Yesuske yeluk sal a mlakye ma tlami ma tba ti tait ity Amat Hulasokwe
14
Yesuske tyanuk huruk ti wasi matoha Iare ma byohe, “Kete ralamire kakan, de mtyohak ti Hulasokwe, ode mtyohak ma Yaw dakun. 2 Ode wenare ribun ti Amaku wasi sey a mamin ti wen sra eras so, ma irire ramin ti. Lemade kmwuna e ma kbwai so, ma ti kusosan wenare kita e, ma mimin ti ma mmyon ti. Ode kolnye nam desike lema mlay, desikeo lema ktwanuk koldyesy ti e de. 3 Lemadendye kolnye kusosan wen desikre kita e maktei bonyo, ana kulak Yaw mai ne huruk, mamode kor a e ma tbai wen kusosan kita e desikre. Kala koldyesy, mamode kolnye kumin ti kabei desy, desikeo mimin ti desy dakun. 4 Ode ei ne mhye sal mabai wen ana kumin ti desy de.” 5 Lemade Tomas tyanuk ti Yesuske ma byohe, “Amam Lan O, lema aramy mhye o mbwai kabei, dendye ana kolkyabei ma bisa ma aramy mhye sal mabai wen desy de?”
6 Dendye Yesuske hyalas i ma byohe, “Yau neke kmwesan a keluk salke ma irire rlami ma rba ti rait Amakw. Ode Yau neke kmwesan kabrita tun a mlaire ti khyali Amakw. Ode Yau neke kmwesan a kal mormyorif manal nini namke ti irkye.† Lema kika sal salik ma irkye bisa ma lyami ma bya ti yait Amakw, de sal a mlakye ne Yau kmwesan bo. Dendye kolnye irkye yobak ma bya ti yait Amakw, keskye lema lyami sal a mlakye, desikeo iry desike ana lema bisa ma ti yait Amakw. 7 Ode kolnye ei neke mhye Yaw de, desikemo ana mhye Amakw dakun. Lemade senweke mhye Amakw de, ode myatos I de.”
8 Lemadendye Filipus tyanuk ti Yesuske ma byohe, “Amam Lan O, aramy mitenke o mswusu Amamw desy ma aramy, desike ne kyoat ma aramy de.”
9 Keskyede Yesuske tyanuk ti i ma byohe, “Filipus o, kunor a e neke klenke soso de, ode lenla mhwe Yaw elik e? Esei desike yatos Yaw, desikeo yatos Amakw ma desy de. Ode kolkyabei ne muten ma kususu Amakw ti e ne de? 10 Lema mtwohak ohe, Yau neke kumin ti Amakw, ode Amaku imin ti Yaw, e? Ode tun a kutanuk ti e nekre mumu ne lema kyosy a Yau kmwesan, de kyosy a Amakw a mamin ti Yaw ne. Ode I ne iala ktela kuala nekre mumu ne.* 11 Lemade ei ne musti mo mtyohak ohe Yau ne kumin ti Amakw, ode Amaku imin ti Yaw. Keskyede kolnye lema mtyohak ti khyali nam kutanuk desy, desikeo lemamo mtyohak ti khyali nyatos masalsyalik i a kualanare. 12 Mtyomolu mamak nam kutanuk ne! Ana kbwa ti kait Amakw mane. Lemadendye esei desike tyohak ma Yaw, i desike ana yala karya ne o mais kola kualanare, ma ti kyal a karya lan mabilak karya kuala desikre dakun, kali kor Amakw o so de. 13 Ode kolnye myal Anikkwe ma miten ma kala nam sai desy, desikemo ana kala nam desy. Ode ana kala nam desike ma irire rleru Amaku Anike, ma ksyusu Amakw wasi haretke ode madelafke.† 14 Koly ma ktwanuk ti e huruk ohe, kolnye myal Anikkwe ma miten ma kala sai ta sai bo, desikeo ana kala nam desy.”
