Irire rleru Yesuske Anike kyoat yala ma syukar ei Yerusalem
11
Kyoat desike Yesuske yor wasi matoha Iare rarasik nus Yerusalemke de.
Keskyede lenla rait Yerusalem,
desikeo musti mo ana rait a hnuke enaru a kmuna.
Hnu deru ne hnu Betfageke ode hnu Betaniake,
neke kimin ti Kususwan Zaitunke,
ma knyey a nus Yerusalemke dakun.
Dendye rala ma ranait hnu deru desy bonyo,
Yesuske yabuk wasi matoha Ike irkye enaru ma yaso sir,
Markus 11:1-14
2 ode tyanuk ti sir de byohe,
“Mbyai hnu mamin ti lulw ne.
Ode ana misukar ei hnuke krala desy,
desikeo myait elik keledai mur ne it ma rikat i ti desy,
neke irire lenla rsai i elik.
Lemade myaka tasy a ranal ma raikat keledai desy,
ode myor i mai ne.
3 Ode kolnye irkye it a tyanuk ti e de byohe,
‘Kyanmwane miala koldyesy ne de?’
Desikeo mhyalas i ma mbyohe,
‘Ity Ebutke byuma pyake keledai ne aduk.
Maktei o,
nenmo yaso ma rety de rolik i ei wenake huruk.’ ”
4 Lemadendye iry deru desike rba,
ode rait keledai mur ne it ma rikat i ti sekye lulkwe ti salke kserike,
dendye deruke raka wasi taskye.
5 Ode irire dum a ramdiry ti desy,
dendye rena iry deru desy ma rbohe,
“Hei,
kyanmwane myaka keledai desy wasi taskye ne de?”
6 Lemade iry deru desike rhalas iry mamdiry ti desikre,
ma rtanuk kola nam dai Yesuske itanuk ti sirke.
Dendye iry mamin ti desikre rlura keledai desy ti iry deru desy,
ma ral i ma ror i ba.
7 Lemade iry deru desike ror keledai desike ba ti Yesuske,
ode ral wait rabit narnarure ma rary a keledai desike rutunanke,
ma Yesuske syai ti.
8 Ode iry ribun mamin ti desikre,
dum a rhela wait rabit narnarure ti salke kralake,
ode dum a ral aw ktahinare toha wait boare,
ma ral ma rhela ti salke kralake dakun.
Iry desikre ral nam desikre ti salke kralake ma ksyusu ohe ralan Yesuske.
9 *Ode dum a rlakut a kmuna Yesuske,
ode dum a rosi lyakwe,
ode raktemtem a ratelat ma rbohe,
“Mmya ma tleru Hulasokwe!
Mmya ma tleru Hulasokwe!
Kali myaa yor ity Ebutke Anike!
10 Ode Hulasokwe yal eraske ti I,
kali mya ma hyareta kola ity ebnwo matrumat raja Daud ne.
Tleru Hulasow mamin sra lahuk ne Anike!”
Iry ribunke rleru Yesuske kyoat a syukar ei Yerusalem (11:10)
11 Kyoat ranait Yerusalem,
desikeo Yesuske syukar ei kintal a Hulasokwe Seike,
ma yatos nam ribun mamin ti desy mumu.
Keskyede kyala ma metdyet,
lemade Yesuske yor wasi matoha I dehean a kresi enaru desy,
rbetik toha kintal Hulasokwe Sei desy,
ma rbai hnu Betaniake.
Yesuske tyuhar akwe it neke kani arake
12 Ode bolbolke bonyo,
Yesuske yor wasi matoha Iare rbetik toha Betania,
kyoat desike Yesuske kyoman o imlar.
13 Ode sososo a ne bonyo,
Yesuske yatos a aw arake mo ktahinare mdat a ksyalik.
Lemade bya ti nyey a aw desy ma yatos o kete kika kisi ta lema.
Keskye lema itot aw desike kisike it dakun,
de ktahinare bo,
kali lenla kyait wasi hulke ma aw ara desike kisi.
14 Lemadendye Yesuske tyanuk ti aw ara desike de byohe,
“Kyala kyosy senweke,
ana lema muisy de.”
Ode kyoat itanuk koldyesy ti aw ara desy,
desikeo wasi matoha Iare rtomolu tun itanuk desy dakun.
Yesuske yesak iry maketa nam ti kintal Hulasokwe Seike
15 Kyoat Yesuske yor wasi matoha Iare ranait Yerusalem bonyo,
bya ti syukar ei kintal Hulasokwe Seike,
ode yesak iry maketa nam ti kintal Hulasokwe Sei desy.
Ode hyau balik mejaare ti desy,
neke meja kyalamo rba ti raliku kuban tike.
Ode hyau balik mbanare dakun,
neke mban a kyalamo rataklulw ti ma raketa manu hahire ti ne.
Markus 11:15-33
16 Ode lema lyura iry makumak a wait nam raketa desikre,
ma rketa ti kintal Hulasokwe Sei desy dakun.
