Yesuske ihliak tunke ti iry makay hinkye
4
*Sekwe it bonyo,
Yesuske yajar ti namwata Tasi Kakan Galileake,
desikeo iry ribunke rma ma rkoal a I.
Lemade bya ti syai aro mabalkye it ma tyaklulw ti khahake.
Ode iry ribun desikre ramdiry ti tasi kakanke kseri desy.
Markus 4:1-20
2 Dendye Yesuske yajar ktela ribun nekre kyor tun inahliakare ti iry ribun desikre.
Ode kyoat iajar desy,
desikeo tyanuk ti iry desikre ma byohe,
3 “Mtyomolu!
Iry manoha boke it a bya ti kyay a hina hinkye ti wasi boke.
4 Ma kyoat ikay hiny desy bonyo,
hiny desike tebikan a kdi ti sal mamin ti boke krala desy,
ma manunare rorw ma ra ma ktei.
5 Ode hiny desike tebikan a kdi ti lasmyer maniniaske,
ma hatkwe kimin ti lasmyer desike kletike.
Hiny madi ti lasmyer maninias desike samlurw o ktyuhw.
6 Keskyede kyoat sekwe ibetik bonyo,
hiny matuhw desike kmyalas,
kali kawanare lema kbya demdemw.
7 Ode hiny desike tebikan a kdi ti sitw o karkyary krala,
ma ktyuhw,
keskye lema kisi,
kali sitw o karkyary desikre klyean a kyor hiny desy,
ma kyah a hiny desy ma lema kisi.
8 Ode hiny desike tebikan a kdi ti lasmyer maiskye,
ma ktyuhw ma kisi.
Kyoat kisi bonyo,
kusunare ratsam neke dum a kisinare hean-telw kbyilak,
dum a kisinare hean-nem a kbyilak,
ode dum a kisinare atw kbyilak dakun.”
9 Kyoat Yesuske ihes tun inahliak desy maktei bonyo,
tyanuk ti sir ma byohe,
“Esei desike ika molu,
desikemo musti mo tyomolu!”
Yesuske lyosu ohe kyanmwane inal tun inahliakke kolnye iajar iry ribunke
10 Kyoat a rlaw ma iry ribun desikre raba ma Yesuske imesan bonyo,
iry matoha Iare dum a ror wasi matoha I dehean a kresi enaru desy,
rena I ti tun inahliak desike kbuanke.
11 Dendye Yesuske hyalas sir ma byohe,
“Ana klwosu ti e,
kali ei neke Hulasokwe lyura e ma mhye nam mahunik i ti irkye,
ti kolkyabei ma Hulasokwe ihareta kola Rajake ne.
Klala ti iry ribunke,
kajar sir a kyor tun inahliakare bo,
12 * ma
‘Biar ma ratos manenen dakun,
keskyede lema rhe kbuanare.
Ode biar ma rtomolu elik,
keskye lema rhe kbuanare dakun.
Kali kolnye ratos ode rhe kbuanare,
desikeo ana rulak sir ma Hulasokwe syos wait lim o sal ba.’ ”
Yesuske yaklol rakay hinkye ne kbuanare
13 Lemade Yesuske tyanuk ti sir ma byohe,
“De lema mhye tun inahliak ne kbuanke e?
Kolnye lema mhye tun inahliak ne kbuanke,
desikemo kolkyabei ma ana bisa ma mhye tun inahliak salik nekre mumu ne kbuanare de?
14 Dendye mtyomolu!
Iry makay a hiny desike,
neke kbuanke o iry a maabrita Hulasokwe tunanare.
Ode hiny desike Hulasokwe tunanare desy.
15 Ode hiny madi ti salke krala mamin ti bo desy,
kola dene iry a matomolu Hulasokwe tuna rabrita ti sir desy,
keskye ngkeskwaure wait uskwe khatuke mya ma yal elik Hulasokwe tuna desikre toha sir.
16 Ode hiny a madi ti hatw khahanare,
desike kbuanke o,
iry matomolu Hulasokwe tunanare ma rtohak kyor ralat mamukmuka iare.
17 Keskye lema raneti ral wait tohtohakke,
ode lema rsosan Hulasokwe tuna desikre ti ralat a kralanare.
Dendye kolnye masunkwe kdyan sir,
ta roban de rtaba sir khyali Hulasokwe tuna desikre,
desikeo ra-la toha wait tohtohak desy elik,
ma lema rtohak Yesuske de.
18 Ode hiny madi ti sitw o karkyary krala ne,
neke kbuanke o iry a matomolu Hulasokwe tunanare.
19 Keskyede ralatare kakan ti ktelanare ribun.
Ode rbuma raka wait maloly ma ribun,
ode rdakin ktela ribun salno salik mamin ti nuske ktem ne dakun.
Dendye ktela desikre mumu neke,
ne kisekan Hulasokwe tunanare toha ralat a kralanare,
dendye Hulasokwe tuna desikre lema kika kbuan ti sir,
kola ne hiny desike ma lema ktyuhw ma kisi kali sitw o karkyary kyah.
20 Keskyede hiny madi ti lasmyer maiskye,
neke kbuanke o iry a matomolu Hulasokwe tunanare ode rtohak,
ma rsosan ti ralat a kralanare.
Ode ramorif ne rala ktela erasare kmyesan,
ma ktyoha Hulasokwe tuna desikre.
Iry desikre rola dene hiny a maisy ma kisinare ribun ne,
ma dum a kisinare hean telw kbyilak,
ode dum a kisinare hean-nem a kbyilak,
ode dum a kisinare atw kbyilak dakun.”
