9
Lemade Yesuske tyanuk huruk ti sir ma byohe,
“Mtyomolu mamak nam kutanuk ne.
Mlay bain!
Ti iry mamin ti neke,
ei ne mumu ne dum a ana lenla mmyaty,
kolnye lenla mmyatakit ohe,
Hulasokwe mya ma hyareta kola Rajake ne,
neke kmyaa kyor wasi haretke.”
Markus 9:1-32
Musa yor Elia ramdiry mait ror Yesuske ti kususwanke
2 *Ode sekwe nem a kyelak eta bonyo,
Yesuske yabuk Petrus,
Yakobus,
ode Yohanes ma ror I ma raktem a rsaik bai huar atat ne it,
ma rmesan ti desy bo.
Ode iry detelw desike ratos mo,
Yesuske uno mata o tenanke ktem ne kihihi i,
3 ode wasi rabitke bokbok ma knyely malay dakun.
Ti nuske ktem ne,
lema irkye it a bisa ma hyas wasi rabitke nini bokbok ma knyely malay kola Yesuske wasi rabit desy dakun.
4 Ode kyala mait bonyo,
Yesuske wasi matoha I detelw desy ratos mo Elia yor Musa ramdiry ma ratun a ror Yesuske.
Elia yor Musa ramdiry ma ratun a ror Yesuske (9:4)
5 Lemade Petrus a tyanuk ti Yesuske de byohe,
“Tuanggurw,
eras a ksyalik ti aramy mimin ti wen ne.
Lemamo aramy msyadiri lasyerkye enatelw,
ma sasam ti O,
sasam ti Musa,
ode sasam ti Elia dakun.”
6 Petrus tyanuk koldyesy,
kali lema hye o musti mo tyanuk sai,
kali yor lian deru desy ramtaut ma ksyeman sir a ksyalik.
7 *Ode oanke khatuke kmya ma kkyahat eta raktemtem.
Ode kyoat ramin ti oanke krala desy,
desikeo rtomolu telke it ma kyosy oanke krala desy ma ktyanuk de kbyohe,
“Anakkwe I ne,
ma klwobak I a ksyalik.
Mtyomolu I!”
8 Ode kyala mait bonyo Petrus yor lian deru desy ratos ti de ratos ma o lema kika iry,
de lenla Yesuske myesan bo.
9 Ode kyoat raorw toha huar desy bonyo,
Yesuske syurat sir de byohe,
“Kete mihes ktela miatos desy ti irkye it dakun,
de mikita nini sekwe kdi ti,
neke Irkye Ananke† myorif toha mamatire,
desikeo nenmo bisa ma mihes ktela desy.”
10 Dendye lema rahes ktela desy ti irkye it dakun,
keskyede detelkwe it de yena it ma rbohe,
“Yesuske tun itanuk ma kibohe,
ana myorif toha mamatire,
neke kbuan sai de?”
11 *Lemade Yesuske wasi matoha I detelw desy rena I ma rbohe,
“Tuanggurw,
kyanmwane iry mahe snurat o tnyetak Musake rtanuk ohe,
musti mo Elia imaa kmuna Mesiaske ne de?”
12 Dendye Yesuske hyalas sir ma byohe,
“Mlay bain!
Elia iry a manety Hulasokwe wasi nyano ne,
ana myaa kmuna ma tyanuk ti iry ribunke ma rsosan ralatare,
ma rakita Irkye Ananke.
Keskyede ktyoha e mo,
kyanmwane nam rakesy ti Kitab Lanke ti kihali Irkye Ananke ohe,
ana irire rahmway I,
ode roban de rtaba I,
ode ana masunw ribunke kidan I dakun ne de?
13 Keskyede klwosu ti e ohe,
Elia neke mya bain de.†
Keskye irire rala i ma ktyoha rabuare,
neke roban de rtaba i,
ma kyal nini rtabahunw a i dakun,
ma kola ne rakesy ti Kitab Lanke ne.”
Yesuske yesak ngkeskwakwe toha naman wamwankye it
14 Kyoat Yesuske yor Petrus,
Yakobus,
ode Yohanes rulak sir ma rait Yesuske wasi matoha idanare bonyo,
ratos o iry ribunke rkoal sir,
ma malmata ror iry mahe snurat o tnyetak Musake de rahalas tel.
15 Kyoat iry ribun desikre ratos Yesuske bonyo rheran a ksyalik,
lemade raktemtem a ra-la ti rbalan Yesuske.
16 Lemade Yesuske yena wasi matoha Iare ma byohe,
“Nam sai ne kihury ma it de ihalas it ne de?”
17 Dendye ti iry a ribun desikre,
neke irkye it a tyanuk ti Yesuske ma byohe,
“Tuanggurw!
