Yesuske myorif huruk
20
Kyoat sew a Mingguke ma wasi bolbolbol ne, ma kelerkok a nggora, desike bonyo Maria Magdalena byai bobke kuran ramlin Yesuske tbunanke tike. Ti inait bonyo, yatos o hatw a ranal ma raeteta bobke kuran desike kiblily ei kuranke kserike de. 2 Lemade ila yolik i ma bya ti inal a yor Simon Petrus ode Yesuske wasi matoha I a ilobakke dakun,† ma tyanuk ti sir de byohe, “Iry dum a ral ity Ebutke tbunanke toha asake kralake, ma lema aramy mhye o rtutuk ti kabei.”3 Lemade Petrus yor Yesuske wasi matoha ida desy, ma rbetik ma rbai bobke kuran desy. 4 Ode kyoat deruke ra-la rba, desikeo Yesuske wasi matoha ida desike lyaha mety ma ibolik Petrus, ma yait bobke kuran desi kmuna. 5 Ode kyoat inait bobke kuran desy bonyo, lema syukar ei kuranke krala desy, de imdiry ti mloskye bo, ma tyukar ma yatos ei kuranke krala desy, desikeo yatos kain lenan maliliw a ranal ma rahul eta Yesuske tbunanke ne ma kimin ti desy bo. 6 Klala Simon Petrus mya ma yait dakun bonyo, syukar elik ei kuranke krala desy, desikeo yatos dakun kain lenan maliliw desy ma kimin ti desy. 7 Ode Simon Petrus myatakit kain lenan ranal ma ralel Yesuske usuke khatuke ne, ma klyuluk i eras-eras bo ti wen desy dakun, keskye lema knyey a kain lenan ranal ma rahul eta Yesuske tbunanke desy. 8 Dendye Yesuske wasi matoha I dai mamuna ma inait bobke kuran desike syukar ei kuranke krala desy ma yatos nam desikre mumu dakun. Ode kyoat iatos nam desikre mumu ne, desikeo nenmo tyohak ohe Yesuske myorif huruk de. 9 Kali Yesuske wasi matoha Iare lenla rhe mamak Kitab Lanke ti kitanuk ma kbyohe, musti mo Yesuske myorif huruk toha mamatire. 10 Lemade Yesuske wasi matoha I deru desike rulak sir ei wait sey ramin tike.
Yesuske syusu tenanke ti Maria Magdalena
11 Keskyede Maria Magdalena imdiry ma nyey a bobke kuran desy ode syer. Ma moluk a iser bonyo, tyukar ma yatos ei bobke kuran desike kralake. 12 Desikeo yatos nyaso manosy laitke enaru, ma rhonak rabit bokbokare, ma deruke rtaklulw ti wen dai a Yesuske tbunanke ralosik tike. Ma it a tyaklulw ti kisara Yesuske usuke khatuke kimin tike, ode it a tyaklulw ti lwaunare kimin tike. 13 Lemade nyaso manosy lait desikre rena Maria Magdalena ma rbohe, “Eno, kyanmwane muser ne de?”
Desikeo Maria hyalas sir ma byohe, “Irire dum a ral Ebuku tbunanke ma lema khwe o ral bai kabei de.”
14 Kyoat Maria itanuk koldyesy maktei bonyo, yulak matake ei lyakwe, desikeo yatos irkye it ma imdiry ti desy, keskye lema hye o Yesuske I desy. 15 Lemadendye Yesuske tyanuk ti Maria de byohe, “Eno, kyanmwane muser ne de? Esei ne muobak I ne de?”
Keskyede Maria ryekan ohe iry a maena i desike iry a manoha boke it, lemade tyanuk ti I ma byohe, “Amo, kolnye oi ne munal Yesuske tbunanke ne, desikemo mlwosu ma yaw o mal I ti kabei, ma bisa ma kbwa ti kal I.”
16 Lemade Yesuske tyanuk ti Maria de byohe, “Maria.”
Ode kyoat Maria itomolu Yesuske ma yabuk i bonyo, Maria yulak i ma syara Yesuske, ode yal tel Ibranike ma yabuk Yesuske ma byohe, “Rabuni!”
Tunke khatu Rabuni neke ti tel Ibranike kbuanke o Tuanggurw.
17 Lemade Yesuske tyanuk ti Maria ma byohe, “Kete mkwumak Yaw aduk, kali lenla kbwa ti kait Amakw. De lemamo mbwa ti mlwosu ti waikure ohe, Yau ne kala ma kbwa ti kait Amakw, neke Amamkye. Ode wasikw Hulasokwe, neke wasimy Hulasokwe dakun.”