Yesuske ihatetak ohe ana Hulasokwe Memeanke kmya ma ksyaluk iry a matohakare
15 Lemade Yesuske tyanuk huruk ma byohe, “Ode kolnye myal ralami kralanare ma Yaw, desikeo ana mtyoha wasikw haretare. 16 Ode ana kuten toha Amakw, ma yaso Iry a Masalukke† ma myai ne ma yeluk Yaw, ma syaluk a e ma yal malkyakakwe ti e. Ode ana Iry a Masaluk desike lema elik ma lyoin toha e, de ana inonor a e nini nam ti kiba knaru ne. 17 Ode Iry a Masaluk neke I ne Hulasokwe Memean a kilosu nam a mlaire mumu ne. Keskyede iry mamin ti nuske ktem ne lema rou ma ral Hulasokwe Memean desy, kali lema rmatakit I, ode lema rhe I. Keskyede ei neke mhye I, kali senweke I ne inonor a e ne, ode ana imin ti ralami kralanare dakun. 18 Lemade ana lema elik ma ktwutuk a e ma mmyorif kola naman metw nekre, de ana kulak a Yaw ma kait e. 19 Ode lema soso bonyo iry mamin ti nuske ktem ne ana lema rmatakit Yaw de, keskyede ei neke ana mmyatakit a Yaw huruk. Ode kali Yau neke ana kmworif huruk, dendye ei neke ana mmyorif dakun. 20 Ode kolnye kyait sekwe ma kmworif huruk, desikeo ana mhye ohe, Yau neke kumin ti Amakw, ode ei neke mimin ti Yaw, ode Yau neke kumin ti e dakun. 21 Dendye kolnye esei desike tyomolu ode tyoha wasikw haretare, desikeo i desike yal ralake kralake ma Yaw de. Ode esei desike yal ralake kralake ma Yaw, desikeo ana Amaku lyobak i. Ode Yau ne ana klwobak i dakun, ode kswusu tenakkwe ti i.”
22 Lemadendye Yudas a salik, neke lema Yudas Iskariotke, i neke yena Yesuske ma byohe, “Amam Lan O, kyanmwane mubuma cuma mo mususu tenamkwe ma aramy, ode lema mususu tenamkwe ti iry mamin ti nuske ktem ne ne de?”
23 Dendye Yesuske hyalas i ma byohe, “Iry a manal ralake kralake ma Yaw ne, i ne ana tyoha tun kutanukare, ode ana Amaku lyobak a i. Ode Amaku yor Yaw neke, ana aramy mmya ma mimin ti iry desy, ma aramy mmyon ti. 24 Klala iry a lema manal ralake kralake ma Yaw ne, i desike lema tyoha tun kutanukare. Keskye tun kutanuk ma mitomolu desikre, neke lema kyosy a Yau kmwesan, de tun desikre mumu ne kyosy a Amakw a maaso Yaw ne. 25 Tun desikre ktwanuk mumu ti e de, ti kyoat kunor a e a nggora ne. 26 Keskyede kyoat a Amaku yaso Iry a Masalukke, neke Memeanke, ma kmya ma kyeluk Yaw, ma ksyaluk a e ti ne, desikeo Memean desike ana kyajar a e ti nam salno salik ribun nekre mumu ne, ode ana kyala e ma minenenas tun kutanuk ti e desikre mumu.
27 Ode ana kbwa, desikeo kal wasikw inaka eraske ti e, ma kyala ralamire ma kele rteka. Ode wasikw inaka eras kunal ti e ne, neke lema kola nam nuske ktem ne kinal ti e desy. Dendye kete ralamire kakan, ode kete mimtaut. 28 Lemade mtyomolu deny o de, ti nam kutanuk ti e desy ohe, ‘Ana kbwa, keskyede ana kulak Yaw ma kait e.’ Ode kolnye myal ralami kralanare bain ma Yaw de, desikemo ana ralamire kimukmuka i, ti khyali kuba ti kunait Amakw ne, kali Amaku lan I ma byilak Yaw. 29 Lemade senweke ktwanuk a ktela ne ti e, ti ana lenla kidi ti ne, mamode ana ti kyoat ktela madi ti sew a ana mama nekre kdi ti, desikeo ana mtyohak ma Yaw bain ohe tun kutanuk ne mlay.
30 Ode ana lema kutun lan a kor e de, kali kyait sekwe ma ngkeskwaure wait uskwe khatu mahareta iry mamin ti nuske ktem ne, neke yala ma mya mane. Keskyede i desike lema bisa ma hyareta yal Yaw. 31 Keskye ana kal tenakkwe ba ma kmwaty ma ktwoha haret Amaku itanukke. Kala koldyesy, mamode kyosy a ktela kuala desy, ma ana iry mamin ti nuske ktem ne rhe ohe, Yau ne kal ralakkwe kralake ti Amakw de.
Dendye lemamo tamdiry ma tbetik toha ne ma tbai wen salik.”