Haret Hulasokwe ode Yahudi-nare wait ktela manosy ebnwo matrumatke
7
Sekwe it bonyo iry a manosy lui Farisike dum a ror iry a mahe snurat o tnyetak Musake dum,
neke rlakut a rosy a Yerusalem ma rma ma rkoal a Yesuske,
ma rbihy a I.
Markus 7:1-23
2 Kyoat desike iry desikre ratos Yesuske wasi matoha Iare dum ma raknam,
desikeo lema rut simatare aduk ma ktyoha ebnwo matrumat Yahudi-nare wait ktela kubkubakke.
3 Kali iry a manosy lui Farisi-nare,
ror iry a Yahudi salik nekre,
kolnye rala ma raknam,
desikeo musti mo rut a simatare aduk,
ma ktyoha ebnwo matrumat a wait ktela kubkubakke.
4 Ode kolnye ti rahwely o wen raketa nam tike,
ode rulak sir toha wen raketa nam tike,
desikeo lenla bisa ma raknam,
de musti mo rut a simatare ma nelnyely aduk.
Wait a ktela nekre rkumak malkyakaw kali kyosy a ebnwo matrumat.
Ode wait a ktela salik nekre ribun dakun,
ma musti mo rtoha.
Neke ktela raut wait taw o,
sru o mbinan o,
ur o werany,
ode nam salik raala toha soly nekre dakun.
5 Lemade iry manosy lui Farisi-nare ror iry a mahe snurat o tnyetak Musake rena Yesuske ma rbohe,
“Kyanmwane wasimw matoha Oare lema rtoha ktela ity ebnwo matrumat raalanare ne de?
Ma lema rut simatare aduk de,
raknam a ror simat maray nekre bony ne de?”
6 *Lemade Yesuske hyalas sir ma byohe,
“Hei iry a mlay bain o makakmet e!
Ei ne myola nam a Yesaya,
iry a heitlulswo manety Hulasokwe wasi nyano desy,
neke nam ikesy ti wasi kitabke.
Neke kyesy kolnye:
‘Bangsa neke lema ral ralat a kusunare ma Yaw,
de rleru Yaw kyor nunut a ktutunare bo.
7 Ode lema kika kbuan ti rasambayan ma Yaw ne,
kali nam raajar nekre irkye wasi haretke desy bo.’
8 Kali ei neke lema mtyoha Hulasokwe wasi haretke,
de mtyoha wasimy a ktela manosy irkye bo.”
9 Lemade Yesuske tyanuk huruk ma byohe,
“Ei neke mhye telke ma lema mhyaduli haret Hulasokwe,
kali mbyuma mtyoha ebnwo matrumamy wait a ktelanare bo.
10 *Kali kola Musa tyanuk de ma byohe,
‘Malan a enamw o amamw!’
Ode tyanuk huruk ma byohe,
‘Esei desike syoba ena o ama,
desikeo musti mo ral tnyetak matmyatkye ti i.’
11 Keskyede ei neke myajar ma mbyohe,
‘Eras ti kolnye irkye it a tyanuk ti ena ta ama ma byohe,
“Eno,
amo,
nam kusosan ma ana kunal ma kusaluk a e ne,
neke kal mumu ma kabar ti Hulasokwe de.”
’ Keskyede Hulasokwe lema dyakin ktela desy!
12 Kali nam miajar desike khyury ma irire lema rsaluk enat o amat ma desy.
13 Ode ktela miala desikre lema ktyoha Hulasokwe tunanare,
de ktyoha ebnwo matrumamy a nam raajar ti eare.
Ode nam miajar desikre,
ktyabal nam ribun salik miajar maoly desy dakun ne,
neke ne kihury ma irire lema ratoha Hulasokwe tunanare ne.”
14 Lemade Yesuske yabuk iry ribun desikre huruk,
ode tyanuk ti sir de byohe:
“Ei ne mumu ne mtyomolu mamak nam kutanuk ti e nekre,
ma mhye.
15 Neke kolnye!
Lema kika kotw o abw manosy a mloskye ma ksyukar ei irkye tenanke,
ma kyala iry desy ma iray.
De nam mabetik kyosy irkye tenanke ne,
nam desike ne kiala iry desy ma iray ne. [
16 Lemade esei desike ika molu desikemo musti mo tyomolu!”]
17 Kyoat Yesuske itun maktei bonyo,
tyutuk iry ribun desikre,
ode yor wasi matoha Iare rsukar ei sekye it,
desike bonyo wasi matoha I desikre rena I de rbohe,
“Tuanggurw,
tun muhliak desikre kbuanke kolkya?”
18 Dendye Yesuske hyalas sir ma byohe,
“Kyanmwane lenla mihe inahliak ne kbuanke ne de?
Lema mhye ohe kotw o abw sai ta sai ksyukar ei irkye tenanke,
desikemo lema bisa ma kyala iry desike ma iray.
