Maria yalik nul mahon a mtelaske ti Yesuske lwaunare o Betania
12
Kyoat desike lenla sekwe nem bonyo, iry Yahudi-nare wait sew lan Paskahke kdi ti,† desikeo Yesuske yulak I ma byai hnu Betaniake huruk. Hnu Betania neke Lazarus wait hnuke, ma ti hnu desike ne Yesuske iaorif Lazarus toha matmyatkye ne.* 2 Lemade ti hnu desike irire rala kalkal lan inaknamke ma rleru Yesuske. Neke Marta i ne isosan a kotw o abw ti sir ne. Ode Lazarus dakun o yor iry a mamai kalkal desikre, ma raktemtem ne rtaklulu ror Yesuske ti mejake ma raknam. 3 *Ode lema soso bonyo Maria syukar ma yait Yesuske dakun, desikeo kyumak botalke ma nul mahona mtelas khesi lan ne kimin ti botal desy. Botal mabenw neke kdedake 500ml. Lemade nul desike Maria yalik ti Yesuske lwaunare, maktei o yal hukake ma kyur, ma khyury ma nul desike khonhona mtelas desike kbyenw ti sekye krala desy.4 Keskyede Yesuske wasi matoha Ike it ma ani Yudas Iskariotke, ma i ne ana iketa Yesuske ne, neke tyanuk ma byohe, 5 “Hei, nul desike khesike lan,† ode kyanmwane lema taketa nul desike ma tanal khesike, ma tahe ti iry a lema manait ei sra o hahare ne de?”
6 Yudas tyanuk koldyesy, keskye lema hyaduli iry a lema manait sra o hah nekre, de i neke iry masosan Yesuske yor wasi matoha Iare wait kubanare, ode i neke iry manametke dakun, ma rait mo inamet kuban mamin ti wait batbatak desy, ma yal ma ktyoha wasi mauke bo.
7 Lemade Yesuske tyanuk ma byohe, “Mlyura wamfwet ne ma yala ktela ne bo. Kali iala koldyesy ne, neke yal ma syosan tenakkwe ti wasikw sew a ana ramlin Yaw ne. 8 *Ode iry a lema manait ei sra o hahare sir ne kyaki-kyaki ne ranonor a e ti nus ne, ma ana bisa ma msyaluk sir ti sew kabei ta kabei bo. Klala Yaw neke lema soso bonyo lema kor e ti ne de.”
9 Ode kyoat iry mamin ti propinsi Yudeake ratomolu ma Yesuske yulak I ma imin ti hnu Betaniake huruk bonyo, ribun sir a rbai hnu Betania desy dakun, ma robak ma ratos I. Keskye raba neke lema khyali Yesuske bo, de raba neke robak ma ratos Lazarus dakun, ti Yesuske iala i ma imorif huruk toha iry mamatire ne. 10 Lemade ktela desike ne kihury ma iry mabaa klen ti irkye yor Hulasokwe ne wait usu khatunare rtanuk maiske ma rreky ma rtabahunw Lazarus dakun, 11 kali khyali Lazarus myaty ode myorif huruk toha matmyatkye ne, desike ne khyury ma iry ribunke lema rbuma rtoha usu khatu mabaa klen desikre, de rbuma rtohak ti Yesuske bo.
Iry ribunke ralatare ksyenan ti Yesuske imai Yerusalem ne
12 Ode bolbolke bonyo, iry ribun mamai nus lan Yerusalemke ma ratoha sew lan Paskahke ne, neke rtomolu o Yesuske yala ma myai Yerusalem dakun, keskyede I ne sal a krala nggora. 13 Lemadendye iry desikre rba ti ral suy utan a ktafran nekre, ma ral ma rbalan a Yesuske, ode ramukmuka sir ode ratelat ma rbohe,
“Tleru Hulasokwe!
Hulasokwe yal eraske ti I, kali ima neke myaa yor ity Ebut Hulasokwe Anike!†
I neke Israel-are wait Rajake I ne!”*
Ral suy utan a ktahinare (12:13)
14 Ti desike Yesuske yatos keledai murke it. Dendye yal keledai desy ma syai ti tyaklulw ti rutunanke, ma kola dene rakesy ti Kitab Lanke ne ti kibohe,
15 “Iry a Sion e,† kete mimtaut!
Myatos! Wasimy Rajake mya de, ma syai keledai mur ne ma tyaklulw ti rutunanke.”*
16 Kyoat desike Yesuske wasi matoha Iare lema rhe ktela iry desikre raala ma rakita Yesuske ne kbuanare. Keskyede kyoat Yesuske imaty maktei o imorif huruk ne, ma Hulasokwe lyeru o byitil Yesuske Anike ma atat bonyo, nenmo wasi matoha Iare rnenas ral ohe, ktela iry nekre raala neke, ne iry manety Hulasokwe wasi nyanoare rkesy ti Kitab Lanke kralake ti khyali Yesuske ne.
