Yesuske yal kotw ti irkye ribunke enaat ma ra
8
Kyoat desy dakun o irire ribun sir a ksyalik,
ma rawahuk sir a ror Yesuske.
Keskye lema kika kotw ma ra,
lemade Yesuske yabuk wasi matoha Iare ma tyanuk ti sir de byohe,
Markus 8:1-21
2 “Klwobak iry ribun lan ne a ksyalik,
kali sekwe enatelw neke ror Yaw de,
ode lema kika kotw ma ra,
kali hinat koture ktei de.
3 Ode kolnye kaso sir ma rulak sir bai wait seire,
desikeo ana kete rlakut nini dum a rlily ti sal a krala kali ramlar.
Kali iry nekre dakun o dum a rosy a wen sosoare ma rma.”
4 Lemade Yesuske wasi matoha Iare rhalas I ma rbohe,
“Tala kolkyabei,
ma tatot kotw ti wen soso kele ratelin ne,
ma bisa ma tal ti iry nekre mumu ma ra de?”
5 Lemade Yesuske yena sir ma byohe,
“Hinamy a rotkye enai desy de?”
Desikeo rhalas I ma rbohe,
“Rotkye itw bo.”
Yesuske byuma yal kotkwe ti iry ribun desikre mumu (8:5)
6 Lemadendye Yesuske yaso ma iry ribun desikre rtaklulw ti lasmyerke khahake.
Ode yal roty deitw desy,
ode yatnyarak ei laitke ma syalak eraske ba ti Hulasokwe ti khyali roty desy.
Maktei o byini-byiny a roty desikre,
ode yal ti wasi matoha Iare ma rasakar ti iry ribun lan desy.
7 Ode iry desikre hinat masy kakan ne enai ne dakun.
Lemade Yesuske yal masy desikre,
ode yatnyarak ei laitke ma syalak eraske ba ti Hulasokwe ti khyali masy desikre.
Maktei o yal ti wasi matoha Iare ma rasakar ti iry ribun lan desy.
8 Ma iry ribun desikre raknam nini rbesur.
Lemade Yesuske wasi matoha Iare rili rahuk roty o masy ktera desikre,
desikeo kbyenw a kolakye itw.
9 Iry a maknam desikre aryaritke anakyai irkye ribunke enaat sir.
Dendye Yesuske yaso iry desikre ma rulak sir bai wenatare.
10 Ode iry desikre raba bonyo,
Yesuske yor wasi matoha Iare rsai aroke,
ma rbity lar ti ma rbai lasmyer Dalmanutake.
Iry manosy lui Farisike raten Yesuske ma yala nyatos masalsyalik iare
11 *Kyoat iry manosy lui Farisike dum a ratomolu Yesuske ma imai wen desy bonyo,
rma ma rait Yesuske ma rataur nunw ror I.
Ode rhury a I ma yala nyatos masalsyalik ike it ma ratos,
ma klyosu ohe I neke Hulasokwe Anan a I.
12 Kyoat Yesuske itomolu ma ratanuk koldyesy bonyo,
ralake kralake lema eras,
dendye tyanuk ma byohe,
“Kyanmwane taras neke raten ma kala nyatos masalsyalik ike it,
desikeo nenmo ratohak Yaw ne de?
Klwosu ti e ohe,
mlay bain o ti taras ne ana lema kala nyatos masalsyalik ike it elik.”
13 Lemade Yesuske yor wasi matoha Iare rtutuk iry desikre ti desy,
ode rsai aroke ma rbai tasi kakanke seridake.
Kete ttoha lui Farisi-nare wait ktela lema mlay nekre
14 Ode kyoat Yesuske yor wasi matoha Iare rbity lar ma raba bonyo,
wasi matoha Iare ramluak ma rety res,
de cuma mo rety rotkye sasasam bo.
15 *Lemade Yesuske tyanuk ti sir de byohe,
“Mijaga mamak e toha raja Herodes yor iry a Farisi-nare hinat ragike.”†
16 Lemade Yesuske wasi matoha Iare rrekan tun Yesuske itanuk desikre,
dendye it de tyanuk ti it ma rbohe,
“Yesuske tyanuk koldyesy,
kali tamluak ma lema tety roty ma kyoat.”
17 Ode Yesuske hye nam ratanukare,
lemade tyanuk ti sir ma byohe,
“Kyanmwane mitanuk ti ktela lema kika roty ne de?
Lema ktwanuk ti ktela kotw o abw ne!
Ei neke lenla mhye Yaw e?
Ode kyanmwane ralami kralanare ngkora kola hatkwe a nggora ne de?
18 *Ei neke mika matamy,
keskyede kyanmwane lema mimatakit ne de?
Ode ei neke mika molumy,
keskyede kyanmwane lema mitomolu ne de?
Ode kyanmwane lema minenas namke it elik ne de?
19 Dendye kena e ohe,
kyoat kubiny rotkye enasim ti irkye ribunke enasim ma rana desike,
kterake miwahuk mumu o kolakye enai kbyenw de?”
Desikeo wasi matoha Iare rhalas I ma rbohe,
“Kolakye hean a kresi enaru ne kbyenw.”
20 Maktei o Yesuske yena sir huruk de byohe,
“Ode kyoat kubiny rotkye itw ti irkye ribunke enaat rana desike,
kterake miwahuk mumu neke kolakye enai kbyenw de?”
Desikeo wasi matoha Iare rhalas I ma rbohe,
“Kolakye itw kbyenw.”
21 Lemade Yesuske tyanuk ti sir de byohe,
“Koldyesikemo kyanmwane mimtaut ohe,
krwekan ti ktela lema kika roty ne de?
