Ttohak manenen ti Yesuske
16
Lemade Yesuske syaur tunake ti wasi matoha Iare huruk ma byohe, “Nam nekre mumu ne nenmo ktwanuk ti e bo, ma kete mila toha wasimy a tohtohakke. 2 Kali ana irire rbu eta e ma kete mbyai wait sey a rasambayan tiare. Ode lema desike kmyesan bo, de ana kyait sekwe ma kolnye irire rtabahunw a e, desike ne rrekan ohe nam raala desy, neke ktyoha Hulasokwe ibuke. 3 Ode rala koldyesy ti e, kali lema rhe Amakw, ode lema rhe Yaw dakun. 4 Sew maba sokre lenla ktwanuk a ktela nekre mumu ti e, kali kola kumin ma kor a e a nggora. Keskyede senweke nenmo ktwanuk a ktela nekre mumu ne ti e mane, mamode kolnye ana kyait sekwe ma roban de rtaba e kola tun kutanuk ti e desikre, desikeo ana ei neke mnyenas ohe, ktela nekre mumu ne kola kuhes ti e a kmuna de.”Nam Hulasokwe Memeanke kikaryaare
5 “Senweke kala ma kbwa ti kait Amakw a maaso Yaw ne. Ode ti ei ne mumu neke lema irkye it a yena Yaw ohe, ‘Mala ma mbwai ka?’ 6 De ralamire kitol bony, ti khyali kutanuk a ktela desikre mumu ti e ne. 7 Keskyede nam kutanuk ti e neke mlay: kuba neke kyety eraske ti e. Kali kolnye lema kbwa, desikeo Iry a Masalukke† ana lema mya ma syaluk a e. Keskye kolnye kbwa, desikeo ana kaso Iry a Masalukke ma mya ma syaluk a e. I neke Hulasokwe Memeanke desy. 8 Ode ana Hulasokwe Memean desike kmya, desikeo ktyanuk ti iry mamin ti nuske ktem ne ma rhe ohe, sir neke rala lim o sal de. Ode kyala sir ma rhe ohe, nam rarekan o mlay desikre lema mlay ti Hulasokwe. Ode ana kyala sir ma rhe dakun ohe, ana Hulasokwe yal wasi ukunke ma yukun sir elik. 9 Ode ana kyala sir ma rhe ohe, sal raala ma kbyilak sal idanare ne, neke lema rtohak ma Yaw. 10 Ode ana kyala sir ma rhe ohe, mormyorif mlakye kimin Yaw, kali ana kbwa ti kait Amakw. Kyoat desy dakun o ei neke ana lema mmyatakit Yaw de. 11 Ode ana Hulasokwe Memean desike kyala iry mamin ti nuske ktem ne ma rhe ohe, Hulasokwe ana yukun sir elik. Kali Hulasokwe yukun a kmuna nyaso mahatw a mahareta iry mamin ti nuske ktem ne de, neke ngkeskwaure wait uskwe khatuke i desy.
12 Ode ktelanare ribun a nggora ma musti mo ktwanuk ti e, keskyede selsel neke lenla bisa ma mhyar a myal ktela desikre kbuanare, kali mdedan. 13 Keskyede kyoat Hulasokwe Memean desike kmya, desikeo ana kyajar e ma kyeuk a e ti nam a mlaire mumu. Keskyede nam kitanuk desikre lema kbyetik kyosy a I a myesan, de kyosy nam itomolu toha Hulasokwe ne. Ode ana klyosu ti e, ti ktela ana madi ti sew a ana mama nekre. 14 Ode Hulasokwe Memean desike ana kyala irire ma rleru Yaw, kali nam kitanuk ti e desikre, ktyomolu toha Yaw ma desy. 15 Kali nam sai ta sai ma Amaku wasi, desikeo wasikw dakun. Lemadendye ktwanuk ohe, Hulasokwe Memean desike ana ktyanuk ti e, ti nam kinal toha Yaw nekre.”
Iry matohakare ralatare ana kitol a kmuna maktei o nenmo ramukmuka sir
16 Lemade Yesuske tyanuk ti wasi matoha Iare ma byohe, “Ana lema soso bonyo lema mmyatakit Yaw de, ode ana lema soso dakun o mmyatakit Yaw huruk de.”
17 Dendye Yesuske wasi matoha Iare ratomolu Yesuske ma itanuk koldyesy bonyo, it de tyanuk ti it ma rbohe, “Kyanmwane itanuk ma ibohe, ana lema soso bonyo lema tmatakit a I de, ode ana lema soso dakun o, tmatakit a I huruk ne de? Ode kyanmwane itanuk dakun ma ibohe, ana yala ma bya ti yait Ama ne de? 18 Ode ti tun itanuk ma ibohe, ‘Lema soso.’ Neke kbuan sai de?”
