Yesuske yajar ma saw o lay neke kete it de ibrai it
10
Kyoat Yesuske byetik a yosy hnu Kapernaumke,
ma byai propinsi Yudeake o sah Yordanke kseri timurke.
Ti desy dakun o iry ribunke rma ma rkoal I.
Ode Yesuske wasi ktelake de,
ma kolnye irire ribun sir koldyesy,
desikeo yajar a sir.
Markus 10:1-31
2 Dendye iry manosy lui Farisi-nare dum a rma ma robak a ksala ma roit salke ti Yesuske,
desikeo rena I de rbohe,
“Mlay bain o ktyoha ity wait ktela kubkubakke mo bisa ma wamwanire rbisak sawatare ba e?”
3 Dendye Yesuske hyalas sir ma byohe,
“Haret Musake khyareta e kolkyabei ti ktela mitanuk desy de?”
4 *Lemade iry desikre rhalas I ma rbohe,
“Musa lyura ma it de ibrai it,
keskye musti mo wamwankye kyesy atyahy a it de ibrai it ne aduk,
ma yal ti wamfwet ibrai desy.”
5 Dendye Yesuske tyanuk ti sir huruk ma byohe,
“Kali khyali usumy khatu lanare,
lemadendye Musa kyesy haret desy ti e ma desy.
6 *Keskyede kyoat Hulasokwe yala nuske ktem ne,
desikeo yala irkye dakun,
neke wamwankye ode wamfwetke.
7 *Lemadendye kyoat wamwankye it a isa,
desikeo ana tyutuk ena o ama,
ma ti yait sawa,
8 ma deruke rawahuk sir ti nam sasamke,
ma lema enaru sir de,
de sasasam sir bo.
9 Kali koldyesike mane,
nam sai desy Hulasokwe yeti yahuk ti sasam de,
desikemo irkye lema bisa ma isali de.”
10 Kyoat Yesuske yor wasi matoha Iare rasukar ei sekye kralake bonyo,
rena I ti ktela it de ibrai it ne.
11 *Dendye Yesuske tyanuk ti sir ma byohe,
“Esei desike ibrai sawa,
ode isaa yor wamfwet salik,
desikeo iry desike yaldotw,
kali byilak lean sawa.
12 Koldyesy dakun ti wamfwetke,
ma kolnye ibrai lai ode isaa yor wamwany salik,
desikeo wamfwet desike yaldotw,
kali byilak lean lai.”
Yesuske syaa sima ti namanare
13 Lemadendye irire ror anat kakanare ti Yesuske,
ma syaa sima ti sir,
keskyede kyoat wasi matoha Iare ratos a ktela desy bonyo,
rkeyer a iry desikre.
14 Kyoat Yesuske iatos ktela desy bonyo,
kyeyer a wasi matoha Iare ode tyanuk de byohe,
“Mlyura naman kakan desikre ma rma ma rait Yaw,
de kete mbya etno eta sir.
Kali iry maola naman kakan desikre,
ana wenatke ne wen Hulasokwe ihareta kola Rajake tike.
15 *Dendye mtyomolu mamak nam kutanuk ne.
Mlay bain!
Esei desike lema tyohak Hulasokwe kola naman kakanke,
i desike ana lema syukar ei wen Hulasokwe ihareta kola Rajake tike.”
16 Lemade Yesuske hyot naman kakan desikre ratsam-ratsam,
ode syaa sima ti sir ma yal eraske ti sir.
Iry maaka malolkye ksunw ksyalik ma syukar ei wen Hulasokwe ihareta tike
17 Kyoat Yesuske syaur wasi laklakutke bai lulkwe,
desike bonyo wamwankye it a ila bya ti syakitil ti Yesuske wasi lulululw ne ma byohe,
“Tuanggurw eras o,
kala kolkyabei ma musti mo ana kmworif nini nam de?”
18 Dendye Yesuske tyanuk ti iry desy ma byohe,
“Kyanmwane mubohe eras Yaw ne de?
Lema irkye it a eras i,
de lenla Hulasokwe myesan eras I bo.
19 *Oi neke mhwe nam a Hulasokwe itetakare de,
neke kete taldotw,
kete ttabahunw iry,
kete tanamet,
kete takakmet ma toit salke ti iry salik,
kete takakmet a irire ma tal wait namit-namit,
ode musti mo talan a ity enat o ity amat.”
20 Lemade iry desike hyalas Yesuske ma byohe,
“Tuanggurw,
nam mutanuk nekre ktwoha mumu kyala kyosy kakan a yakwe de.”
