Yesuske syusu I ti wasi matoha Ike irkye itw
21
Ode sekwe enai ne kyelak eta bonyo, Yesuske syusu tenanke ti wasi matoha Iare ti Tasi Kakan Tiberiaske.† Ode ktela isusu tenanke ti wasi matoha Iare ne kdi ti kolnye: 2 Sekwe it bonyo Simon Petrus, yor Tomas a kyalamo rahaly anike o Didimus ne,† ror Natanael, ma i ne yosy a hnu Kanake, ma kimin ti propinsi Galileake, ode ror Zebedeus ananare dakun,† ode rtabal Yesuske wasi matoha Ike enaru dakun, ma sir neke raktemtem a rawahuk sir ti namwata tasi kakan desy. 3 *Dendye Simon Petrus tyanuk ti lian desikre ma byohe, “Kbwa ti ktwunik dary ma ne.”Dendye lian desikre rhalas i ma rbohe, “Aramy myor o ma tba ti ttunik dary dakun.”
Lemadendye raktemtem a rsai aroke ma rba, keskyede sewah desike wait darkye lema knyal maskye it elik.
4 Ode kyoat a nenma msarinke bonyo, Yesuske wasi matoha I desikre ratos irkye it ma imdiry ti namwatake, neke Yesuske, keskye lema rhe ohe Yesuske I ne imdiry ne. 5 Lemade Yesuske yatela ma yena sir ma byohe, “Hei liakw e,† mitot masy ta lema de?”
Desikeo iry desikre rhalas I ma rbohe, “Lema aramy mitot namit-namit elik.”
6 *Dendye Yesuske tyanuk ti sir ma byohe, “Desikemo mtyunik wasimy darkye ti wasimy aroke kseri wanke, ana knyal masire.”
Dendye iry desikre rtoha Yesuske tun itanukke, ma rtunik wait darkye ti wait aroke kseri wanke. Ode kyoat a rbity wait dary desy bonyo, lema rbiti ral dary desy ei srake, kali knyal masire ribun sir a ksyalik.
7 Lemade Yesuske wasi matoha I a ilobak desike† tyanuk ti Petrus ma byohe, “Ity Ebut Yesuske I so.”
Kyoat a Petrus itomolu o Yesuske I desy bonyo, yal wasi rabitke ma hyonak huruk, kali dai rtunik darkye, desikeo yonuk a i. Dendye ihonak i maktei bonyo, nyusuk ei tasike ma byai rake. 8 Klala Yesuske wasi matoha I a mamin ti aroke a nggora ne rhaya wait aroke bai rake, desyo rbity dary desy, neke kbyenw ti masire, ode lema soso sir toha rake, de anakyai kasonanke lalwakwe atkwe sasam. 9 Kyoat iry desikre rba ti ranait rake ma raorw toha wait aroke bonyo, ratos akye ma kiharhar, ma maskye ode rotkye kimin ti ay desy kharake.
10 Lemade Yesuske tyanuk ti sir ma byohe, “Myety a masy nenmo wasimy darkye kinal desikre dum mai san.”
11 Dendye Simon Petrus a syai ei aroke, ode byity dary desy ei rake, neke kbyenw ti masy lan de lan nekre, neke aryaritke atw ksala hean-sim a kresi enatelw (153). Ode biar ma masy desikre ribun sir dakun, keskye wait dary desike lema kimahy elik.
12 Lemadendye Yesuske tyanuk ti sir ma byohe, “Mmya ma taknam.”
Kyoat desy o Yesuske wasi matoha I desikre it a lema ires ma yena Yesuske ma byohe, “Esei O de?” Kali rhe ohe, I neke ity Ebutke. 13 Lemade Yesuske lyakut ba ti yal rotkye ktyabal maskye, ode yal ti iry desikre ma ra. 14 Ti desike ne Yesuske syusu I ti wasi matoha Iare kdi a kla-teluke desy, ti kyoat imorif huruk toha iry mamatire ne.
Yesuske itun a yor Petrus
15 Ode kyoat a raknam ti bolbol desy maktei bonyo, Yesuske yena Simon Petrus ma byohe, “Simon a Yohanes anan o, oi neke munal ralamkwe kralake ma Yaw neke kbyilak ti iry nekre ranal ralat a kralanare ma Yaw ne e?”
Dendye Petrus a hyalas Yesuske ma byohe, “Ou, Amam Lan o! Oi neke mhwe ohe yaw neke kal ralakkwe kralake ti O de.”
Dendye Yesuske tyanuk ti Petrus ma byohe, “Koldyesikemo oi neke musti mo mujaga mamak wasikw matoha Yaw nekre, kola dene iry a majaga dombake yal kotw ti wasi dombanare ne.”
