Ror Yesuske ba ti gubernur Pilatus
15
Bolbolbol ne bonyo,
Iry Lan Maohut Tunare mumu ne rawahuk sir,
neke iry mabaa klen ti irkye yor Hulasokwe wait usu khatunare,
ror iry manety lulw ti Yahudi-nare,
rtabal iry mahe snurat o tnyetak Musake.
Sir ne rawahuk sir ma rkau tunke ti sasam,
ma rbuma rtunik tnyetak matmyatkye ti Yesuske.
Dendye iry desikre raso irire ma rsik ranteke ti Yesuske simanare,
ode ror I ba ti gubernur Pilatus.
Markus 15:1-32
2 Kyoat ranait so bonyo gubernur Pilatus yena Yesuske ma byohe,
“Oi ne iry Yahudi-nare wait raja O e?”
Yesuske hyalas ma byohe,
“O a mmwesan a mtwanuk koldyesy bo.”
3 Lemade iry mabaa klen ti irkye yor Hulasokwe wait usu khatunare,
roit sal ribunke ti Yesuske.
4 Dendye gubernur Pilatus yena I huruk ma byohe,
“Hei!
Iry nekre roit sal ribun lan ne ti O,
ode kyanmwane lema muhalas sir ne de?”
5 Keskyede Yesuske lema hyalas tunke it elik,
ma khyury ma gubernur Pilatus a hyeran.
6 Ode kyalamo kyait sew lan Paskahke,
desikemo gubernur Pilatus wasi ktelake de,
ma tyunik irkye it toha iry a raluk sir ei sey metmetke kralake ne.
Iry a Pilatus itunik desike ktyoha iry Yahudi-nare ratenke bo.
7 Kyoat desike dakun o irkye it ma ani Barabas.
Barabas neke rluk i a yor iry mahature ei sey metmetke kralake,
kali rsorw a haret Romawike.
Kyoat Barabas a rsorw haret Romawi desy,
desikeo rtabahunw a irire dum dakun.
8 Lemade iry ribunke rma ma rait gubernur Pilatus,
ma raten i ma tyunik irkye it,
ma ktyoha ktela kyalamo iala ti sew lan Paskahke ne.
9 Lemadendye Pilatus yena sir ma byohe,
“Myou ma ktwunik Yahudi-nare wait raja ne ti e e?”
10 Pilatus yena koldyesy kali hye ohe,
iry mabaa klen ti irkye yor Hulasokwe wait usu khatunare ral Yesuske ti i,
kali rsoi ralat Yesuske.
11 Keskyede iry mabaa klen ti irkye yor Hulasokwe wait usu khatunare,
neke rsuy iry ribunke ma iry ribun desikre raten toha Pilatus,
ma tyunik Barabas toha sey metmetke kralake ti sir.
12 Dendye Pilatus yena sir huruk ma byohe,
“Koldyesikemo,
iry a mibohe Yahudi-nare wait raja ne,
musti mo kala I kolkya?”
13 Desikeo iry desikre rboran ma rbohe,
“Mbwakw a I ti tul masanwalw ike!”
14 Lemade Pilatus tyanuk ti iry desikre ma byohe,
“Iry neke yala sal sai de?”
Keskyede iry desikre rboran ma telatare lan ma rbohe,
“Mbwakw a I ti tul masanwalw ike!”
15 Dendye Pilatus yobak ma yala iry ribun desikre ralatare ma ksyenan,
lemade tyunik Barabas toha sey metmetke ti iry desikre,
klala yaso wasi suldatare ma roban Yesuske,
maktei o rbakw a I ti tul masanwalw ike.
Suldatare rahmway Yesuske
16 Lemadendye suldatare ror Yesuske ma rsukar ei wen rawahuk sir tike.
Neke kimin ti gubernur Pilatus sey lan imin tike wasi kintalke kralake.
Ode rabuk suldat salikare mumu,
ma rawahuk sir ti desy dakun.
17 Ode ronuk wasi rabitke toha I,
ode ral rabit narnarw a kmata molmol ebuske ma ral ma rhonak a I.