18 Lemade Maria bya ti yait Yesuske wasi matoha Iare mumu, ma tyanuk ti sir de byohe, “Katos ity Ebutke de!” Ode ihes a nam Yesuske itanuk ti i nekre mumu ti sir.
Yesuske syusu tenanke ti wasi matoha Iare
19 Kyoat sew Minggu desike wasi sewahke bonyo, Yesuske wasi matoha Iare rawahuk sir ti sekye it, desikeo rholat holholatare mumu ode rkus eta, kali ramtaut iry manety lulw ti iry a Yahudi-nare. Ode kyala mait bonyo Yesuske mya ma imdiry ti wasi matoha I desikre wait kditlalan ne ma tyanuk ti sir de byohe, “Inaka eras manosy Hulasokwe kimin a e.”
20 Kyoat Yesuske itanuk koldyesy maktei bonyo, syusu baku knua mamin ti simanare ti sir, ktyabal a nua rasimban serike ne ti sir. Dendye wasi matoha I desikre ramukmuka ramarmara sir, kali ratos ity Ebut Yesuske de. 21 *Dendye Yesuske tyanuk ti sir huruk ma byohe, “Kuten ma inaka eras manosy Hulasokwe kimin ti e! Kola ne Amaku yaso Yaw, koldyesy dakun o Yaw neke kaso e dakun.”
22 Ode kyoat Yesuske itanuk koldyesy maktei bonyo, yohw memeanke ti wasi matoha Iare ma byohe, “Myal Hulasokwe Memean ne.”
23 *Maktei o tyanuk ti sir de byohe, “Kolnye msyos irire salatare ba, desikeo Hulasokwe ana syos wait lim o sal desikre ba. Keskyede kolnye lema msyos iry desikre wait lim o sal ba, desikeo ana Hulasokwe lema syos wait lim o sal desikre ba dakun.”
Yesuske syusu tenanke ti Tomas
24 Ode kyoat Yesuske mya ma syusu tenanke ti wasi matoha Iare, desikeo Yesuske wasi matoha Ike it a lema imin, neke Tomas, ma kyalamo rabuk i ti Didimus.† 25 Dendye kyoat a Tomas a mya, desikeo Yesuske lema imin. Keskye wasi matoha Iare rtanuk ti Tomas ma rbohe, “Aramy myatos ity Ebutke de!”
Keskyede Tomas byu ti sir de byohe, “Kolnye lenla katos baku knua mamin ti simanare, ma krwoka tanakure ti baku knua desikre, ode krwoka simakkwe ti nua rasimban seri desy, desikemo ana lenla ktwohak.”
26 Ode mingguke sasam a kyelak eta de, desikeo Yesuske wasi matoha I desikre rawahuk sir ti sey desy huruk, desikeo Tomas imin dakun de. Ode rholat holholatare ma rkus eta, keskyede kyala mait bonyo Yesuske mya ma imdiry ti wait kditlalan ne, ode tyanuk ma byohe, “Inaka eras manosy Hulasokwe kimin a e.”
27 Maktei o tyanuk ti Tomas de byohe, “Matos baku knua mamin ti simakw nekre, dendye mrwoka tanamkwe ti. Ode mlol simamkwe ma mrwoka ti serikw rasimban ne. Ma kete mutartaur ralamw de, de musti mo mtwohak.”
28 Lemade Tomas hyalas I ma byohe, “Ou, mlay! Oi neke Ebukw a O, ode wasikw Hulasow a O.”
29 Lemade Yesuske tyanuk ti i ma byohe, “Tomas, nenmo mtwohak kali matos Yaw de. Klala eraske kimin ti iry a lenla mamatakit Yaw ne, keskyede tyohak ma Yaw bo.”
Brit Eras rakesy ti kitab ne rkesy ma irire rtohak ti Yesuske ma ana rmorif nini nam
30 Ode Yesuske wasi matoha Iare ratos deny ohe, Yesuske yala ktela masalsyalik iare ribun ma kbyilak ktela masalsyalik ribun iala ma kukesy ti kitabke krala ne. 31 Keskyede ktela ribun kukesy ti kitabke krala ne, kkwesy ma ei neke bisa ma mtyohak ohe Yesus neke Mesias a I,† ode Hulasokwe Anan a I. Ma kolnye esei desike tyohak ti Yesuske, desikeo Yesuske yal mormyorif harharkwe ti i, ma ana myorif yor Yesuske nini nam ti kiba knaru ne.