Yesuske syambayan ti wasi matoha Iare
17
Lemadendye Yesuske tyanuk ate ktela ribun desikre mumu ti wasi matoha Iare, maktei bonyo, yatnyarak ei laitke ode tyanuk ma byohe, “O Amo, kyait sekwe mane, lemade kuten ma mbwitil ode malan Anamw a Yaw ne ma irire ratos. Mala koldyesy, mamode bisa ma Yau neke kbwitil ode kalan O ti irire ma rleru Animkwe. 2 Kali kola dene munal haretke ma Yaw, ma kuhareta iry mamin ti nuske ktem ne mumu ne, mamode bisa ma kal mormyorif manal nini namke ti iry a munal sir ma Yaw nekre. 3 Ode mormyorif manal nini nam neke ne: Irire rhe O. Neke Oi neke mmwesmesmesan a Hulasow mlakye. Ode irire rhe Yaw dakun de, neke Yesus Kristus† a muaso Yaw ma, kumai nuske ktem ne. 4 Ode Yau neke kbwitil ode kalan a O ti nuske ktem ne, kali kala ate nam ribun lan muaso ma kuala nekre ma ktei de. 5 Ode Amo, kala ma kbwa ti kait O ti desy. Lemade kuten toha O, ma ana mal alanke ma Yaw huruk ti desy, kola ne alan mamin Yaw ti kyoat kunor a O desy, ti kyoat nuske ktem ne lenla kimin ne.6 Yau ne kuhes O ti iry a munal sir toha nuske ktem ne ma munal sir ma Yaw ne de. Iry nekre wasimw a sir, ode mal sir ma Yaw de, ode sir ne dakun o rtoha nam mutanukare de. 7 Ode selsel neke rhe ohe, nam ribun lan a kuala ode kuajar nekre mumu ne, neke kyosy a Amakw a O ne. 8 Ode ktwanuk ti sir ti ktela nekre mumu, ti mutanuk ma Yaw desy, ma sir neke rtomolu ma ral de. Ode sir neke rhe bain ohe, Yau neke kosy a O. Ode rtohak ohe Oi ne muaso Yaw ne.
9 Ode kusambayan neke lema kswambayan ti iry a mamin ti nuske ktem ne, de kswambayan ti iry a munal sir ma Yaw nekre rmesan bo, kali sir neke wasimw a sir de. 10 Ode wasikw iry ribun nekre mumu, desikeo wasimw a sir. Ode wasimw iry ribun nekre mumu, desikeo wasikw a sir dakun de. Ode kyosy a iry desikre mumu ne wait mormyorif a kibitil o kialan Yaw ne, mane kihury ma irire raleru Yaw ne. 11 Ode ana lema kumin ti nuske ktem ne de, kali kala ma kulak Yaw ma ti kait O. Klala iry a munal sir ma Yaw nekre, neke ana ramin ti nuske ktem ne a nggora. O Amo, Oi ne nelnyely a O, ode kuten ma mujaga mamak sir a mor wasimw haretke,† neke wasimw haret munal ma Yaw ne. Mala koldyesy, mamode sir neke bisa ma raktemtem neke rety ral sasamke, kola ne kunety ral sasamke kunor a O ne. 12 Ode kyoat kunor sir a nggora ne, desikeo kujaga sir a kyor wasimw haret munal ma Yaw desy. Ode kujaga sir ma lema irkye it a itayar,† de lenla irkye sasam neke ana itayar. Kali iry neke Hulasokwe yohut de, ma ana i ne ibai mamaty rala ne, neke wen a akye ode belerangke kilehur ti nini namke.† Ode nam nekre mumu ne ana kdi ti ma ktyoha nam rakesy ti Kitab Lanke ne.*