Lema koldyesy.
De musti mo mhye nam nekre mumu ne kbuanare.”
Yesuske yala iry matmabolke ma myatakit ti hnu Betsaidake
22 Kyoat Yesuske yor wasi matoha Iare ranait hnu Betsaidake,
desikeo irire ror iry matmabolke it ti Yesuske,
ode ral ralat a kusunare bain-bain ma raten ma syaa sima ti iry desy ma bisa ma myatakit.
Markus 8:22-38
23 Lemade Yesuske kyumak iry matmabol desy simake,
ode yeuk i ma rbai hnu desike kserike.
Ode Yesuske iniw ti simake ma kyasa ti iry matmabol desike matake,
ode syaa sima ti iry desy,
maktei o yena i ma byohe,
“Mmwatakit nam dum deny e?”
24 Desike bonyo iry desike yatos ei lulkwe ode tyanuk ma byohe,
“Ou,
katos irire,
kali katos ma rlakut ti de rlakut ma,
keskyede rola ne aw mamdiry nekre ti kilakut ne.”
Yesuske yala iry a matmabolke ma myatakit (8:24)
25 Lemadendye Yesuske syaa sima ti iry desike matake huruk,
ma iry desike matake kdyelaf ma myatakit eras de,
ma yatos nam ribun nekre mumu.
26 Lemade Yesuske yaso iry desy ma yulak i bai wasi sekye,
ode tyanuk ti i de byohe,
“Mbwa,
keskye kete mosy hnuke kditlanke!”
Petrus you ohe Yesus neke Iry a Hulasokwe isusu ma ika Raja ode iaorif irkye ne
27 Kyoat Yesuske yor wasi matoha Iare rbai hnu mamin ti Kaisarea Filipike,
desikeo ti salke kralake Yesuske yena wasi matoha Iare ma byohe,
“Ktyoha irire mo esei ne Yaw ne de?”
28 *Lemadendye wasi matoha Iare rhalas I ma rbohe,
“Irire dum a rbohe,
Oi neke Yohanes Mababtiske.
Ode iry dum a rbohe,
Oi neke Elia O.
Ode iry dum a rtanuk huruk ma rbohe,
Oi neke iry a heitlulswo manety Hulasokwe wasi nyanoke it ne,
ma myorif huruk mane.”
29 *Lemade Yesuske yena sir huruk ma byohe,
“De ktyoha e mo,
esei ne Yaw ne de?”
Lemade Petrus hyalas ma byohe,
“Oi neke Mesias O!”†
30 Lemadendye Yesuske byu eta malkyakaw wasi matoha Iare,
ma kete rahes ti esei ta esei dakun ohe,
Yesus neke Mesias I.
Yesuske lyosu ohe masunkwe ana kdyan I ode rtabahunw a I
31 Lemadendye kyala kyosy sew desy,
desikeo Yesuske nenmo lyosu ti wasi matoha Iare ma yajar sir de byohe,
“Irkye Ananke† musti mo ana hyar masunkwe ribun.
Ode iry manety lulw ti Yahudi-nare,
ror iry mabaa klen ti irkye yor Hulasokwe,
neke wait usu khatunare,
ror a iry mahe snurat o tnyetak Musake dakun,
sir neke lema rou I.
Ode irire musti mo rtabahunw I.
Keskye ana sekwe enatelw bonyo,
myorif huruk.”
32 Ode kyoat Yesuske syisy hela nam ribun lan ne ti wasi matoha Iare bonyo,
Petrus kyumak Yesuske simake ma byity a I ma rei kserike,
ode tyerik I ma kete ihes ba de.
33 Keskye Yesuske yulak I ma syara wasi matoha Iare,
ode tyerik Petrus ma byohe,
“Ngkeskwaw o,
maditi lakhidik o toha ne!
Kali oi neke lema mrwekan nam Hulasokwe irekanke,
de mrwekan nam irkye irekanke kmyesan bo.”
34 *Dendye Yesuske yabuk iry ribun desikre mumu rtabal wasi matoha Iare ode tyanuk ti sir ma byohe,
“Kolnye esei desike byuma tyoha Yaw,
musti mo ibu a ituli tenanke ti sai ta sai bo,
ode hyar wasi tul masanwalw ike,†
ma tyoha Yaw.
35 *Kali esei desike byuma kyumak eta wasi mormyorifke ti lasmyerke khaha ne,
desikemo mormyorhyanke ti wen sra eraske ana kitayar.
Keskye esei desike yotuk wasi mormyorifke ba,
khyali Brit Eraske ma tyoha Yaw,
ode ires ma myaty khyali Yaw,
desikemo ana myorif ti wen sra eraske nini nam.
36 Mtyomolu!
Kolnye esei desike wasi malolkye lan,
ma ti kyal nuske ktem ne mumu,
keskye kolnye myaty ma lema byai wen sra eraske,
de Hulasokwe yotuk i bai mamaty rala,
desikemo wasi maloly desikre mumu ne kbuan sai ti i de?
37 Lema kika kbuan!
Kali lema bisa ma ral nam dum ma reluk mormyorif manal nini namke.
38 Ode kolnye esei desike myay ma you daku iry ribun mahatw lema matohak I ti selsel ne,
ohe hye Irkye Ananke,
ta myay ma you ohe hye tun a Irkye Ananke itanukare,
desikemo Irkye Ananke ana lema you ma hye iry desy dakun,
ti kyoat ima huruk ne.
Ode kyoat Irkye Ananke ima huruk ne,
ana myaa yor madelafke,
ode malkyakaw manosy Ama Hulasokwe,
ktyabal Hulasokwe wasi nyaso nelnyelire ma rosy laitke.”