21 Keskyede Yesuske yatos i ode lyobak i dendye tyanuk ti i ma byohe,
“Ktelake sasam neke lenla mtwoha,
neke mulak a o,
ode mkweta wasimw maloly desikre mumu,
ode muhe ti iry a lema manait ei sra o hahare.
Koldyesikemo oi neke ana Hulasokwe yal malolkye ti o ti wen sra eras Hulasokwe imin tike.
Muala koldyesy maktei desikeo nenmo mmwa ma mtwoha Yaw.”
22 Kyoat iry desike itomolu tun Yesuske itanuk desikre bonyo,
ralake ksyal ti nam itomolu desy,
kali iry desike wasi malolkye lan.
Dendye yulak i ma byai waitke.
23 Lemade Yesuske yatos wasi matoha Iare ode tyanuk ti sir ma byohe,
“Iry a maaka malolkye ana ksunw ma syukar ei wen Hulasokwe ihareta kola Rajake tike.”
24 Kyoat Yesuske itanuk koldyesy bonyo,
wasi matoha Iare rheran ti ratomolu tun Yesuske itanuk desy.
Keskyede Yesuske syaur tunake huruk ma byohe,
“Anakw e,
iry a maaka malolkye ksunw ma syukar ei wen Hulasokwe ihareta kola Rajake tike.
25 Lemade ktwanuk ti e ohe,
kalkal ti a untake syukar ei balbyalkye kuranke,
keskye ksunw ksyalik ti iry maaka malolkye syukar ei wen Hulasokwe ihareta kola Rajake tike.”
Irkye yor untake (10:25)
26 Kyoat a Yesuske wasi matoha Iare ratomolu tun itanuk desikre bonyo,
ktyabal ma rheran huruk,
ode it de yena it ma rbohe,
“Mane iry maaka malolkye ksunw ksyalik ma syukar ei wen sra eraske,
desikemo esei ne ana Hulasokwe iaorif i ma isukar ei wen sra eraske ne de?”
27 Dendye Yesuske yulak matake ma yatos sir,
ode tyanuk ti sir ma byohe,
“Hulasokwe yala hye nam a irkye lema iala hyeke.
Kali Hulasokwe yala yal ma yala nam nekre mumu.”
28 Lemadendye Petrus tyanuk ti Yesuske ma byohe,
“Tuanggurw,
aramy neke mtyutuk ara wasimy nam ribun nekre mumu de,
ma aramy mtyoha O.”
29 Lemade Yesuske hyalas sir ma byohe,
“Mtyomolu mamak nam kutanuk ne.
Mlay bain!
Ti esei ta esei bo,
ma tyutuk bain-bain wasi sekye,
wainare,
ena o ama,
ananare,
ode wasi boluhu-boel,
kali tyoha Yaw,
ode kali bya ti yabrita Brit Eraske,
30 desikeo iry desike,
ti wasi mormyorif selsel ne,
ana Hulasokwe yal sey o,
wai o,
ena o,
ama o,
anan o,
boluhu-boel nekre ti i,
desikeo karyarike atw kbyilak ti nam itutuk desikre.
Ode biar ma roban de rtaba i dakun,
keskyede ti taras ana mama ne,
desikeo ana myorif nini nam ti wen sra eraske.
31 *Keskyede iry maaka malolire,
ode iry a raalan sir ne,
ana ribun a rosy lyakwe.
Klala iry a lema manait ei sra o hah nekre,
ode iry a lema raalan sir nekre,
ana rmuna.”
Yesuske lyosu kla-teluke ti ana imaty ne
32 Kyoat Yesuske yor wasi matoha Iare rlakut bai Yerusalem,
desikeo Yesuske lyakut a kmuna.
Dendye wasi matoha Iare kola ne rheran.
Ode iry matoha sirare ramtaut.
Lemadendye Yesuske yabuk wasi matoha Iare,
ode tyanuk nam ana madi ti tenanke ne ti sir
Markus 10:32-52
33 ma byohe,
“Mtyomolu!
Tala ma tbai Yerusalem mane.
Ma ana ti soke Irkye Ananke† ral I ba ti iry mabaa klen ti irkye yor Hulasokwe wait usu khatunare,
ror iry mahe snurat o tnyetak Musake,
ma rtunik tnyetak matmyatkye ti I.
Maktei o ral I ti bangsa lema mahe Hulasokwe ne.
34 Ode iry desikre ramahis a I,
rahmway I,
rasburik a I,
roban de rtaba I,
maktei o rbakw a I ti tul masanwalw ike ma myaty.
Keskyede ana sekwe enatelw bonyo myorif huruk.”