13 Keskyede Amo, selsel neke kala ma kbwa ti kait O mane. Dendye ti kyoat kumin ti nuske ktem ne a nggora, desikeo ktwanuk nam nekre mumu ti wasikw irire de. Ode ktwanuk nam nekre mumu ti sir de, ma rtomolu, mamode ana wasikw inamukmuka ike kimin a sir dakun, ma kibebenw a sir. 14 Yau neke kabrita tunamure ti sir de. Ode ktela neke khyury ma iry mamin ti nuske ktem neke ramnisik wasikw irire, kali wasikw iry nekre ramorif ne lema kola iry mamin ti nuske ktem ne wait mormyorifare. Kola dene Yaw dakun o kumorif ne lema kola dene iry mamin ti nuske ktem ne wait mormyorifare.† 15 Ode Yau neke lema kuten ma mal sir toha nuske ktem ne, keskyede kuten toha O, ma mujaga sir toha iry mahatkwe, neke ngkeskwaure wait uskwe khatuke. 16 Kali wasikw iry nekre lema rmorif kola iry mamin ti nuske ktem ne wait mormyorifare de, kola dene Yau ne dakun o lema kmworif kola dene iry mamin ti nuske ktem ne wait mormyorifare ne.* 17 Amo, tunamure mlay mumu. Dendye kuten ma majar tunamw desikre ti sir ma rtohak ode rtoha. Ma tunamw desikre kyala sir ma nelnyelnyely a sir ma wasimw a sir, ma kete raka wait lim o sal de. 18 Kola ne muaso Yaw ma kumai nuske ktem ne, kola dene Yaw dakun o kaso sir ma rba ti rabrita Brit Eraske ti iry mamin ti nuske ktem ne. 19 Ode kabar tenakw ne ti O, ma kswaluk sir. Ma sir neke bisa ma rtoha tunamw a mlay munal ti sir desikre. Ma tunamw desikre kyala sir ma nelnyelnyely a sir ma wasimw a sir.
20 Ode lema cuma mo kswambayan ti sir bo, de kswambayan ti iry a ana matohak ma Yaw ne dakun, kali sir desike dakun o ana rtomolu ode rtohak nam a wasikw matoha Yaw nekre raajar ti sirare. 21 Lemadendye kuten ma lemamo mala sir ma, sir ne mumu ne rety ral sasamke, kola dene kunor Amakw a O ne, ti ituru tanety ral sasamke dakun ne. Ode kuten ma sir neke rety ral sasamke ror ituru, ma iry mamin ti nuske ktem ne, ana rtohak ohe Oi ne muaso Yaw ne.
22 Ode Amo, kal alanke ti sir, kola dene alan munal ma Yaw ne. Kala koldyesy ma sir neke rety ral sasamke, kola dene ituru ne dakun. 23 Yau neke kumin ti sir, ode Oi ne mumin ti Yaw. Ode Amo, kuten ma sir neke ana rety ral sasamke elik, ma khyury ma iry mamin ti nuske ktem ne bisa ma rhe ohe, Oi ne muaso Yaw ne. Ode bisa ma rhe ohe, Oi ne mlwobak a iry matoha Yaw desikre, kola dene mulobak Yaw dakun ne.
24 Ode Amo, kuten ma iry a munal sir ma Yaw nekre, ana ror Yaw ti wen ana kumin tike, ma bisa ma rmatakit wasikw madelaf o alan munal ma Yaw ne, kali Oi neke mlwobak a Yaw ti kyoat lenla muala nuske ktem ne. 25 O Amo, mlakye kimesmesan ne kimin O. Ode iry a mamin ti nuske ktem ne lema rhe O. Keskyede Yau neke khwe O. Ode wasikw a matoha Yaw nekre sir ne rhe ohe, Oi ne muaso Yaw ne. 26 Ode klwosu Amakw a O ne ti sir de, ode kyaki-kyaki ne ana klwosu O ti sir. Kala koldyesy ma wasimw loblobak a munal ma mulobak Yaw ne ana kimin ti sir, ma sir neke ralobak iry, kola dene mulobak Yaw ne. Ode Yau neke kumin ti sir ma sir neke rety ral sasamke ror Yaw.”