17 *Lemadendye yajar iry ribun desikre ma byohe,
“Rkesy ti Kitab Lanke de ma kbyohe,
‘Seikw neke,
sey a,
bangsa mamin ti nuske ktem ne mumu ne,
sey rasambayan tike.’
Keskye ei ne myal ti kindika wen a iry manametare rawahuk sir tike bo.”
Yesuske yesak iry maketa namare toha Hulasokwe Seike (11:17)
18 Kyoat desy dakun o,
iry mabaa klen ti irkye yor Hulasokwe wait usu khatunare,
ror iry mahe snurat o tnyetak Musake rtomolu ktela Yesuske iala desikre,
desike bonyo robak ksala ma rtabahunw a I.
Keskyede ramtaut,
kali ratos o iry ribun mamin ti desikre mumu ne rheran a ksyalik ti ratomolu Yesuske nam iajar nekre.
19 Ode sekwe bya ma kyala ma sewah bonyo,
Yesuske yor wasi matoha Iare rbetik toha nus Yerusalem desy.
Yesuske yajar ity ti ktela tatohak ti ity Ebutke ne
20 Ode ti bolbolbol ne bonyo,
Yesuske yor wasi matoha Iare rlakut ma rbilak aw ara ituhar desy,
desike bonyo ratos aw ara desike ma kimraw de,
ma ti kyal kawanare dakun.
21 Dendye Petrus nyenas yal nam liahke Yesuske itanuk ti aw ara desy,
lemade tyanuk ti Yesuske de byohe,
“Tuanggurw,
matos!
Aw ara liahke mutuhar neke kimraw de.”
22 Lemade Yesuske hyalas sir ma byohe,
“Musti mo mtyohak Hulasokwe.”
23 *Ode tyanuk huruk ma byohe,
“Mtyomolu mamak nam kutanuk ne!
Kolnye esei desike mlay bain ma lema ralake kakan,
de tyohak ti Hulasokwe bain-bain,
desikeo bisa ma yal haretke ti huarke ma byohe,
‘Muhmua toha ne,
ma ti mdwi o tasike.’
Desikemo Hulasokwe ana yala nam desike ma kdi ti,
kolnye tyohak bain-bain ohe nam iten desike ana kdi ti.
24 Lemadendye ktwanuk ti e ohe,
kolnye msyambayan,
ma miten sai ta sai toha Hulasokwe,
desikeo musti mo mtyohak bain-bain ohe,
nam miten desike ana yal ti e.
25 *Ode kolnye msyambayan,
desikeo musti mo msyos iry maka salat ti e nekre ba,
ma Amamy mamin ti wen sra eraske ana syos salamire ba dakun. [
26 Keskyede kolnye lema mbyuma msyos iry maka salat ti e nekre ba,
desikemo ana Amamy mamin ti wen sra eraske lema syos salamire ba dakun.”]†
Usu khatu Yahudi-nare rena Yesuske ohe ese yal haret ne ti I de
27 Kyoat Yesuske yor wasi matoha Iare rulak sir bai Yerusalem huruk,
ode malmata lyakut ti kintal Hulasokwe Seike,
desikeo iry mabaa klen ti irkye yor Hulasokwe neke wait usu khatunare,
ror iry mahe snurat o tnyetak Musake,
rtabal manety lulw ti Yahudinare,
rma ma rait Yesuske.
28 Ode rena I ma rbohe,
“Haret kabei ne munal ma muala ktela nekre ne de?
Ode esei ne inal haret ne ti O,
ma muala ktela desikre ne de?”
29 Dendye Yesuske hyalas sir ma byohe,
“Kena e ti ktelake sasam aduk,
ma kolnye mhyalas Yaw,
desikemo nenmo klwosu ti e dakun o haret kabei ne kunal ma kuala ktela nekre ne.
30 Ktyoha e mo,
Yohanes Mababtiske wasi haretke kyosy esei de?
Kyosy a Hulasokwe,
ta kyosy a irkye de?
Mhyalas Yaw aduk!”
31 Lemade iry desikre raktemtem a rrekan ti de rrekan ma ode it de tyanuk it ma rbohe,
“Ana kolnye thalas ma tbohe,
‘Wasi haret desy kyosy Hulasokwe,’
desikeo ana tyanuk ma ity de byohe,
‘Koldyesikemo kyanmwane lema mitohak Yohanes ne de?’
32 Ode kete tbohe,
‘Wasi haret desy kyosy irkye bo,’
kali kolnye ttanuk koldyesy,
desikemo ana iry ribunke rkeyer a ity,
kali rtohak o Yohanes neke iry manety Hulasokwe wasi nyanoke.”
33 Lemade iry desikre rhalas Yesuske de rbohe,
“Lema aramy mhye o Yohanes wasi haret desike kyosy esei.”
Dendye Yesuske tyanuk ti sir de byohe,
“Desikemo Yaw dakun o lema klwosu ti e ohe,
esei ne inal haret ne ma Yaw,
ma kal ma kala ktela nekre mumu ne!”