Yesuske lema ralan I ti wasi hnuke
6
Lemadendye Yesuske yor wasi matoha Iare rbetik toha Yairus wasi sekye ma rbai Nazaret,
neke Yesuske wasi hnu a lan I tike.
Markus 6:1-29
2 Ode kyoat sew Inamreske bonyo,
Yesuske yajar ti Yahudi-nare sey rasambayan tike.
Dendye iry ribun nekre rheran ti ratomolu I ne,
lemade rtanuk ma rbohe,
“Nam iajar nekre kyosy kabei de?
Ode esei ne inal hehei lulw o lyaw ne ti I ma iajar kolnye de?
Ode kyanmwane bisa ma yala ktela masalsyalik iare ne de?
3 De lema I neke ika tukan aw e?
Ma Maria anan a I e?
Ma wainare sir ne Yakobus,
Yoses,
Yudas ode Simon sir e?
Ma rahyetanare sir ne ranor a ity ti ne e?”
Lemadendye iry desikre ralatare ksunw,
dendye lema rou ma ral Yesuske.
4 *Lemade Yesuske tyanuk ti sir ma byohe,
“Iry manety Hulasokwe wasi nyanoke,
ralan i ti hnu kabei ta kabei bo,
klala wai o hatnima mamin ti wasi hnuke,
neke rmesan lema ralan a I!”
5 Ti desike dakun o Yesuske lema yala ktela masalsyalik ike it dakun,
kali iry desikre lema rtohak I.
De cuma mo syaa sima ti irire dum,
ode nyoha wait kbainare ma eras sir.
6a Ode Yesuske hyeran,
kali iry desikre lema rtohak I.
Yesuske yaso wasi matoha I dehean a kresi enaru desy ma ti rabrita nyano manosy Hulasokwe ode rnoha iry a klurukare wait kbainare ma eras sir
6b Maktei o Yesuske yor wasi matoha I dehean a kresi enaru desy rbetik rosy a hnu Nazaretke,
ode rlakut a rlola hnuare ma Yesuske yajar irire.
7 Lemadendye Yesuske iwahuk wasi matoha I dehean a kresi enaru desy.
Ode ihanun wasi matoha I desikre raru-raru ti sasam,
maktei o yal wasi haretke ti sir,
ma bisa ma resak ngkeskwaure.
8 *Ode yaso sir de byohe,
“Miba neke kete myety namit-namit,
neke kete myety a res,
ode kete myety a suhlwak,
ode kete myety a kuban dakun,
de myety a wasimy tektekanare bo.
9 Ode mbya o kete myety rabit ma kbyilak,
de rabit mamin ti tenamire,
ode dori mamin ti lwaumire bo.”
10 Maktei o Yesuske tyanuk ti sir huruk ma byohe,
“Kolnye myait a hnuke it,
ode irkye it a yal e ma mimin ti wasi sekye,
desikemo mimin ti sey desy nini mbyuma mbyetik toha hnu desy,
ma mbyai hnu salik.
11 *Keskye kolnye msyukar a hnuke it,
ode lema rou ma ral e ei wait seire,
ode lema rbuma rtomolu e dakun,
desikemo mbyetik toha hnu desy.
Keskye mryitik a ahkwe toha lwaumire ti desy aduk,
ma klyosu ohe Hulasokwe ana yukun hnu desy.”
Yesuske itanuk koldyesy ti sir maktei bonyo,
yaso sir ma rba.
12 Lemadendye wasi matoha dehean a kresi enaru desike rbai nus o hnu mamin ti desy ma ti rabrita ohe,
irire musti mo rtunik wait lim o sal ba.
13 *Ode sir dakun o resak a ngkeskwaure,
ode rkasa nulke ti iry a klurukare ma eras sir.
Yohanes Mababtiske rtabahunw a i
14 *Lemade Yesuske Anike kimelir ti kabei ta kabei bo,
ti ktela ribun iala nekre.