17 Ode iry ribun a kola raatos Yesuske ma iabuk Lazarus ma byetik toha wasi asake kralake ma iala i ma myorif huruk ne, iry desikre sir ne rabrita ktela desike ti kabei ta kabei bo. 18 Desike ne kihury ma irire ribun robak ma raba ti rabalan Yesuske ne, kali rtomolu ktela masalsyalik a kisusu Hulasokwe wasi haret lan iala desy. 19 Dendye iry manosy lui Farisi-nare it de tyanuk ti it ma rbohe, “Lema bisa ma tala namit-namit ma kbyilak de. Kali myatos, irire mumu ne rma ma rtoha I de.”
Yesuske lyosu ana imaty ne
20 Kyoat sew lan Paskahke kidi ti desy, desikeo iry Yahudi-nare ribun a rmai Yerusalem ma rtoha sew lan Paskah desy. Kyoat desy dakun o iry a Yunani-nare dum a rma ma rtoha sew lan Paskah desy dakun. 21 Dendye iry a Yunani desikre rba ti rait Filipus.† Filipus neke yosy a hnu Betsaidake ti propinsi Galileake. Dendye iry desikre rtanuk ti Filipus ma rbohe, “Amo, aramy mbyuma minal a myor Yesuske.” 22 Lemade Filipus bya ti lyosu ti Andreas, ma deruke rba ti rlosu ti Yesuske.
23 Lemadendye Yesuske tyanuk ti sir ma byohe, “Kyait sekwe de, ma Hulasokwe lyeru o byitil Irkye Ananke Anike ma atat.†* 24 Mtyomolu mamak nam kutanuk nekre. Kolnye irire lema rtan gandumke khatuke sasam, desikeo ana lema kisi, de koldyesy bo. Keskyede kolnye rtan gandumke khatuke ma kola ne kmyaty, maktei o nenmo ktyuhw, desikemo kisinare ribun.† 25 *Kali kolnye esei desike byuma kyumak eta wasi mormyorifke ti nuske ktem ne, desikeo ana lema myorif nini nam. Klala kolnye esei desike tyutuk lakhidik wasi mormyorifke ti nuske ktem ne, desikeo ana myorif nini nam ti wen sra eraske. 26 Ode esei desike kyarya ma Yaw, desikeo musti mo tyoha Yaw, ode biar ma kumin o kabei ta kabei bo, desikeo iry makarya ma Yaw desike musti mo imin desy dakun. Ode esei desike kyarya ma Yaw, desikeo Amaku ana yalan a i.
27 Senweke ralakkwe ksyal a ksyalik. Dendye musti mo ana ktwanuk sai ti Amakw de? Lema bisa ma ktwanuk ma kbwohe, ‘Amo, maditi Yaw toha masunw lan ana madan Yaw ne.’ Kali kmwai nuske ktem ne ma ana masunw lan ne kdi ti ma Yaw.”
28 Dendye Yesuske tyanuk ti Ama ma byohe, “Amo! Mswusu ohe Animkwe eras ma irire rleru Animkwe!”
Kyoat Yesuske itanuk koldyesy maktei bonyo, tyomolu teltelke kyosy wen sra eraske ma kbyohe, “Ou, kswusu deny ohe Anikkwe eras ma irire rleru Anikkwe. Ode ana kswusu huruk ohe Anikkwe eras ma irire rleru Anikkwe huruk.”
29 Lemade iry ribun mamdiry ti desike ratomolu teltel desy bonyo, dum a rtanuk ma rbohe, “Krutu ma desy.” Ode dum a rtanuk ma rbohe, “Hulasokwe wasi nyaso manosy laitke it a itun a yor I.”
30 Dendye Yesuske tyanuk ti sir ma byohe, “Tel desike ity ne mumu ne ttomolu de, keskye lema ktyanuk ma kmwesan a ktwomolu ohe khyalas Yaw, de ktyanuk ti e ma mtyomolu ohe khyalas Yaw ma desy. 31 Sekwe kyait de ma Hulasokwe yukun nuske ktem ne, ode kyait sekwe de ma Hulasokwe yala yal ngkeskwaure wait uskwe khatu mahareta ti nuske ktem ne ma yotuk i ba. 32 Ode kolnye ti nuske ktem ne, irire rsalak Yaw bai akwe ktutuke ma atatat a Yaw ma kmwaty,† desikeo ana khwury ma iry ribun manosy bangsa salno salik nekre mumu ne, neke rma ma rait Yaw.”* 33 Yesuske tyanuk koldyesy, ma ksyusu ohe kolkyabei ti ana imaty ne.
