Yesuske yesak ngkeskwaw ribunke toha iry Gerasake it
5
Lemade Yesuske yor wasi matoha Iare rsara sir ti tasi kakanke seridake,
neke iry Gerasa-nare wait lasmyerke.
Markus 5:1-20
2 Ode kyoat Yesuske nenmo yorw toha aroke,
desikeo wamwankye it ma ngkeskwaure rsukar i,
ma yosy a ratkye ma mya ma lyakut sara Yesuske.
3 Iry desike imin ti ratkye,
ma lema irkye it a bisa ma kyumak yal i elik,
biar ma ral ranteke ma rdalun i desyo lema bisa dakun.
4 Kali kyalamo irire ral ranteke ma rdalun sima o lwau,
keskyede byesak i ti de byesak i ma,
nini kele yohut rante ranal ma radalun i desy ma kiskyui kiskyay.
Ode irkye it a lema malkyakaw i ma,
bisa ma kyumak yal i elik.
5 Ode sewah o msarin neke lyakut ti de lyakut ma ti ratkye krala desy,
ode ti kususwanare dakun,
ma byoran ti de byoran ma bo.
Ode yal hatkwe ma yal ma tyutu tenan ne nini kimnu a kimlarit.
Iry a ngkeskwaure rasukar i desike ila sara Yesuske (5:5)
6 Ode kyoat iatos Yesuske ma sososo a I ne bonyo,
ila ma ti yait Yesuske ma syakitil ti Yesuske wasi lulululw ne.
7-8 Lemade Yesuske tyanuk ti iry desike ma byohe,
“Hei ngkeskwaw o,
mbwetik toha iry ne!”
Dendye iry desike telake lan ma tyanuk de byohe,
“Yesus Hulasow Lan Lahukke Anan O,
mrweky sai ma yaw ne de?
Kuten ma muhwab ti Hulasokwe ma ana lema muhdawan yaw,
ma isikkwe ksunw!”
9 Maktei o Yesuske yena iry desy ma byohe,
“Animw ka?”
Desikeo iry desike hyalas ma byohe,
“Anikw a Legion ande,
kali ribun aramy!Ӡ
10 Lemade ngkeskwaw desikre raten mirmirmirin toha Yesuske,
ma kete Yesuske yaso sir ma rbetik toha lasmyer desy.
11 Ode ti soke dakun o hahire ribun a sir a ksyalik,
ma moluk a raobak kotut ti kususwanke kserike.
12 Lemade ngkeskwaw desikre raten bain-bain toha Yesuske ma rbohe,
“Kolnye mesak aramy tyoha iry ne,
desikemo mlwura aramy ma ti msyukar ei hahy sokre.”
13 Dendye Yesuske you tyoha tun ratanuk desy.
Lemadendye ngkeskwaw desikre rbetik toha iry desy,
ode ti rsukar ei hahkye kmeta desy.
Ma hahkye kmeta desike anakyai ribunke enaru sir,
neke ra-la roruk ma ti rnusuk toha iskye ksouke ei tasi kakanke ma rlodur,
ode renw tasi ma rmaty.
14 Lemade iry majaga hahy desikre ratos a ktela desy bonyo,
ra-la toha wen desy,
ma rba ti rahes ktela desy ti iry mamin ti nus o hnu kabei ta kabei ti lasmyer Gerasa desy.
Dendye iry ribun lan desikre ratomolu brit desy bonyo,
rbetik rosy wait nus o hnu desikre ma rbai wen desy,
ti ratos ktela madi ti desy.
15 Ode kyoat iry desikre rma ma rait a Yesuske bonyo,
ratos o iry a ngkeskwaure rasukar i desike eras i de.
Ma hye toha lbweta de,
ode hyonak a i de,
ma tyaklulw.
Lemade iry desikre raatos a ktela desike bonyo ramtaut.
16 Ode iry a maatos a kmuna ktela desike elik neke,
rahes ti iry a nenmo mamaare,
ti ktela madi ti iry a ngkeskwaure rasukar i desy.
Ode rahes a ktela madi ti hahkye kmeta desy ti sir dakun.
17 Lemadendye iry desikre ralkyaw sir ma raten toha Yesuske ma byetik toha wait lasmyer desy.
18 Ode kyoat Yesuske syai ei aroke huruk bonyo,
iry a ngkeskwaure rabetik toha i desike iten ma tyoha Yesuske.
19 Keskyede Yesuske lema you,
de tyanuk ti iry desy ma byohe,
“Mulak a o bai wasimw sekye,
ode muhes ti sekye kralake ror iry mamin ti wasimw a hnuke dakun,
ti kolkyabei mane Hulasokwe ilobak a o ne,
ode ti kolkyabei mane iala ktela nekre mumu ti o ne.”
20 Lemade iry desike bya,
ode yabrita ktela Yesuske iala ti i nekre mumu,
ti iry mamin ti lasmyer Dekapoliske.†
Ode iry a matomolu ktela ihes desikre,
sir mumu ne rheran a ksyalik.
Yesuske yala Yairus ananke ma myorif ode nyoha kbaike toha wamfwetke it ma eras a i
21 Lemade Yesuske yor wasi matoha Iare rbity lar ti ma rulak sir bai tasi kakanke seridake.
Ode kyoat Yesuske yorw toha aroke ma imdiry ti laranke khahake bonyo,
iry ribunke lui-lui sir ma rma ma rkoal a I.