19 Kali kotw o abw tana nekre lema ksyukar ei ity ralatare,
de ksyukar ei ity fteitare,
maktei o tadaik ba bo.”
Koldyesike mane Yesuske byohe lema kika kotw tasusi,
de ta kotw nekre mumu bo.
20 Lemade Yesuske tyanuk huruk ma byohe,
“Nam mabetik toha irkye ralake kralake ne,
nam desike ne kiaraik a i ne.
21 Kali nam atyat ribun lan ne kbyetik kyosy irkye ralake kralake,
dendye rrekan ti ktela atyatare,
ode rala ktela ayatare dakun,
neke:
ranamet,
rtabahunw iry,
wamfwetare ror wamwanire it de hyury a it koi-kay ma rala ktela atyatare,
22 rbilak lean sawatare ta lemamo laitare,
radakin nam,
rahatw,
rulak de rtalik iry,
rsoi ralat,
lema rmay rhe de rala ktela atyatare ma ktyoha wait dakdyakinare ti sai ta sai bo,
rahmway iry,
rbitil tenatare ma atat ma ratun bakbak,
ode usut a khatunare lan.
23 Dendye mnyenas,
ktela atyat desikre mumu ne kbyetik a kyosy irkye ralake kralake,
mane kiaraik irkye ne.”
Wamfwet a lema Yahudike tyohak ti Yesuske
24 Lemadendye Yesuske byetik toha wen desy,
ma byai lasmyer Tiruske.
Ode syukar ei sekye it,
kali lema byuma irire rhe I,
keskyede lema bisa ma ihunik a hye wasi mama ne,
kali ribun a rhe I de.
Markus 7:24-37
25 Keskye enenke it ma anan wamfwetke ngkeskwakwe syukar a i,
ma kyoat enen desike itomolu Yesuske ma ima bonyo,
lema ikita de mya elik ma syakitil ti Yesuske wasi lulululw ne.
26 Enen desike iry a lema Yahudike,
de yosy a lasmyer Fenisiake ti propinsi Siriake,
neke ral tel Yunanike.
Enen desike iten toha Yesuske ma yesak a ngkeskwakwe toha ananke.
27 Lemade Yesuske ihliak tunke ma tyanuk ti enen desy ma byohe,
“Oi ne lema Yahudi o,
dendye kolnye kswaluk o a kmuna,
neke† kola ne kal namanare hinat kotw ma kotuk ti asure ra ma desy.
De musti mo kal kotw ti namanare ma raknam a kmuna ma rbesur aduk,
desyo kteranare nenmo bisa ma kotuk ti asure ma ra.”
28 Keskye enen desike hyalas ma byohe,
“Ebo,
mlay!
Keskye asw nekre dakun o ra namanare hinat kotw ktera madi ei mejake hah ne.”
29 Lemade Yesuske tyanuk huruk ti enen desy ma byohe,
“Enen o,
tun mutanuk desike mlay.
Lemadendye mbwa,
kali ngkeskwakwe byetik toha anamkwe de.”
30 Kyoat a enen desike yulak i bai wasi sekye bonyo,
yatos ananke o yenaf ma tyebti ti otke,
kali ngkeskwakwe byetik toha i de.
Iry a mamolw ma kihury ma lema bisa ma itun ne neke Yesuske yala i ma tyomolu ode itun eras
31 Lemade Yesuske byetik toha lasmyer Tiruske,
neke yosy a nus Sidonke,
ma lyakut yosy lasmyer Dekapoliske,†
ma byai Tasi Kakan Galileake.
32 Ode ti desike dakun o,
irire dum a ror irkye it ti Yesuske.
Iry neke myolw ode nunuke ktem dakun.
Ode raten toha Yesuske ma syaa sima ti iry desy.
33 Lemade Yesuske yal iry desy,
ma deruke soso sir toha iry ribun desikre,
ma ti rmesan bo.
Ode ryoka tanake ti iry desike moluke,
maktei o iniw ti tanake ode yal tana desy ma yamas iry desike manke.
34 Maktei o Yesuske yatnyarak ei laitke,
ode myea o lema ktei,†
lemade yal tel Ibranike ma tyanuk de byohe,
“Efata!”
(Neke kbuanke o,
“Kimlakat.”)
35 Dendye iry desike eras i elik,
ma tyomolu.
Ode telake kbyetik dakun ma itun eras.
36 Lemade Yesuske byu eta iry ribun mamin ti desy,
ma kete rahes ktela iala nekre ti irkye it dakun.
Ode biar ma Yesuske byu eta ma kete rahes,
keskyede ktyabal ma iry desikre rahes ktela desikre ti kabei ta kabei bo.
37 Ode iry maseak ode matomolu Yesuske nam iala desikre mumu ne,
rheran a ksyalik,
ode it de tyanuk ti it ma rbohe,
“Yesuske nam iala nekre mumu ne eras,
kali iry lema matomoluke desikeo tyomolu,
ode iry a nunu ktemke desikeo itun eras elik.”