19 Ode Yesuske hye ohe, matoha I desikre robak ma rena nam dum toha I, lemade tyanuk ti sir ma byohe, “Ei neke it de yena it ti khyali tun kutanuk ma kubohe, ‘Ana lema soso bonyo lema myatakit Yaw de, ode ana lema soso dakun o myatakit Yaw huruk de.’ 20 Lemade mtyomolu mamak nam kutanuk ne: Ana msyer ma kisalsal, klala iry mamin ti nuske ktem ne ana ramukmuka sir. Keskyede mnyenas! Khyehyei neke ana msyer, keskye kalyauke bonyo ana mimukmuka mimarmara e. 21 Ktela ana mikoman desike, kola ne wamfwetare kyoat radur hah ne, ma kyoat radur hah, desikeo rkoman o ksunw ksyalik ma rser ti wenatare elik. Keskyede radur hah ma ktei ma ratos naman radur ti i desy bonyo, lema rnenas a ksunsunuke ti dai radur hah desy de, kali ralatare ksyenan ti kyoat ratos anat radur sir ei nuske ktem ne de. 22 Ode ana ei ne myola sir ne dakun, ma senweke ralami kralanare ksyal a ksyalik, keskyede ana kyoat a kmwa ma kait a e huruk, desikeo ana ralamire kimukmuka i a ksyalik. Ode ana irkye it a lema bisa ma hyuty yal wasimy a inamukmuka i desy toha e elik. 23 Mtyomolu mamamak nam kutanuk ne: Kyala kyosy sew desike, ana lema myena namit-namit toha Yaw de, kali kolnye myal Anikkwe ma miten nam sai ta sai toha Amakw, desikeo ana Amaku yal ti e.† 24 Kyala kyosy lulswo ma ti kyait senwe, lenla myal Anikkwe ma miten nam dum toha Amakw. Dendye myal Anikkwe ma miten a nde, ana Hulasokwe yal ti e, ma wasimy a inamukmuka ike lan ma kbyilak.
25 Lemade nam desikre mumu ne kola ktwanuk ti e a kyor inahliakare. Klala ana kyait sekwe, desikeo ana lema ktwanuk tun inahliakare de, de kolnye kuhes Amakw ti e, desikeo ktwanuk a kimlolol ma mhye. 26 Kyoat desike ana myal Anikkwe ma miten nam toha Amakw. Ode kyoat minal Anikkwe ma miten nam toha Amakw ne, kete mryekan ohe nam miala desy kola ne mtyanuk ma Yaw, ma Yau ne kuten nam desy toha Amakw ma yal ti e. Lema koldyesy. 27 Kali Amaku I ne dakun o lyobak e a ksyalik. Ode Amaku ilobak a e ne, khyali ei neke mlyobak a Yaw, ode mtyohak ohe Yau neke kosy a Amakw. 28 Mlay! Yau neke kosy Amakw, ma kmwai nuske ktem ne ma ne. Keskyede selsel neke kala ma ktwutuk nuske ktem ne ma ne, ode kulak Yaw ba ti kait Amakw.”
29 Lemade Yesuske wasi matoha Iare rtanuk ti I de rbohe, “Amam Lan O, senwe nenmo mutun ne lema muhliak tun mutanukare, de mutun neke kimlolol bo. 30 Selsel ne aramy mhye ohe, mhwe mumu de, ode mhwe nam irkye irekan ti ralake kralake ne ti lenla iena O ti namit-namit ne. Dendye aramy mtyohak ohe, Oi neke mosy a Hulasokwe.”
31 Lemade Yesuske hyalas sir ma byohe, “Senweke nenmo mtyohak bain-bain ma Yaw deny ode? 32 Keskyede mnyenas, ana kyait sekwe ma kmya, ode sew desike kmya de, desikeo ana milaa miskyui-miskyay ma mbyai wasimy seire, ode mtyutuk lakhidik Yaw ma kmwesan bo. Keskyede ana lema kmwesan, kali Amaku sew kyaki ne yor Yaw. 33 Lemadendye nam nekre mumu ne ktwanuk ti e de, ma ei neke myorif ti inaka eraske, kali ei neke myety ral sasamke myor Yaw de. Ode ana masunure kdyan a e ti nuske ktem ne, keskyede ei neke musti mo myalkyaw ralamire ti masunw madan e desikre, kali ksworw a nuske ktem ne ma kala kal i de.”