Yesuske myorif huruk
16
Kyoat sew Inamreske kisakut bonyo,
Maria Magdalena ode Maria Yakobus ena ne,
ode Salome rba ti rliw a nyatasa o nul mahon a mtelas nekre,
kali ana bolbol o rbuma rbai bobke kuran Yesuske ramlin I tike,
ma ana rkasa nam raliw desikre ti Yesuske tbunanke,
ma ktyoha Yahudi-nare wait ktela kubkubakke.
Markus 16:1-20
2 Ode sew mingguke wasi bolbolbol ne,
ma sekwe nenmo ibetik ne,
desikeo rbai wen ramlin Yesuske tbunanke tike.
3 Ode ti salke kditlalan,
desikeo it de tyanuk ti it ma rbohe,
“Ana ese syaluk ity ma lyilik hatw lan ranal ma raeteta bobke kuran ramlin Yesuske tbunanke ti desy de?”
4 Keskyede kyoat ranait bobke kuran ramlin Yesuske tbunanke ti desy bonyo,
ratos o hatw lan desike kiblily ei kserike de.
Nyaso manosy laitke itun a yor wamfwetare (16:5)
5 Lemade wamfwet desikre rsukar bai bobke krala desy.
Ode kele rsumuk mait sir kali ratos o lyalaw murke it,
ma hyonak rabit narnarw bokbokbokke ma tyaklulw ti bobke krala desy kseri wanke.
6 Keskyede lyalaw mur desike tyanuk ti sir ma byohe,
“Kete mimtaut!
De khwe ohe,
miobak Yesus Iry a Nazaret a rabakw a I ti tul masanwalw ike ne.
I neke myorif huruk.
Ode lema imin ne de.
Myatos!
Wen a ramlin I tike ne.
7 *Dendye mbya,
ode mtyanuk ti wasi matoha Iare,
ode Petrus dakun ma mbyohe,
‘Yesuske myuna e bai propinsi Galileake de.
Ti soke ana nenmo minal a myor I,
kola dene tun itanuk a kmuna ti e desy.’ ”
8 Keskyede wamfwet desikre ramlulurw,
kali ramtaut ma ksyeman sir,
desikeo ra-la toha bobke kuran desy.
Ode lema rares ma rahes namit-namit ti irkye it elik,
kali ramtaut a nggora.†
[Yesuske syusu tenanke kdi a klai ne ti irire maktei o syai bai wen sra eraske
9 Kyoat Yesuske myorif huruk,
ti sew mingguke wasi bolbolbol ne,
desikeo syusu tenanke kmunmunmuna ti Maria Magdalena.
Maria neke,
ain maba sokre Yesuske yesak ngkeskwakwe itw toha i de.
10 Dendye Maria bya ti yabrita ti iry a kyalamo matoha Yesuske ne ohe,
Yesuske myorif huruk de,
kali myatakit I de.
Kyoat desy o iry desikre malmata ralatare ksyal ma rser a nggora.
11 Ode kyoat iry desikre ratomolu ohe,
Yesuske myorif huruk de,
ma syusu tenanke ti Maria de,
keskyede iry desikre lema rtohak nam Maria itanuk desy.
12 Maktei o Yesuske yala matake ma kihihi i,
ma kola iry salik,
ma syusu tenanke huruk ti wasi matoha Ike irkye enaru.
Neke kdi ti ti kyoat iry deru desike malmata rlakut rosy a Yerusalem ma rbai hnuke it.
13 Dendye iry deru desike rulak sir ma rahes ti liatare,
keskyede liat desikre lema rtohak sir dakun.
Yesuske lyakut yor wasi matoha Ike enaru ti salke kralake (16:12)
14 Ode sekwe enai ne kyelak eta bonyo,
Yesuske syusu tenanke ti wasi matoha I dehean a kresi sasam desy,
ti kyoat a malmata raknam.
Ode tyerik sir,
kali usut a khatunare malkyakaw ma lema rtohak iry a raseak I a kmuna ti imorif huruk ne.
15 *Lemade Yesuske tyanuk ti sir ma byohe,
“Musti mo mbyai wen kabei ta kabei ti nuske ktem ne,
ma myabrita Brit Eraske ti esei ta esei bo.
16 Ode kolnye esei desike tyohak Yaw ode rbabtis i,
desikeo ana Hulasokwe yaorif a i.
Klala esei desike lema tyohak Yaw,
desikeo ana Hulasokwe yukun a i.
17 Dendye kolnye esekar desike rtohak Yaw,
desikeo ana kal wasikw haretke ti sir ma bisa ma rala ktela masalsyalik iare kola ne:
ral Anikkwe ma resak ngkeskwaure,
ode kolnye ratun,
desikemo bisa ma ral tel a salno salik lema rahe nekre,
ma ral ma ratunak.
18 Ode kolnye rkumak manunkwe,†
desikeo ana lema rmaty.
Ode kolnye renw a racunke,
desikeo ana lema rmaty dakun.
Ode kolnye rsaa simat ti iry a isy masunure,
desikeo iry isy masunw desikre ana eras sir elik.”
19 *Ode kyoat Yesuske itun a yor wasi matoha Iare maktei,
desikeo Hulasokwe syalak I bai wen sra eraske,
ma tyaklulw ti Hulasokwe seri wanke.
20 Lemadendye Yesuske wasi matoha Iare rba ti rabrita Brit Eraske ti kabei ta kabei bo.
Ode ity Ebutke dakun o yor sir ti wait karyaare.
Ode yal wasi haretke ti sir ma kyalkyaw sir ma rala ktela masalsyalik iare,
ma ksyusu ohe brit ratanuk ne Brit a mlakye.]
Markus 16:21-21