Inahliakke ti iry makarya ti bo tasy maiskye
20
Lemadendye Yesuske tyanuk huruk ma byohe, “Kuhliak ktela Hulasokwe ima ma ihareta kola Rajake ne, neke kolnye: Irkye it a wasi bo tasy maiskye, ma kebuke bolbolbol ne byetik ti yobak iry, ma rba ti rkarya wasi bo desy. 2 Dendye itot makaryaare bonyo itun a yor sir, ma kolnye rou ma rkarya wasi bo desy, desikeo ana syelw a sir, neke ktyoha kyalamo raselw irire wait katire ti seure ratsam ne, neke khesike dinarke sasam.† Lemade iry desikre rou de, dendye byu ti sir ma ti rkarya wasi bo tasy maisy desy.3 Ode anakyai kyoban sikwe bonyo, boke kebu desike byetik huruk ma byai wen raketa nam tike. Ti desike yatos o irire dum a rtaklulw bo, kali lema raka karyaat. 4 Lemade tyanuk ti sir ma byohe, ‘Mbya ti mkyarya wasikw bo tasy maiskye, ode ana kswelw a khesike ti e, ma ktyoha karya mikarya desy.’ Lemade iry desikre rtoha ma rba.
5 Ode anakyai kyoban hean a kresi enaru ti sedutw ne bonyo, boke kebu desike byai wen raketa nam tike huruk, ode yatos o irire dum a rtaklulw ti desy nggora. Dendye tyanuk ti sir kola dai itanuk ti mamunanare ne huruk. Maktei o kyoban enatelw ti sew maba ne, desikeo boke kebu desike yala koldyesy ti irire dum huruk.
6 Ode anakyai kyoban enasimke ti seswery ne, boke kebu desike byetik ma byai wen raketa nam tike huruk bonyo, inal a yor irire dum, ma rtaklulw ti desy bo. Dendye yena sir ma byohe, ‘Senweke lema mitot karya, mane mitaklulw bony ne e?’
7 Lemade iry desikre rhalas i ma rbohe, ‘Ou, lema kika iry ma ral karya ma aramy mkyarya, mamode rselw aramy.’
Lemade bo tasy maisy desike kebuke tyanuk ti sir ma byohe, ‘Desikemo mbya ti mkyarya o wasikw bo tasy maiskye dakun.’
8 *Ode metdyetke bonyo, boke kebu desike tyanuk ti wasi makarya desikre wait uskwe khatuke ma byohe, ‘Mabuk makarya desikre mumu, ode mswelw a wait katire ti sir. Keskyede mswelw wait katire ti sir kolnye: mswelw ti iry a nenmo masukar ma makarya desikre a kmuna. Maktei o kitoha-kitoha i nini makarya mamunanare rosy lyakwe, desikeo nenmo mswelw wait katire ti sir.’
9 Lemade makarya desikre rma. Desikeo uskwe khatu desike syelw a iry a nenmo makarya ti kyoban enasimke ti seswery ne wait katire a kmuna. Ma uskwe khatu desike yal kuban dinarke ratsam-ratsam ti iry desikre ma kyakar sir. Kuban dinar neke sasam o kdeda katkye sekwe sasam.† 10 Dendye makarya mamuna kyala kyosy bolbolbol neke rrekan ohe, ana ral katy ti sir o kbyilak dai nenmo makarya seswery nekre, kali rrekan ohe rkaryaa rala rosy bolbolbol ne de. Kyosy desy ma o ral kuban dinarke ratsam-ratsam ti sir dakun bo. 11 Dendye kyoat wait uskwe khatuke inal wait katire ti sir bonyo, lema rou ma ral, kali rkeyer a boke kebu desy ma it a tyanuk ma byohe, 12 ‘Edo! Makarya manosy lyaw desikre nenmo rsukar ma rkarya jamke sasam bo, klala aramy neke mkyaryaa myala myosy a bolbolbol ne, ma sew manas ne kena aramy nini ti sewah, desikeo mswelw a ara wasimy katire o kdeda nenmo makarya ti seswery neke wait katire dakun.’