Kor anakkwe mai wen ne ma kuten ma msweak i,
kali ngkeskwakwe syukar i ma yala i ma nunuke ktem.
18 Ma seure rait mo ngkeskwakwe syukar a i,
ode byesak i ti lasmyerke,
ode ryeti tenanke,
ode ikernisy nini uhuhare kbyetik kyosy a nurno haha.
Mane kuten toha wasimw matoha Oare de,
ma resak a ngkeskwaw desy,
keskyede lema resak ral i.”
19 Lemade Yesuske tyanuk ti wasi matoha Iare ma byohe,
“Hei,
iry a lema matohak e!
Musti mo ana kor e nini kolkya?
Ode ana kukita nini hekyab o mtyohak Yaw de?”
Lemade Yesuske tyanuk ti naman desike ama ma byohe,
“Mor anamw desy ma.”
20 Dendye ror naman desy ti Yesuske.
Keskyede kyoat ngkeskwaw desike iatos Yesuske bonyo,
byesak naman desy elik ti lasmyerke,
ode yayak i ti de yayak i ma,
ma uhuhare kbyetik kyosy nurno haha.
21 Lemade Yesuske yena naman desike ama de byohe,
“Wasi kbai ne kyal ainke enai mane de?”
Desyo naman desike ama-na hyalas Yesuske ma byohe,
“Kyala kyosy a kakan ike de.
22 Ode seure rait mo ngkeskwakwe yala i ma yei akye kralake,
dete lemamo tyunik i ei werke kralake,
kali yobak ma tyabahunw a i.
Lemade Ebo!
Mlwobak aramy,
ode mswaluk aramy,
kolnye bisa ma mala mal ngkeskwaw ne ma byetik toha anakkwe!”
23 Lemade Yesuske tyanuk ma byohe,
“Kyanmwane mtwanuk ma Yaw ohe,
kolnye bisa ma kala kal ktela desy ne de?
Dendye klwosu ti o ohe,
Hulasokwe bisa ma yala sai ta sai ti o bo,
kolnye mtwohak ti I.”
24 Ode kyoat naman desike ama-na itomolu nam Yesuske itanukke bonyo,
yeik ma byohe,
“Tuanggurw!
Yaw neke ktwohak ti Hulasokwe.
Lemade mswaluk yaw ma malkyaw wasikw tohtohakke!”
25 Kyoat Yesuske yatos iry ribunke ma rma ma rkoal I bonyo,
Yesuske yaswel ngkeskwaw desy ma byohe,
“Hei ngkeskwaw a maala naman ne ma imolw ode nunuke ktem dakun ne,
mbwetik toha naman ne!
Ode kete mulak o de!”
26 Dendye ngkeskwaw desike byoran,
ode byesak naman desy o ksunw ksyalik,
maktei bonyo byetik toha naman desy.
Kyoat ngkeskwaw desy ibetik toha naman desy,
desikeo naman desike kola dene imaty ne,
ma khyury ma iry ribunke rtanuk ma rbohe,
“Naman ne myaty de.”
27 Keskyede Yesuske kyumak naman desike simake,
ode syaluk i ma byatar,
dendye naman desike byatar ma imdiry.
28 Kyoat Yesuske yor wasi matoha Iare rmesan ti sekye it a krala,
desikeo wasi matoha Iare rena I de rbohe,
“Kyanmwane lema bisa ma aramy myesak ngkeskwaw desike ne de?”
29 Lemade Yesuske hyalas sir ma byohe,
“Ngkeskwaw maoly desike lema bisa ma myesak i a kyor ktela salik,
de musti mo myesak i a kyor sambayanke bo.”
Yesuske lyosu huruk ti ktela ana imaty ne
30 Kyoat Yesuske yor wasi matoha Iare rbetik toha wen desy,
desikeo rsaur wait laklakutke ma rlakut a rlola propinsi Galileake.
Keskyede Yesuske lema you ma irire rhe ohe imin ti kabei,
31 kali malmata yajar wasi matoha Iare.
Ode Yesuske tyanuk ti wasi matoha Iare ma byohe,
“Irkye Ananke ana ral I ba ti irire ma rhareta I,
ode ana rtabahunw a I,
keskye sekwe enatelw bonyo ana myorif huruk.”
32 Keskyede Yesuske wasi matoha Iare lema rhe tun itanuk desikre kbuanare.
Ode lema rares ma rena tun desikre kbuanare toha Yesuske dakun.
Yesuske wasi matoha Iare raeta tel ma robak ma rhe ohe ti sir mumu ne ese lan i
33 Ode Yesuske yor wasi matoha Iare rait hnu Kapernaumke,
ode kyoat rsukar ei sekye it bonyo,
Yesuske yena wasi matoha Iare ma byohe,
“Nam sai ne kihury ma dai mieta tel ti salke kralake ne de?”