34 *Lemadendye iry ribun mamin ti desike rtanuk ti Yesuske ma rbohe, “Ti Kitab Lanke ktyanuk ma kbyohe, Mesiaske ana myorif nini nam.† Ode kolkyabei mane mutanuk de mbwohe, ‘Irkye Ananke musti mo rsalak I bai akwe ktutuke ma atatat a I ma imaty’ ne de? Koldyesikemo Irkye Anan ne esei de?”
35 Dendye Yesuske tyanuk ti sir ma byohe, “Wasikw madelaf a kidelaf e ne, neke lenla tebikan bonyo kitayar de. Dendye kolnye madelaf desy kimin a nggora, ei neke musti mo mlyakut ti madelaf desy, ma kete kelerakokke khyareta e. Kali esei desike lyakut ti kelerakokke, desikeo ana lema hye iba sara. 36 Ktwanuk ti e ma musti mo mtyohak ti madelaf desy ti kyoat madelaf desike kinor a e a nggora ne, ma ana ei ne Hulasokwe anan a e, ma madelaf desy kimin a e.” Yesuske itanuk koldyesy maktei bonyo, bya ti ibuny ma lema rhe o byai kabei.
Iry Yahudi-nare ribun lema rtohak ti Yesuske
37 Ode biar ma Yesuske yala ktela ribun masalsyalik iare de, ma iry desikre ratos dakun de, keskyede iry desikre ribun a lema rtohak ti Yesuske bo. 38 Ode kyoat ktela irire ribun a lema ratohak ti I ne kidi ti bonyo, Yesaya iry manety Hulasokwe wasi nyanoke, tun heitlulswo ikeskye nenmo kdi ti. Kali tun ikeskye ktyanuk ma kbyohe,
“Amam Lan O, nenma-nenma lema kika iry matohak nam a aramy miabrita nekre.
Ode biar ma Oi neke mswusu ohe wasimw haretke lan ti sir dakun, keskyede lema ratohakke bo.”*
39 Ode heitlulswo Yesaya kyesy huruk ma lyosu ti kihali ribun sir a lema bisa ma ratohak ti Yesuske ne, ma byohe,
40 *“Ity Ebutke yala matatare ma kete rmatakit,
ode kyahat eta huhutare ma kete rrekan a rhe namit-namit de.
‘Kala koldyesy ma, iry desikre kete rulak sir ma rait Yaw,
ma kete knwoha wait kbainare ma eras sir.’ ”
41 Lemade Yesaya manety Hulasokwe wasi nyano desike heitlulswo kyesy koldyesy, kali i ne iatos Yesuske wasi haret lan ne a ksyalik ti ana kima ne, ode yabrita Yesuske ti irire dakun. 42 Biar ma irire ribun lema rtohak ti Yesuske, keskye Yesuske dakun o irire ribun a rtohak ti I. Ode iry manety lulw ti Yahudi-nare dum a rtohak ti I dakun. Keskye iry matohak nekre lema rala ma kbyetik ti iry ribunke, kali ramtaut o kete kyal nini iry manosy lui Farisi-nare rbu eta sir, ma kete rsukar ei iry Yahudi-nare wait sey rasambayan tiare. 43 *Iry mamtaut desikre rdakin ma irire ralan a sir, ma kbyilak ti Hulasokwe ialan a sir ne.
44 Lemade Yesuske yatela ma tyanuk ti iry ribun desikre ma byohe, “Esei desike tyohak ma Yaw, kbuanke o i desike lema tyohak ma Yau kmwesan bo, de tyohak elik ti Iry a maaso Yaw ne dakun. 45 Ode esei desike yatos Yaw, desikeo yatos a Iry a maaso Yaw ne dakun. 46 Ode kumai nuske ktem neke, kmwa kola madelafke ma kdyelaf ti nuske ktem ne, ma iry matohak ma Yaw nekre, lema ramin ti kelerakokke de. 47 Ode kolnye iry a ratomolu tun kutanukare, keskye lema rtoha, desikeo lema kukun a sir. Kali kuma neke lema kmwa ma kukun irkye ti nuske ktem ne, de kmwa ma kaorif irkye ti nuske ktem ne. 48 Keskyede iry a rabrai ma rtohak ma Yaw desikre, ode lema rou ma rtomolu tun kutanukare, desikeo ana Hulasokwe yal tun kutanuk desikre ma yal ma yukun sir, ti sew a nuske ktem ne ana kilodur ne. 49 Kali tun kutanuk desikre lema kyosy a Yaw kmwesan, de Amakw a maaso Yaw ne, I ne inal haretke ma Yaw ma musti mo ktwanuk tun itanuk ma Yaw desikre ti e. 50 Ode khwe ohe, tun Amaku itanuk ma Yaw desikre kyety mormyorif manal nini namke ti irkye. Lemade tun kutanukare, neke tun desikre ne Amaku iaso Yaw ma kutanuk ne.”