Lukas i

Brit Eras

Lukas

ikeskye

Tun a khatu nekre klyosu kitab ne kralake

Lukas neke ika dokter ma lyakut yor Paulus ma ti rabrita Brit Eraske (Kol. 4:4; 2Tim. 4:11; Flm. 24). Lukas neke nyah lola mamamak Yesuske wasi mormyorifke toha iry maseak mamunanare (Luk. 1:1-2). Ode kyesy kitab ne ti Teofilus ma hye Yesuske wasi mormyorifke dakun.

Ti kitab a ikesy neke, Lukas ihes ohe kyanmwane Yesuske imai nuske ktem ne de. Yesuske ima neke, “Mya ma yobak iry matayarare ma yaorif sir” (Luk. 19:10). Yesuske ima neke yety a Brit Eraske ti sir. Brit neke ana kyala iry mamin nuske ktem ne mumu, ma ramukmuka sir a ksyalik (Luk. 2:10; 2:30-32; 3:6; 24:47). Ti Brit Eraske krala neke, tbaca mo, “Eraske kimin ti e, kolnye lema myait ei sra o hah, kali senweke Hulasokwe wasi iry a e, ode ana mimin ti nus lan Hulasokwe ihareta tike” (Luk. 6:20; 7:22; 14:11-13; 21:1-4). Tbaca Yesuske wasi loblobakke ti iry a maka wait lim o sal nekre (Luk. 5:30; 7:37-50; 15:1-2). Tbaca huruk ti wasi loblobakke ti wamfwetare (Luk. 7:11-17; 8:2-3; 10:38-42; 13:10-13; 21:1-4; 23:27-31). Ode wasi loblobakke ti namanare dakun (Luk. 8:41-42, 54-55; 9:38-42; 9:46-48; 18:15-17).

 

Kitab ne kisike kolnye

1. Lukas wasi tun mamunake ti wasi kitab ikeskye (Luk. 1:1-4).

2. Radur Yohanes Mababtiske, ode radur Yesuske (Luk. 1:5–2:52).

3. Yesuske rbabtis I, ode ngkeskwaure wait uskwe khatuke hyury a I (Luk. 3:1–4:13).

4. Yesuske hyatuk wasi karyake ti propinsi Galileake (Luk. 4:14–9:50).

5. Yesuske ikarya ti kyoat ilakut bai Yerusalem ne (Luk. 9:51–19:27).

6. Yesuske wasi minggu manosy lyakwe ti Yerusalemke nini imaty ne (Luk. 19:28–23:56).

7. Yesuske imorif huruk ne, ode isusu tenanke ti wasi matoha Iare (Luk. 24:1-53).