16 Maktei o Yesuske yena Petrus huruk ma byohe, “Simon a Yohanes anan o, mal ralamkwe kralake ma Yaw deny ta lema de?”
Lemade Petrus a hyalas Yesuske ma byohe, “Ou, Amam Lan o! Oi neke mhwe o yaw ne kal ralakkwe kralake ti O de.”
Dendye Yesuske tyanuk ti Petrus ma byohe, “Koldyesikemo oi neke musti mo mujaga mamak wasikw matoha Yaw nekre, kola dene iry a majaga dombake ti ijaga wasi dombanare ne.”
17 Lemadendye Yesuske yena Petrus huruk kdi a kla-teluke ma byohe, “Simon a Yohanes anan o, mal ralamkwe kralake ma Yaw deny ta lema de?”
Lemade Petrus a ralake ksyal ti Yesuske iena i kdi a kla-teluke ohe yal ralake kralake ti Yesuske ta lema. Dendye Petrus a tyanuk ti Yesuske ma byohe, “Amam Lan o, Oi neke mhwe nam ribun lan ne, ode Oi ne mhwe ohe yaw ne kal ralakkwe kralake ti O de.”
Dendye Yesuske tyanuk ti i ma byohe, “Koldyesikemo oi neke musti mo mujaga mamak wasikw matoha Yaw nekre, kola dene iry a majaga dombake ti ijaga wasi dombanare ne.”
18 Dendye Yesuske syaur nam itanuk desy ma byohe, “Mtwomolu mamak tun kutanuk ne, kyoat a tuhmury a o nggora, desikeo kyosy a o ma mala sai ta sai bo, ode kyosy a o mdwakin ma mbwai kabei ta kabei bo. Keskyede ana kyait ma amosw a o, desikeo mtwolar sisno simamw ei hahke bo, ode iry salik a rikat a sisno simamw, ode reuk a o bai wen lema muou o lema mudakin ma muba ti nekre.”
19 Yesuske tyanuk koldyesy ma klyosu ti Petrus ti kolkyabei ana Petrus imaty ne, ma Petrus imaty ne ana khyury ma irire rleru Hulasokwe. Kyoat Yesuske itanuk koldyesy maktei bonyo, tyanuk huruk ma byohe, “Mtwoha Yaw.”
Tun Yesuske itanuk khyali wasi matoha I a ilobakke
20 *Kyoat a Petrus yulak matake ei lyakwe, desikeo myatakit a Yesuske wasi matoha I a ilobak i desy, ma malmata tyoha sir. Ode i ne kyoat a Yesuske iknam a yor wasi matoha Iare desy, desikeo i ne itaklulw ma iney a Yesuske ne, ma iena Yesuske ma ibohe, “Amam Lan O, esei ne ana iketa O ne de?” 21 Lemade Petrus a imatakit iry ne bonyo yena Yesuske ma byohe, “Amam Lan O, ana sai kdi ti ti iry ne de?”
22 Lemade Yesuske tyanuk ti Petrus ma byohe, “Kolnye Yau neke kbwuma iry neke myorif nini kulak Yaw ma kmwai nuske ktem ne huruk, neke lema wasimw karyake desy. De oi neke wasimw karyake, neke musti mo mtwoha Yaw bo!”
23 Dendye tun neke kimelir ti Yesuske wasi matoha Iare ohe, Yesuske wasi matoha I a ilobak desike ana lema myaty. Keskyede Yesuske lema tyanuk ti Petrus ma byohe, wasi matoha I a ilobak desike ana lema myaty, de tyanuk ma byohe, “Kolnye Yau neke kbwuma iry neke myorif nini kulak Yaw ma kmwai nuske ktem ne huruk, neke lema wasimw karyake desy.”
Yohanes kyus wasi kitab ikeskye
24 Ode Yesuske wasi matoha I a ilobak desike dakun o yatos nam Yesuske iala nekre mumu de, ode nam desikre kyesy ti kitabke krala ne de. Ode ity neke the ohe, nam ikesy nekre mumu ne mlay.
25 Ode kyoat Yesuske imin ti nuske ktem ne a nggora, desikeo yala nam masalik iare ribun a ksyalik dakun. Ode nam ribun iala desikre lema rkesy mumu ti kitabke krala ne. Kali kolnye robak ma rkesy nam ribun Yesuske iala desikre mumu, neke ratsam-ratsam ti kitabare, desikeo krwekan mo ti nuske ktem ne, lema kika kwena ma bisa ma rsosan kitab rakesy desikre mumu ti.