ror Yaw ba ti iry manety lulw ti Yahudi-nare. Keskyede wen kuhareta kola rajake tike, neke lema kyosy a nuske ktem ne.”
37 Lemadendye Pilatus yena Yesuske huruk ma byohe, “Desikemo Oi ne Raja O e?”
Lemade Yesuske hyalas i ma byohe, “Oa mmwesan a mtwanuk ma mbwohe, Raja Yaw. Nam mutanuk desy mlay, kali radur Yaw ma kuka Raja, ode kmwai nuske ktem ne ma kabrita nam a mlaire ti irire. Ode esekar desy robak nam a mlaire, desikeo sir desike mumu ne ana rtomolu toha Yaw.”
38a Lemade Pilatus tyanuk ti Yesuske ma byohe, “Eh! Nam a mlay ne sai de?”
Rtunik tnyetak matmyatkye ti Yesuske
38b Lemade Pilatus iena Yesuske koldyesy maktei bonyo, Pilatus byetik ei mloskye huruk ma inal a yor iry a Yahudi-nare, ode tyanuk ti sir ma byohe, “Lema kutot iry neke salake it elik. 39 Keskyede wasikw ktelake de ma kyalamo ti sew lan Paskahke, desikeo ktwunik irkye it toha sey metmetke kralake. Dendye myou ma ktwunik Yahudi-nare wait Raja ne ti e e?”
40 Keskyede iry desikre raktemtem ne rboran ma rbohe, “Kete mtwunik a I! Kete mtwunik a I! De mtwunik Barabas bo!”
Barabas neke iry a masorw a haret Romawike.