Yesuske yut a wasi matoha Iare lwautare
13
Ode lenla sew lan Paskahke kdi ti,† desikeo Yesuske hye ohe kyait a sekwe ma tyutuk nuske ktem ne mane, ma yulak I ma ti yait Ama Hulasokwe o wen sra eraske. Ode kyoat Yesuske imin ti nuske ktem ne, desikeo lyobak wasi iry matoha Iare, neke lyobak sir nini kyait sew a imatkye. 2 Ode kyoat Yesuske yor wasi matoha Iare lenla rawahuk sir ma raknam ti sewah desy bonyo, uskwe khatu ngkeskwakwe syukar Yudas Iskariotke de. Yudas neke Simon Iskariotke ananke, ma i ne ana iketa Yesuske ne. Lemade sewahke bonyo, Yesuske yor wasi matoha Iare rawahuk sir ma rtaklulw ma raknam ti sew lan Paskah desy. 3 Yesuske hye ohe Ama Hulasokwe yal haretke mumu ti I de. Ode Yesuske hye dakun ohe, Ama Hulasokwe yaso I ma myai nuske ktem ne, ode ana yulak I huruk ma ti yait Ama Hulasokwe. 4 Lemadendye Yesuske imdiry ma ti yonuk wasi rabit narnarw bokbokke, ode yal kainke klaike ma yaklela ti smwelake. 5 Maktei o yal werke ti loyangke it, ode yal wer desy ma yut a wasi matoha Iare it o it lwaut, neke yut it a lwau kmuna maktei o yal kainke klai inal ma iaklela ti smwelake desy, ma yal ma kyur iry mamuna desike lwauke ma bakbak. Yesuske yala koldyesy ti wasi matoha Iare ma kyakar sir mumu.6 Ode kyoat Yesuske inait a Simon Petrus bonyo, Simon a tyanuk ti I ma byohe, “Amo, Oi ne Amam Lan a O, ode kyanmwane mubuma muut a lwaukure ne de?”
7 Lemade Yesuske hyalas i ma byohe, “Senweke lenla mhwe nam kuala ne kbuanke, keskyede ana kalyauke bonyo nenmo mhwe wasi kbuanke.”
8 Lemadendye Petrus a tyanuk ti Yesuske huruk ma byohe, “Keskye lema eras kolnye mut a lwaukkwe.”
Lemade Yesuske tyanuk ti Petrus ma byohe, “Kolnye lema kut lwaumkwe, desikemo oi neke lema wasikw iry a o.”
9 Dendye Simon Petrus tyanuk ti Yesuske ma byohe, “Amam Lan O, desikemo kete mut lwaukkwe bo, de mut a simakkwe ode usukkwe khatuke dakun!”
10 Keskyede Yesuske tyanuk ti Petrus ma byohe, “Irkye it ma kolnye iris ma nelnyely a i de, maktei o lyakut ti de lyakut ma, desikemo lema rut a tenanke ktem ne huruk, de rut a lwaunare bo, kali tenanke ktem ne nelnyely a nggora, de lwaunare ne kiray bony ne.† Ode ei ne nelnyely a e de, keskye lema ei ne mumu ne nelnyely a e.”
11 Ode Yesuske nenmo tyanuk ma byohe, “Ode ei ne nelnyely a e de, keskye lema ei ne mumu ne nelnyely a e,” kali Yesuske hye iry a mareky ma ana iketa I ne de.
12 *Kyoat Yesuske iut a wasi matoha Iare lwautare maktei bonyo, yal wasi rabit narnarw bokbok desy ma hyonak huruk, maktei o tyaklulw. Ode tyanuk ti sir ma byohe, “Mhye nam dai nenmo kuala ti e ne kbuanke ta lema de? 13 Neke ei neke kyalamo myabuk Yaw o ‘Tuanggurw,’ dete lemamo ‘Amam Lan O.’ Desike mlay! Kali Yaw neke wasimy Tuanggurw a Yaw, ode wasimy Amam Lan Yaw. 14 Dendye kolnye wasimy Tuanggurw Yaw, ode wasimy Amam Lan Yaw ma kut a lwaumire, desikemo ei neke musti mo it de yut it a lwau dakun. 15 Kala kolnye ma myatos mamode ana myala kola dakun.”
16 *Yesuske tyanuk huruk ma byohe, “Mtyomolu mamak nam kutanuk ne: Makaryake lema lan i ma byilak wasi amam lanke, ode iry a raasoke lema lan i ma byilak iry a maaso ike. 17 Ode ei neke mhye nam kutanuk nekre mumu de. Dendye kolnye mnyauk tenamire ma babaf ti sai ta sai bo, ma mtyoha ma myala kola nam kuala desy, desikemo ana Hulasokwe yal eraske ti e.
18 Nam kutanuk nekre lema ktwanuk ti ei ne mumu. Kali Yaw ne khwe iry a kuilikare de. Keskyede nam rakesy ti Kitab Lanke kralake ne, musti mo kdi ti. Ode nam rakesy neke kbyohe, ‘Liakw a maknam a kyor Yaw ne, ana syanyeta Yaw.’* 19 Lemade senweke ktwanuk ktela ne ti e, ti ana lenla kidi ti ne, ma kolnye ktela ne ana kdi ti, desikeo ei neke mtyohak ohe Yaw neke Iry a Hulasokwe iasoke I ne, ma kola tun kutanuk ti e desy.”