Maktei o ranak karkyary a mahaw ne,
ode ronuk ti Yesuske usuke khatuke,
ma kola snyamurke,
ma ral ma rahmway Yesuske.
18 Maktei o rala rhury ma ralan I,
ma rtanuk ma rbohe,
“Raja iry Yahudi O,
aramy myalan O!”
Suldatare rakakmet ma ralan Yesuske bo (15:18)
19 Ode raeluk-raeluk sir ma ral tektekanke it ma roban Yesuske usuke khatuke,
maktei o rasburik I.
Ode rala rhury ma rsakitil o rou ti I.
Rala koldyesy ma raranran I.
20 Ode kyoat rahmway I o rasburik I ma ktei,
desikeo ronuk rabit narnarw a kmata molmol ebus desy toha I.
Ode ral wasi rabitke ma rhonak I huruk.
Maktei o ror i bai mloskye ti rbakw a I ti tul masanwalw ike.
Yesuske rbakw a I ti tul masanwalw ike
21 *Kyoat suldat desikre ror Yesuske ma rbetik toha nus desy,
ma rbai wen ana rabakw a Yesuske tike,
desikeo ti salke kditlalan ne ranal a ror irkye it ma ani Simon,
iry a Kirene-ke.
Simon neke Aleksander ode Rufus amatke,
ma yala ma syukar nus Yerusalemke.
Lemade suldat desikre rpaksa i ma hyar a Yesuske wasi tul masanwalw desy.
22 *Ode suldat desikre ror Yesuske bai wenke it ma kani a Golgota,
neke kbuanke o, Wen Uskwe Keburake kimin tike.†
23 Ode rahora mohkwe ktyabal tasy maiskye kwenke,†
ma ral ti Yesuske yenw,
keskyede Yesuske ibrai ma yenw.
24 *Maktei o suldat desikre rbakw Yesuske ti tul masanwalw ike.
Ode rhuty aluri ti wasi rabitare ma rhe o,
ana esekar ne rosy simbol o rabit nekre.
25 Ode kyoban sikwe ti bolbol ne,
desikeo rbakw a Yesuske ti tul masanwalw ike.
26 Ode rkesy ti mbanke klaike it ma rbakw ti tul masanwalw i desy wasi srake,
neke rkesy kolnye:
I neke raja iry a Yahudi-nare.
Tunke khatu rakesy neke,
ksyusu sal raoit ti Yesuske ne.
27 Ode kyoat a rbakw Yesuske,
desikeo rbakw iry mahatkwe enaru dakun,
ma it a imin ti Yesuske seri wanke,
ode it a imin ti Yesuske seri wisalke. [
28 Koldyesike mane nam rakesy ti Kitab Lanke krala neke kdi ti de,
neke ktyanuk de kbyohe,
“I neke rbohe iry mahatw I dakun”.†]
29 *Ode iry malakut manosy wen desike dakun o rahmway I,
ode rowou daku I,
ma rtanuk de rbohe,
“Hei,
Oi ne mutanuk ma mubohe,
ana muskyui-muskyay Hulasokwe Seike,
ode sekwe enatelw o mswadiri huruk.
30 Koldyesikemo morw toha tul masanwalw i desy,
ma maorif tenamkwe a nde!”
31 Ode iry mabaa klen ti irkye yor Hulasokwe wait usu khatunare,
ror iry mahe snurat o tnyetak Musake,
ramdiry ti desy ma rahmway Yesuske dakun,
ma it de tyanuk ti it ma rbohe,
“Iry salik o bisa ma yaorif sir,
ode tenanke o lema bisa ma yaorif yal dakun e!
32 Ode kolnye iry neke you ohe,
I neke Mesias I,
ma iry a Israel-are wait Rajake I ne,
desikemo musti mo myesan a yorw toha tul masanwalw i desy,
ma tatos desikeo nenmo ttohak.”
Ma ti kyal iry deru rabakw sir a ror Yesuske neke rahmway Yesuske dakun.
Yesuske myaty
33 Kyoat desike sekwe dyutw mais-mais,
keskye kelerkok ti nuske ktem desy,
kali Hulasokwe yala sekwe ma lema ryan,
nini kyal jamke enatelw.
