Yesus neke tasy maiskye ktenan mlakye ne ode ity neke ksananare
15
Yesuske ihliak tunke it ma tyanuk huruk de byohe, “Yau neke tasy maiskye ktenan mlakye ne Yaw, ode manoha bo tasy maisy neke Amakw. 2 Ode ksananare neke wasikw, ma kolnye ksana lema maka kisinare, desikemo Amaku tyusy ma byisak ba. Klala ksana maka kisinare, desikemo Amaku yatlyosik ratsam-ratsam ma nelnyely, mamode ana kisinare ktyabal ma ribun. 3 Ode khyali tunakw kuajar ti eare, dendye ei neke nelnyely a e de. 4 Dendye ei neke musti mo mimin ti Yaw, ode Yau neke kumin ti e. Kali kolnye lema mimin ti Yaw, desikemo ana lema bisa ma myala ktela erasare. Kola dene tasy maiskye ksananare ma kolnye lema klyatan a ktenanke, desikeo ana lema kika kisi. Klala kolnye ksana desikre klyatan a ktenanke, desikemo ana kisi. 5 Yau neke tasy maiskye wasi ktenan mlakye, ode ei neke wasi ksananare. Ode iry a mamin ti Yaw ode kumin ti i ne, i desike ana wasi mormyorifke eras kola ne ksana maka kisi ribun desy. Kali kolnye lema mimin ti Yaw, desikemo ei neke lema myala myal ktela erasare elik. 6 Dendye kolnye esei desike lema imin ti Yaw, desikeo kola dene aw ksana lema maka kisinare ne. Ma ana manoha bo desy syoby a ksana desikre ba toha ktenanke, ma yotuk bai mloskye ma kimraw, maktei o yili yahuk ode yal akye ti ma knya. 7 Klala kolnye ei neke tetap ma mimin ti Yaw, ode tunakure tetap ma kimin ti ralami kralanare, desikeo mdyakin ma miten sai toha Amakw, desikeo nam miten desike Amaku ana yal ti e. 8 Ode kolnye ei ne myala ktela erasare ribun, kola ne ksana maka kisi ribun desikre, desike ksyusu ohe, ei neke wasikw matoha e bain-bain. Desike ne khyury ma irire rleru Amakw.9 Yau neke klwobak a e, kola dene Amaku ilobak Yaw ne. Dendye musti mo ei neke tetap ma mimin ti wasikw loblobakke. 10 Neke kolnye ei neke mtyoha wasikw haretare, desikemo ei neke mimin ti wasikw loblobakke ma desy.† Kola dene ktwoha Amaku wasi haretare, desikeo kumin ti Amaku wasi loblobakke dakun ma desy. 11 Nam ribun nekre klwosu ti e de, ma ana wasikw inamukmuka ike kimin ti ralami kralanare, ode ei ne dakun o wasimy a inamukmuka ike ana ktyabal a ktyabal toha. 12 *Lemade wasikw haret kutanuk ti eke, neke kolnye: Musti mo it de lyobak it, kola dene kulobak a e ne. 13 Ode lema kika iry a wasi loblobakke lan ma kbyilak loblobak a kihury irkye ma inal wasi mormyorifke ma imaty ma kieluk lianare ne. 14 Lemade kolnye ei neke mtyoha wasikw haretare, desikemo liakw a e ma desy. 15 Dendye senweke lema kbwohe wasikw at e de, kali atke lema hye ebuke wasi nam irekanare. De ei neke kbwohe liakw a e de, kali nam ribun kutomolu toha Amakw neke, klwosu ti e mumu de. 16 Kali ei neke lema myilik Yaw, de Yau neke kilik a e. Ode kaso e ma mbya ti myala ktela erasare, ode myabrita Yaw ti irire ma rtohak ma Yaw dakun, desikemo myola dene tasy maiskye ksana maka kisi eras desikre. Ode kisi eras desikre ana lema kibtasy, de kmyorif nini nam. Ode kaso e ma myala koldyesy, ma kolnye myal Anikkwe ma miten nam sai toha Amakw, desikeo ana Amaku yal ti e.† 17 Lemadendye wasikw haret kunal ti eke, neke kolnye: Musti mo it de lyobak a it.”
Irire ti nuske ktem ne ramnisik Yesuske yor wasi matoha Iare
18 Lemadendye Yesuske tyanuk huruk ti wasi matoha Iare ma byohe, “Kolnye iry mamin ti nuske ktem ne ramnisik e, desikeo mnyenas ohe, iry desikre ramnisik Yau kmuna e de. 19 Dendye kolnye ei neke lema mtyohak ma Yaw, kola iry mamin ti nuske ktem ne lema ratohak ma Yaw ne, desikemo iry mamin ti nuske ktem ne ana rlobak a e a nggora, kola dene ralobak wait irire ne. Keskyede Yau neke kilik a e toha iry mamin ti nuske ktem ne, ma wasikw iry a e de, ma lema mmyorif kola sir de. Koldyesike mane iry mamin ti nuske ktem ne ramnisik a e ne. 20 *Ode musti mo mnyenas nam kola kutanuk ti e desy. Neke makaryake lema lan i ma byilak wasi amam lanke. Dendye kolnye iry mamin ti nuske ktem neke roban de rtaba Yaw, desikeo sir neke ana roban de rtaba e dakun. Klala kolnye iry desikre rtoha tunakure de, desikeo ana rtoha tun mitanukare dakun. 21 Keskyede ana irire roban de rtaba e, kali mtyoha Yaw. Rala ti e koldyesy, kali sir desike lema rhe Iry a maaso Yaw ne. 22 Lemade kolnye lema kmwa ma ktwanuk tunakure ti iry desikre, desikemo sir neke Hulasokwe lema yoit salke ti sir. Keskyede kmwa ma kait sir ma ktwanuk tunakure ti sir de, ode rabrai ma rtoha tun kutanuk ti sir desikre. Dendye lema bisa ma ralak tenatare ma rbohe, sir neke lema raka wait lim o sal. 23 Dendye kolnye esei desike imnisik Yaw, desikeo imnisik Amakw dakun ma desy. 24 Ode kala ktela masalsyalik iare daku iry ribunke de, ode irkye it a lenla elik ma yala ktela maoly desikre daku irkye. Keskyede kolnye lema kala nam maoly desikre, desikemo Hulasokwe lema yoit salke ti iry maatos nam kuala desikre. Keskye lema bisa ma iry desikre ralak tenatare ma rbohe, lema raka wait lim o sal. Kali senweke biar ma ratos nam kuala daku sir nekre de, keskyede sir neke tetap ma ramnisik Yaw, ode ramnisik Amakw dakun. 25 Keskyede rala koldyesy, kali nam iry manety Hulasokwe wasi nyanoare rakesy ti wait Kitab Lanke kralake ne, musti mo kdi ti, ti kibohe, ‘Sir neke ramnisik Yaw, keskye lema kala namit-namit mane kihury ma ramnisik Yaw ne.’*
26 Keskyede Yau neke ana kaso Iry a Masalukke† ma mya ma syaluk a e. I neke Memeanke kyosy Amakw, ma klyosu ktela mlaire. Ode Memean a mlay desike ana kmya ma kihes namit-namit a khyali Yaw ti irire. 27 Ode ei ne musti mo mihes Yaw ti irire dakun, kali kyoat khwatuk wasikw karyake ti nuske ktem ne, desikeo ei neke myor a Yaw kyala kyosy khyehyeike de.”