13 Lemade boke kebu desike hyalas makarya desy ma byohe, ‘Liakw, lema kuka salakw ti e. Kali dai bolbolke tatuna khesike ma ktei de, desikeo myou ti sekwe sasam neke musti mo kswelw a kuban dinarke ratsam-ratsam ma kyakar e ode? 14 Lemade mal wasimw katkye ode mbwa. Kali kbwuma kal katy ti iry nenmo makarya desikre, neke mais kola dene kunal ti o ne. 15 Dendye kbwuma kala sai ta sai, desyo kyosy a yaw bo. Kali wasikw! Dendye kete mswoi ralamw ti kuala eraske ti irire ne dakun.’ ”
16 *Lemade Yesuske tyanuk huruk ma byohe, “Iry manosy lyakwe ana myuna, klala iry mamunake ana yosy lyakwe.”†
Yesuske lyosu kla-teluke ti ana imaty ne
17 Kyoat Yesuske lyakut bai nus Yerusalemke, ma ti wait laklakutke a nggora ne, desike bonyo yabuk wasi matoha I dehean a kresi enaru desy, ma rawahuk sir a rmesan, ma soso sir toha ribunke. Ode tyanuk kakan ti sir ma byohe, 18 “Mtyomolu! Tala ma tbai Yerusalem mane. Ode ti soke Irkye Ananke† ana ral I ti usu khatu mabaa klen ti irkye yor Hulasokwe, ror iry mahe snurat o tnyetak Musake, ma rtunik tnyetak matmyatkye ti I. 19 Maktei o ral I ti iry a lema Yahudi-nare, ma rahmway I, roban de rtaba I, ode rbakw a I ti tul masanwalw ike ma myaty. Keskyede sekwe enatelw bonyo ana myorif huruk.”
Yesuske yajar wasi matoha Iare ti ktela tanauk ity tenatare ma babaf ne
20 Lemadendye Zebedeus sawa, yor anan a Yakobus ode Yohanes, neke rma ma rseak Yesuske. Ma Zebedeus sawa-na syakitil o you ti Yesuske wasi lulw ne, ma iten namke it toha I. 21 Lemade Yesuske yena i ma byohe, “Eno, sai ne mubuma kunal ti o ne de?”
Dendye enen desike hyalas ma byohe, “Kbwuma anakw deru neke it a tyaklulw ti serimw wisalke, ode it a tyaklulw ti serimw wanke, kolnye kyait ma muka Raja, ode mtwaklulw ti wasimw kader madelafke ma mhwareta ti.”
22 Keskye Yesuske tyanuk ti sir ma byohe, “Ei neke lema mhye nam mitenke. De ei neke bisa ma mhyar masunw ana kuhar ne e?”
Lemade iry desikre rhalas Yesuske ma rbohe, “Ou, bisa ma aramy mhyar.”
23 Lemade Yesuske tyanuk ti sir ma byohe, “Ou mlay, ana mhyar masunw kuhar ne dakun. Keskyede ti nam miten desy, lema wasikw haretke desy ma kswusu ohe, ana ese tyaklulw ti serikw wisalke, ode ana ese tyaklulw ti serikw wanke. Kali haret desike kimin a Amaku myesan bo, ma ana syusu wen desikre ti wasi iry a iilikare de.”
24 Ode kyoat Yesuske wasi matoha I dehean desike ratomolu nam liat deru desike raten toha Yesuske desy bonyo, rkeyer a deruke a ksyalik. 25 *Lemade Yesuske yabuk raktemtem, ode tyanuk ti sir ma byohe, “Mhye ohe usu khatu mahareta ti wait bangsa nekre ti nuske ktem ne, kyalamo rhareta wait masyarakatke ne ksunw ksyalik, ode rdakin ma rala wait masyarakatke kola ne wait atare ne bo. 26 Keskyede ei neke kete myala koldyesy. De kolnye esei desike byuma iry lan a i, musti mo nyauk tenanke ma babaf ma yola makarya ne bo. 27 Ode esei desike byuma imin ti lulkwe ma lan lahuk i ti e, desikeo i desike musti mo ika at ma kyarya ti e mumu. 28 Kola Irkye Ananke ti imai nuske ktem ne, lema byuma irkye kyarya ti I, de mya ma kyarya ma syaluk irkye, ode yal tenanke ma myaty ma lyitan eta iry ribunke dakun.”†
Yesuske yala iry matmabolke enaru ma rmatakit
29 Ode kyoat Yesuske yor wasi matoha Iare rbetik toha Yerikho, desikeo iry ribunke lui-lui sir ma rtoha Yesuske. 30 Kyoat desy dakun o irkye enaru ma matatare kbyol, ode rtaklulw ti salke kserike. Ode ratomolu Yesuske ma ilakut ti desy bonyo, ratelat ti Yesuske ma rbohe, “Yesus! Raja Daud tesnwo natu O! Mlwobak aramy!”
31 Keskyede iry ribun desikre rterik malkyakaw iry deru desy ma mamwaw sir. Keskyede iry deru desike lema rhaduli iry ribun desikre, de reik ma rbohe, “Yesus! Raja Daud tesnwo natu O! Mlwobak aramy.”
32 Lemade Yesuske imres, ode tyanuk ti iry deru desy ma byohe, “Nam sai ne miten ma kuala ti e ne de?”
33 Lemade iry desikre rhalas Yesuske ma rbohe, “Ebo, aramy mbyuma aramy myatakit.”
34 Dendye Yesuske ralake klyobak sir a ksyalik, lemade syaa simake ti iry deru desy matatare bonyo, deruke rmatakit elik. Dendye deruke rlakut ma rtoha Yesuske.