Markus 9:33-50
34 *Keskyede wasi matoha Iare lema ratun,
de mamwaw sir bo,
kali rhe ohe dai raeta tel ti salke kralake,
khyali robak ma rhe ohe,
ese lan a i ti sir ne mumu.
35 *Lemade Yesuske tyaklulw,
ode yabuk wasi matoha I dehean a kresi enaru desy,
ode tyanuk ti sir ma byohe,
“Kolnye esei desike byuma lan a i,
musti mo nyauk tenanke ma babaf,
ma yola iry makarya ne ma syaluk irire mumu.”
36 Lemade Yesuske kyumak naman kakan ne it simake,
ode yaso i ma imdiry ti kditlalan ne.
Maktei o hyot naman desy,
ode tyanuk ti wasi matoha Iare ma byohe,
37 *“Esei desike you ma yal naman kakan ne khyali Yaw,
desikemo kola ne you ma yal Yaw dakun.
Ode esei desike you ma yal Yaw,
desikemo kola ne you ma yal Hulasow a maaso Yaw ne dakun.”
Yesuske lyosu ohe esei desike lema syorw ity, i desike yor a ity
38 Dendye Yohanes a tyanuk ti Yesuske ma byohe,
“Tuanggurw,
aramy myatos irkye it ma yal a Animkwe,
ma yesak ngkeskwakwe.
Lemade aramy mbyu eta iry desy,
kali lema yor lui ity.”
39 Keskyede Yesuske tyanuk ti sir ma byohe,
“Kete mbyu eta i,
kali iry manal Anikkwe ma yala ktela masalsyalik iare,
iry desike ana lema ihmwai Yaw dakun.
40 *Ode esei desike lema syorw a ity,
i desike yor lui ity.”
41 *Lemadendye Yesuske tyanuk ti sir huruk ma byohe,
“Mlay bain,
esei desike yal werke ti takwe,
ma yal ti e ma myenw kali mtyoha Yaw,
i desike ana yal ksewanke toha Hulasokwe.
Ktela kihury ma irire rdi ei lim o sal
42 Ode esei desike hyury a iry a wasi tohtohakke lenla malkyakaw ti itohak ma Yaw ne,
ma khyury ma iry desike yala lim o sal,
desikemo iry mahury desike,
Hulasokwe ana yukun i o ksunw ksyalik,
ma kbyilak ti kolnye raikat hatw lan ne ti telake,
ode raotuk i ei tasike kralake ne.†
43 *Ode kolnye simamkwe serit a khyury a o ma mdwi ei lim o sal,
desikemo mal turike ma mtwusy ohut simamw desy ba!
Kali lemamo mmworif ti wen sra eraske nini nam a mor simamkwe serit.
Desike ne eras ma kbyilak ti kolnye mbwuma mmworif mor simamw deru desy,
keskyede ana rotuk o bai mamaty rala. [
44 Neke ti wen desike akye klyehur ti nini nam,
ode ulare ana lema rmaty.]
45 Ode kolnye lwaumkwe serit a khyury a o ma mdwi ei lim o sal,
desikemo mal turike ma mtwusy ohut lwaumw desy ba!
Kali lemamo mmworif ti wen sra eraske nini nam a mor lwaumkwe serit.
Desike ne eras ma kbyilak ti kolnye mbwuma mmworif mor lwaumw deru desy,
keskyede ana rotuk o bai mamaty rala. [
46 Neke ti wen desike akye klyehur ti nini nam,
ode ulare ana lema rmaty.]
47 *Ode kolnye matamkwe serit a khyury a o ma mdwi ei lim o sal,
desikemo mhwakilw matamkwe khatu desy ba!
Kali lemamo mmworif ti wen a Hulasokwe ihareta tike mor matamkwe serit.
Desike ne eras ma kbyilak ti kolnye mmworif mor matamw deru desy,
keskyede ana rotuk o bai mamaty rala.
48 *Kali ti mamaty rala neke ay mamin ti desike lema bisa ma kmyaty,
ode ul mana mamatire ne lema bisa ma rmaty dakun.
49 Dendye mnyenas,
irkye yal taisiskye ti healke kisike ma kyala healke kisi desike ma nelnyely.
Koldyesy dakun o Hulasokwe yal masunkwe ma ity kola ne akye kina ity ne,
ma ana masunw desikre kyajar ity ma ana nelnyely a ity dakun.”
50 Lemade Yesuske tyanuk ma byohe,
“Taisiskye eras,
keskyede kolnye taisisy ne malmyaly,
desyo ana ral sai ma rala taisisy malmyaly desy ma mkes huruk de?
Lemadendye ei neke musti mo myola taisiskye ti mimorif ne,
ma mimorif neke mo it de ika eras yor it.”*