20 *Ode Yesuske tyanuk huruk ma byohe, “Mtyomolu mamak nam kutanuk ti e ne: esei desike ikita ma yal iry a kuasoke, desikeo yal Yaw dakun. Ode esei desike ikita ma yal Yaw, desikeo yal Amakw a maaso Yaw ne dakun.”
Yesuske hye o ana wasi matoha Ike it a kyeta I ti iry a mamnisik Iare
21 Kyoat Yesuske itanuk koldyesy maktei bonyo, ralake krala neke ksyal a ksyalik. Dendye tyanuk ti wasi matoha Iare ma byohe, “Mtyomolu mamak nam kutanuk ne! Ti ei ne mumu neke irkye it a ana kyeta Yaw.”
22 Lemadendye wasi matoha I desikre rheran, ode it de yatos it, kali lema rhe ohe, esei ne Yesuske ibohe ana iketa I ne. 23 Ode ti wen desy, Yesuske wasi matoha I a ilobakke ma i ne tyaklulw ti Yesuske serike.† 24 Dendye Simon Petrus kyubak mata daku iry a Yesuske ilobak i desy, ma yena Yesuske ohe, esei ne Yesuske itanuk i ne de? 25 Lemadendye Yesuske wasi matoha I desike, yulak matake sara Yesuske ode ibubu ti I ma byohe, “Amam Lan O, esei de?”
26 Dendye Yesuske hyalas i ma byohe, “Kolnye khwuhuk a rotkye ti wer mamin ti takwe krala ne, ode kal ti esei desy, desikemo iry ne i desy.”
Dendye Yesuske yal a rotkye ma byiny, ode hyuhuk ti wer desy, maktei o yal ti Yudas, neke Simon Iskariotke ananke. 27 Ode kyoat a Yudas inal roty desy bonyo, uskwe khatu ngkeskwakwe syukar a i. Lemadendye Yesuske tyanuk ti Yudas ma byohe, “Nam a mubuma muala ne, mala mirin a nde.”
28 Keskyede iry a rataklulw ma raknam a ror Yesuske desy, lema rhe nam Yesuske itanuk ti Yudas desike kbuanke elik. 29 De iry desikre dum a rrekan o, Yesuske yaso Yudas ma bya ti lyiw nam dum ti kalkal sew lan Paskahke, dete lemamo bya ti ihe kuban ti iry a lema manait ei sra o hah nekre. Kali rhe ohe Yudas neke kyumak iry desikre wait kubanare. 30 Dendye Yudas inal roty desy bonyo, byetik ma bya elik. Kyoat desyo sewah de.
Yesuske yal haret harharkwe ti matoha Iare
31 Kyoat Yudas ibetik ma iba bonyo, Yesuske tyanuk ma byohe, “Kyait sekwe de, ma Hulasokwe lyeru o byitil Irkye Ananke Anike ma atat.†* Ode ana kyosy a nam kualanare, desikeo ana irire rleru Hulasokwe Anike dakun. 32 Ode khyali ktela kuala nekre khyury ma irire rleru Hulasokwe Anike, dendye ana Hulasokwe yal wasi haretke ode madelafke ma Yaw, mamode khyury ma irire rleru Yaw dakun. Ode ana lema soso bonyo, Hulasokwe yala koldyesy de. 33 *Anakw e, Yau neke ana lema soso bonyo lema kor a e de. Ode ana miobak Yaw, keskyede ana lema bisa ma mbyai wen kuba ti ne. Kola dene ktwanuk ti iry manety lulw ti Yahudi-nare de, ode senweke ktwanuk ti e dakun ma ne. 34 *Lemade kal haret harharkwe ti e, neke kolnye: Musti mo it de lyobak it. Kola ne kulobak e ne, lemade musti mo it de lyobak it. 35 Kali kolnye it de lyobak it, desikemo irire mumu neke ana rhe ohe, ei neke wasikw matoha e.”
Yesuske hye o Petrus ana ibu a ituli I
36 Lemade Simon Petrus yena Yesuske ma byohe, “Amam Lan O, mala ma mbwai kabei ne de?”
Dendye Yesuske hyalas i ma byohe, “Senwe kala ma kbwai wen a lema bisa ma muba tike. Keskyede kalyauke o ana mbwai wen desy dakun.”
37 Petrus a tyanuk huruk ma byohe, “Amam Lan O, kyanmwane senwe lema bisa ma kutoha O ne de? Kou ma kmwaty khyali O!”
38 Dendye Yesuske hyalas i ma byohe, “Petrus o, oi ne mbwohe mou ma mmwaty khyali Yaw e? Mtwomolu mamak nam kutanuk ti o ne: Bolbolbol ne sihkye lenla kyokoak, desikeo oi ne mubu a mutuly Yaw kdi a kla-telw de, ma mbwohe lema mhwe Yaw.”