Yesuske ihliak tunke ti ktela damarke ode lalwakwe
21 *Lemade Yesuske tyanuk ma byohe,
“Lema irkye it a tyunw damarke,
ode yal ti lkuskye kralake ma kyahat eta,
ta lemamo yal ti rintyotake ma kitina i.
De musti mo yal ei kwena atatke ma kdyelaf a sekye kralake.
Markus 4:21-41
22 *Kali nam Hulasokwe iala ma kibuny nekre,
ana yala ma kbyetik mumu.
Ode rekryeky a Hulasokwe ihunik nekre,
ana irire mumu ne bisa ma rhe.
23 Lemadendye esei desy ika molu,
desikemo musti mo tyomolu.”
24 *Ode Yesuske tyanuk huruk ma byohe,
“Mryekan mamak nam mitomolu nekre!
Kali lalwaw minal ma milaw ti irire ne,
ana Hulasokwe yal ma lyaw ti e dakun.
Ode lema desy bo,
de ana lyaw o tyabal ma kbyilak ti e dakun.
25 * Kali esei desike,
syosan mamak tun kutanukare ma hye,
desikeo Hulasokwe tyabal hehe desy ti i ma kbyilak.
Klala esei desike tyomolu ode lema syosan mamak tun kutanukare,
biar ma ryekan o hye tunakure de,
keskyede ana Hulasokwe yal a yolik hehe desy toha i.”
Yesuske ihliak tunke ti hiny a matuhkwe
26 Dendye Yesuske tyanuk huruk ma byohe,
“Hulasokwe ihareta kola Rajake,
neke kola iry a manoha boke ti itan hinkye ti wasi boke ne.
27 Lemade sewahare bonyo iry desike yenaf,
ode msarinare o byatar ma yal karyake.
Klala hiny desike kmyesan a ktyuhw,
ode kmyesan a klyean ma lan.
Keskye iry desike lema hye o,
nam sai ne kiala hiny desike ma kituhw ma lan ne.
28 De cuma mo lasmyer neke kmyesan a kyala ma ktyuhw,
maktei o kisitw ma ksitunare ribun,
ode kihun ma kisi.
29 *Ode kolnye kyait sekwe ma kisinare knyor de,
desikeo boke kebu desike,
mya ma yal elik kisi desikre.”
Yesuske ihliak tunke ti lasyeke khatuke
30 Maktei o Yesuske tyanuk huruk ma byohe,
“Ana kal sai ma kulalau kyor Hulasokwe ima ma ihareta kola Rajake ne de?
Dete lemamo kal tun inahliak sai ma kuhliak de?”
31 Dendye Yesuske tyanuk ma byohe,
“Hulasokwe ima ma ihareta kola Rajake ne,
neke kuhliak ti lasyeke khatu rakay ti lasmyerke ne.
Lasyeke khatu neke kakakan bain ti hiny nekre mumu ti nuske ktem ne.
32 Keskyede kolnye tkay lasyeke khatu desy ti boke ma ktyuhw ma lan,
ma kbyilak nam matuhw ida nekre mumu,
ode kisan ma ksananare lan,
ma khyury ma manunare raka nukat ti,
ma ramin ti.”
33 Koldyesike mane Yesuske yal inahliak ribun maoly desikre,
ma yal ma yajar iry ribun desikre,
ma ktyoha wait hehe rarekanare kinaitare bo.
34 Dendye sew kyaki ne Yesuske yajar iry ribunke kyor tun inahliakare.
Klala kolnye Yesuske yor wasi matoha Iare ma rmesan,
desikeo nenmo yaklol tun inahliak desikre kbuanare mumu ti sir.
Yesuske tyenauk esumetkye
35 Ode ti sew desike dakun o sekwe yala ma dyi,
desikeo Yesuske tyanuk ti wasi matoha I dehean a kresi enaru desy ma byohe,
“Mmya ma tsai aroke ma tbity lar ti ma tbai tasi kakanke serida so.”
36 Lemade wasi matoha Iare rtutuk iry ribun desikre ti desy,
ode rew ba ti rsai aro Yesuske itaklulw ti desy,
ma rbity larke ti ma rba.
Desikeo aroare dum a rbity lar ma rtoha sir dakun.
37 Ode kyala mait bonyo,
eskwe mety ksyalik ode besanare lan,
ma tasike ksyukar ei aroke kralake ma nenma rlodur.
38 Kyoat desy dakun o Yesuske malmata yenaf ti aroke lyakwe,
ode lyun a lunlunke ma tyebti.
Lemade wasi matoha Iare roha I ma rbohe,
“Tuanggurw O!
Tala ma tmaty mane,
lema mhwaduli ity e?”
39 Lemade Yesuske byatar,
ode tyerik esw desy,
ode tyenauk besa atat desikre ma byohe,
“Mamwaw o!”
Yesuske tyenauk besa atatare (4:39)
Desike bonyo kele rtenauk esw desy,
ode besanare ti tasi kakan desike kele rteka ma mlin a mlin.
40 Lemade Yesuske tyanuk ti wasi matoha Iare ma byohe,
“Kyanmwane mimtaut ne de?
Ode kyanmwane lenla mitohak Yaw ne de?”
41 Lemade wasi matoha I desikre ramtaut a ksyalik,
ode it de tyanuk ti it ma rbohe,
“Iry neke esei bain de?
Mane inal haretke ti esw o besa nekre,
desikeo kele rateka mait ne de!”