Markus 5:21-43
22 Ode irkye it ma ani Yairus ma mya dakun.
Yairus neke ika usu khatu ti Yahudi-nare sey rasambayan tike.
Ode kyoat iatos Yesuske bonyo,
bya ti syakitil ti Yesuske lwau-na ktutunare,
23 ma yal ralake kusuke bain-bain,
ma iten toha Yesuske ma byohe,
“Tuanggurw!
Anakw wamfwetke kluruk a i,
ma nenma myaty.
Lemade kuten toha O,
ma mbwai wasikw sekye ti mswaa simamkwe ti anakkwe ma eras i,
ma kete myaty.”
24 Lemade Yesuske yor Yairus ma rbai Yairus wasi sekye.
Keskye iry ribunke lui-lui sir ma rtoha Yesuske,
ma it de dyekin it,
ma robak ma rney a Yesuske.
25 Ti iry ribun desikre dakun o wamfwetke it ma kbai larke khatu maskyakye kyala i ainke hean a kresi enaru de,
26 ma dokterare raeluk-raeluk sir ma rnoha wasi kbai desy,
keskye lema kika iry a manoha kyal wasi kbai desy.
Ode biar ma yal wasi malolkye mumu ti dokter desikre nini ktei,
keskyede lema kika kbuan,
de wasi kbaike ktyabal a ktyabal ma mdedan toha.
27 Ode wamfwet desike tyomolu Yesuske nam ialanare de,
dendye biar ma irire ribun sir,
keskyede wamfwet desike isia ia yosy a lyakwe ma ti nyey a Yesuske,
ma kyambil mait wasi rabit narnarkwe.
28 Kali wamfwet desike ryekan ti ralake ma byohe,
“Biar ma kkwambil mait Yesuske wasi rabit narnarkwe bo,
desikeo ana wasikw a kbaike kitayar ma eras yaw elik.”
29 Lemade kyoat wamfwet desike yalkyaw i ma isia i ti iry ribun desikre ma ikambil Yesuske wasi rabit narnarkwe bonyo,
kyoman o wasi kbai desike kitayar elik.
30 Ode kyoat desike dakun o Yesuske hye elik ohe,
amalkyauke kbyetik kyosy tenanke.
Dendye yulak i sara iry ribun desikre,
ode yena sir ma byohe,
“Esei ne ikambil wasikw rabitke ne de?”
31 Keskye wasi matoha Iare rhalas I ma rbohe,
“Tuanggurw!
Matos,
iry ribun lan neke radekin ma robak ma rney a O,
ode kyanmwane muena o esei ne ikambil wasimw rabitke ne de?”
32 Lemade Yesuske yulak I ma yatos iry desikre mumu,
ma yobak ma hye o esei ne iala ktela desike ne.
33 Lemade wamfwet desike hye o Yesuske hye ktela iala desy,
dendye imtaut ma huake kyamlulurw.†
Lemade lyakut ti syakitil ti Yesuske wasi lulululw ne.
Ode yal ralake kusuke bain-bain ma ihes nam madi ti i ne mumu ti Yesuske,
mane kihury ma ikambil Yesuske wasi rabitke ne.
34 Lemadendye Yesuske tyanuk ti wamfwet desy ma byohe,
“Eno,
Hulasokwe nyoha wasimw kbaike ma eras a o de,
khyali wasimw tohtohakke.
Dendye mbwaa mor inaka eras manosy Hulasokwe,
kali wasimw kbaike eras de.”
35 Malmata Yesuske itun a yor wamfwet desy,
desikeo irire dum a rosy Yairus wasi sekye,
ma rma ma rtanuk ti Yairus de rbohe,
“Amo,
anamkwe myaty de.
Dendye kete mhwury ma tuanggurkwe byai wasimw sekye de.”
36 Keskyede Yesuske itomolu tun ratanuk desike bonyo,
lema hyaduli,
de tyanuk ti Yairus ma byohe,
“Kete mumtaut,
de mtwohak bo.
Anamkwe ana myorif.”
37 Dendye Yesuske byu eta ma kete irkye it a tyoha I,
de cuma mo tyanuk ti Petrus,
ode Yakobus yor wai Yohanes,
ma ror Yesuske de raktem a rba bo.
38 Kyoat ranait Yairus wasi sekye bonyo,
Yesuske yatos o irire ribun sir,
ma serser nanyay a sir ode telatare lan ma ralola-ratanuk ti desy.
39 Ode kyoat Yesuske syukar ei Yairus wasi sekye kralake bonyo,
tyanuk ti iry desikre ma byohe,
“Kyanmwane serser nanyay e ne de?
Naman ne lema myaty,
de yenaf bo!”
40 Keskyede kyoat iry desikre ratomolu Yesuske nam itanuk desy bonyo ramahis.
Lemade Yesuske byu ti iry desikre mumu ma rbetik ei mloskye.
Ode tyanuk ti naman desike ena-na yor ama,
ode wasi matoha I detelw desy,
ma raktem a rsukar ei naman desike wasi kamarke.
41 Ode Yesuske kyumak naman desike simake,
ode yal naman desike wait telke ma tyanuk de byohe,
“Talita kum,”
neke kbuanke o,
“Akasy,
mbwatar!”
Yesuske kyumak naman mamaty desike simake ma naman desike myorif huruk (5:41)