Ode raja Herodes Antipas tyomolu irire ma rbohe,
“Yesus neke Yohanes Mababtiske i ne,
ma myorif huruk toha mamatire de.
Dendye haret lan ne kimin i ma bisa ma yala ktela masalsyalik iare.”
15 Ode irire dum a rtanuk huruk ma rbohe,
“Yesus neke Elia!”
Ode irire dum dakun neke rtanuk ma rbohe,
“I neke,
iry a manety Hulasokwe wasi nyanoke,
kola iry a heitlulswo ranety Hulasokwe wasi nyanoare ne.”
16 Keskyede kyoat raja Herodes Antipas itomolu ktela desy bonyo,
tyanuk ma byohe,
“Nde!
De kete Yohanes Mababtis kola kuaso ma rasoby ohut telake i ne,
ma senwe myorif huruk mane!”
17-18 *Keskye lenla tun desike kdi ti bonyo,
raja Herodes neke yaso ma rkumak Yohanes,
ma rluk i ti sey metmetke kralake.
Yala koldyesy,
kali Herodes sawa Herodias ne kyeyer a Yohanes ne a ksyalik.
Herodias ne heit a raja Herodes wai Filipus ne sawa i.
Ode Herodias ne kyeyer a Yohanes,
kali kyaki-kyaki ne Yohanes tyerik raja Herodes,
ma byu eta i ma byohe,
“Ktela muala desike sal!
Kali Hulasokwe wasi tnyetak inal ti Musake kbyu eta ma kete tasaa tor ity waitare sawatare.”
19 Desike ne kihury ma Herodias yatil Yohanes,
ma yobak ma tyabahunw a i.
Keskye lema bisa ma tyabahunw a i,
20 kali raja Herodes neke ryiw a Yohanes,
kali hye ohe Yohanes neke iry a mlakye,
ode nelnyely a i.
Lemadendye byelat eta i.
Ode raja Herodes neke dyakin ma tyomolu Yohanes ma ihes tun.
Ode biar ma dyakin ma tyomolu Yohanes ma ihes tun,
keskyede tun itomolu desikre kyala ralake kralake ma lema ktyeka i.
21 Lemadendye Herodias itot klelanke it ti kyoat raja Herodes yala kalkal lan ne,
ti wasi sew radur hahak ike.
Ti sew desike raja Herodes yabuk wasi maka kmata lan nekre mumu,
ror usu khatu suldatare,
rtabal iry manety lulw ti Galilea nekre mumu dakun,
ma rmai wasi kalkal desy.
22 Ma kyoat a kalkal desike klyakut,
desikeo Herodias anan wamfwetke mya ma myenari ti kalkal desy.
Ode wasi menari desike kyala raja Herodes ralake ma ksyenan a ksyalik,
ktyabal maka kmata lan a raabuk ti kalkal desy ralatare ksyenan dakun.
Dendye raja Herodes tyanuk ti warar mur desy ma byohe,
“Kolnye mdwakin sai ma muten toha yaw,
desikeo ana kunal ti oke bo!”
23 Lemadendye raja Herodes ihatetak bain-bain ti warar mur desy ma byohe,
“Nam sai desike muten,
ana kal ti o.
Ma ti kyal wen kuhareta ti ne serit dakun,
ana kunal ti oke bo!”
24 Dendye warar desike byetik toha kalkal desy,
ode bya ti yena ena Herodias ma byohe,
“Eno,
musti mo kuten sai toha raja Herodes de?”
Lemade ena-na hyalas i ma byohe,
“Musti mo muten a Yohanes Mababtiske usuke khatuke.”
25 Lemadendye warar desike lyahlaha mirin ma yulak i ti tyanuk ti raja Herodes ma byohe,
“Amo,
jam ne dakun o kuten a Yohanes Mababtiske usuke khatuke,
ma mal ti mbinan helhelake,
ode mal ma yaw.”