Yakobus yor Yohanes raten ma Yesuske yala ktelake sasam ti sir
35 Kyoat Yesuske itun maktei bonyo,
Yakobus yor Yohanes,
neke Zebedeus ananare,
rba ti rney a Yesuske,
ode rtanuk ti I ma rbohe,
“Tuanggurw,
aramy miten ma mala ktelake sasam ma aramy.”
36 Dendye Yesuske yena sir ma byohe,
“Nam sai ne mibuma kuala ti e ne de?”
37 Lemade deruke rhalas Yesuske ma rbohe,
“Aramy mbyuma aramy miru neke,
it a tyaklulw ti serimw wisalke,
ode it a tyaklulw ti serimw wanke,
ma aramy myor a O ma thareta,
kolnye kyait ma muka Raja ode mtwaklulw ti wasimw kader madelafke ma mhwareta ti.”
38 *Keskyede Yesuske tyanuk ti sir ma byohe,
“Ei neke lema mhye nam mitenke.
De mryekan o ei ne bisa ma mhyar masunw a mdedanke,
kola masunw a mdedan ana madan a Yaw ne e?Ӡ
39 Lemade deruke rhalas I ma rbohe,
“Bisa.”
Dendye Yesuske tyanuk ti deruke ma byohe,
“Mlay bain!
Miru neke ana masunkwe kdyan e kola ne ana masunkwe kidan Yaw ne.
Ode ana rbabtis e a ror babtis a ranal ma rababtis a Yaw ne dakun.
40 Keskyede lema wasikw haretke ma kswusu ohe,
ana ese tyaklulw ti serikw wisalke,
ode ana ese tyaklulw ti serikw wanke.
Kali haret desike kimin a Amaku myesan bo,
ma ana syusu wen desikre ti wasi iry a iilikare de.”
41 Ode kyoat Yesuske wasi matoha I dehean desike ratomolu tun Yakobus yor Yohanes ratanuk desy bonyo,
rkeyer a deruke a ksyalik.
42 *Dendye Yesuske yabuk raktemtem,
ode tyanuk ti sir ma byohe,
“Mhye ohe iry a lema Yahudi-nare wait iry lan nekre,
ror iry a maka kmata lan nekre,
sir ne rahareta wait masyarakatke o ksunw ksyalik ne.
43 *Keskyede ti ei neke kete myala koldyesy.
De kolnye esei desy byuma lan a i,
musti mo nyauk tenanke ma babaf ma yola makarya ne bo.
44 Ode esei desike byuma lan i ma byilak iry salik,
desikeo musti mo i desike ika at ti e mumu.
45 Kola Irkye Ananke ti imai nuske ktem ne,
lema byuma irkye kyarya ti I,
de mya ma kyarya ma syaluk irkye bo.
Ode yal tenanke ma myaty ma lyitan eta iry ribunke.”
Yesuske yala iry matmabolke ma myatakit
46 Kyoat desy dakun o Yesuske yor wasi matoha Iare rait Yerikho.
Maktei o ti kyoat rabetik toha Yerikho bonyo,
iry ribunke lui-lui sir ma rtoha Yesuske.
Desikeo iry maten namke it,
ma matake kbyol,
ode tyaklulw ti salke kserike ma iten nam.
Iry neke ani Bartimeus,
neke Timeus ananke.
47 Ode itomolu Yesus iry Nazaret ne ma ilakut yosy wen desy bonyo,
iry desike yatela ma byohe,
“Yesus!
Daud Anan O!
Mlwobak a yaw!”
48 Lemade iry desikre rterik malkyakaw iry matmabol desy,
ma rbu ti i ma mamwaw i.
Keskyede matmabol desike telake lan ma yatela huruk ma byohe,
“Yesus,
raja Daud tesnwo natu O,
mlwobak a yaw!”
49 Lemade Yesuske imres,
ode yaso ma rabuk iry matmabol desy.
Dendye iry desikre rtanuk ti iry a matmabol desy ma rbohe,
“Mumdiry,
ode malkyau ralamkwe,
kali Yesuske yabuk a o!”
50 Lemadendye iry a matmabol desike yonuk wasi rabit narnarkwe,
ode lyahlaha mirin ma imdiry ma bya ti yait Yesuske.
51 Dendye Yesuske yena i de byohe,
“Nam sai ne muten ma kuala ti o ne de?”
Desike bonyo iry desy hyalas ma byohe,
“Tuanggurw,
kbwuma kmwatakit.”
52 Lemade Yesuske tyanuk ti i ma byohe,
“Oo,
mmwatakit ande!
Kali mtwohak ma Yaw de.
Dendye mbwa.”
Kyala mait bonyo,
iry desike myatakit elik!
Dendye tyoha Yesuske ma rba.