Markus 15:33-47
34 *Ode kyoban enatelkwe ti sekwe iba ne bonyo,
Yesuske yatela ma byohe,
“Eloi,
Eloi,
lama sabakhtani?”
Neke kbuanke o,
“Amo,
Amo,
kyanmwane mututuk Yaw ne de?”
35 Kyoat iry mamdiry ti wen desikre ratomolu nam Yesuske itanuk desy bonyo,
rtanuk ma rbohe,
“Mtyomolu ma yabuk Elia,
iry a heitlulswo manety Hulasokwe wasi nyano desy.”
36 *Lemadendye irkye it a ila bya ti yal temarke ode yutuk ti aurke khunake,†
maktei o hyuhuk aurke khuna desy ti tasy maiskye kwen makitkye,
ode yal ti Yesuske nunuke,
ode byohe,
“Ode takita ma tatos o,
dai yabuk Elia dendye,
tseak o ana Elia mya ma nyauk I toha tul masanwalw i ne ta lema.”
37 Lemade Yesuske yatela huruk maktei bonyo myaty.
38 *Kyoat desike kain mal de mal a ratola ma kyeteta wen nelnyely mamin ti Hulasokwe Seike kralake,
kele rahy ti kbya enaru,
neke kyala kyosy srake ma ti kyait hahke.
39 Kyoat suldatare wait uskwe khatu desike iatos ti kolkyabei ma Yesuske imaty ne bonyo,
tyanuk ma byohe,
“Mlay bain!
I neke Hulasokwe Anan a I!”
40 *Ode ti desike wamfwetare dum a ramdiry ma sososo a sir,
ma ratos a ktela desy.
Wamfwet desikre neke Maria Magdalena,
Salome,
ode Maria.
Maria ida neke Yoses yor Yakobus Kakanke enatke,†
ma sir neke Yesuske wai amurire.
41 Kyoat Yesuske imin o Galilea,
desikeo wamfwet detelw neke rtoha I de.
Ode kyalamo rsaluk I ti nam sai ta sai bo.
Ode wamfwet salik nekre ribun ramdiry ti desy dakun.
Sir ne mumu ror Yesuske ma rmai Yerusalem.
Yesuske ramlin a I
42-43 Kyoat desy o irire mumu ne rasosan sir ma rakita sew Inamreske,
kali sekwe yala ma dyi.†
Desikeo Yusuf,
iry manosy nus Arimateake ti propinsi Yudeake,
i neke Iry Lan Maohut Tunke it ne,
ode irire ralan a i dakun,
dendye Yusuf neke lema imtaut de bya ti yait gubernur Pilatus,
ma iten Yesuske tbunanke ma ti yamlin.
Yusuf neke i ne ikita sew a Hulasokwe ima ma ihareta kola Rajake ne.
44 Kyoat Pilatus itomolu Yusuf ma iten Yesuske tbunanke bonyo hyeran,
kali nenmo hye ohe Yesuske myaty de.
Lemade yabuk a suldatare wait uskwe khatuke ma yena i de byohe,
“Yesuske myaty deny e?”
45 Ode kyoat Pilatus itomolu suldatare wait uskwe khatuke ma ihalas i koldyesy bonyo,
lyura Yesuske tbunan desy ti Yusuf.
46 Lemade Yusuf lyiw a kain bokbok malilikwe,
maktei o bya ti nyauk Yesuske tbunanke toha tul masanwalw ike.†
Inauk Yesuske tbunanke maktei bonyo yal kain bokbok maliliw desy,
ma yal ma hyul a Yesuske tbunan desy.
Ode bya ti yamlin ti bobke kuranke.
Maktei bonyo lyilik hatw lan ne ti kyeteta bobke kuran desy.
Bobke kuran neke heit a irire rhak hatkwe ksouke ma kuran.
47 Kyoat desy dakun o Maria Magdalena,
ode Maria Yoses ena neke ratos Yusuf ma tyutuk Yesuske tbunanke ti bobke kuran desy.