26 Kyoat raja Herodes itomolu warar desy nam itenke bonyo,
ralake kitol a ksyalik.
Keskye lema bisa ma byity suka wasi hatetak desy de,
kali wasi mwakun desikre dakun o,
rtomolu wasi hatetak desy de.
27 Lemadendye raja Herodes yal haretke elik ti wasi suldat majakke it,
ma byai sey metmetke,
ti syoby ohut Yohanes Mababtiske telake.
28 Maktei o yal Yohanes usuke khatuke ti mbinan helhelake,
ode yety ma yal ti warar desy.
Ode warar desike yeta syaur ti ena Herodias.
29 Kyoat a Yohanes wasi matoha iare ratomolu ktela desy bonyo,
rma ma ral Yohanes tbunanke ma ti ramlin o ratkye.
Yesuske yal kotw ti irkye ribunke enasim ma ra
30 Ode kyoat a Yesuske wasi nyasoare rulak sir ma rawahuk sir a ror Yesuske,
desikeo rahes a ktela rakarya ode raajar nekre mumu ti Yesuske.
Markus 6:30-56
31 Keskye iry ribunke ti de ba de ma sir ti desy,
ma khyury ma Yesuske yor wasi nyaso dehean a kresi enaru desy,
lema bisa ma raknam o renw.
Dendye Yesuske tyanuk ti wasi nyaso desikre ma byohe,
“Mmya ma tbai wen kele ratelinke it,
ma tamin ti ma tmea tebikan aduk.”
32 Lemadendye Yesuske yor wasi nyaso desikre rsai aroke ma rbai wen a kele ratelinke it,
ma soso sir toha iry ribunke.
33 Keskyede kyoat raba bonyo,
iry ribunke ratos sir ode rhe wen raba tike.
Lemadendye iry mamin ti nus o lasmyer desy mumu ne,
rlakut a rlahamety ma rosy sal rake,
ma rmuna Yesuske yor wasi nyaso desikre bai wen kele ratelin desy.
34 *Ode kyoat a Yesuske rsara sir ti wen kele ratelin desy bonyo,
yatos o irire ribun sir a rawahuk sir ti wen desy de.
Lemadendye khyury ma Yesuske lyobak sir a ksyalik,
kali rola dene dombanare ti lema kika iry majaga sir ne.
Dendye Yesuske yajar ktela ribunke ti iry ribun desikre.
35 Ode kyoat sekwe yala ma idi bonyo,
Yesuske wasi matoha Iare rma ma rtanuk ti I ma rbohe,
“Tuanggurw O,
wen neke kele rtelin,
ode sekwe yala ma dyi mane.
36 Lemamo maso iry nekre ma rba,
ma bisa ma ti rliw a kotw o abw ti hnu maney nekre ma ra.”
37 Keskyede Yesuske hyalas wasi matoha Iare ma byohe,
“Lema!
Ei neke musti mo myal kotw ti iry nekre ma ra.”
Lemade rhalas Yesuske de rbohe,
“Kolkyabei ma bisa ma aramy mlyiw roty karyari ne,
ma aramy myal ti iry nekre mumu ma ra de?
Roty desikre khesike anakyai kubanke† atkwe enaru!”
38 Dendye Yesuske yena wasi matoha I desikre de byohe,
“Hinamy a rotkye enai desy de?
Myatos aduk!”
Kyoat ratos bonyo rlosu ti Yesuske ma rbohe,
“Rotkye enasim ode maskye enaru bony mane.”
39 Lemade Yesuske yaso iry desikre ma rtaklulw ma kukwan it kukwan it ti tnyei na khahanare.
40 Dendye iry desikre rtoha ma rtaklulw ma kukwan it kukwan it,
ma kukwanare dum a irkye rait atw,
ode kukwanare dum a irkye rait a hean-sim.
41 Kyoat iry ribun lan desikre rataklulw bonyo,
Yesuske yal roty desim desy,
ode masy deru desy,
ode yatnyarak ei laitke ma syalak eraske ba ti Hulasokwe ti khyali roty o masy desikre.
Maktei o byiny a roty o masy desikre,
ode yal ti wasi matoha Iare ma rasakar ti iry ribun lan desy.
42 Ma raktemtem mumu neke raknam nini rbesur.
43 Maktei o Yesuske wasi matoha Iare rili rahuk roty o masy ktera desikre,
desikeo kbyenw a kolakye hean a kresi enaru.
44 Iry a maknam mamin ti desikre mumu,
kolnye raki wamwanire rmesan bonyo,
irkye ribunke enasim sir.
Klala lenla raki wamfwetare ror namanare.
Yesuske lyakut ti tasike khahake
45 Kyoat raknam maktei bonyo,
Yesuske tyanuk elik ti wasi matoha Iare,
ma rmuna I bai hnu Betsaidake,
ti tasi kakanke seridake.
Lemade wasi matoha Iare roruk ma ti rsai aroke,
ma rbity lar ti ma rba.
Ode Yesuske yaso iry ribun desikre ma rulak sir bai wait a hnuare.
46 Kyoat iry desikre raba mumu bonyo,
Yesuske syai bai kususwanke ti syambayan.
47 Ode kyoat sekwe dyi ma kelerkok bonyo,
Yesuske wasi matoha Iare rait ei tasi kakanke kditlalan ne,
ode lenla Yesuske myesan imin ti rake bo.
48 Ode Yesuske yatos wasi matoha Iare,
ma lema rhaya ral wait aroke,
kali eskwe kyosy lulkwe.
Ode anakyai kyoban enatelkwe ti nyamo ne,
desikeo Yesuske lyakut ti tasike khahake,
ma bya sara sir ma yala ma myuna sir.
49 Kyoat wasi matoha Iare ratos Yesuske ma lyakut ti tasike khahake,
desikeo rakeni ohe,
watkwe kebuke it ne.
Dendye rboran,
50 kali raktemtem neke ratos I bonyo,
ramtaut ma ramlulurw.
Keskyede Yesuske tyanuk ti sir ma byohe,
“Hei mamwaw e!
Kete mimtaut!
Kali Yaw ne.”
Yesuske lyakut ti tasike khahake (6:50)
51 Lemade Yesuske syai ei wait aroke bonyo kele rteka eskwe mait.
Dendye wasi matoha Iare rheran a ksyalik ma lema rhe o rala sai.
52 Kali sir dakun o,
lenla rhe kbuanke ti ktela Yesuske inal rotkye enasim ode maskye enaru,
ti iry ribun lan ne ma rana desy.
Ode sir dakun o lenla rhe ohe Yesus neke esei ne bain,
kali ralat a kralanare ngkora a nggora.
Yesuske nyoha kbainare toha irire ti hnu Genesaretke
53 Kyoat Yesuske yor wasi matoha Iare rbai tasi kakanke seridake,
ma ranait namwata Genesaretke bonyo,
rbaly ti desy.
54 Ode kyoat raorw toha aroke bonyo,
iry ribunke ratos sir,
desikeo rhe Yesuske elik.
55 Dendye iry ribun desikre ra-la a robak hnu mamin ti desikre,
ma ti rlosu ti sir,
ma kolnye Yesuske byai hnu kabei desy,
desikeo irire ral wait iry isy masunure ti mbelukare ma ror sir ba ti Yesuske.
56 Ma kolnye Yesuske byai nus o hnu mamin ti lasmyer desy,
desikeo iry mamin ti nus o hnu desikre ror wait iry a isy masunure bai wait mleranare,
ma kolnye Yesuske lyakut yosy desy,
desikemo raten ma iry a isy masunw desikre rkambil wasi rabit narnarw desy kninike bo.
Dendye iry a isy masunw kabei desy kyambil Yesuske wasi rabit narnarw desy kninike,
desikeo wasi kbaike kitayar ma eras i elik.